Luka 9 - PaicîÉ cùru pâ tèpa 12 apostolo kêe Mataio 10.5–15; Maréko 6.7–13 1-2 Wà Iésu, âna é todà tèpa 12 *apostolo kêe me naa jaaé.  é panuârà pâ, ba na rà picémara târa pâ âboro ê *Mwaciri kà Pwiduée.  é naa tàra ê tàrù ma pàtàmee, ba na rà tü târa ê pâ duée, ma nama tiàu maagé kà tèpa âboro. 3  é ina tàra pâ: «Guwà cibwaa pa cè muru wiàna guwà pâra—wiàna cè tâjò, ma cè atà, ma cè poloa, ma cè mwani.  guwà nye coona co caapwi ârabwée. 4 «Â wiàna tòpiwà naa na cè jè pwârawâ, â wâdé na guwà tâa wê, tiagoro cè tòotù cèna guwà mwa pâra [gée na napô-bà]. 5  wiàna càcaa nüma tèpa âboro na rà tòpiwà naa na cè jè ére, â guwà pâra géewê.  guwà tauri ê dàuru puu goro âwà, ba na guwà paari pâ, càcaa wâdé ê pwina rà pwa.» 6  rà pâra wà tèpa *câmu naa na pâ village, â rà picémara ê *Picémara Wâdé, â rà nama tiàu maagé kà tèpa âboro. É têre jèkutâ gooé wà Héroda Mataio 14.1–12; Maréko 6.14–29 7-9 Wà pwi ukai *Héroda Antipas âna é têre ê jèkutâ [goro pâ *câmu kâra pàtàmee na é pwa wà Iésu].  é ina pâ: «Go pwa ma tépàgà nya Ioane Pwi a piupwaa.  wàilàapà pwi âboro bèeni, na go têre pâ jèkutâ gooé?»  é tapoo dumapiê, ba rà ina gooé wà pàra tàpé pâ: «Wàé, âna wàé *Ioane Pwi a piupwaa na é wâro côwâ gée na aubà.»  wà pàra tàpé, âna rà ina pâ wà *péroféta Élia, é, pwi jè péroféta na jè pàara napô, na é wâro côwâ.  wà Héroda, âna pwa na é côo mwara wà Iésu. É pa-ija 5 000 âboro Iésu Mataio 14.13–21; Maréko 6.30–44; Ioane 6.1–15 10 Rà wâjué côwâ wà tèpa apostolo [gée na pâ village, â rà pitapitirirà] naa jaa Iésu.  rà piwiâ têe diri ê pâ namuru na rà pwa.  é poparà pâ naa na jè ére na wâmwünyabweri ê village Bethsaïda, ba na rà tâa acari wê. 11 Êco na wâru ê pâ âboro, na rà têre pâ rà pâra naawê, â rà pâra wiârà.  é tòpirà wà Iésu, â é pacâmurirà goro ê Mwaciri kà Pwiduée, â é nama tiàu maagé kàra. 12 Jèe pwa na é duu i tòotù, â rà medarié wà tèpa câmu kêe, â rà ina têe pâ: «Gà panuâ pâ ê pâ âboro bèeni naa na pâ village ma pâ pwârawâ na tàmwünyabwe, ba na rà o pa cè uti kàra, ma puu wê. Ba aupiticia ni.» 13  é tòpi tàra pâ: «Bwa, guwà naa cè uti kàra!»  rà ina têe pâ: «Auwa! Nye 5 poloa co, ma ârailu ârawéà na wâjaabà! Gona nümagà na bà pâra nau wâri cè utimuru ba kàra diri? Ba o nye êco kaa pwiri cè pai naa cè uti kàra!» 14 (Ba ê jéû tèpa paao maina na rà tâa wê, âna po 5 000 kaamwara.)  é ina tàra wà Iésu pâ: «Bwa. Guwà ina târa ê pâ âboro bèeni pâ, rà pwa nari pubu goro 50 jècaa, â rà tâaboo.» 15  rà cau tâaboo tèpa âboro. 16  é popa i pâ 5 poloa ma i du ârawéà wà Iésu.  é tagòtùé too *napwéretòotù, â é pwaolé tà Pwiduée.  