รูด 3 - Prai Bibleรูด เริล และ โบอาด 1 อุ เจ็นนัน วัล นาโอมี ก็ ไล รูด คือเน “ควัน เอิญ และ คล็อง อน มัห ก็ เลาะ ซัง มัห มี ครอบครัว เป็น คอง ออ ฮัก นอ 2-3 โบอาด นัน ตี มัห เริล แองกาน เลิม เคิบ ลูกนอง นำ นัน นำ เป็น ควน นไจ อา แตๆ นัน ดาย ควัน เจ็นเน มัห ต็อง ปัง แญง เม ดาย ควัน แจ็ล เน งวะ โบอาด วี ซา บาเล นอ มัห ต็อง เริล และ นำ แจ็ล เน มัห ก็ เอิม นอก วาล ซิห นำฮอม จึห คัว เลาะลัห ทีซุด แลว มัห แตงตัว เลียบลอย แลว มัห ก็ เริล และ นำ ตัก ตี อัห วี ซา นัน แต มัห อำ ระ อัห เม็จ นัง ออ ดาย กัน แลว อัห วี ซา แลว อัห อิม จะ แลว อัห ออก ปุจ องุน อิม แลว 4 มัห ก็ พก ดอม โบอาด นำ อวย ตัก นเดย มัห เม็จ ตี นำ อวย แลว มัห ก็ จอม โตะ มพึห มบอด ตัก เจ็ง นำ มัห ก็ อวย ติๆ ตัก เจ็ง นำ นัน เจ็นนัน กัน โบอาด ร็อห ลัก แลว กัน นำ เม็จ มัห แลว มัห แอง จังนัก วัล โบอาด ก็ ไล อน มัห ฮัก” เมเทา นำ อัง 5 รูด ก็ ปัง แญง เมเทา ออ มด จู มบลึ 6 แจ็ล แลว นำ ก็ เริล ตัก ตี โบอาด วี ซา นัน 7 แลว โบอาด อิม จะ อิม ออก เลาะ แลว นำ ก็ เลาะใจ เลาะ คอ นำ ก็ เริล อวย เพา มบรูจ ซา นัน ทาเน รูด ก็ จอม โตะ ตัก มบรูจ ซา นัน นำ จอม โตะ มพึห มบอด ตัก เจ็ง โบอาด นำ ก็ อวย ติๆ นดิ เจ็ง โบอาด นัน 8 ทาเน เคิง เดิก โบอาด ก็ เกล นัง นำ ก็ เพลิด นทัน นำ นทัน เม็จ มี ครำ อวย อุ ติๆ นดิ เจ็ง ออ นัน 9 นำ ก็ ซ็วน “อีเอ นะ เออะ” นำ อัง รูด ก็ ไล นำ “เอิญ รูด ดาย เอิญ เป็น ลูกนอง คอง มัห ดาย เอิญ เม็จจึด มัห เป็น ควน นไจ เพียห คล็อง เอิญ แตๆ เน ดาย เอิญ ก็ ลด ครอ ระ มัห เอิด นทัล โกบ ออ ทึม เอิญ ระ เอิญ เป็น ยัห มัห ดาย” รูด อัง 10 โบอาด ก็ ไล นำ คือเน “ครอ ระ เอาซาง อวยพอน มัห แอง เลาะๆ ซิห มัห ฮัก ดาย ควัน ตี มัห ครอ ระ เอิญ เอิด มัห เป็น ยัห เน ก็ เลาะ ซีเละ มัห แอง เลาะ แอง ซือ เคิบ เมเทา ออ แลว ตี มัห ครอ เอิญ ฮุนเน มัห ก็ เฮง แอง เลาะ แอง ซือ เคิบ กรอก คล็อง มัห วัล ควัน บาว ฮัง ควัน บาว ตุก มัห ก็ ไอ มี เอิด มัห และ คล็อง ตัก ควน