Sant Lu 11 - Lis Evangèli 1903 (Provençal)

CHAPITRE VOUNGEN

De que maniero se dèu prega. — Blasfème di Farisen. — Lou fort arma. — Jounas, la Rèino dóu Miejour, li Ninivito. — Jèsu remouco l'ipoucrisìo di Farisen e dis Escribo.

¹ Un jour, coume èro en un rode que pregavo, quouro aguè fini, un de si disciple ié diguè: Segnour, ensignas-nous à prega, coume l'ensignè Jan peréu à si disciple.

² E ié diguè: Quouro pregas, digas: Paire, santifica siegue voste noum. Que voste règne avèngue.

³ Dounas-nous vuei noste pan de cade jour,

⁴ E remetès-nous nòsti pecat, estènt que, nàutri peréu, remetèn en quau nous dèu. E noun nous adugués en tentacioun.

⁵ Ié diguè mai: Se quaucun de vautre a un ami, e que vague vers éu au mitan de la niue, em'acò ié digue: Moun bèu, presto-me tres pan,

⁶ Qu'un ami miéu m'arribo de vouiage, e n'ai rèn pèr ié bouta davans;

⁷ E se d'en-dedins l'autre respond: Vengues pas me secuta, que la porto es deja clavado, e li pichot emai iéu sian au lié; noun pode me leva pèr te servi;

⁸ Se pamens lou proumié countùnio de tabassa, vous lou dise, emai noun se levèsse pèr n'i'en douna, sufis qu'es soun ami, dins acò, sufis que lou secuto, éu se levara e n'i'en dounara autant que n'a de besoun.

⁹ E tambèn iéu vous dise: Demandas, e vous dounaran; cercas e trouvarés; picas e vous durbiran.

¹⁰ Dóumaci quau demando, reçaup; e quau cerco, trovo; e à quau pico, se durbira.

¹¹ Se quaucun de vautre demando de pan à soun paire, aquest-d'eici es que ié dounara 'n caiau? O, se ié demando de pèis, es que liogo de pèis, ié dounara 'no serp?

¹² O bèn se ié demando un iòu, es que ié pourgira 'n escourpioun?

¹³ Adounc se vàutri, marrit que sias, sabès douna de bòni causo à vòstis enfant, de quant voste Paire d'eilamount dounara l'Esperit bon à-n-aquéli que ié demandon?

¹⁴ Un jour, Jèsu couchavo un demòni, e aquéu demòni èro mut. Quouro aguè coucha lou demòni, lou mut parlè, e la foulo fuguè dins l'amiracioun.

¹⁵ Mai s'en trouvè quàuquis-un que diguèron: Es au nom de Belzebut, prince di demòni, qu'éu foro-bandis li demòni.

¹⁶ E d'autre, pèr lou tenta, ié demandavon un signe celèste.

¹⁷ Mai éu, devistant sa pensado d'éli, ié diguè: Tout reiaume contro éu-meme divisa, sara en perdicioun, e l'oustau toumbara sus l'oustau.

¹⁸ Adounc, se Satan es contro éu-meme divisa, soun reiaume coume tendra, d'abord qu'es pèr Belzebut, disès, qu'embandisse li demòni?

¹⁹ Mai se iéu es au noum de Belzebut, que bandisse foro li demòni, au noum de quau voste fiéu li foro-bandisson? Amor d'acò, éli-meme saran vòsti juge.

²⁰ Au contro, s'es pèr lou det de Diéu que couche li demòni, de tout segur es vengu vers vautre lou reiaume de Diéu.

²¹ Quand lou fort arma gardo soun oustau, tout soun dequé es à la sousto.

²² Mai se subran un plus fort qu'éu ié toumbo subre e lou lucho, ié levara sis armo que tant ié coumtavo dessus, e chabira si despueio.

²³ Quau noun es emé iéu, m'es contro; e quau emé iéu noun acampo, escampiho.

²⁴ Quand l'esperit inmounde a sourti d'un ome, trèvo li rode secarous, en bousco de repaus; mai, n'en trouvant ges, éu dis: Tournarai dins moun oustau, que n'ai sourti.

²⁵ Em'acò, i'estènt vengu, lou trovo escouba mai que bèn e tout adourna.

²⁶ Alor s'envai e s'ajoun sèt àutris esperit, mai marrit qu'éu; e coume soun intra, ié rèston; e la fin d'aquel ome es au pire de sa coumençanço.

²⁷ Or, s'anè trouva, coume disié 'cò, qu'uno femo se boutè à crida dóu mitan de la foulo, e diguè: Benurous lou vèntre que vous a pourta, e li mamello qu'avès tetado!

