อุ ตี แลง 11 - Prai Bibleเอาซาง โทจ ครำ ลืน 1 อุ เจ็นนัน วัล ครำ อิซราเอล ก็ โป เยโฮวา เลือง อัห อด ตุก อด ญาก นัน เยโฮวา เม็จ อัห โป ออ นำ ก็ แร็ง อ็อด อัง อัห ซีเละ นำ ก็ แอง ระ โตะ โอด โทจ แอ็ม อัห จีก แอ็ม เปล คาย อัห แด 2 อัห ก็ ครอ ระ โมเซด จวย ออ โมเซด ก็ ลด ครอ เคิบ เยโฮวา โอด นัน ก็ ลิบ มเพิด แอ็ม 3 เยโฮวา ระ โอด โทจ แอ็ม อัห เคิง นัน อัห ลด มพึ ซือ ลงลุก นัน ตัก ทาเบรา (ทาเบรา ซีแล็ม เค็ย “จีก ซะ”) ครำ อิซราเอล โป โมเซด เลือง ซะ ป็อง 4 ทาเน ก็ มี ครำ กรอก ซอ เริล เลิม เคิบ ปึง ครำ อิซราเอล นัน อัห ก็ แร็ง โซะ ป็อง ปัด ซีเละ ครำ อิซราเอล ก็ โซะ ป็อง ปัด เมือนนอย อัห เญ็ม อัห โป คือเน “ปัด ป็อง ก็ ไอ มี ซีเอ และ อน ปัด ตัก แอ ป็อง บ็อห 5 กำนา ญาม แอ ควะ อุ ตัก ปะเทด อียิบ นัน แอ ก็ กุญ ป็อง คา อิม ไอ มี จำเป็น แอ ทน เตาะ แพะ แค็ล แพะ เตา ก็ มี ฮอม บัว ฮอม เตียม ก็ มี แอ กุญ ป็อง มด 6 แต มานะ เน ปืด แอ ป็อง มานา จูงิๆ ไอ มี ซีวะ แจ็ด ป็อง แอ ก็ ไอ มี แร็ง เตาะ” อัห โป ฮุนเน 7 ทาเน มานา นัน ก็ แย็ด แก็น มอก พรัน พักซี พัหๆ เลืองๆ 8-9 อี คลิห เลิม เคิบ มอก ตัก แจ็ล ตัก งกร็อห อัห ก็ เริล ซวาล เอิด ซับ เจิง แลว อัห เคิด ตัก กุล แด อัห โม แด เจ็นนัน อัห ก็ ตม แอง คนม เป็นแพ็นๆ ซียุม มอก คนม ตี อัห ตา นำมัน แลว ก็ ลบ วัล อบ ยุม มอก นัน 10 ทาเน โมเซด ก็ เม็จ อัห เญ็ม อัห โป อุ ฮุนนัน อัห จูกรอกๆ ก็ ญ็อง โป อุ ตัก ปะตู พาเต็น คอง ออ ฮัก เยโฮวา ก็ แร็ง อ็อด อัง อัห โมเซด ก็ ไอ มี เลาะใจ ปัง เตาะ 11 นำ ก็ ซ็วน เยโฮวา “เป็น ตัก ซีวะ มัห แอง เคิบ เอิญ คือเน มัห ไอ มี ปอใจ อัง เอิญ เลือง ซีวะ บ็อห มัห ไล เอิญ ฮับพิดซอบ ปึง ครำ ดก เน อังวะ บ็อห 12 ไอ แมน เอิญ แอง ปึง อัห เน เกิด เล็ห ดาย เป็น ตัก ซีวะ มัห ไล เอิญ แกบ เอิด ปึง เน มอก อัห แกบ ควัน ตอล นัน ซีวะ มัห จบ ไล เอิญ แกบ ซับ อัห จำปอ โตะ ตัก ตี ซิก คานาอัน ตี มัห ซันญา ระ อน ตัก เอาจ็อง อัห ตัก อิง นัน 13 เอิญ ไอ มี จางรู และ ปัด อน ตัก ครำ ดก มอก เน ดาย อัห เญ็ม ซีนืล โซะ ป็อง ปัด ซีเละ มัน อัห ซ็วน และ ซะ ป็อง ตัก เอิญ 14 เอิญ ไอ มี แป ฮับพิดซอบ ครำ ปึง เน เตาะ แร็ง ญาก เกิน