Sant Jan 10 - Lis Evangèli 1903 (Provençal)

CHAPITRE DESEN

La Parabolo dóu bon Pastour. — Noste-Segne vai à Jerusalèn pèr la Dedicàci. — Li Judiéu lou volon aqueira. — Éu ié provo sa divinita pèr sis obro. — Se retiro de dela lou Jourdan.

¹ Veramen, veramen vous lou dise, aquéu que noun intro de la porto dins lou cast di fedo, mai que ié mounto d'un autre rode, aquéu-d'aqui es un raubaire e un larroun.

² Mai aquéu qu'intro de la porto, es lou pastre de l'avé.

³ A-n-aquéu-d'aqui lou pourtié duerb, e li fedo auson sa voues. Li fedo siéuno éu li sono pèr soun noum, em'acò li largo.

⁴ E 'no fes si fedo à-n-éu bandido, ié camino davans; e li fedo lou seguisson, estènt que counèisson sa voues.

⁵ Un estrangié, lou seguisson pas, mai se garon d'éu, dóumaci counèisson pas la voues dis estrangié.

⁶ Acò's la parabolo que ié diguè Jèsu; mai éli sachèron pas de que ié parlavo.

⁷ Adounc Jèsu ié tournè à dire: Veramen, veramen vous lou dise, iéu siéu la Porto dóu fedan.

⁸ Tóuti aquéli que soun vengu acò 's d'arpian e de larroun e li fedo lis an pa 'scouta.

⁹ Iéu siéu la Porto. Se quaucun intro pèr iéu, sara sauva; intrara e sourtira, e trouvara de pasquié.

¹⁰ Lou laire noun vèn que pèr rauba, sagata, e mena perdre. Iéu siéu vengu pèr que li fedo agon la vido, et l'agon mai aboundouso.

¹¹ Iéu siéu lou bon Pastour. Un bon pastre douno sa vido pèr soun avé.

¹² Mai lou lougadié, aquéu que noun es de la pastriho, e que li fedo soun pas siéuno, tre vèire lou loup que vèn, planto aqui li fedo e s'encour; em' acò lou loup lis arrapo e des-troupello l'escabot.

¹³ Or, lou lougadié s'empart, sufis qu'es lougadié, e que noun s'enchau dóu fedan.

¹⁴ Pèr quant à iéu, siéu lou bon Pastour, e counèisse mis óuviho, e mis óuviho me counèisson,

¹⁵ Coume lou Paire me counèis, e coume iéu counèisse lou Paire; e ma vido la doune iéu pèr moun avé.

¹⁶ Ai encaro d'àutri fedo que noun soun d'aquesto jasso e aquéli, me li fau adurre; ausiran ma voues, e i'aura plus qu'uno jasso e qu'un pastre.

¹⁷ Es pèr eiçò que lou Paire m'amo, dóumaci iéu doune ma vido pèr tourna-mai la reprene.

¹⁸ Res me la lèvo; mai iéu la doune d'esperiéu; ai lou poudé de la douna, e ai ou poudé de tourna la reprene: ansin es lou coumandamen qu'ai reçaupu de moun Paire.

¹⁹ I'aguè mai uno chamaio entre li Judiéu, raport à-n-aquéli paraulo.

²⁰ Bravamen d'éli disien: Es endemounia e a vira lou sèn; perqué l'escoutas?

²¹ Lis autre disien: Acò 's pas li paraulo d'un endemounia; es que lou demòni pòu durbi li vistoun dis avugle?

²² Or, fasien à Jerusalèn la fèsto de la Dedicàci; erian en ivèr.

²³ E se permenavo, Jèsu, dins lou tèmple, souto lou pourtegue de Salamoun.

²⁴ S'acampèron dounc à soun entour, li Judiéu, e ié disien: Jusquo quouro nous tendrés en chancello? S'es vous lou Crist, digas-lou clar.

²⁵ Ié respoundeguè Jèsu: Vous parle e me cresès pas. Lis obro que iéu coumplisse au noum de moun Paire, aquélis obro rèndon temouniage de iéu.

²⁶ Mai vautre cresès pas, dóumaci sias pas de moun avé.

²⁷ Mi fedo escouton ma voues, e iéu li counèisse, e me seguisson.

²⁸ Iéu ié doune la vido eternalo, e noun periran jamai, e res me li raubara di man.

²⁹ Ço que moun Paire m'a douna, es mai grand que tout; e res lou pòu rauba di man de moun Paire.

³⁰ Iéu e lou Paire sian qu'un.

³¹ Alor li Judiéu agantèron de pèiro pèr l'aqueira.

³² Jèsu ié venguè: Ai fa que-noun-sai de bònis obro davans vautre au noum de moun Paire; pèr quinto d'aquélis obro m'aqueiras?

³³ Ié respoundeguèron li Judiéu: Es pas pèr uno bono obro que vous aqueiran, mai pèr blasfème, e pèr-ço-que vous, ome que sias, vous fasès Diéu.

³⁴ Jèsu ié rebriquè: Noun es escri, vejan, dins vosto lèi: Iéu ai di: Sias de Diéu?

³⁵ Se dounc la Lèi apello diéu aquéli que la paraulo de Diéu i'es estado adreissado (e l'Escrituro se pòu pas desfaire,)

³⁶ Perqué disès à-n-aquéu que lou Paire a santifica e manda dins lou mounde: Tu, blasfèmes, pèr-ço-qu'ai di: Siéu lou Fiéu de Diéu?

³⁷ Se fau pas lis obro de moun Paire, me creigués pas.

³⁸ Mai se li fau, e que me vougués pas crèire, cresès à mis obro, pèr que couneigués e que creigués que lou Paire es en iéu, e iéu dins lou Paire.

³⁹ Adounc li Judiéu cercavon de l'aganta, mai s'escapè de si man.

⁴⁰ E s'enanè tourna-mai de dela lou Jourdan, au meme rode ounte Jan batejavo d'en-proumié; e demourè 'qui.

⁴¹ Em'acò venguè forço mounde lou trouva, e disien: Jan, éu, n'a ges fa de miracle;

⁴² Mai tout ço que Jan a di d'aquest-d'eici èro verai. E n'i'aguè bravamen que creiguèron en éu.