Sant Jan 3 - Lis Evangèli 1903 (Provençal)

CHAPITRE TRESEN

Charradisso de Jèsu 'mé Nicoudème: la reneissènço esperitalo, la mort dóu Redemtour e lou salut dóu mounde, la necessita de la fe. — Countèsto pertoucant lou batisme. — Temouniage dóu Precursour.

¹ I'avié 'n ome dintre li Farisen, que ié disien Nicoudème, un di catau dóu pople juei.

² Aquéu-d'aqui venguè trouva Jèsu, de niue, e ié diguè: Mèstre, sabèn que sias un dóutour vengu de Diéu, car degun pòu faire li miracle que vous fasès, se Diéu noun es em'éu.

³ Ié respoundeguè Jèsu: Veramen, veramen te lou dise, se quaucun noun renais un segound cop noun pòu vèire lou reiaume de Diéu.

⁴ Nicoudème ié venguè: Un ome, coume pòu naisse, en estènt vièi? Pòu-ti tourna-mai intra dins lou sen de sa maire e renaisse?

⁵ Jèsu respoundeguè: Veramen, veramen te lou dise, se quaucun noun renais de l'aigo e dóu Sant-Esperit, non pòu intra dins lou reiaume de Diéu.

⁶ Ço qu'es na de la car es car; e ço qu'es na de l'Esperit es esperit.

⁷ Qu'acò noun t'estoune se t'ai di: Fau que neissegués tourna-mai.

⁸ Lou ventoulet boufo ounte vòu, e sa voues l'auses, mai noun sabes d'ounte vèn, ni mounte vai: ansin n'es de tout ome qu'es na de l'Esperit.

⁹ Ié respoundeguè Nicoudème, disènt: Coume acò pòu avé d'èstre?

¹⁰ E ié tournè dire Jèsu: Tu, siés mèstre en Israèl, e siés ignourènt d'aquéli causo!

¹¹ Veramen, veramen te lou dise, ço que sabèn nautre, lou disèn, e ço qu'avèn vist, l'afourtissèn; mai de noste testimòni n'en voulès ges.

¹² Se vous ai parla de causo terrenalo, e que noun i'agués creigu, coume farés, quouro vous parlarai de causo celestialo pèr ié crèire?

¹³ Car degun a mounta dins lou cèu, senoun aquéu que n'es descendu, lou Fiéu de l'ome, qu'es amoundaut.

¹⁴ E coume Mouïse aubourè lou serpènt dins lou desert, ansin fau que siegue auboura lou Fiéu de l'ome,

¹⁵ Pèr que tout ome qu'a fe dins éu noun perigue, mai ague la vido eternalo.

¹⁶ Car Diéu a tant ama lou mounde que i'a douna soun Fiéu soulet, pèr que tout ome que crèi en éu noun perigue, mai ague la vido eternalo.

¹⁷ Diéu, en efèt, noun a manda soun Fiéu dins lou mounde pèr juja lou mounde, mai sus l'estiganço que lou mounde siegue sauva pèr éu.

¹⁸ Qu crèi en éu noun es juja; mai qu noun crèi es deja juja, en estènt qu'a pas fe au noum dóu Fiéu soulet de Diéu.

¹⁹ Or, vès-eici lou jujamen: la lumiero es vengudo dins lou mounde, e an miés ama, lis ome, la sourniero que la lumiero, en estènt que sis obro èron marrido.

²⁰ Car tout ome que mau agis a en òdi la lumiero, e s'avanço pas de la lumiero, cregnènço que sis obro siegon jujado.

²¹ Mai aquéu qu'agis counforme à la verita s'avanço de la lumiero, pèr que siegon manifestado, sis obro, estènt qu'es en Diéu que soun facho.

²² Après, venguè Jèsu 'mé si disciple dins lou terraire de Judèio; ié demouravo em' éli e batejavo.

²³ Emai Jan batejavo en Einoun, dins la vesinanço de Salin, que lis aigo aboundavon aqui; e venien li gènt e i'èron bateja.

²⁴ Jan, dóumaci, l'avien pancaro mes en presoun.

²⁵ Or, i'aguè 'no countèsto entre li disciple de Jan e li Judiéu sus la purificacioun.

²⁶ E venguèron vers Jan, e ié diguèron: Mèstre, aquéu qu'èro emé tu de dela lou Jourdan, e que tu i'as rendu temouniage, vaqui que batejo aro, e tóuti van à-n-éu.

²⁷ Jan respoundeguè: Noun pòu l'ome reçaupre que que siegue, se noun i'es esta douna d'en aut.

²⁸ Me fasès la fe, vàutri meme, qu'ai di: Es pas iéu lou Crist, mai siéu esta manda davans éu.

²⁹ Quau a la nòvio es lou nòvi; mai l'ami dóu nòvi qu'es aqui e que l'escouta, es dins uno grando gau d'ausi la voues dóu nòvi. Or, acò 's ma gau à iéu, e coumplèto.

³⁰ Éu, fau que crèisse; e iéu, que demenigue.

³¹ Aquéu que vèn d'en aut es au-dessus de tóuti. Aquéu que vèn de la terro, es de la terro, e de la terro éu parlo. Aquéu que vèn dóu cèu es au-dessus de tóuti;

³² E de ço qu'a vist emai ausi, éu n'en pourgis temouniage; e soun temouniage d'éu, degun que lou reçaupe.

³³ Aquéu qu'a reçaupu soun temouniage, afourtis que Diéu es vertadié.

³⁴ Car aquéu que Diéu a manda dis li paraulo memo de Diéu, dóumaci noun es pèr mesuro que Diéu douno l'Esperit.

³⁵ Lou Paire amo lou Fiéu e i'a tout mes entre man.

³⁶ Qu crèi au Fiéu a la vido eternalo; e qu noun crèi au Fiéu, veira pas la vido, mai l'iro de Diéu es tancado sus éu.