ซำรับ เอิญ ซีเละ ดาย 15 กัน มัห แอง จังเน เคิบ เอิญ ซีเละ ก็ มัห มเบิล แอ็ม เอิญ นทึห เตาะ ครอ ระ มัห ใจ ดัว ซิห เอิญ ไอ มี ระ เอิญ อด เอิด ซะ ญาก เน วัล เตาะ มัห มเบิล แอ็ม เอิญ ก็ เลาะ” โมเซด ไล เยโฮวา จังนะ เอาซาง ไล โมเซด เลือก เอิด พูจวย เจ็ดซิบ ล็อง 16 เยโฮวา ก็ ไล โมเซด คือเน “มัห เลือก เอิด อัหแกะ อิซราเอล เจ็ดซิบ ล็อง โตะ และ เอิญ ดาย มัห ต็อง เอิด เอา แกะๆ ตี อัห เจือใจ กุญ มัห ไล อัห โตะ ญ็อง อุ เลิม เคิบ มัห ตัก พาเต็น เอิญ นัน ดาย 17 เอิญ ก็ จูล โตะ จ็อก เคิบ มัห ตัก นัน เอิญ ก็ อน ซีมาล ออ ตัก อัห มอก เอิญ อน ตัก มัห นัน ระ ปึง อัห กุญ จวย มัห ฮับพิดซอบ ดอม ปึง พซาซน นัน ไอ มี ระ มัห ฮับพิดซอบ มี ล็อง เดียว เตาะ 18 เจ็นนัน มัห ก็ ต็อง ไล ปึง พซาซน เตียม นัง ออ ระ เลาะๆ วาล ดาย งิ กรัก อัห ก็ กุญ ป็อง ปัด มัห ต็อง ไล อัห คือเน ‘เยโฮวา เม็จ แญง แป เญ็ม ซ็วน และ ปัด นำ เม็จ แป เญ็ม โป เค็ย ญาม แป อุ ตัก อียิบ แป ก็ อุ เลาะ อุ ซุก ซะบาย เจ็นเน นำ ก็ อน ปัด ตัก แป ดาย แป ก็ ต็อง กุญ ป็อง ปัด นัน ซีเละ 19 ไอ แมน แป กุญ ป็อง มี งิ เปียะ ฮา งิ มี ซิบ มี ซาว งิ ซัง 20 แต แป ต็อง ป็อง เป็น ซัวะ จำปอ ปืด ปอ กาย จำปอ ซอล ตี แป เป็น คือเน ก็ ญอน แป ไอ มี ญอม ปัง แญง เยโฮวา ตี อุ เลิม เคิบ แป นัน แป ก็ วัล โป เค็ย นำ ไอ มี เลาะ ซับ แป ทอก เจ็น ปะเทด อียิบ’ มัห ต็อง ไล อัห คือเน” เยโฮวา อัง 21 โมเซด ก็ ไล เอาซาง คือเน “ครำ ตัก อุ เคิบ เอิญ เน ก็ ดก ดาย นับ อัหคล็อง ตัก แกะ แลว ก็ มี ฮก แซน ล็อง แลว มัห เค็ย อง อน ปัด ตัก อัห ปอ ป็อง มี ซัวะ 22 แอ และ ปัด ตัก นเดย กุญ บ็อห กัน มเบิล แกะ มเบิล งัว อัห มด ก็ ไอ มี ปอ ป็อง ก้า เอิด คา ตัก นอก ทะเล มด อน อัห ป็อง ก็ ไอ มี ปอ ก้า” โมเซด อัง 23 เยโฮวา ก็ ซวัล โมเซด คือเน “เอิญ ไอ มี เจาะ ที เจาะ ลา ดาย แร็ง อำนาด คอง เอิญ ไอ มี ซุด เตาะ ไอ มี ปอ อิง แป ก็ กิว เม็จ ฮุน เอิญ เค็ย นะ” นำ อัง 24 เจ็นนัน โมเซด ก็ เริล ไล อัห มอก เยโฮวา ไล อน นัน นำ ก็ ไล ปึง เอา แกะ เจ็ดซิบ ล็อง นัน โตะ ญ็อง อุ เคิง เปล พาเต็น นัน 25 เยโฮวา ก็ จูล โตะ ตัก บด จ็อก เคิบ อัห เยโฮวา ก็ อน ซีมาล ออ ตัก ปึง เอา แกะ เจ็ดซิบ ล็อง นัน มอก นำ ไล อน ตัก โมเซด แลว ญาม ซีมาล นัน โตะ อุ เคิบ อัห แลว ปึง อัห จู ล็อง ก็ จ็อก มอก เป็น ลาม เอาซาง ฮัก แต ไอ มี อิง ก็ เค็ด งาล แอ็ม 26 ทาเน ตัก ปึง เจ็ดซิบ ล็อง นัน ก็ มี อุ เปียะ ล็อง ตี ไอ มี เริล ตัก พาเต็น เอาซาง ปาม ซือ ตัก เอลดาด เคิบ เมดาด ปาม ควะ อุ ตัก คาย ญาม นัน ซีมาล เอาซาง ก็ จูล โตะ อุ เคิบ ปาม เมือนนอย ปาม ก็ จ็อก มอก เป็น ลาม เอาซาง ฮุน อัห นัน 27 มี ครำ นุมๆ มี ล็อง เม็จ ปาม จ็อก มอก เป็น ลาม เอาซาง นัน นำ ก็ เล็ง โตะ ไล โมเซด “โมเซดๆ ลุง เอลดาด เคิบ ลุง เมดาด นัน ปาม แอง นัง ออ มอก เป็น ลาม เอาซาง ตัก คาย ดาย” ล็อง นัน อัง 28 ทาเน โยซูวา ควัน นูน ตี เป็น ครำ จวย โมเซด เจ็น นำ ควะ นุม อุ นัน นำ ก็ ไล โมเซด คือเน “โมเซด มัห มบราง ปาม จ็อก ดาย” นำ อัง 29 โมเซด ก็ ซวัล โยซูวา คือเน “มัห จบ แอง ใจ ฮอน อังวะ บ็อห อำ ทืล เตาะ ดาย ครอ ระ เยโฮวา อน ซีมาล ออ ตัก ครำ คอง ออ มด จู ล็อง จู นัง ก็ จู ครอ ระ อัห จ็อก มอก เป็น ลาม เอาซาง มด เนอ” โมเซด อัง 30 เจ็นนัน โมเซด เคิบ ปึง เอา แกะ เจ็ดซิบ ล็อง นัน ก็ วัล โตะ ตัก คาย เอาซาง อน เซ็ม ซีงูด ตัก อัห 31 เจ็นนัน เยโฮวา ก็ ลด แอง ระ เล็ห งกริม ปึห ซับ เซ็ม ซีงูด เจ็น นอก ทะเล เย็ห ก็ พาล อุ ทึห เจ็น ซิก ซม เปียะ ซอก เน เย็ห ก็ มพลิห ตัก คาย เคิบ เปล คาย ทัว มด ปุด ปิ ตัก คาย นัน ทัว เปล บัดซะ คาย นัน ก็ มี เซ็ม อุ ทัว มด ดก ซีเละ เยอะ ซะ เจ็น คาย นัน ดก กีโล ก็ ควะ มี เซ็ม อุ มด 32 โตะ เซ็ม นัน แลว ครำ อิซราเอล ก็ เญ็บ เอิด มด งิ มด แจ็ล นัน คือ งิ กรัก วัล อัห ก็ ควะ เญ็บ เอิด อุ เจ็น งกร็อห จำ แจ็ล วัล ไอ มี ซีเอ กุญ แย็ด เตาะ อัห กุญ ดก กวา ฮาซิบ ทัง วัล อัห ก็ แพ ตาก อาก ระ อน ตัก บัดซะ เปล คาย ระ งเคา 33 ญาม อัห ควะ มี เซ็ม ปอ ป็อง อุ นัน เยโฮวา ก็ แร็ง อ็อด อัง อัห นำ ก็ แอง โรก ระบาด ซิห ตัก อัห ระ อัห เปิล ดก ล็อง 34 ดก อัห เทิ๊บ ครำ ตัก นัน อัห ก็ ลด มพึ ซือ เคิง นัน เค็ย คิบโรด-ฮัดทาอาวา ซีแล็ม เค็ย “พาเฮ็ว ครำ โซะ ป็อง ปัด” 35 เจ็นนัน อัห ก็ ญาย เริล เจ็น คิบโรด-ฮัดทาอาวา นัน อัห ก็ โตะ ตัง คาย อุ ตัก ฮาเซโรด |
Global Partners
Global Partners