é tubiti i poloa, â é naa tà tèpa câmu kêe, â rà ipâdi târa ê pâ âboro.  é wàrapwiri târa mwara i du ârawéà. 17  rà cau ija diri, tiagoro na rà jèe po cau pwàro diri.  rà panaimari côwâ ê dàra noo kâra poloa.  ê dèreè, âna rà pwaai 12 nakébò goo. É pwi Mesia wà Iésu Mataio 16.13–28; Maréko 8.27–9.1 18 Na jè tòotù, â é pwapwicîri acari wà Iésu. [Ûna é nabwé] â é medari tèpa câmu kêe, â é tawèerirà pâ: «Gona dà na rà ina gooò wà tèpa âboro? Rà ina pâ gona wâgo wàa?» 19  rà tòpi têe pâ: «Rà ina wà pàra pwi pâ wâgà Ioane Pwi a piupwaa.  rà ina wà pàra tàpé pâ wâgà péroféta *Élia.  rà ina wà pàra tàpé mwara pâ gà pwi jè ârapàara tèpa péroféta biu, na é wâro côwâ gée na aubà.» 20  é tawèerirà wà Iésu pâ: «Â, na wâguwà na?»  é tòpi têe wà Pétéru pâ: «Wâgà, âna gà pwi *Mesia, [*pwi a pa-udò] na gà me gée jaa Pwiduée!» 21 Êco na é nye âji papwicîri jiirà kaa na rà inapàpari pwiri. Ée mwa bà ma wâro côwâ 22 É ina tàra pâ: «O tèepaa ê pàara, na go mwa dau pwa ê maagé côo na wâgo *Pwina naîri âboro. Ba wà tèpa pitûâ; ma wà tèpa caa kà tèpa pwa *ârapwaailò; ma wà tèpa *dotée goro ê Naèà, âna o nye tàutàra gooò.  rà mwa pwa ma go bà. Êco na, naa na béâracié kâra tòotù gée na càùé, âna go mwa wâro côwâ.» Pai pâra wiâê 23 É ina tà diri tèpa âboro wà Iésu pâ: «Wiàna nüma cè pwi jè âboro na é me wiâô, â é cibwaa mwa tà piniimiriê côwâ. Â, diri na pâ tòotù, âna wâdé na é kâa ê *kurucé kêe, â é me wiâô. 24 Ba wà pwina nümee na é ipwamuru ê wâro kêe, âna ée mwa tubatiàu.  wà pwina é panuâ ê wâro kêe ba kôo, âna wà pwiibà, âna ée udò [â o tâa têe ê *âji wâro]. 25  târa dà kà pwi âboro na é tòpi diri ê pâ neemuru gòropuu, wiàna é tubatiàu ê nyuâaê? 26 «Wà pàra tàpé, âna rà kamu gooò ma ê popai kôo na ara pâ âboro. Â, na wàrapwiri, â wâgo, Pwina naîri âboro, âna go o mwa kamu goorà, wiàna go o mwa me, [naa na pwi tòotù kôo. Na pwi tòotù-bà] â o paari ê pai maina ma muugère ma pai pwicîri kâbà, ma Caa kôo ma wà tèpa *angela kêe. 27  go ina tàwà ê âjupâra pâ: Wà pàra tèpa gére wâni nabà, âna rà bwaa côo ê pai tèepaa kâra i Mwaciri kà Pwiduée, béaa kâra cè pai bà kàra.» Paari pai maina ma muugère kà Iésu naa gòrojaa Mataio 17.1–8; Maréko 9.2–8 28 Wâpâ na 8 tòotù gée na càùru ê pai ina kà Iésu pwiri, â é popa wà Pétéru, ma Ioane, ma Jacques.  rà too, naa gòrojaa, ba na rà pwapwicîri wê. 29 Ûna é gére pwapwicîri wà Iésu, â pitòotéri pai côo ê naporomee.  pâra ma po dau pwaa ê pâ ârabwée kêe, â é pwâra. 30-31  ru nye tèepaa kaa wà *Moosé ma wà Élia, [tupédu péroféta béaa].  po dau maina awé ê muugère kà Pwiduée naa goorà.  