Sant Marc 10 - Lis Evangèli 1903 (Provençal)

CHAPITRE DESEN

L'indissoulubleta dóu mariage. — Jèsu benesis lis enfantoun. — Un jouvènt forço riche. Lou centuple e l'eterno vido. — Nouvello anóuncio de la Passioun. — La demando di fiéu de Zebediéu. — L'avugle de Jericò.

¹ Jèsu, partènt d'aqui, venguè sus li counfigno de Judèio, de la man dela dóu Jourdan. E s'acampè mai de moulounado de gènt à soun entour, em' acò éu, coume à l'acoustumado, tourna-mai lis endóutrinavo.

² Alor s'avancèron d'éu, li Farisen, e ié demandèron: Es-ti permés à l'ome d'enmanda sa mouié. — Èro pèr lou prouva.

³ Mai éu ié respoundeguè: Dequé vous a ourdouna Mouïse?

⁴ Éli diguèron: Mouïse a permés d'escriéure un ate de divorci e d'enmanda pièi la mouié.

⁵ Jèsu ié rebriquè: Es pèr l'encauso de la dureta de voste cor que vous escriguè aquelo ourdounanço.

⁶ Mai au coumençamen de la creacioun, Diéu li faguè mascle e femèu.

⁷ Amor d'acò, l'ome quitara soun paire e sa maire, e s'estacara à sa mouié;

⁸ E saran dous en uno car. Ansin soun plus dous, mai uno souleto car.

⁹ Adounc ço que Diéu a joun ensèn, que l'ome noun lou dessepare.

¹⁰ Uno fes à l'oustau, si disciple lou questiounèron mai sus acò-d'aqui.

¹¹ E ié diguè: Qu enmando sa mouié e n'espouso uno autro, fai un adultèri à respèt de la proumiero.

¹² E se 'no femo quito soun ome e se marido em' un autre, fai peréu un adultèri.

¹³ Ié presentèron alor d'enfantoun sus l'estiganço que li touquèsse. Mai li disciple rambaiavon aquéli que li presentavon.

¹⁴ De li vèire ansin faire, Jèsu se n'endignè e ié diguè: Leissas l'enfantuegno veni vers iéu, e li rebufessias pas, que lou reiaume de Diéu es à-n-aquéli que ié sèmblon.

¹⁵ Veramen vous lou dise, qu noun reçaupra lou reiaume de Diéu coume un enfant, i'intrara pas.

¹⁶ Em'acò lis embrassant e pausant li man sus éli, éu li benesissié.

¹⁷ Coume se boutavo en camin, n'i'aguè un que vers éu courreguè e, plegant lou geinoui, lou pregavo ansin: Bon Mèstre, dequ'ai à faire pèr avera la vido eternalo?

¹⁸ Jèsu ié diguè: Perqué m'apelles bon? De bon i'a rèn que Diéu.

¹⁹ Counèisses li coumandamen: Faras ges d'adultèri; noun tuaras; noun raubaras; faus testimòni noun diras; ounouro toun paire e ta maire.

²⁰ Aquest ié respoundeguè: Mèstre, tout acò-d'aqui l'ai óusserva desempièi moun jouvènt.

²¹ Jèsu, l'aguènt aluca, l'afeciounè e ié diguè: I'a 'no causo que te manco: vai; tout ço qu'as vènde-lou e baio-lou i paure, qu'auras un tresor dins lou cèu; vène pièi e seguisse-me.

²² Mai éu, tout tristas d'aquelo paraulo, s'enanè 'mé la lagno: avié proun viéure, dóumaci.

²³ Alor Jèsu, espinchant à soun entour, diguè à si disciple: Coume es difìcile à-n-aquéli qu'an d'argènt d'intra dins lou reiaume de Diéu!

²⁴ Li disciple istavon espanta de si paraulo. Mai Jèsu ié tournè à dire: Mi pichounet, coume i'es dificile à-n-aquéli que bouton sa fe dins l'argènt d'intra dins lou reiaume de Diéu!

²⁵ Es mai facile à-n-un camèu de passa pèr lou trau d'uno aguïo qu'à-n-un riche d'intra dins lou reiaume de Diéu.

²⁶ N'en fuguèron encaro mai estouna, e se venien dis un is autre: E quau pòu dounc èstre sauva?

²⁷ Jèsu, lis alucant, diguè: Pèr lis ome acò 's impoussible, mai noun pèr Diéu, car tout es poussible à Diéu.

