เยซู โตะ 19 - Prai Bible1 เจ็นนัน วัล เอิญ ก็ เม็จ นเซิง ปึง ครำ เอาซาง ตัก ซะวัน ทึห แร็ง นเซิง ซีเละ อัห จ็อก คือเน “โอ งกีจ็อง เฮย อิห ลือ มัห ซีเละ มัห จวย อิห ปน แอ็ม เจ็น ลุห มัห มี เกียด มี อำนาด ดก ทีซุด 2 มัห แอง เลาะ แอง ซือ ซีเละ มัห ตัดซิน แคระ ตลอด มัห ก็ ลงโทด เมือง จ็อง นัน ตี ซับรวง ครำ ทัว โลก แอง ลุห ครำ เมือง นัน อัห มเบิล แอ็ม ลูกนอง คอง มัห มัห ก็ ตอบติก แตน ครำ คอง ออ ฮัก ซาทุ เตาะ” ปึง อัห จ็อก จังนะ 3 อัห ก็ ลบ วัล ลือ เอาซาง คือเน วัล “โอ เอาซาง เฮย อิห ลือ มัห ซีเละ ญอน มัห ลงโทด ซิห อัห นัน จือ เตาะ นเทาะ โอด ตัก เมือง นัน อี ก็อห อุ ตลอด จำ นเดย จำ กวา ไอ มี งิ มเพิด แอ็ม เตาะ” อัห อัง 4 แลว ปึง ครำ เอาซาง จ็อก ตัก ซะวัน นทึห แลว ปึง พูนำ ซาวซี ล็อง เคิบ เทวาดา ซี ล็อง นัน อัห ก็ กราบ ไว เอาซาง ตัก คุด อุ เคิง ตี คุด ครึๆ นัน อัห ลด จ็อก คือเน “โอ เอาซาง เฮย อิห อวด ลือ มัห ซีเละ ซาทุ เตาะ” อัห อัง 5 เจ็นนัน เอิญ ก็ เม็จ แญง นะ เจ็น ตี คุด ครึ นัน แญง นัน จ็อก คือเน “แอ เนอ ครอ ระ แอ มด จู ล็อง ลือ เอาซาง งกีจ็อง คอง แอ เนอ ตึง ซะ แกะ ตึง ครำ ทำมาดา ตี ทือ นำ ตี เกงใจ อัง นำ นัน ครอ ระ แอ มด จู ล็อง ลือ งกีจ็อง คอง ออ เนอ” แญง นะ อัง 6 เจ็นนะ เอิญ ก็ เม็จ นเซิง นะ เป็น แญง จ็อก แร็ง นเซิง ซีเละ มอก นเซิง ครำ ดก ล็อง นซาก อุ แร็ง นเซิง มอก นเซิง นอก คลิห เจ็น ทึห ซะ แร็ง นเซิง มอก โกระ เคิร แร็ง นเซิง ซีเละ อัห ก็ จ็อก คือเน “ครอ ลือ เอาซาง ตัก เป็น งกีจ็อง คอง แอ นำ มี แร็ง มี อำนาด ดก ทีซุด นำ แอง ซีวะ ก็ กุญ มด จู มบลึ ครอ ลือ นำ ซีเละ เพาะวา นำ โตะ ปกคอง โลก เน แลว 7 ครอ ระ แอ เลาะใจ เลาะคอ ลือ เอาซาง งกีจ็อง ดาย เพาะวา และ เล็ห เวลา ควัน แกะ แตงงาน ออ แลว เจาซาว คอง นำ ก็ พอม แลว 8 อัห ก็ อน พา ลินนิน ยาง เลาะ พัห ซัล ระ เจาซาว จึห” อัห อัง (พา ลินนิน เลาะ นัน ก็ ซีแล็ม เค็ย ซะ เลาะ ตี ครำ เอาซาง แอง นัน) 9 เจ็นนัน