Ioane 9 - PaicîÉ nama é niâ pwi a bwi 1 Ûna é pâra wii naigé wà Iésu, â é côo pwi jè âboro, na é pwi a bwi gée na aukîri kêe. 2  rà tawèerié wà tèpa *câmu kêe pâ: «Pwi ukai, cina é bwi wà pwini? Pwiri gée goro cè èpà kêe, é, gée goro cè èpà kà du nyaa ma caa kêe?» 3  é tòpi tàra pâ: «Bwa, càcaa gée goro èpà kêe, â càcaa gée goro cè èpà kà du nyaa ma caa kêe. Ê pai bwi kêe, âna pwa, ba na paari ê pàtàma Pwiduée naa gooé. 4 Ba, na pàara naa bwaa pwaa, âna wâdé na jè pacoo ê pâ wakè kà Pwina é cùruo me. Ba é wâmwünyabwe ê bàutê, â o jèe nye ticè âboro na pâri ma é wakè na bàutê. 5 Ba, na go bwaa wâni gòropuu, âna go pwéelaa kâra ê gòropuu.» 6  é èdu boo naa napuu, â é biinaimari ê nüru èdu kêe ma puu.  é tâmi ê du parawére âraporomee i pwi a bwi. 7  é ina têe pâ: «Gà pâra nau nuwagà naa najawé Siloé.» (Siloé, âna pai ina wèe pâ ‘Cùrué’.)  é pwa wà pwini, â ûna é wâjué me côwâ [naa pwârawâ] â é jèe nye niâ! Rà pò gooé tèpa âboro 8 Wà tèpa âboro na rà wâro goro jènereê, ma wà tàpé na rà mu côoê na é mu ila, âna rà pò ma pi-ina tàra pâ: «Gona càcaa wà i pwi âboro na ia é mu nye tà tâaboo burà ila?» 9  rà ina wà pàra tàpé pâ: «Akaé.» Êco na rà ina wà pàra tàpé mwara pâ: «Bwa! Pwacèwii naa wàé.»  wà pwiibà, âna é tòpi tàra pâ: «Bwa, nye wâgo kaa.» 10  rà tawèerié pâ: «Ico pwini, gà wànau târa ê pai pwa wèe ma gà côojè?!» 11  é tòpi tàra pâ: «Wà pwi jè âboro na nee Iésu, âna é pwa ma go côojè. Ba é bii ê puu, â é tâmi ê du parawére âraporomeeô goo.  é ina tôo pâ, na go nuwao naa najawé Siloé. Ûna go wàrapwiri, â go nye niâ kaa!» 12  rà ina têe pâ: «Â é wâpà wà pwi âboro-bà?»  é tòpi pâ: «Îi, câgo caa tâmogòori.» Rà tawèerié tèpa Farasaio 13 Rà popa wà i pwi a bwi, pâdari tèpa *Farasaio. 14 Ba napwa ê tòotù bèepwiri ia é bii i puu na wà Iésu, ma é pwa ma é niâ, âna tòotù pwicîri. 15  rà tawèerié mwara wà tèpa Farasaio, goro ê pai niâ kêe.  é tòpi tàra pâ: «É tâmi i du parawére âraporomeeô goro dùuru, â go nuwa, êkaa na go niâ.» 16  jèe pâra nau pitadàrù ê pai tâa kàra. Ba rà ina wà pàra tàpé pâ: «Wà pwi âboro na é pwa pwiri, âna câé caa me gée goo Pwiduée! Ba câé caa papwicîri ê *tòotù pwicîri!»  rà ina wà pàra tàpé pâ: «Bwa, wiàna é pwi âboro èpà, â pwiri càcaa pâri ma é pwa ê pâ *câmu kâra pàtàma Pwiduée.» 17  rà tawèeri mwara i pwi âboro a bwi pâ: «Dà cè pai niimiri'gà naa gooé, na é nama gà niâ?»  é tòpi tàra pâ: «É pwi *péroféta [na é me gée goo wà Pwiduée].» Rà todà du nyaa ma caa kêe 18 Wà tèpa pitûâ kà tèpa *Juif, âna càcaa nümarà na rà cèikî pâ, wà pwiibà, âna pwi a bwi béaa.  rà bwaa nye pwa mwara ma ru me, wà du nyaa ma caa kêe. 19  rà tawèeriru pâ: «Pwi naîu wà pwini?  âjupâra pâ é bwi gée na aupitèpaé?  gorodà na é niâ nabà?» 20  ru tòpi tàra pâ: «Üu kaa, é pwi naîbu.  é pwi a bwi gée na aupitèpaé. 21  é jèe niâ nabà, êco na câbu caa tâmogòori cè majoroé.  