Sant Lu 14 - Lis Evangèli 1903 (Provençal)

CHAPITRE QUATOURGEN

Garisoun d'un ome boufre. — Uno leiçoun d'umileta e de carita. — La parabolo di counvida que fan de refus. — Qualila di veritàbli disciple.

¹ Se rescontro que Jèsu intrè dins l'oustau d'un di principau Farisen, un jour de sabat, pèr ié manja 'n moussèu; em'acò éli lou tenien d'à ment.

² Or, veici qu'un ome boufre se capitavo davans éu.

³ E, prenènt la paraulo, Jèsu diguè i Dóutour de la lèi em' i Farisen: Es-ti permés de gari lou jour dóu sabat?

⁴ Mai éli restèron mut. Em'acò éu, prenènt aquel ome pèr la man, lou gariguè e l'enmandè.

⁵ E tourna-mai s'adreissant à-n-éli ié diguè: Qu d'entre vautre, se soun ase o soun biòu toumbo dins un pous, noun lou davero lèu-lèu, meme un jour sabat?

⁶ E poudien rèn ié respondre à-n-acò-d'aqui.

⁷ S'adreissè pièi i counvida, e de li vèire coume chausissien li proumié sèti, ié diguè en parabolo:

⁸ Quouro te counvidon en de noço, noun t'entaules à, la proumiero plaço, cregnènço qu'un de mai ounourable que tu siegue de counvit;

⁹ Em'acò vèngue l'oste, que touti dous vous a counvida, e te digue: Douno la plaço à-n-aquest; e alor faudra que vagues, emé la vergougno, te teni au darrié rèng.

¹⁰ Mai, quouro te fan uno counvidacioun, vai-ié e bouto-te lou bèu darrié de tóuti, per que, se 'n-cop vendra toun counvidaire, éu te digue: Moun bon, mounto plus aut. E alor saras englouria davans touto la taulado.

¹¹ Dóumaci qu s'enausso l'abeissaran, e qu s'abaisso l'enaussaran.

¹² Diguè peréu à-n-aquéu que l'avié counvida. Quouro fas un dina o 'n soupa, sones pas tis ami nimai ti fraire, nimai ti parènt, nimai ti vesin que soun riche, cregnènço que t'enviton éli peréu, e qu'acò te siegue un rendut.

¹³ Mai quouro fas un festin, sono li paure, lis estroupia, li goi e lis avugle;

¹⁴ E benurous saras, qu' an pas pèr te lou rèndre, car te sara rendu à la resurreicioun di juste.

¹⁵ Entre avé ausi aquéli paraulo, un di taulejaire ié diguè: Benurous aquéu que manjara de pan dins lou reiaume de Diéu!

¹⁶ Alor Jèsu ié venguè: Un ome faguè 'no grando soupado, e ié counvidè abord de mounde.

¹⁷ E mandè soun varlet, à l'ouro de la soupado, pèr dire i counvida de veni, que tout èro lèst.

¹⁸ Em'acò tóuti coumencèron de cerca d'escuso. Lou proumié ié diguè: Ai croumpa 'no bastido, e necessarimen fau que la vague vèire; te n'en prègue, fai-me 'scuso.

¹⁹ Lou segound diguè: Ai croumpa cinq couble de biòu, e vau lis assaja; te n'en prègue, fai-me 'scuso.

²⁰ Un autre diguè: Me siéu acampa 'no femo, e ansin pode pas i'ana.

²¹ E, de retour, lou varlet rapourtè 'içò à soun mèstre. Alor lou paire de famiho, en coulèro, diguè à soun varlet: Vai-t'en lèu sus li plaço e dins li carriero de la vilo; e li paure e lis endeca, e lis avugle e li goi, fai-lèi intra eici.

²² E diguè lou varlet: Mèstre, s'es fa coume avès di, mai i'a 'ncaro de plaço.

²³ E diguè lou mèstre au varlet: Vai-t'en dins li camin e de-long di baragno, e forço lou mounde d'intra, que moun oustau siegue plen.

²⁴ Car, vous lou dise, pas-un d'aquéli qu'èron esta counvida, tastara de ma soupado.

²⁵ Or, de moulounado de pople marchavon emé Jèsu; e se virant vers éli, éu ié diguè:

²⁶ Se quaucun vèn vers iéu, e noun ahis soun paire e sa maire, e sa mouié e sis enfant, e si fraire e si sorre, e meme sa propro vido, pòu pas èstre moun disciple.

²⁷ E qu noun porto sa crous e noun me seguis, pòu pas èstre moun disciple.

²⁸ Dóumaci, quau es aquéu de vautre qu'en voulènt basti uno tourre, noun s'assèto proumié pèr faire lou comte di despènso que soun necessàri, e vèire s' a de que l'acaba;

²⁹ Cregnènço qu'après avé bouta li foundamento, éu noun posque l'acaba, e que tóuti aquéli que veiran acò coumençon de se trufa d'éu,

³⁰ En disènt: Aquel ome s'es mes à basti e n'a pas pouscu acaba?

³¹ O bèn quau es lou rèi, à mand de leva guerro contro un autre rèi, que noun s'assèto proumié pèr eisamina se pòu, emé dès milo ome, marcha contro aquéu qu'emé vint milo s'avanço sus éu?

³² Se lou pòu pas, d'enterin que l'autre rèi es encaro liuen, éu ié mando uno embassado, e ié parlo de faire la pas.

³³ Ansin dounc, aquéu de vautre que noun renóuncio à tout ço qu' a, pòu pas èstre moun disciple.

³⁴ Es bono la sau; mai se la sau s'esvano, emé que la salaran?

³⁵ Noun sièr plus ni pèr la terro, ni pèr lou femié; mai la jitaran deforo. Quau a d'auriho pèr entèndre, qu'entènde.