วัล เทวาดา ก็ ไล เอิญ คือเน “มัห ต็อง เคียน ระ อน คือเน ดาย จู ล็อง ตี ควัน แกะ มพอล อัห โตะ แตงงาน ออ นัน อัห ก็ กุญ เลาะ ซีเละ” นำ อัง นำ ก็ ลบ ไล เอิญ คือเน วัล “กึด เลาะๆ ดาย จู มบลึ ตี เอิญ ไล มัห เน ก็ เป็น แญง นังเลาะ คอง เอาซาง” เทวาดา ไล เอิญ จังเน มัดทิว 22:2-3 10 เอิญ เม็จ เทวาดา ไล ออ คือนะ แลว เอิญ ก็ บัก และ กราบ ไว นำ แต นำ ก็ มบราง เอิญ ไว ออ “อำ จบ ไว เอิญ เตาะ แอ ก็ เป็น ครำ ฮับไจ เอาซาง เลิม นอย นัน เอิญ เคิบ มัห ก็ เป็น ครำ ฮับไจ เอาซาง เลิม ควน นไจ มัห จู ล็อง ตี แก็นใจ เจือ แญง เยซู นัน อัห ก็ เป็น ลูกนอง เอาซาง เมือนนอย มด ครอ ระ แอ ไว เอาซาง ฮัก ซัง เลาะ เพาะวา เลือง ซำคัน ทีซุด ตี ลาม เอาซาง ไล อน นัน ก็ เป็น เลือง เยซู มด ฮัก แอ ไว เอาซาง ฮัก ซัง เลาะ” เทวาดา อัง มี ล็อง ต็อก มา พัห 11 เจ็นนัน วัล เอิญ ก็ เม็จ ซะวัน พลาง อุ เอิญ ก็ เม็จ มา พัห มี นัง นะ ญ็อง อุ นัน มี ครำ มี ล็อง ต็อก มา พัห นะ อุ ซือ นำ ตัก “ครำ เลาะ ครำ ซือ ตี เจือ ใจ กุญ” นำ ตัดซิน อัห ญาม นเดย นำ ก็ ตัดซิน แคระ ตลอด นำ ไอ มี โกง อัห เตาะ นำ ต็อง ดอม เลาะๆ วาล กัน นำ เม็จ อัห กิว พิด ซีเละ ซัง นำ กอย เริล ฮบ อัห นำ ไอ มี จบ ฮบ ครำ เลาะ เตาะ 12 แก็น มัด นำ ก็ กรึห มอก โอด นำ ซุก มงกุด ตัก กึ ดก อัน ตัก นัง คอง นำ ก็ มี ซือ เคียน ติด อุ วัล ซือ ตี อัห เคียน นัน ซีแล็ม เค็ย ซีวะ ก็ ไอ มี ซีเอ เม็จจึด เตาะ นำ มี ล็อง เดียว เม็จจึด 13 นำ ก็ จึห โกบ ตี จุบ ตัก เมียม อัห แทก นำ ตัก “แญง เอาซาง” 14 ทาเน ปึง ทฮาน คอง เอาซาง อัห ก็ ต็อก มา พัห เคริบ ล็อง นัน ตี อัห แทก นำ ตัก แญง เอาซาง นัน คัว คอง ปึง ทฮาน นัน ก็ เป็น พา ลินนิน เลาะลัห พัห ซัร อัห ต็อก มา พัห เคริบ ล็อง นัน เริล 15 ทาเน ล็อง นัน ตัก เป็น ฮัวนา อัห นัน ก็ มี ดาบ ทอก โตะ เจ็น งกาบ นำ ดาบ นัน เลิน แญง ซีเละ บัดนะ นำ ก็ เอิด ดาบ นัน ฮบ เคิบ ครำ จู กรอก ตี เป็น ซะตรู เคิบ นำ นำ ฮบ เคิบ อัห ซะนะ แลว