Sant Lu 10 - Lis Evangèli 1903 (Provençal)

CHAPITRE DESEN

Messioun di setanto-dous disciple. — Vilo impenitènto. — Retour di setanto-dous disciple. — Parabolo dóu bon Samaritan. — Marto e Marìo.

¹ Quauque tèms après, lou Segnour designè mai setanto-dous àutri disciple, e li mandè dous à cha dous davans éu dins touti li vilo e lis endré ounte devié ana.

² E ié disié: La meissoun es grosso, mai li travaiadou soun clar. Pregas dounc lou mèstre de la meissoun que mande de travaiadou à sa meissoun.

³ Anas, veici que iéu vous mande vautre coume d'agnèu au mitan di loup.

⁴ Pourtés ges de bourso, ges de biasso, ges de soulié, e saludés degun sus lou camin.

⁵ En quet oustau qu'intrés, digas proumié: Pas à-n-aquest oustau.

⁶ E se se ié capito un enfant de pas, repausara sus éu vosto pas; senoun, elo vers vautre revendra.

⁷ Restas dins lou meme oustau, manjant e bevènt ço que trouvas aqui; l'oubrié, dóumaci, merito soun salàri. Barrulés pas d'oustau en oustau.

⁸ En queto vilo qu'intrés, se vous reçaupon, manjas ço que vous pourgiran.

⁹ Garissès li malaut que se ié trovon, e digas-ié: Es proche de vautre lou reiaume de Diéu.

¹⁰ Mai en queto vilo qu'intrés, se noun vous reçaupon, anas-vous en sus la plaço e digas:

¹¹ Vès, jusquo la póusso de vosto vilo que s'es agantado à nautre, vous l'espóussan contro. Pamens sachés eiçò, qu'es proche lou reiaume de Diéu.

¹² Vous assegure qu'en aquéu jour Soudomo sara mai espargnado qu'aquelo vilo d'aqui.

¹³ Malur à tu, Gourouzaïn! malur à tu Beisaïdo! dóumaci se dins Tir e dins Sidoun s'èron coumpli li miracle que se soun coumpli au mitan de vautre, i'a de tèms qu'aurien fa penitènci, d'assetoun dins la saco e lou cèndre.

¹⁴ Mai pèr Tir e Sidoun, au jujamen, ié sara mai perdouna qu'à vautre.

¹⁵ E tu, Cafarnaoun, que jusquo au cèu t'enausses, jusquo en infèr t'aprefoundiras.

¹⁶ Qu vous escouto, m'escouto; qu vous mespreso, me mespreso. Mai qu me mespreso, mespreso Aquéu que m'a manda.

¹⁷ Or, revenguèron en gau, li Setanto-dous, disènt: Mèstre, jusquo li demòni que se soumeton à nautre, en voste noum!

¹⁸ E ié diguè: Vesiéu Satan toumba dóu cèu coume l'uiau.

¹⁹ Vès, vous ai douna lou poudé de subre-chaupi li serpas e lis escourpioun e touto la forço de l'enemi, e rèn vous fara mau.

²⁰ Dins acò, noun vous rejouïgués de ço que lis esperit vous iston soumés; mai rejouïssès-vous de ço que vòsti noum soun escri dins lou cèu.

²¹ Sus l'ouro meme, éu trefouliguè dins lou Sant-Esperit, e diguè: Glòri te rènde, Paire, Segnour dóu cèu e de la terro, perqué as escoundu aquéli causo i sage em' i prudènt, e lis as revelado i pichot. O, Paire, qu'ansin t'a fa gau.

²² Tout m'es esta douna pèr moun Paire; e res saup quau es lou Fiéu, senoun lou Paire; ni quau es lou Paire, senoun lou Fiéu, emai en quau lou Fiéu aura vougu lou revela.

²³ E se virant vers si disciple, diguè: Urous lis uei que veson ço que vesès!

²⁴ Dóumaci, vous lou dise, que-noun-sai de proufèto e de rèi an vougu vèire ço que vesès, e noun l'an vist; ausi ço qu'ausès, e noun l'an ausi.

²⁵ E veici qu'un dóutour de la lèi s'aubourè pèr lou prouva, disènt: Mèstre, coume farai pèr avé la vido eternalo?

²⁶ E Jèsu ié venguè: Dins la lèi, dequé i'a d'escri? coume ié legisses?

²⁷ Aquest ié respoundeguè: Amaras lou Segnour toun Diéu de tout toun cor e de touto toun amo, e de tóuti ti forço e de tout toun èime, e toun prouchan coume tu-meme.

²⁸ Jèsu ié diguè: Acò 's bèn respoundu; ansin fagues, e viéuras.

²⁹ Mai éu, voulènt faire soun juste, diguè à Jèsu: E quau es moun prouchan?

³⁰ Jèsu, lou rabaiant, diguè: Un ome davalavo de Jerusalèn à Jericò, e toumbè au mitan di larroun que lou desabihèron, e l'aguènt ablasiga, s'esbignèron en lou leissant mti mort.

³¹ E s'encapè qu'un sacerdot davalavo pèr la memo draio, e, tre l'avé vist, filè soun camin.

³² La memo causo, un levito, que se devinavo peraqui: l'aluquè e se tirè liuen.

³³ Mai un Samaritan, qu'èro pèr orto, i'arribè contro; e, de lou vèire, ié faguè coumpassioun.

³⁴ Em'acò, s'aflatant d'éu, ié plechè si plago, après i'avé vuja d'òli e de vin; e, lou boutant sus soun chivau, lou menè ounte establavo e n'en prenguè bèn siuen.

³⁵ L'endeman, tirè dous denié, e li baiè à l'oste, disènt: Agués siuen d'éu, e tout ço que despensarés en subre, iéu, tre retourna, vous lou rendrai.

³⁶ Quau d'aquéli tres te sèmblo èstre esta lou prouchan d'aquéu que toumbè au mitan di larroun?

³⁷ Lou dóutour respoundeguè: Es aquéu que n'a 'gu pieta. E ié diguè Jèsu: Vai, e fai coume éu.

³⁸ Or, s'anè trouva, coume èron pèr camin, qu' intrè dins uno bourgado; em'acò uno femo, que ié disien Marto, lou reçaupè dins soun oustau.

³⁹ Aquesto avié 'no sorre, dóu noum de Marìo, que, se tenènt d'assetoun i pèd dóu Segnour, escoutavo sa paraulo.

⁴⁰ Mai Marto èro touto en aio pèr lou vai-e-vèn dóu service. Elo s'arrestè e diguè: Segnour, noun vous enchau que ma sorre me laisse souleto pèr servi? Digas-ié dounc que m'ajude.

⁴¹ E respoundènt, ié diguè lou Segnour: Marto, Marto, te lagnes e te desvarìes pèr forço causo.

⁴² Ve, n'i'a qu'uno de necessàri. Marìo a chausi la meiouro part, e ié sara pas levado.