โรม 13 - Prai Bibleเลือง แอ อุ เลาะ ตาม กดมาย 1 ทาเน ครอ ระ แป ปัง เจานาที ตัก มี อำนาด ปกคอง แป ดาย เพาะวา เอาซาง ฮัก ตัง ระ อัห มี อำนาด ปกคอง แอ กัน เอาซาง ไอ มี ระ อัห มี อำนาด อัห ก็ ไอ มี อำนาด เตาะ เจ็นเน แอ ก็ ต็อง ปัง แญง อัห เลาะๆ ซัง เลาะ ดาย 2 เจ็นนัน กัน เอา นเดย ไอ มี ปัง แญง อัห ก็ มอก อัห ไอ มี ปัง แญง เอาซาง นัน นำ ก็ ต็อง กุญ โทด วัล ดาย 3 กัน แอ ไอ มี แอง พิด แอ ก็ ไอ มี จำเป็น นเจิก อัง อัห เตาะ แต ครำ แอง พิด อัห ก็ ต็อง นเจิก อุ แลว นอ กัน แอ ไอ มี ซีรอก ระ ปึง เจานาที ลงโทด ออ แอ ก็ ต็อง ปัง แญง อัห เลาะๆ อัห เม็จ แอ ปัง แญง ออ เลาะ อัห ก็ อวด แอ วัล 4 แอ ต็อง ปัง เจานาที ดาย เพาะวา อัห เป็น ลูกนอง เอาซาง อัห แองกาน ตาม นาตี ออ ระ เป็น ปะโยด ตัก แอ วัล แต กัน แอ แอง พิด แอ นเจิก อัง อัห ก็ ซมควน แลว เพาะวา อัห กิว มี อำนาด ดาย อัห ลงโทด แอ จังนัก ก็ กุญ มด อัห เป็น ลูกนอง เอาซาง ดุห อัห ก็ มี นาตี จัดกาน ครำ ไอ มี เลาะ แตน เอาซาง 5 เจ็นนัน แอ ก็ ต็อง ปัง เจานาที ตัก มี อำนาด ปกคอง แอ ซัง เลาะ ตี แอ ปัง แญง อัห ก็ ไอ แมน แอ นเจิก อัห ลงโทด มี มบลึ เดียว แอ ปัง แญง อัห ก็ เพาะวา แอ ก็ ซึลใจ แอ ก็ เม็จ ใน ใจ ออ เค็ย ไอ มี พิด ซีวะ เตาะ 6 เจ็นเน แอ ก็ ต็อง เซีย พาซี ดาย เพาะวา ครำ ตี เก็บ พาซี นัน อัห ก็ ฮับไจ เอาซาง อัห ปกคอง แอ ก็ เป็น งาน ตี เอาซาง ระ อัห แอง ฮัก 7 จังนะ ดาย ครอ ระ แอ ต็อห เงิน อน ตัก อัห ตาม กดมาย ตาม ระเบียบ ทุก ยาง ดาย เป็น พาซี เป็น คา ทำเนียม แอ ก็ ต็อง อน อัห มด แอ ก็ ต็อง ญอม ปัง เจานาย จู ล็อง แอ อน เกียด ตัก อัห ซัง เลาะ เลือง แอ อุ เลาะ เคิบ นอย 8 เลือง เป็น นี อัห ก็ ซำคัน แอ เป็น นี อีเอ แอ ก็ ต็อง อน แอ็ม แต แอ เป็น นี มี ยาง แอ เป็น นี รัก นอย แอ ต็อง รัก นอย ฮัก นี นัน ไอ มี งิ ซุด แอ็ม เตาะ ครอ ระ แอ รัก นอย ตลอด จำ นเดย จำ กวา ดาย กัน แอ รัก นอย ก็ มอก แอ แอง ทุก ยาง ตาม กด เอาซาง เลาะ แลว 9 กด เอาซาง มี ดก คอ นอ “อำ ปิล จู อำ มเบิล อัห อำ ลอด ซะ อัห อำ โซะ กุญ ซะ อัห” กด อัง แต กัน แอ แอง ตาม กด มี คอ เน ตี เค็ย “แอ ต็อง รัก อัหซอ มอก รัก นัง ออ” ก็ มอก แอ แอง ตาม กด มด จู คอ แลว 10 กัน แอ รัก อัหซอ แอ ก็ แอง เลาะ เคิบ อัห ตลอด ไอ มี จบ แอง ลุห ซีวะ ซิห อัห เตาะ กัน แอ รัก นอย ก็ มอก แอ แอง ทุก ยาง ฮุน กด เอาซาง ไล อน แลว 11 ตี เอิญ ครอ ระ แป รัก นอย ฮุนเน ก็ เพาะวา มานะ เน เป็น เวลา ซำคัน ซีเละ ดาย แอ ต็อง ปัง นึง อุ เลาะๆ เพาะวา งิ ตี เอาซาง ระ แอ ปน แอ็ม เจ็น ซะพาบ ไอ มี เลาะ เน ก็ บัก และ เล็ห แลว เคริบ ติ เล็ห งิ ติกๆ ไอ มี ควะ อิง มอก แอ ล็อน เจือ แมะ กำนา เตาะ 12 แอ ตี เจือ เอาซาง แอ ก็ เม็จ แลว เวลา แอ อุ ใน โลก ไอ มี เลาะ เน ก็ บัก และ ซุด แอ็ม แลว นอ มอก แจ็ล บัก และ ปัห ซะ นัน งิ ตี เอาซาง โตะ จวย แอ ปน แอ็ม เจ็น ซะ ไอ มี เลาะ เน ก็ บัก และ เล็ห แลว เอิญ ก็ ลด ครอ ระ แป เลิก แอง ซะ ไอ มี เลาะ นัน แต ครอ ระ แป แอง ซะ เลาะ ตี จวย ระ แป ไอ มี กาน แอ็ม ตัก ปรอง ซาตาน นัน ต็อง แอง มอก ทฮาน ตี เอิด อาวุด คอง ออ ซู เคิบ ซะตรู ออ นัน 13 แอ แอง ซะ เลาะ ฮัก มี ซีวิด เลียบลอย มอก ครำ อุ ตี ทาง ซะ ตัก งิ ฮัก อำ ปาย โละ แอว โละ มวน ออก ปุจ แว ดาย เลือง ปิล จู ปิล วะ กึด เจอะ กึด ราย ไอ จอง ไอ ไจ นัน ก็ อำ แอง เตาะ เลือง เซาะ นอย คอย นอย ลุห อัง นอย ก็ อำ แอง เตาะ 14 แต ต็อง ระ เยซู คริด งกีจ็อง ซับรวง แอ ฮัก ซัง เลาะ ซีวะ ตัก ซับรวง แอ แอง พิด งาย ก็ อำ แอง เตาะ อำ ระ ใจ เครม นัน แอง ตาม ใจ ออ เตาะ |
Global Partners
Global Partners