นำ ก็ ปกคอง อัห นำ ก็ ก็อง ซีงคัล เล็ก ปกคอง อัห บัดนะ นำ ปกคอง อัห ดุ ซีเละ นำ ก็ ไจ แร็ง ไจ อำนาด คอง ออ ลงโทด ซิห อัห นำ ลงโทด อัห มอก นำ โตก องุน ระ เล็ห พุย นัน เพาะวา เอาซาง ตัก มี แร็ง ดก ทีซุด นัน นำ แร็ง อ็อด อัง อัห ซีเละ 16 ตัก โกบ ตัก นดัก คอง นำ ก็ มี ซือ เคียน ติด อุ ฮุนเน “พะเจายูฮัว ตี แกะ ทีซุด งกีจ็อง ตี แกะ ทีซุด ใน โลก” ซือ คอง นำ จังนะ เทวาดา มพอล เซ็ม โตะ ป็อง เซ็จ อัห 17 ทาเน เอิญ ก็ เม็จ เทวาดา มี ล็อง วัล ญ็อง อุ ซือ งิ นัน นำ ก็ งกรอ ปึง เซ็ม โตะ ป็อง เซ็จ ปึง ครำ เปิล นัน นำ งกรอ แร็งๆ ฮุนเน “โตะ เนอ เซ็ม เฮย โตะ ป็อง เลียง จ็อง คอง เอาซาง 18 โตะ ป็อง เซ็จ ปึง พะเจายูฮัว เซ็จ ปึง นาย พน นาย พัน เซ็จ ทฮาน มา เซ็จ มา เซ็จ ครำ ฮัง เซ็จ ครำ ตุก ครำ ญาก เซ็จ ปึง ลูกนอง เซ็จ ปึง เจานาย แกะ เซ็จ จู ล็อง จู นัง แป โตะ ป็อง แอ็ม เซ็จ อัห เน มด เนอ” เทวาดา อัง 19 เจ็นนัน เอิญ ก็ เม็จ ซัด ราย เคิบ ปึง พะเจายูฮัว ทัว โลก แพนซิก เคิบ ปึง ทฮาน คอง อัห มด อัห ก็ กุญ ใจ นอย รอม นอย โตะ ฮบ ล็อง ตี ต็อก มา พัห เคิบ ปึง ทฮาน คอง นำ วัล 20 อัห ฮบ เคิบ นำ แต จู ล็อง ตัก อุ เพียห ซัด ราย นัน อัห ก็ กาน อัง ล็อง ตี ต็อก มา พัห นัน มด แลว อัห กาน อัง ล็อง ตี ต็อก มา พัห นัน แลว เจ็นนัน ล็อง ตี ต็อก มา พัห นัน ก็ เญ็บ ซัด ราย เคิบ ลาม คีอู นัน กวาง แอ็ม นัง รีด ปาม ตัก งกุก โอด ตี มี มาด มี โอด กรึห อุ นัน ลาม คีจุ นัน เกย แอง ซะ แปลก จุ พซาซน ดก ล็อง ระ อัห เจือ ซัด ราย นัน แต นำ จุ จุม ครำ ตี ทือ ฮูบ ซัด ราย นำ จุ จุม ครำ ตี มาย นัง ออ เป็น ครำ คอง ซัด ราย นัน แต ซุดทาย นำ ต็อง คลิห อุ ตัก งกุก โอด ฮัก 21 แลว ล็อง ตี ต็อก มา พัห นัน กวาง แอ็ม ปาม แลว นำ ก็ ลด มเบิล แอ็ม ทฮาน คอง ปาม วัล นำ เอิด ดาบ ตี ทอก โตะ เจ็น งกาบ นัน มเบิล แอ็ม อัห ซุด มด เจ็นนัน ปึง เซ็ม ก็ รูบ โตะ ป็อง แอ็ม เซ็จ ปึง อัห นัน อิม มด จู นัง |
Global Partners
Global Partners