Sant Jan 8 - Lis Evangèli 1903 (Provençal)

CHAPITRE VUECHEN

La femo adultro. — Jèsu lumiero dóu mounde, Fiéu e mandadou de Diéu. — Malur d'aquéli que refuson de lou reçaupre. — Li veritàblis enfant d'Abram. — Lou Diable, messourguié e paire de la messorgo. — Jèsu prouclamo sa divinita: li Judiéu l'aquèiron.

¹ Pamens, Jèsu se gandiguè vers la mountagno dis Oulivo,

² E, à la primo-aubo, tourna-mai s'enanè au tèmple, em'acò tout lou pople venguè vers éu; e d'assetoun, éu lis ensignavo.

³ Alor lis Escribo e li Farisen i'aduguèron une femo presso en adultèri; e la boutèron au mitan.

⁴ Em'acò diguèron: Mèstre, aquelo femo d'aqui vènon tout-bèu-just de l'aganta que fasié l'adultèri.

⁵ Or, dins sa lèi Mouïse nous a coumanda d'aqueira de femo ansin. Vous, vejan, dequé disès?

⁶ Parlavon ansin sus l'estiganço de lou tenta pèr pousqué pièi l'acusa. Mai Jèsu, se boutant de clinoun, escrivié au sòu emé lou det.

⁷ E coume s'óupilavon à lou questiouna, éu s'aubourè e ié diguè: Aquéu de vous-autre qu'es sènso pecat, mande-ié la pèiro lou proumié.

⁸ Pièi se boutant mai de clinoun, escrivié au sòu.

⁹ Mai, en ausènt acò-d'aqui, un à cha un s'esbignèron, à coumença pèr li pu vièi e restè soulet Jèsu emé la femo qu'èro aqui drecho au mitan.

¹⁰ S'aubourant alor, Jèsu ié venguè: Femo, ounte soun aquéli que t'acusavon? Degun t'a coundana?

¹¹ Elo diguè: Degun, Segnour. Jèsu ié faguè: Nimai iéu, te coundanarai pas. Vai-t'en e partènt d'aro pèques plus.

¹² Jèsu tournè parla au pople e diguè: Iéu siéu la lumiero dóu mounde; qu me seguis noun camino dins la sournuro, mai aura la lumiero de vido.

¹³ Adounc ié diguèron li Farisen: Vous, aqui, vous rendès temouniage e voste temouniage es pas vertadié.

¹⁴ Jèsu ié respoundeguè: Emai me porge temouniage à iéu, moun temouniage es vertadié; sabe, dóumaci, d'ounte vène emai ounte vau.

¹⁵ Vautre jujas segound la car. Iéu, noun juge degun.

¹⁶ E quand jugèsse, moun jujamen sarié digne de fe, car siéu pas soulet: i'a iéu e Aquéu que m'a manda, lou Paire.

¹⁷ Dins vosto lèi, es escri que lou temouniage de dous ome es vertadié.

¹⁸ Or, iéu me rènde à iéu-meme temouniage de iéu.

¹⁹ Adounc ié diguèron: Ounte es voste Paire? Jèsu respoundeguè: Vous-autre, ni me couneissès iéu ni moun Paire. Se me couneissias, tambèn couneirias moun Paire.

²⁰ Aquéli paraulo d'aqui, Jèsu li diguè dins l'endré ounte èro lou tresor en ensignant dins lou tèmple; e res l'arrestè, dóumaci èro panca vengudo soun ouro.

²¹ Jèsu ié diguè mai: Iéu m'envau, e me cercarés, e mourirés dins voste pecat. Aqui ounte vau, vous-autre noun poudès veni…

²² Adounc li Judiéu fasien: Es que s'anarié tua, que dis: Aqui ounte iéu vau, vous-autre noun poudès veni?

²³ Ié diguè: Vautre, sias d'en bas; iéu, siéu d'en aut. Vautre sias d'aquest mounde; iéu, siéu pas d'aquest mounde.

²⁴ Vous ai dounc di que mourirés dins vòsti pecat; dóumaci se noun cresès ço que iéu siéu, mourirés dins voste pecat.

²⁵ Adounc éli ié faguèron: Vous, quau sias? E Jèsu respoundeguè: Siéu lou principe, iéu que vous parle.

²⁶ Ai forço causo à dire de vautre e à coundana en vautre. Mai Aquéu que m'a manda es vertadié, e li causo qu'ai ausido d'éu, iéu li dise dins lou mounde.

²⁷ Éli coumprenguèron pas que disié que Diéu èro soun Paire.

²⁸ E Jèsu ié diguè: Quand aurés enaussa lou Fiéu de l'Ome alor couneirés ço que siéu, e que fau rèn de iéu-meme, mai que coume moun Paire m'a ensigna, iéu parle.

