Sant Jan 5 - Lis Evangèli 1903 (Provençal)

CHAPITRE CINQUEN

Garisoun d'un ome malaut desempièi trento vuech an. — Li Judiéu remiéutejon contro Jèsu que se dis Fiéu de Diéu. — Responso dóu Divin Mèstre: temouniage de Mouïse, de Jan-Batisto, dóu Paire Celèste e de si pròpris obro. — Encauso de l'incredulita di Judiéu.

¹ Erian à la fèsto di Judiéu e Jèsu mountè à Jerusalèn.

² Or à Jerusalèn i'a la piscino proubatico qu'en ebriéu ié dison Beisaïdo qu'a cinq pourtegue.

³ Aqui dessouto, avias estendu pèr lou sòu uno moulounado de malaut, d'avugle, de goi, de paralisa qu'èron à l'espèron dóu gafouiamen de l'aigo.

⁴ Car un ange dóu Segnour davalavo tèms en tèms dins lou barquiéu, e l'aigo boule-gavo. Em'acò lou bèu proumié que davalavo dins lou barquiéu, après lou gafouiamen de l'aigo, se devinavo gari de quinto malautié que fuguèsse.

⁵ Or i'avié 'n ome aqui que despièi trento vuech an tirassavo soun mau.

⁶ Quand Jèsu lou veguè coucha au sòu, e que sachè qu'èro ansin despièi bravamen de tèms, ié diguè: Vos èstre gari?

⁷ Ié respoundeguè lou malaut: Segnour, ai degun, quand l'aigo es en bourroulo, pèr me manda dins lou muvèu; d'enterin que vène iéu, un autre avans iéu ié davalo.

⁸ Jèsu ié diguè: Aubouro-te, cargo ta litocho e marcho.

⁹ E subran fuguè gari aquel ome, carguè sa litocho, em'acò marchavo. Or, èro lou jour dóu Sabat.

¹⁰ Adounc li Judiéu disien à-n-aquéu qu'èro esta gari: Es lou Sabat! t'es pas permés de carreja ta litocho.

¹¹ Éu ié venguè: Aquéu que m'a gari, m'a di: Cargo ta litocho e marcho.

¹² Ié demandèron: Quau es aquel ome que t'a di: Cargo ta litocho e marcho?

¹³ Or, aquéu que venié d'èstre gari sabié pas quau èro; car Jèsu s'èro tira liuen de la foulo acampado en aquéu rode.

¹⁴ Mai pièi, Jèsu lou rescountrè dins lou tèmple, e ié diguè: Te vaqui gari; pequèsses plus, que noun t'arribèsse pire.

¹⁵ S'enanè aquel ome e anounciè i Judiéu qu'èro Jèsu que l'avié gari.

¹⁶ Amor d'acò, li Judiéu secutavon Jèsu, estènt que fasié aquéli causo d'aqui lou jour dóu Sabat.

¹⁷ Mai Jèsu ié respoundeguè: Moun Paire noun s'arrèsto d'agi; emai iéu agisse.

¹⁸ Sus acò, cercavon que mai, li Judiéu, de lou faire mouri, en estènt que noun soulamen tremancavo lou Sabat, mai encaro disié que Diéu èro soun Paire, se fasènt egau à Diéu. Adounc Jèsu reprenguè la paraulo e diguè:

¹⁹ Veramen, veramen vous lou dise, noun pòu lou Fiéu faire quicon d'esperéu, senoun ço que vèi faire au Paire; car tout ço que lou Paire fai, lou Fiéu tambèn lou fai coume éu.

²⁰ Lou Paire, dóumaci, amo lou Fiéu e ié mostro tout ço qu'éu-meme fai; e ié moustrara d'obro mai grando encaro qu'aquéli, de maniero que sarés dins l'amiracioun.

²¹ Coume lou Paire ressuscito li mort e li reviéudo, ansin lou Fiéu reviéudo quau vòu.

