Sant Jan 16 - Lis Evangèli 1903 (Provençal)

CHAPITRE SEGEN

Se countùnio lou Sermoun après la Ceno. — Noste Segne anóuncio de persecucioun. — L'Esperit counsouladou. — Esvalido la tristesso, vèn la 'joio. — Vertu de la preguiero.

¹ Vous ai di aquéli causo, pèr que noun vous escandalisés.

² Vous metran à la porto di sinagogo, e vai veni l'ouro qu'aquéu que vous tuara, creira rèndre glòri à Diéu.

³ E ansin vous faran, pèr-ço-que noun counèisson ni lou Paire ni iéu.

⁴ Mai acò, vous l'ai di pèr que, se 'n-cop l'ouro sara vengudo, vous souvengués que vous l'ai di.

⁵ Acò, vous l'ai pas di d'en-proumié, dóumaci ère emé vautre. Mai aro m'envau vers Aquéu que m'a manda, e res de vautre me demando: Ounte anas?

⁶ Mai sufis que vous ai ansin parla, de la tristesso es gounfle voste cor.

⁷ Pamens, iéu vous dise la verita: vous es en-de-bon que m'envague; car, se noun m'envau, lou Counsouladou vendra pas vers vautre.

⁸ Em'acò, quouro sara vengu, éu fara la provo au mounde sus lou pecat, sus la justiço e sus lou jujamen.

⁹ Sus lou pecat, dóumaci an pas creigu en iéu;

¹⁰ Sus la justiço, dóumaci m'envau vers lou Paire, e me veirés plus;

¹¹ Sus lou jujamen, dóumaci lou prince d'aquest mounde deja es juja.

¹² Ai encaro forço causo à vous dire, mai noun poudès li pourta pèr aro.

¹³ Se 'n-cop, pamens, l'Esperit de verita sara vengu, vous ensignara touto verita. Noun parlara de soun sicap; mai, tout ço qu'aura ausi, lou dira, e vous anounciara li causo avenidouiro.

¹⁴ Éu m'englouriara, pèr-ço-que prendra dóu miéu, e vous lou fara saupre.

¹⁵ Tout ço qu'a lou Paire es miéu; es pèr acò, qu'ai di: Prendra dóu miéu, e vous lou fara saupre.

¹⁶ Encaro un pau, e me veirés plus; e tourna-mai encaro un pau, e me veirés, pèr-ço-que m'envau vers moun Paire.

¹⁷ Alor quàuquis-un de si disciple se diguèron dis un is autre: Qu'es acò que nous dis: Encaro un pau, e me veirés plus; e tourna-mai encaro un pau, e me veirés, pèr-ço-que vau vers moun Paire?

¹⁸ Disien dounc: Que vòu dire acò: Encaro un pau? Sabèn pas de que nous parlo.

¹⁹ Coumprenguè Jèsu que voulien lou questiouna, e ié venguè: Vous demandas entre vautre dequ'ai vougu dire pèr eiçò: Encaro un pau, e me veirés plus; e tourna-mai encaro un pau, e me veirés.

²⁰ Veramen, veramen vous lou dise, plourarés e vous doulentarés, vous-autre; e lou mounde menara rejouïssènço. Sarés dins la lagno, mai vosto lagno en gau se chanjara.

²¹ La femo, quouro s'acoucho, tiro peno, dóumaci es vengu soun moumen; mai, quouro a fa 'n enfant, s'ensouvèn plus de soun mau, tant es countènto d'avé mes un ome au mounde.

²² Ansin vautre, aro, tiras peno; mai tournarai vous vèire e se rejouïra voste cor, e vosto countentesso, degun vous la levara.

²³ En aquéu jour, me questiounarés plus sus rèn. Veramen, veramen vous lou dise, se demandas quaucarèn au Paire en moun noum, éu vous lou dounara.

²⁴ Enjusqu'aro avès rèn demanda en moun noum. Demandas e reçauprés, pèr que vosto joio siegue en soun plen.

²⁵ Aquéli causo, vous lis ai dicho en parabolo. L'ouro vèn qu'en parabolo noun vous parlarai plus; mai claramen vous endóutrina-rai sus lou Paire.

²⁶ En aquéu jour, demandarés en moun noum, e vous dise pas que iéu pregarai lou Paire pèr vautre.

²⁷ Es que, lou Paire vous amo, dóumaci vautre m'avès ama, e avès creigu que iéu siéu sourti de Diéu.

²⁸ Siéu sourti dóu Paire, e siéu vengu dins lou mounde; aro quite lou mounde, e tourne vers lou Paire.

²⁹ Si disciple ié diguèron: Vaqui que nous parlas aro claramen, e sènso parabolo.

³⁰ Aro vesèn que sabès tout, e noun es necite que plus res vous questioune: amor d'acò cresèn que sias sourti de Diéu.

³¹ Jèsu ié repoundeguè: Aro cresès?

³² Veici veni l'ouro, e 's deja vengudo, ounte vous escampiharés cadun de voste caire, e soulet me leissarés. Mai siéu pas soulet, car lou Paire es emé iéu.

³³ Vous ai di aquéli causo, pèr qu'en iéu agués la pas. Dins lou mounde, n'aurés de lagno; mai agués fisanço: iéu ai vincu lou mounde.