Hébéru 1 - Paicî

iésu kériso âna é piwéna jii diri (Naporomee 1.1–4.13)

¹ Na pàara biu, âna é pipatùrari wà tèpa jojoorojè wà Pwiduée, na rà naigé mee tèpa *péroféta kêe goro pàra pai pwa wèe na wâru.

² Â, na pàara nabà—naa na pâ bénabwé tòotù—âna é patùrajè, goo wà Pwina naîê. Ba gée gooé, âna wà Pwiduée, âna é tapoo ê napwéretòotù ma ê gòropuu, bau diri pâ muru na tâa na. Â nye wàé kaa na é pitòrigarié wà Pwiduée, ba na ée mwa panuâ têe diri pâ pwiibà.

³ Na jè côo Pwina naîê, â jè côo ê pai muugère ma pai maina kà Pwiduée Caa. Ba ipaiwà wàilu naa na diri pai pwa wèe. Diri pâ muru, âna rà cau tèepaa ma wâro, gée goro ê popai kêe, na dau pwa pàtàmee. Nye wàé kaa, Pwina naîê, na ia é cèitiri ê pâ èpà kâjè. Â gée na càùé, â é wâjué côwâ naa jaa Pwiduée, na é wânidò *napwéretòotù. Â wà Pwiduée—wà Pwina dau pwa pàtàmee—âna é nama é tâaboo naa gòro âji îê [ba na é pitûâ kâra diri pâ muru].

É piwéna jii tèpa angela

⁴ Wà Pwiduée, âna é nama é piwéna jii diri tèpa *angela, wà Pwina naîê. Â é naa têe pwi neere âboro, na dau pwamuru naa goo, jii diri pâ neere âboro.

⁵ Ba câé mu caa ina tà pwi jè angela wà Pwiduée pâ: Wàéni popai kôo, na go ina nabà: Gà pwina naîô, â go pwi caa'gà. Psaume 2.7 é, Go o pwi Caa kêe, â ée mwa pwi naîô. 2 Samuel 7.14

⁶ Ûna é paari Pwina naîê, tà tàpé na rà tâa jaaé, â é naa têe ê tàrù kà pwi ciàra èpo, â é pitûâri pâ: Wâdé na wà diri tèpa angela kôo, âna rà o cau ipwamainaê diri. Psaume 97.7

⁷ Napwa naa goo tèpa angela kêe, âna é ina wà Pwiduée: Go nama rà pwacèwii ê pwéretòotù; Rà o pwacèwii ê doromara ânye. Psaume 104.4

⁸ Êco na wàéni ê pwina é ina naa goo wà Pwina naîê: Wâgà co [Pwina naîô] âna wâgà Pwiduée ! O ticè pwâadàra ê Mwaciri'gà. Gà mwa Pwi Ukai dàra gòiri awé. O *tàrù ê pai pitûâ'gà.

⁹ Gà wâdéari ê tàrù, â gà miiri ê èpà. Â wâgo, Pwiduée Caa'gà, âna go jèe pitòrigarigà jii diri tèpa béegà. Go wicèpwiri ê jawé ûrea naa gòro pûrugà. Go nama rà pipwamainagà; go naa tâgà ê pipwàdée, na dau maina awé. Psaume 45.7–8

¹⁰ É ina mwara wà Pwiduée, naa goo Pwina naîê pâ: Naa na autapoo goo, âna nye wâgà, Pwi Ukai , na gà pwi a tòpò ê pàara gòropuu. Gà pwi a bari iri napwéretòotù.

¹¹ O mwa tiàu ê gòropuu diri, ma napwéretòotù, ma diri pwina tâa na. Êco na nye wâgà co na o mwa tâa awé.

¹² Gà o cùurà pwacèwii ârabwée; Gà o pipîrirà pwacèwii dòro aupuu. Â nye wâgà co, na gà nye tà tâa awé; Gà nye tà wâro dàra gòiri! Psaume 102.26–28

¹³ Â wàéni jè muru na ia é ina wà Pwiduée: “Gà me ma gà tâa ni. Tâa ni gòro îô étò. [Go naa tâgà ê pitûâ. O pwamainagà awé.] Go nama gà còogai tèpa ipaa dàgà.” Psaume 110.1 Gona guwà niimiri pâ, é ina pwiri tà pwi jè angela kêe? [Bwa! É ina pwiri tà Pwina naîê!]

¹⁴ Ba napwa naa goo wà tèpa angela, âna rà tèpa ênawéna co. Ba é cùrurà wà Pwiduée, ba na rà pitu tâjè, wàijè na ée mwa pa-udòjè, [ma naa tâjè ê *âji wâro jaaé].