²⁸ Alor Pèire se boutè à ié dire: Lou vesès, nautre avèn tout quita e vous avèn segui.

²⁹ Ié respoundeguè Jèsu: Veramen vous lou dise, degun quitara, pèr iéu e pèr l'Evangèli, soun oustau, o si fraire, o si sorre, o soun paire, o sa maire, o sis enfant, o si terro,

³⁰ Que noun reçaupe aro-aro, en aquest siècle, cènt fes autant, d'oustau, de fraire, de sorre, de maire, d'enfant e de terro, emé de persecucioun, e dins lou siècle avenidou, la vido eternalo.

³¹ Mai n'i'a de bèu que, de proumié, devendran li darrié; e di darrié, forço que saran li proumié.

³² Or, èron en routo que mountavon à Jerusalèn; Jèsu ié caminavo davans, e tóuti èron espanta e lou seguissien emé cregnènço. Eu prenènt tourna-mai li Douge à despart, se boutè à ié dire ço qu'arribarié pèr éu.

³³ Veici que mountan à Jerusalèn, e lou Fiéu de l'ome sara cita davans li prince di prèire, lis Escribo e lis Ancian; éli lou coundanaran à mort e l'abandounaran i Gentiéu:

³⁴ E l'escarniran, e i'escupiran contro, e lou flagelaran e lou tuaran; mal au jour tresen, éu ressuscitara.

³⁵ Alor Jaque e Jan, li fiéu de Zebediéu, s'avancèron d'éu, en disènt: Mèstre, voudrian que faguessias pèr nautre tout ço que vous demandaren.

³⁶ Éu ié venguè: Que voulès que fague pèr vautre?

³⁷ Ié diguèron: Acourdas-nous d'èstre asseta, l'un à vosto drecho, l'autre à vosto gaucho, dins vosto glòri.

³⁸ Mai Jèsu ié respoundeguè: Sabès pas ço que demandas. — Poudès lou béure lou calice que dève béure iéu, e èstre bateja dóu batisme que sarai bateja?

³⁹ Éli faguèron: Lou poudèn. Mai Jèsu ié diguè; O, lou calice que béurai, lou béurés, e dóu batisme que sarai bateja iéu, sarés bateja;

⁴⁰ Mai de sèire à ma drecho o à ma gaucho, depènd pas de iéu de vous l'acourda à vautre, mai à-n-aquéli pèr quau es alesti.

⁴¹ Li dès, en ausènt acò, aguèron la maliço contro Jaque e Jan.

⁴² Mai Jèsu li sounè e ié diguè: Sabès qu'aquéli que regardon coume li mèstre di nacioun an sus éli lou segnourage, e que si prince an poudé sus éli.

⁴³ Acò 's pa 'nsin entre vautre; mai aquéu que voudra èstre lou mai grand, sara voste serviciau;

⁴⁴ E quau voudra èstre lou proumié d'entre vautre, sara de tóuti lou servènt.

⁴⁵ Car lou Fiéu de l'ome éu-meme noun es vengu sus l'estiganço d'èstre servi, mai de servi e de douna sa vido pèr la rançoun dóu mounde.

⁴⁶ Venguèron pièi à Jericò; e, coume partie de Jericò emé si disciple e tout un mouloun de pople, lou fiéu de Timiéu, Bartimiéu l'avugle èro asseta sus la ribo dóu camin, que demandavo l'óumorno.

⁴⁷ Entre saché qu'èro Jèsu de Nazarèt, se boutè à crida e à dire: Jèsu, fiéu de Dàvi, agués pieta de iéu.

⁴⁸ E i'avié forço gènt que lou charpavon pèr lou faire teisa. Mai éu cridavo que mai: Fiéu de Dàvi, agués pieta de iéu.

⁴⁹ Alor Jèsu, s'aplantant, coumandè que lou faguèsson veni. E sounèron l'avugle en ié disènt: Bon courage! lèvo-te, que te sono.

⁵⁰ Aquest jitè soun mantèu e d'un saut venguè vers Jèsu.

⁵¹ E Jèsu, prenènt la paraulo, ié diguè: Dequé vos que te fague? L'avugle ié respoundeguè: Rabboni, que ié vegue.

⁵² Jèsu ié venguè: Vai, que t'a fe t'a sauva. E subran éu ié veguè, e seguissié Jèsu sus lou camin.