Sant Lu 12 - Lis Evangèli 1903 (Provençal)

CHAPITRE DOUGEN

Lou levame di Farisen. — N'avé temour que de Diéu. — Blasfème contro lou Sant-Esperit. — S'avisa de l'avariço e di van pensamen. — Vigilànci au service de Diéu. — Li signe di tèms.

¹ Or, de moulounado de pople s'estènt acampado à l'entour de Jèsu, bèn tant que li gènt ié marchavon dessus, éu se boutè à dire à si disciple: Avisas-vous dóu levame di Farisen, qu'acò 's l'ipoucrisìo.

² Noun i'a rèn de secrèt que noun siegue descata, ni rèn d'escoundu que noun se sache.

³ Car ço que dises dins l'escuresino, lou diran en plen jour; e ço que vous sias di à l'auriho dins la chambro, lou predicaran sus la téulisso.

⁴ Vous dise dounc à vàutri, mis ami: Agués pas pòu d'aquéli que tuon lou cors, em'acò pièi podon rèn mai.

⁵ Mai vous vau aprene quau avès de cregne: cregnès aquéu qu'uno fes vous avé leva la vido, a lou poudé de vous cabussa dins la dano. O, vous lou dise, aquéu-d'aqui, cregnès-lou.

⁶ Cinq passeroun, es que se vèndon pas dous as? e pas-un d'éli n'es óublida davans Diéu.

⁷ Jusquo li péu de vosto tèsto soun tóuti coumta. Adounc cregnegués rèn; valès bèn mai que la passerounaio, vautre.

⁸ Or, vous lou dise: Quau me counfessara davans lis ome, tambèn lou Fiéu de l'ome lou counfessara davans lis ange de Diéu.

⁹ Mai aquéu que m'aura renega davans lis ome, sara renega davans lis ange de Diéu.

¹⁰ Quau que siegue qu'aura di uno paraulo contro lou Fiéu de l'ome, acò ié sara remés; mai aquéu qu'aura blasfema contro lou Sant-Esperit, noun ié saras remés.

¹¹ Quouro vous menaran dins li sinagogo, davans li magistrat e lis autourita, vous metegués pas en peno de que maniero o de ço que respoundrés, nimai de ço que dirés;

¹² Car lou Sant-Esperit vous ensignara, sus lou moumen, ço que vous faudra dire.

¹³ Alor n'i'aguè un dins lou pople que ié faguè: Mèstre, digas à moun fraire de parteja 'me iéu l'eiretage.

¹⁴ Mai Jèsu ié venguè: Ome, quau m'a 'stabli juge e partejaire entre vautre?

¹⁵ Pièi ié diguè: Vès, avisas-vous de touto avariço; dóumaci un ome a bello èstre dins la drudiero, sa vido noun depènd di bèn que pòu avé.

¹⁶ Em'acò diguè à la foulo aquesto parabolo: I'avié 'n richas que sa terro carguè de fru en abounde.

¹⁷ Em'acò se pensavo dintre éu, disènt: Dequé farai, qu'ai pas pèr rejougne mi fru?

¹⁸ E diguè: Veici ço que farai: demoulirai mis òrri, e de plus grand n'en bastirai, e i'amoulounarai tóuti mi póusito e tóuti mi bèn,

¹⁹ E dirai à moun amo: Moun amo, as de viéure tant-que, pèr de lònguis annado; pauso-te, manjo, béu, fai bono vido.

²⁰ Mai Diéu ié diguè: Foulas, aquesto niue, te van redemanda toun amo; e ço qu'as acampa, de quau sara?

²¹ Ansin n'es d'aquéu que pèr éu acampo, e qu'es pas riche pèr Diéu.

²² Diguè pièi à si disciple: Amor d'acò vous dise: Fugués pas en pensamen pèr vosto vido, de ço que manjarés; nimai pèr voste cors, de coume vous abiharés.

²³ La vido es mai que la nourrituro, e lou cors mai que lou vièsti.

²⁴ Vesès un pau li courpatas: ni semenon ni meissounon; an ni estivo ni òrri; pamens Diéu lis apasturo. E de quant valès mai qu'éli!

²⁵ Quau de vautre, emé si pensamen, pòu apoundre à sa taio uno couidado?

²⁶ Adounc se poudès pas meme la mendro di causo, perqué vous soucita dis autro?

²⁷ Ousservas lis ile coume crèisson: ni travaion, ni fielon; pamens, vous lou dise, Salamoun éu-meme dins touto sa glòri noun èro abiha coume l'un d'éli.

²⁸ Adounc, se l'erbo que vuei es pèr champ, e que sara deman jitado au four, Diéu la vestis d'aquéu biais, de quant mai vous-àutri, gènt de pau de fe?

²⁹ Ansin vautre, noun vous metegués en cerco de ço que manjarés o de ço que béurés, e noun vous enaurés en tant de pensamen.