นไจ เอาเทา ออ ฮัก 11 ตี มัห โตะ ครอ เอิด เอิญ เน ก็ อำ ทืล เตาะ เอิญ กิว เอิด มัห ดาย มัห เป็น ครำ เลาะ ซีเละ ครำ ทัว เมือง เน อัห เม็จ มด แลว เค็ย มัห เป็น ครำ เลาะ เอิญ ก็ แอง จู มบลึ ตาม แญง มัห ครอ นัน ดาย 12 เอิญ เป็น ควน นไจ คล็อง มัห ตี เปิล เริล แลว นอ เอิญ ก็ มี นาตี เอิด มัห เป็น ยัห ออ แตน นำ นังเลาะ แต มี ปันฮา มี ติด คล็อง มัห มี ควน นไจ แตๆ มี ล็อง วัล นำ มี ซิด เอิด มัห ดก กวา เอิญ เอิญ เป็น ควน นไจ ฮาง มี ติด 13 แจ็ล เน มัห อวย เน วาล ดาย ปัห ซะ ซัง เอิญ เริล ซ็วน อ็อญ ล็อง นัน กัน นำ ฮับพิดซอบ เอิด มัห เป็น ยัห ออ เอิญ ก็ ระ นำ เอิด มัห ฮัก แต กัน นำ ไอ มี เอิด มัห เป็น ยัห ออ เอิญ ก็ เอิด มัห กุญ เอิญ ครอ ซาบาน เคิบ มัห เคิบ มัด เอาซาง ตัก รีด อุ ตลอด เค็ย เอิญ ฮับพิดซอบ มัห ฮัก ดาย แต แจ็ล เน มัห อวย ตัก เน วาล จำปอ ปัห ซะ ดาย” โบอาด อัง 14 รูด ก็ อวย นดิ เจ็ง โบอาด นัน จำ งกร็อห แต รูด ก็ ตุด ร็อห งกร็อหๆ ควะ ม็อญ ซะ อุ นำ ไอ มี ซีรอก ระ อัหซอ เม็จ ออ เพาะวา โบอาด เพีย ไล นำ วาล แลว เค็ย ไอ มี ระ ซีเอ เม็จ นำ โตะ ตัก นัน รูด ก็ ไอ มี ระ ซีเอ เม็จ ออ เตาะ 15 ทาเน รูด ก็ มี โกบ นซุบ ออ โบอาด ก็ ไล นำ ซับ โกบ นซุบ นัน ตัก ออ โบอาด ก็ พอง ซา บาเล ฮก คนาน ปก ซิห ตัก โกบ นซุบ รูด นัน นำ ก็ จวย ญ็อก ซิห ตัก แพน รูด รูด ก็ ตอล ซับ ตัก เมเทา ออ 16 โตะ รูด ตัก เจิง แลว เมเทา นัน ก็ ราบ ซ็วน รูด “มัห เป็น จังนัก ควัน” นำ อัง รูด ก็ เลามุน อน ตัก เมเทา ออ ปัง มด จู มบลึ ตี โบอาด ไล นำ นัน 17 รูด ก็ ไล เมเทา ออ คือเน “ซา บาเล ฮก คนาน เน ก็ นำ ปัน อน ตัก เอิญ ลือๆ ดาย เม นำ เค็ย เอิญ วัล นัง ลือ โตะ และ มัห ก็ ไอ มี เลาะ” รูด ไล เมเทา ออ คือนะ 18 นาโอมี ก็ ไล รูด คือเน “ควัน เฮย ครอ ระ มัห ซอดแซ็ง เพา ปัง เลือง เน วาล ดาย อ็อญ เจือ เป็น จังนัก เอิญ แก็นใจ เจือ เค็ย โบอาด จัดกาน เลือง เน ระ แลว แอ็ม งิ นะ เน งวะ นำ ไอ มี เซย อุ ดาย” เมเทา นำ อัง |
Global Partners
Global Partners