²⁸ Mai éu respoundeguè: Benurous pulèu aquéli qu'escouton la paraulo de Diéu e l'ousservon.

²⁹ De moulounado de pople, pamens, landavon à soun entour, e se boutè à ié dire: Aquesto generacioun es uno generacioun cativo; elo, demando un signe, e de signe n'i'en sara ges douna d'autre que lou signe dóu proufèto Jounas.

³⁰ Dóumaci, coume Jounas fuguè 'n signe pèr li Ninivito, ansin sara lou Fiéu de l'ome pèr aquesto generacioun.

³¹ La rèino dóu Miejour s'aubourara au jujamen contro lis ome d'aquesto generacioun e li coundanara; car venguè dóu fin founs de la terro pèr ausi la sapiènci de Salamoun: e veici que i'a mai que Salamoun eici!

³² Li Ninivito s'aubouraran au jujamen contro aquesto generacioun, e la coundanaran; car faguèron penitènci à la predicacioun de Jounas: e veici que i'a mai que Jounas eici!

³³ Res atubo uno làmpi pèr la bouta dins l'escoundedou, o souto la panau; mai sus un candelié, pèr que li gènt en intrant vegon de lume;

³⁴ La làmpi de toun cors es toun uei. Se toun uei es simple, tout toun cors sara luminous; mai s'es catiéu, toun cors tambèn sara sourneirous.

³⁵ Aviso-te dounc que la lumiero qu'as en tu noun siegue uno sourniero.

³⁶ Adounc se tout toun cors luminejo, emé pas un rode qu'iste sourne, tout sara luminous, e sara coume uno làmpi de clarta que te fara lume.

³⁷ Dins lou tèms que parlavo, un Farisen lou preguè de veni dina 'méu. Estènt dounc intra, s'entaulè.

³⁸ Or, lou Farisen, fasènt dintre éu si refleissioun, coumencè de se dire: Coume vai que noun s'es lava avans dina?

³⁹ Mai lou Segnour ié diguè: Vous-àutri, li Farisen, netejas lou deforo dóu got e de l'escudello; mai ço qu'avès au dintre de vautre es clafi de rapino e d'iniqueta.

⁴⁰ Estùrti, aquéu qu'a fa lou deforo, es qu'a pas fa peréu lou dedins?

⁴¹ Basto, ço qu'avès de soubro, baias-lou en óumorno, e veici que tout vai èstre pur pèr vous.

⁴² Mai malur à vàutri, Farisen, dóumaci pagas lou dèime de la mento, de la rudo e de tóuti lis erbo, em' acò treraancas la justiço e l'amour de Diéu! Aquéli causo d'aqui, falié li pratica, sènso manca lis autro.

⁴³ Malur à vàutri, Farisen, dóumaci amas li proumié sèti dins li sinagogo, e li salamalè en plaço de ciéuta!

⁴⁴ Malur à vautre, dóumaci semblas à de toumbèu que se veson pas e que lis ome ié marchon dessus sènso lou saupre!

⁴⁵ Alor un dóutour de la lèi, prenènt la paraulo, ié venguè: Mèstre, en disènt acò, nous envergougnas tambèn nautre.

⁴⁶ Mai Jèsu diguè: Emai à vàutri, Dóutour de la lèi, malur! dóumaci, cargas li gènt de gros fais que noun li podon pourta, e vautre li toucas pas meme dóu bout dóu det.

⁴⁷ Malur à vàutri que bastissès li toumbo di Proufèto, e 's vòsti paire que lis an tua!

⁴⁸ Ato! fasès proun vèire que sias counsènt is obro de vòsti paire; dóumaci, éli lis an tua, e vautre bastissès si toumbo.

⁴⁹ Amor d'acò, la sagesso de Diéu a di: Mandarai vers éli de Proufèto e d'Apoustòli; em' acò tuaran lis un e persecutaran lis autre,

⁵⁰ Pèr que se demande comte à-n aquesto generacioun dóu sang de tóuti li Proufèto, que s'es escampa tre la coumençanço dóu mounde,

⁵¹ Despièi lou sang d'Abèl enjusquo au sang de Zacarìo, que periguè entre t'autar e lou tèmple. O, vous lou dise, se n'en demandara comte à-n-aquesto generacioun.

⁵² Malur à vàutri, Dóutour de la lèi, dóumaci avès rauba la clau de la scienci; noun sias intra, vous autre, e aquéli qu'intravon, lis avès empacha.

⁵³ Dóu tèms que ie parlavo ansin, li Farisen e li Dóutour de la lèi coumencèron de lou quicha ferme e de l'aclapa de questioun à noun plus,

⁵⁴ Ie cercant d'engano, se virant de biais pèr tira quaucarèn de sa bouco, que lou pousquèsson acusa.