Sant Lu 16 - Lis Evangèli 1903 (Provençal)

CHAPITRE SEGEN

Parabolo dóu baile degaié. — Degun pòu servi dous mèstre. — Li jujamen de Diéu soun autre qu'aquéli dis ome. — Indissoulubleta dóu mariage. — Lou marrit riche e lou paure Lazàri.

¹ Jèsu disié peréu à si disciple: Un catau se trouvavo d'avé 'n baile, que lou venguèron acusa de ié degaia soun viéure.

² Lou mandè querre e ié faguè: Dequé m'an di de tu? rènde-me comte de ta beilié; partènt d'aro, dóumaci, pourras plus beileja.

³ Alor lou baile dintre éu se pensè: Que farai, aro que moun mèstre me lèvo de baile? Fouire, lou pode pas; mendica, me fai vergougno.

⁴ Sabe dequé farai pèr se 'n-cop m'auran leva lou gouvèr, trouva d'oustau que m'aculi-gon.

⁵ Aguènt dounc fa veni à-de-rèng li debitour de soun mèstre, diguè au proumié: Quant ié dèves à moun mèstre?

⁶ Aquest venguè: Cènt barriéu d'òli. Lou baile ié diguè: Reprene toun papié, assèto-te lèu e marco-n'en cinquanto.

⁷ Venguè pièi à-n-un autre: E tu, quant dèves? Aquéu diguè: Cènt cargo de blad. Éu ié respoundeguè: Reprene ta biheto, e marco-n'en vuetanto.

⁸ Lou mèstre lausè lou baile catiéu qu'avié prudentamen agi: es que li fiéu dóu siècle soun mai avisa dins sis afaire que li fiéu de la lumiero.

⁹ E iéu vous dise à vautre: Fasès-vous d'ami emé li richesso cativo, pèr que vous reçaupon éli, quouro sarés au bout, dins lis etèrni tabernacle.

¹⁰ Quau es fidèu dins li méndri causo, estam-bèn fidèu dins li grando; e quau dins li méndri causo es injuste, tambèn dins li grando éu l'es.

¹¹ Adounc se noun sias esta fidèu dins li richesso injusto, quau vous fisara li veritablo?

¹² E se noun sias esta fidèu dins ço qu'es dis autre, quau vous dounara ço qu'es vostre?

¹³ Res pòu servi dous mèstre: car n'aura un en òdi e l'autre en afecioun, o bèn s'estacara à l'un e mespresara l'autre. Poudès pas servi Diéu e Manmoun.

¹⁴ Or, li Farisen, qu'acò'ro d'avare, escoutavon tóuti aquéli causo e se trufavon d'éu.

¹⁵ E ié diguè: Vautre, cercas de faire vòsti juste davans lis ome; mai Diéu counèis vòsti cor: car ço que pèr lis ome es grand es uno abouminacioun davans Diéu.

¹⁶ La Lèi e li Proufèto an dura enjusquo à Jan; desempièi, lou reiaume de Diéu es anouncia, e cadun se forço pèr i'intra.

¹⁷ Es mai eisa que lou cèu e la terro passon, qu'uno souleto letro toumbe de la lèi.

¹⁸ Quau enmando sa mouié e n'espouso uno autro, fai un adultèri; e quau espouso aquelo que soun ome a 'nmandado, fai un adultèri.

¹⁹ I'avié 'n richas, qu'èro abiha de pourpro e de lin, e que taulejavo tóuti li jour magnificamen.

²⁰ I'avié tambèn un pauras, nouma Lazàri, qu'èro coucha davans sa porto, tout plen de mau,

²¹ Barbelant de se ressacia di brenigo que toumbavon de la taulo dóu riche, e res n'i'en dounavo; mai li chin venien, e lipavon si plago.

²² Or, se capito que lou paure mouriguè, e lou pourtèron, lis ange, dins lou sen d'Abram. Mouriguè tambèn lou riche, e fuguè 'nseveli dins l'infèr.

²³ E aussant lis uei, d'enterin qu'èro dins li suplice, veguè Abram de liuen, emé Lazàri dins soun sen.

²⁴ En bramant, éu diguè: Paire Abram, agués pieta de iéu, e mandas Lazàri, que sausse lou bout de soun det dins l'aigo, pèr me refresca la lengo, dóumaci reboulisse dins aquesto flamado.

²⁵ Mai ié diguè Abram: Moun fiéu, ensou-vène-te qu'as agu ta part de bèn en ta vido, e Lazàri peréu sa part de mau; or, à l'ouro d'aro, es dins lou soulas, éu, e tu dins lou reboulimen.

²⁶ De mai, i'a entre nautre e vautre un grand garagai establi pèr de bon; de maniero qu'aquéli que voudrien d'eiçamount passa vers vautre, o d'eilavau passa eici, lou podon pas.

²⁷ Lou riche diguè: Au-mens, paire, vous n'en prègue, mandas-lou à l'oustau de moun paire, —

²⁸ Ai cinq fraire, dóumaci — pèr que lis avertigue d'acò, e noun vèngon, éli tambèn, dins aquest infernas.

²⁹ E ié venguè Abram: An Mouïse e li Proufèto; que lis escouton.

³⁰ Mai éu restoublè: Nàni, paire Abram; mai se quaucun di mort li vai trouva, faran penitènci.

³¹ Abram ié diguè: S'escouton ni Mouïse ni li Proufèto, un di mort aurié bèu reveni, éli creiran pas.