²² Lou Paire jujo res; mai tout lou jujamen l'a remés au Fiéu,

²³ Pèr que tóuti ounouron lou Fiéu, dóu meme biais qu'ounouron lou Paire. Quau ounouro pas lou Fiéu, ounouro pas lou Paire que l'a manda.

²⁴ Veramen, veramen vous lou dise, aquéu qu'ausis ma paraulo, e crèi à-n-Aquéu que m'a manda, a la vido eternalo, e noun passo en jujamen, mai es passa de la mort à la vido.

²⁵ Veramen, veramen vous lou dise, l'ouro vèn, es deja vengudo ounte li mort ausiran la voues dóu Fiéu de Diéu; e aquéli que l'auran ausido viéuran.

²⁶ Dóumaci coume lou Paire a la vido en éu-meme, ansin a douna tambèn au Fiéu d'avé la vido en éu-meme.

²⁷ E i'a douna lou poudé de juja, pèr-ço-qu'es lou Fiéu de l'ome.

²⁸ Vous estounés pas d'acò, que vèn l'ouro ounte tóuti aquéli que soun au cementèri, ausiran la voues dóu Fiéu de Diéu;

²⁹ E n'en sourtiran: aquéli qu'an fa lou bèn, pèr la resurreicioun de la vido; mai aquéli qu'an fa lou mau, pèr la resurreicioun dóu jujamen.

³⁰ Noun pode, iéu, rèn faire d'esperiéu: coume entènde, juge; e moun jujamen es juste, en estènt que noun cerque ma voulounta de iéu, mai la voulounta d'Aquéu que m'a manda.

³¹ S'es iéu que me porge temouniage à iéu, moun temouniage es pas vertadié.

³² Quaucun mai rènd temouniage de iéu, e sabe qu'es vertadié lou temouniage que rènd de iéu.

³³ Avès manda 'no embassado à Jan, e pourgiguè temouniage à la verita.

³⁴ Pèr moun comte de iéu, noun es d'un ome que reçaupe lou temouniage; mai dise eiçò pèr que fugués sauva.

³⁵ Jan èro un lume qu'ardejavo e lusissié; e vautre, avès vougu vous escarrabiha 'n moumenet à sa lumiero.

³⁶ Mai iéu, ai un temouniage mai grand qu'aquéu de Jan; dóumaci lis obro que lou Paire m'a douna de coumpli, lis obro memo que iéu fau, temònion de iéu qu'es lou Paire que m'a manda.

³⁷ E Aquéu que m'a manda, lou Paire, éu-meme a rendu temouniage de iéu. Sa voues, pamens, l'avès jamai ausido, e sa fàci nimai, l'avès pas visto.

³⁸ Mai sa paraulo d'éu noun la gardas en vautre, car à-n-aquéu qu'a manda, à-n-aquéu-d'aqui vautre i'avès pas fe.

³⁹ Furnas lis Escrituro, d'abord que vous cresès de ié trouva la vido eternalo; emai éli, rèndon temouniage de iéu.

⁴⁰ E voulès pas veni vers iéu pèr avé la vido.

⁴¹ La glòri, noun es dis ome que la reçaupe.

⁴² Mai vous counèisse: avès pas l'amour de Diéu en vautre.

⁴³ Iéu siéu vengu au noum de moun Paire, e me reçaupès pas; se n'en vèn un autre en soun propre noum, aquéu-d'aqui lou reçauprés.

⁴⁴ Coume poudès avé la fe, vàutri que reçaupès la glòri lis un dis autre, e cercas pas la glòri que vèn de Diéu soulet?

⁴⁵ Vous pensés pas que fugue iéu que vous acusarai davans lou Paire: aquéu que vous acuso, es Mouïse, en quau esperas, vous-autre.

⁴⁶ Dóumaci, se cresias à Mouïse, creirias bessai tambèn à iéu, car es de iéu que parlo dins sis escri.

⁴⁷ Mai, se cresès pas à sis escri, coume creirés à mi paraulo?