rà pitùra ma wà Iésu goro ê pai o bà kêe na *Iérusaléma. Ba o wàrapwiri ê pai o pacoo [ê auniimiri kà Pwiduée gée na biu]. 32 Ûna rà gére wàrapwiri, âna rà tàgére puu wà Pétéru ma wà tupédu a câmu bée, goro pai oratàra. Ûna rà tàcî, â rà côo ê pai muugère kà Iésu, â rà côo wà tupédu péroféta, 33 na pwa na ru pâra jiirà.  é nye ina kaa wà Pétéru pâ: «Pwi a pwa pupûra, nye po dau wâdé tâbà, na bà gére tâa ni jaagà.  wâdé na bà pacima cè tèpa âracié nacapè—ba kâgà jèpwi, â kà Moosé jèpwi, â kà Élia jèpwi.» É ina pwiri, ba câé caa tâmogòori cèna é ina, [goo pai dàpàgà têe]. 34 Na é bwaa gére tùra, â é nye tèepaa me kaa ê jè nee, â é cajipirà.  po dau wâgotàra ma wà tupédu a câmu bée. 35  rà têre ê pwâratùra gée na nee, na ina pâ: «Wà pwini, âna wàé co kaa pwiri, wà Pwina naîô [na caapwi co] na go pitòrigarié.  guwà pitêre dèe.» 36 Ûna é nabwé i pwâratùra, â jèe nye tà wàilà acari ma wà Iésu.  càra caa pwa jèkutâ goo, naa na pâ parui na wâru. É nama wâdé côwâ pwi jè èpo na pwa duée gooé Mataio 17.14–18; Maréko 9.14–27 37 Na dàuru kêe, â rà boome côwâ gée gòrojaa wà Iésu ma wà tèpa âracié a câmu kêe.  rà medarirà pâ âboro na dau wâru. 38  pwi jè ârapàararà, âna é tomara too, ma ina tà Iésu pâ: «Pwi a pwa pupûra, go ilari jiigà pâ, gà pitu tà pwina naîô, na é caapwi co. 39 Ba é mu popaé ê duée, â é mu nama é uu, ma tûu ma pòtàta pâ napuu, â é nama còobé ê pâ oropwêe.  é mu po dau pwatarié, ma tubaèpà têe, béaa kâra pai còobé kêe gée gooé. 40  go ilari jii tèpa câmu'gà pâ, na rà tü târa i duée, êco na càcaa pâri naa goorà.» 41  é ina tàra wà Iésu pâ: «Au, [go nyi meaariwà] wâguwà tèpa âboro nabà! Ba bwaa câguwà caa cèikî, â guwà tèpa imwüru! Tiagoro wiidà na go o bwaa nye tà tâa jaawà, ma pidàpwicâariô naa goowà? Popa me cai naani i pwi nari âboro èpo!» 42 Ûna rà gére popaé me, â i duée, âna é tüê boo naa napuu, â é nama é céca.  é nye pwa kaa i duée wà Iésu.  é nye nama tiàu maagé kà pwini, â é naaê tà caa kêe. 43  rà po dau pò wà diri tèpa âboro, na rà côo ê câmu bèepwiri kâra ê pàtàma Pwiduée na dau maina. Wà tèpa âboro, âna rà picâdiri diri ê pwina é pwa wà Iésu.  é ina tà tèpa câmu kêe pâ: Pàra popai kà Iésu tà tèpa câmu kêe Rà o pwa ma go bà Mataio 17.22–18.6; Maréko 9.30–41 44 «Guwà têre bwàti, ma tà niimiri ê pwina go ina tàwà: O mwa icurio tà tèpa âboro, wâgo Pwina naîri âboro.  rà o tâjùruo, â rà o pwa ma go bà.» 45 Êco na càra caa tâmogòori ê pwina é ina. Ba cârü tàra ê pai ina wèe.  wâgotàra na rà tawèerié goo. Wà pwina é imaina naa na Mwaciri 46 Gée na càùé, â rà tapoo pitòocia wà tèpa câmu. Rà pitawèerirà pâ, o wàilàapà gée goorà cè pwina pwamuru naa gooé. 47 Êco na é tâmogòori ê pwâra-nümarà wà Iésu.  