Sant Lu 3 - Lis Evangèli 1903 (Provençal)

CHAPITRE TRESEN

Aparicioun e predicanço de Jan-Batìsto. — Lou bouton en presoun. — Batisme de Jèsu. — Sa genealougìo.

¹ L'an quinge dóu règne de Tibèri Cesar, estènt Pons Pilato gouvernour de Judèio, estènt tetrarco de Galilèio, Erode, e Felip soun fraire tetrarco de l'Iturèio emai de la Tracounito, e Lisanias tetrarco d'Abileno.

² Dóu tèms di grand-prèire Ano e Caïfo, faguè lou Segnour ausi sa voues à Jan, fiéu de Zacarìo, dins lou desert.

³ E venguè dins touto l'encountrado dóu Jourdan, predicant lou batisme de penitènci, pèr la remessioun di pecat.

⁴ Coume es escri au libre di sermoun d'Isaìo lou proufèto. Voues d'aquéu que clamo dins lou desert: Alestissès la draio dóu Segnour, fasès dre si carreiroun.

⁵ Touto vau, l'aturaran; touto mountagno, touto colo, l'abasaran, e se chanjaran li draio en drechiero, e li raboutudo en camin clot.

⁶ Em' acò touto car veira lou salut de Diéu.

⁷ Disié dounc i foulo, que venien se faire bateja de si man: Raço de vipèro, quau vous a aprés à fugi davans la coulèro avenidouiro?

⁸ Fasès dounc de fru digne de penitènci, e anés pas dire: Pèr paire avèn Abram. Car vous afourtisse qu'es proun fort Diéu, pèr d'aquéli clapo faire sourti de fiéu d'Abram.

⁹ Es que, deja la destrau es messo à la racino de l'aubre. Tout aubre dounc que fai pas de bon fru, lou couparan e lou jitaran au fiò.

¹⁰ E li foulo lou questiounavon en disènt: Adounc dequé faren?

¹¹ E ié respoundié coume eiçò: Quau a dos tunico, que n'en baie uno à-n-aquéu que n'es sènso; e quau a pèr manja, que parteje peréu.

¹² Venguè tambèn de publican que voulien èstre bateja e ié diguèron: Mèstre, dequé faren?

¹³ E ié diguè: Demandés rèn de mai que ço que vous es ourdouna.

¹⁴ Lou questiounavon tambèn li sóudard; disènt: E dequé faren, nautre? E ié diguè: Brutalejés degun, ni-mai fagués ges de fraudo, e countènt fugués de vosto pago.

¹⁵ Pamens s'imaginavo lou pople, e tóuti dintre éli se pensavon que Jan èro belèu lou Crist.

¹⁶ Em'acò Jan prenguè la paraulo e diguè en tóuti: Iéu, vès, vous bateje dins l'aigo; mai n'en vendra un mai fort que iéu, que siéu pas digne de desnousa li courrejoun de si soulié. Éu vous batejara dins lou Sant-Esperit e dins lou fiò.

¹⁷ Tèn soun drai à la man e netejara soun iero; e acampara lou blad dins soun òrri, mai la paio, éu la brulara dins un fiò inamoussable.

¹⁸ Ansin, em' aquéli noumbróusis eisour-tacioun, e bèn d'autro encaro, evangelisavo lou pople.

¹⁹ Mai Erode lou tetrarco, coume Jan lou charpavo raport à-n-Eroudiado, mouié de soun fraire, e raport à tóuti li malafacho qu'avié coumesso,

²⁰ Erode i' apoundeguè 'ncaro aquesto d'embarra Jan en presoun.

²¹ Or, vous trouvarés, d'enterin que batejavon tout lou pople, Jèsu estènt peréu bateja e pregadis, se durbiguè lou cèu;

²² E davalè sus éu lou Sant-Esperit, souto uno formo sensiblo, coume uno couloumbo. E dóu cèu uno voues s'ausiguè: Tu siés moun Fiéu bèn-ama; en tu iéu me coungouste.

²³ Or, Jèsu, quouro coumencè, avié peraqui trento an, e lou prenien pèr lou fiéu de Jóusè, qu'éu lou fuguè d'Eli, que lou fuguè de Matat,

²⁴ Que lou luguè de Levi, que lou fuguè de Mènqui, que lou fuguè de Janiéu, que lou fuguè de Jóusè,

²⁵ Que lou fuguè de Matatias, que lou fuguè d'Amos, que lou fuguè de Nahum, que lou fuguè d'Esli, que lou fuguè de Nage,

²⁶ Que lou fuguè de Mahat, que lou fuguè de Matatias, que lou fuguè de Semèi, que lou fuguè de Jóusè, que lou fuguè de Juda,

²⁷ Que lou fuguè de Jouan, que lou fuguè de Resa, que lou fuguè de Zouroubabèu, que lou fuguè de Salatiéu, que lou fuguè de Nèri,

²⁸ Que lou fuguè de Mèuqui, que lou fuguè d'Addi, que lou fuguè de Cousan, que lou fuguè d'Elmadan, que lou fuguè de Her.

²⁹ Que lou fuguè de Juese, que lou fuguè d'Eliezèr, que lou fuguè de Jourim, que lou fuguè de Matat, que lou fuguè de Levi,

³⁰ Que lou fuguè de Simeoun, que lou fuguè de Juda, que lou fuguè de Jóusè, que lou fuguè de Jounas, que lou fuguè d'Eliakim,

³¹ Que lou fuguè de Melea, que lou fuguè de Menno, que lou fuguè de Matata, que lou fuguè de Natan, que lou fuguè de Dàvi,

³² Que lou fuguè de Jessè, que lou fuguè d'Oubèd, que lou fuguè de Booz, que lou fuguè de Saumoun, que lou fuguè de Nassoun,

³³ Que lou fuguè d'Aminadab, que lou fuguè d'Aram, que lou fuguè d'Esroun, que lou fuguè de Farès, que lou fuguè de Juda,

³⁴ Que lou fuguè de Jacob, que lou fuguè d'Isa, que lou fuguè d'Abram, que lou fuguè de Tarè, que lou fuguè de Nacor,

³⁵ Que lou fuguè de Sarug, que lou fuguè de Ragau, que lou fuguè de Faleg, que lou fuguè d'Ebèr, que lou fuguè de Salè,

³⁶ Que lou fuguè de Caïnan, que lou fuguè d'Arfassad, que lou fuguè de Sem, que lou fuguè de Nouè, que lou fuguè de Lamec,

³⁷ Que lou fuguè de Matiéu-Salè, que lou fuguè d'Enoc, que lou fuguè de Jared, que lou fuguè de Malaleèl, que lou fuguè de Caïnan,

³⁸ Que lou fuguè d'Enos, que lou fuguè de Sèt, que lou fuguè d'Adam, qu' éu lou fuguè de Diéu.