³⁰ Car es li gènt dóu mounde que soun en aio pèr aquéli causo; mai voste Paire saup que n'avès besoun.

³¹ Adounc cercas proumié lou reiaume de Diéu e sa justiço, e tóuti aquéli causo vous vendran pèr dessus.

³² Agués pas pòu, pichot troupèu, que i'a fa gau à voste Paire de vous douna lou reiaume.

³³ Vendès ço qu'es vostre e chabissès-lou en óumorno. Fasès vous de bourso que noun se gausigon, un tresor dins lou cèu que noun s'abene jamai, que lou larroun noun ié vèngue contro e que lis arno pourrigon pas.

³⁴ Dóumaci ounte i'a voste tresor, aqui i'aura voste cor.

³⁵ Que siegon vòsti loumb encentura; e li lume atuba dins vòsti man.

³⁶ E vautre, fugués coume aquéli gènt qu'espèron que soun mèstre revèngue di noço, pèr, se 'n-cop tournara e turtara, ié durbi autant-lèu.

³⁷ Benurous aquéli serviciau qu'entre arriba, lou mèstre trouvara revihadis! Veramen vous lou dise, éu se cenchara, li fara metre à taulo e à-de-rèng li servira.

³⁸ E se vèn à la segoundo vèio e s'es à la tresenco vèio que vèn, em'acò li trove ansin, benurous soun aquéli serviciau!

³⁹ Or, sachés eiçò: Se couneissié, lou paire de famiho, à queto ouro lou larroun a de veni, viharié osco seguro, e noun leissarié trauca soun oustau.

⁴⁰ Adounc, vàutri tambèn, fugués lèst, dóumaci à l'ouro que noun ié pensas, lou Fiéu de l'ome vendra.

⁴¹ Alor Pèire ié diguè: Segnour, es pèr nautre que disès aquelo parabolo, o bèn pèr tóuti?

⁴² E respoundeguè lou Segnour: Quau es, à toun estimo, lou baile fidèu e avisa, que soun mèstre l'a 'stabli sus si gènt pèr au tèms vougu douna 'n cadun sa mesuro de blad?

⁴³ Benurous aquéu baile que, tre arriba, soun mèstre lou trouvara 'nsin à soun obro.

⁴⁴ Veramen vous lou dise, éu sus tóuti si bèn l'establira.

⁴⁵ Mai s' aquéu baile se dis entre éu: Tardo bèn, moun mèstre, de veni! e que se boute à pica li varlet emai li servicialo, à manja, à chima, à s'empega,

⁴⁶ Vendra lou mèstre d'aquéu baile, dins lou jour que se i'espèro pas, e à l'ouro que n'en saup rèn; em'acò lou separara, e lou boutara 'mé li gènt sènso fe.

⁴⁷ Pèr quant au varlet qu'en estènt au courrènt de la voulounta de soun mèstre, s'es pas tengu lèst, nimai a pas fa coume voulié lou mèstre, ié dounaran l'espóussado dur;

⁴⁸ Mai aquéu que noun èro au courrènt e qu'a fa de causo que i'ameriton d'èstre batu, reçaupra 'no espóussado bèn mendro. En quau s'es douna forço, se demandara forço; e 'n quau s'es forço fisa de causo, reclamaran mai de comte.

⁴⁹ Siéu vengu jita lou fiò sus la terro, e dequé vole senoun que s'atube?

⁵⁰ Ai d'èstre bateja d'un batisme; e coume acò me prèsso que s'acoumpligue!

⁵¹ Es que vous pensas que siéu vengu adurre la pas sus la terro? Nàni, vous dise, mai la divisioun.

⁵² Car, partènt d'aro, saran cinq dins un meme oustau, de divisa: tres contro dous, e dous contro tres.

⁵³ Saran divisa: lou paire contro lou fiéu, e lou fiéu contro soun paire, la maire contro la fiho e la fiho contro la maire, la sogro contro sa noro e la noro contro sa sogro.

⁵⁴ Disié peréu au pople: Quouro vesès un nivo s'auboura dóu tremount, tout-d'un-tèms disès: La plueio es aqui; e se devino ansin.

⁵⁵ E quouro vesès que boufo lou miejour, disès: Fara caud; e manco pas.

⁵⁶ Ipoucrito, sabès ço que chamo l'aspèt dóu cèu e de la terro; e lou tèms ounte sias, d'ounte vèn que noun lou couneissès?

⁵⁷ D'ounte vèn peréu que noun destrias, de voste sicap, ço qu'es juste?

⁵⁸ Quouro vas emé toun aversàri davans lou magistrat, en camin boulego-te pèr sourti d'afaire em'éu, cregnènço que te tirasse vers lou juge, e que lou juge t'abandoune au justicié, e que lou justicié te jite en presoun.

⁵⁹ Te lou dise, noun sourtiras d'aqui que noun agues paga fin-qu'à la darriero dardèno.