é popa ji nari èpo, â é tòpòé boo naa goro jènereê. 48  é ina tàra pâ: «Wà pwina é tòpi naa na neeô pwi jè nari èpo pwacèwii pwini, âna é tòpio.  wà pwina é tòpio, âna é tòpi mwara Pwina é cùruo me. Ba wà pwina é dau ipakîriê, naa nabibiu kàwà, âna wàé kaa pwiri, wà pwi âboro na é imaina.» Naaco pwina câé caa cicarajè 49 É ina wà Ioane tà Iésu pâ: «Pwi a pwa pupûra, bà côo pwi jè âboro, na é tü târa ê pâ duée, naa na neegà.  pwa na bà ina têe pâ, na é cibwaa pwa, ba câé caa pwi béejè.» 50  é tòpi tàra pâ: «Guwà cibwaa pacooé! Ba wà pwina câé caa cicarajè, âna é pwi béejè.» Tàutàra gooé naa Samaria 51 O jèe tèepaa ê pàara na o mwa dàgòtù côwâ wà Iésu naa napwéretòotù.  é nye ipagòorié, ba na é pâra naa Iérusaléma. 52  é cùru béaa tèpa ipa popai kêe pâ, na rà pâra naa na jè village na napô *Samaria, ba na rà o pwabwàti ê pai o tèepaa pâ kêe. 53 Êco na wà tèpa âboro wê, âna tàutàra gooé. Ba [rà têre pâ] ée mwa caa pâra géewê naa Iérusaléma, [ville wâ napô *Judée]. 54 Ûna ru têre ê pwiibà wà tupédu a câmu kêe, wà Jacques, ma wà Ioane, â ru ina têe pâ: «Kaa! Pwi Ukai, jè mwa ilari ê ânye napwéretòotù, ba na cîri tàpéeni!» 55  é tabiié Iésu, â é nye pwaru kaa: {«Câgàu caa tâmogòori pâ po dau èpà pwâranümau! 56 Ba wâgo Pwina naîri âboro, âna câgo caa me, ba na rà bà wà tèpa âboro.  go me, ba na rà udò.}»  rà pâra naa na jè village. Tàpé na nümarà na rà pâra wiâ Iésu Mataio 8.19–22 57 Na rà pâra wii naigé, â é medari Iésu wà pwi jè âboro, â é ina têe pâ: «[Nümoo na go pwi a câmu'gà] â go o pâra wiâgà, naa na diri cè ére cèna gà o pâ wê.» 58  é tòpi têe wà Iésu pâ: «Ê pâ macii a piugà, âna pwa aucârü kàra, â pâ marü, âna pwa na wânaîrà.  napwa naa gooò, Pwina naîri âboro, âna nye ticè aunao kôo.» 59  ipaiwà naa goo pwi jè âboro. Ba é ina têe wà Iésu pâ: «Gà me wiâô.» Êco na é ina têe wà pwini pâ: «Tàpo coo. Ma go jèe mara pâra nau ipwàniri caa kôo.» 60  é tòpi têe wà Iésu pâ: «Bwa, gà naaco tèpa bà, ma rà nye ipwànirirà côwâ!  wâgà, âna gà pâra, â gà inapàpari ê Mwaciri kà Pwiduée.» 61 Napwa naa goo pwi jè âboro, âna é ina tà Iésu pâ: «Üu, co Pwi Ukai, go o mwa pâra wiâgà. Êco na gà naaô ma go mara picijii ê tâa kôo.» 62  é tòpi têe wà Iésu pâ: «Wà pwina é tòpò îê naa goro ê béû, â é ciburà niâ wâjué côwâ, âna wà pwiibà, âna o càcaa pâri ma é tò naa na Mwaciri kà Pwiduée.» |
© 2012, Wycliffe Bible Translators, Inc. All rights reserved.
Wycliffe Bible Translators, Inc.