²⁹ Aquéu que m'a manda es emé iéu, e lou Paire noun m'a leissa soulet, dóumaci ço que i'agrado iéu lou fau de-countùni.

³⁰ Dóu tèms que parlavo ansin, n'i'aguè forço que creiguèron en éu.

³¹ Jèsu disié dounc i Judiéu qu'avien creigu en éu: Se restas dins ma paraulo, sarés veramen mi disciple;

³² E couneirés la verita, e la verita vous rendra libre.

³³ Ié rebriquèron: Sian de la raço d'Abram, e sian jamai esta lis esclau de degun. Adounc que venès dire: Sarés libre?

³⁴ Jèsu ié respoundeguè: Veramen, veramen vous lou dise, quau fai lou pecat es esclau dóu pecat.

³⁵ Or, l'esclau noun rèsto pèr toustèms dins l'oustau; mai lou fiéu ié rèsto pèr toustèms.

³⁶ Se dounc lou Fiéu vous bouto en liberta, sarés veritablamen libre.

³⁷ Sabe que sias li fiéu d'Abram; mai cercas de me faire mouri, pèr-ço-que ma paraulo pren pas en vautre.

³⁸ Iéu, ço qu'ai vist dins moun Paire, lou dise; e vautre, ço qu'avès vist dins voste paire, lou fasès.

³⁹ Éli restoublèron e diguèron: Noste paire es Abram. Jèsu ié respoundeguè: Se sias li fiéu d'Abram, fasès dounc lis obro d'Abram.

⁴⁰ Mai aro cercas de me faire mouri iéu, pèr vous avé di la verita qu'ai apresso de Diéu: acò-d'aqui, Abram l'a pas fa.

⁴¹ Vautre, fasès lis obro de vos e paire. Éli subran ié venguèron: Nautre, sian pas bastard; avèn qu'un paire, Diéu.

⁴² Adounc Jèsu ié diguè: Se Diéu èro voste paire, de-segur m'amarias, car es de Diéu que siéu sourti e que siéu vengu. Siéu pas vengu de iéu-meme, mai es éu que m'a manda.

⁴³ D'ounte vèn que coumprenès pas moun parladis? Pèr-ço-que poudès pas entèndre ma paraulo.

⁴⁴ Vautre avès pèr paire lou diable, e voulès coumpli li desiranço de voste paire. Éu es esta 'n assassin dempièi la coumençanço, e noun s'es tengu dins la verita, pèr-ço-que i'a ges de verita dins éu. Quouro messourguejo, éu parlo de soun sicap, dóumaci es messourguié e paire de la messorgo.

⁴⁵ Mai iéu, quand dise la verita, avès pas fe à iéu.

⁴⁶ Quau de vautre m'acusara de pecat? Se vous dise la verita, perqué noun me cresès?

⁴⁷ Aquéu qu'es de Diéu, escouto li paraulo de Diéu. Veici perqué vautre noun lis escoutas, es que sias pas de Diéu.

⁴⁸ Adounc ié respoundeguèron li Judiéu, ié diguèron: L'avian pas di, nautre, qu'erias un samaritan, vous, e un endemounia?

⁴⁹ Jèsu ié tournè à dire: Iéu noun siéu un endemounia; mai ounoure moun Paire, e vautre me desounouras.

⁵⁰ Noun recerque iéu ma glòri: n'i'a un qu'acò 's soun afaire; aquéu fara justiço.

⁵¹ Veramen, veramen vous lou dise, se quaucun gardo ma paraulo, noun jamai veira la mort.

⁵² Alor ié faguèron li Judiéu: Aro sabèn que sias un endemounia. Abram es mort, li Proufèto tambèn, e venès dire: Se quaucun gardo ma paraulo, noun jamai passara pèr la mort!

⁵³ Vous, d'asard, sias-ti mai grand qu'Abram noste paire, qu'es mort, e que li proufèto que peréu soun mort? Quau vous cresès d'èstre?

⁵⁴ Jèsu respoundeguè: Se me glourifique iéu, ma glòri n'es rèn. Es moun Paire que me glourifico, Aquéu meme que disès voste Diéu.

⁵⁵ Pamens, lou couneissès pas; mai lou counèisse iéu; e se disiéu que lou counèisse pas, sariéu coume vautre un messourguié. Mai lou counèisse e garde sa paraulo.

⁵⁶ Abram, voste paire, a barbela de vèire moun jour; l'a vist, e n'es esta dins la gau.

⁵⁷ Li Judiéu alor ié diguèron: Avès pancaro cinquanto an, e avès vist Abram?

⁵⁸ Jèsu ié respoundeguè: Veramen, veramen vous lou dise, d'en-davans qu'Abram fuguèsse, iéu siéu.

⁵⁹ Em'acò agantèron de pèiro pèr li jita contro éu; mai Jèsu s'escoundeguè e sourtiguè dóu tèmple.