câbu caa tâmogòori mwara cè pwi âboro, cèna é nama wâdé ê du âraporomee. Wâdé na guwà nye tawèerié cai, ba jèe nye pwi âboro maina, â jèe nye pâri ma é ina tàwà!» 22 Ru ina pwiri, ba wâgotàru goo tèpa pitûâ kà tèpa Juif. Ba rà jèe pitêrerà pâ na rà o pacoo gée na *wâra pitapitiri kàra, êdiri pâ âboro na rà ina pâ wà Iésu, âna é pwi *Mesia [na é me nau pa-udò ê Ba]. 23 Wàépwiri ê majoroé ma ru ina wà du nyaa ma caa kêe pâ: «Guwà jèe nye tawèerié cai, ba jèe nye pwi âboro maina.» Rà jèu tawèeri pwi a bwi 24 Rà jèu todà côwâ wà i pwi a bwi wà tèpa Farasaio.  rà ina têe pâ: «Gà ina ê âjupâra na ara Pwiduée! Ba bà tâmogòori pâ wà pwi âboro na é nama gà wâdé, âna é pwi âboro èpà.» 25  é tòpi tàra pâ: «Câgo caa tâmogòori pâ, pwiri pwi âboro èpà.  caapwi co ê pwina go tâmogòori, âna, béaa, âna go pwi a bwi, â nabàni, âna go jèe niâ.» 26  rà ina têe mwara pâ: «Gona dà na é pwa tâgà? É wànau târa ê pai pwa wèe, ma gà niâ?» 27  é tòpi tàra pâ: «Ia go jèe ina tàwà, â tàutàwà na guwà têre!  gorodà na guwà bwaa jèu tawèeri mwara? Pwiri nümawà na guwà tèpa âboro kêe mwara?» 28  rà pwaé, ma ina têe pâ: «É! Pwiini! Nye wâgà na gà pwi âboro kêe! Ba wàibà, âna bà tèpa pâra naa goo wà *Moosé! 29 Bà nye tâmogòori pâ é patùra Moosé wà Pwiduée.  wà pwiibà, âna ji pwi a me géepà?!» É paâjupâra tàra pàtàma Iésu 30 É ina tàra wà pwiibà pâ: «Nye ité, ba é nama go niâ, êco na wâguwà, âna câguwà caa tâmogòori na é me géewê! 31  jè jèe cau tâmogòori pâ, câé caa têre tèpa âboro èpà wà Pwiduée.  é têre tàpé na rà papwicîriê, â na rà pwa ê câbawâdé kêe. 32 Mu nye ticè âboro na é nama é niâ cè pwi jè âboro, na é bwi gée na aupitèpaé! 33  wiàna câé caa me jii Pwiduée wà pwi âboro bèepwiri, â pwiri càcaa pâriê ma é pwa cèna wàrapwiri.» 34  rà putàmuriê wà tèpa Farasaio ma ina têe pâ: «Pwiini! Gà pwa na gà pacâmuribà, wâgà na gà pé pwi a pwa na èpà, gée na aupitèpagà?»  rà tü têe gée na wâra pitapitiri. É cèikî naa goo Iésu 35 É têre wà Iésu pâ rà tü tà i pwi ia é bwi, â é pâmariê.  é ina têe pâ: «Gà nye cèikî naa goo wà *Pwina naîri âboro?» 36 «Pwi ukai, wàilàapà pwiri, ba na go cèikî naa gooé?» 37 «Gà jèe tàgére côoê, ba wàé na é tàgére patùragà!» 38 «Üu, co Pwi Ukai, go cèikî naa googà!»  é cigòboo ma tùu jùrué na ara Iésu. Tàpé na tàutàra na rà côo 39 É ina wà Iésu pâ: «Go tèepaa me naani gòropuu, na pinaaitiri tèpa âboro—ba na rà niâ tèpa âboro na rà bwi; â na rà bwi tèpa âboro na rà niâ.» 40 Na rà têre pwiri wà pàra tèpa Farasaio, na rà gére tâa wê, â rà ina têe pâ: «Wànau? Wàibà mwara âna bà tèpa bwi?» 41  é tòpi tàra pâ: «Wiàna guwà gére tèpa bwi, â pwiri nye gére ticè èpà kàwà. Êco na guwà ina pâ guwà niâ. Êkaa na guwà tà tâa na ê èpà kàwà.» |
© 2012, Wycliffe Bible Translators, Inc. All rights reserved.
Wycliffe Bible Translators, Inc.