มาระโก 6 - Prai Bibleครำ งวัล นาซาเร็ด เซ็ห อัง เยซู มัดทิว 13:53-58 , ลูกา 4:16-30 1 ทาเน เยซู ก็ เริล เจ็น นัน ลบ โตะ ตัก งวัล ออ ตัก นาซาเร็ด นัน ลูกนอง นำ ก็ เริล เลิม 2 เล็ห วัน เซา นำ ก็ นเจ็น อัห ตัก ฮ็อง พซุม ดก ครำ โตะ ปัง อัห ก็ ญ็อก งึด อัง นำ มด อัห ก็ ซ็วน นอย คือเน “ปาโท็ห นำ เอิด แญง เน เจ็น นเดย บ็อห โตะ นเจ็น แอ อีเอ อน กำกึด อน ปันญา ระ นำ แอง ซะ แปลก เน บ็อห 3 นำ เป็น ซะลา แอง เจิง พาลือ เม นำ ก็ ตัก มารี นำ เป็น นไจ ยากอบ โยเซด ยูดาด เคิบ ซีโมน ปึง ควน อัหเม คอง นำ ก็ อุ งวัล เน เลิม” อัห อัง อัห ก็ เลอะ เซ็ห อัง นำ วัล 4 เยซู เม็จ อัห เซ็ห อัง ออ คือนัน นำ ก็ ไล อัห คือเน “ครำ จู ตี อัห ก็ ทือ ลาม เอาซาง มด แต ครำ มี งวัล เลิม อัห ก็ ไอ มี ทือ นำ เตาะ ควน นไจ นำ ก็ ตึก อัห ก็ ไอ มี ทือ นำ เตาะ” เยซู อัง 5 อัห ไอ มี เจือ เยซู ปานเดย เตาะ เยซู ก็ ลด ไอ มี ปอ แอง ซะ แปลก ตัก งวัล นัน มี แต นำ เอิด ที ออ คอบ ครำ โซะ แด ระ งาล โซะ แต ไอ มี ปอ ดก ล็อง ซัง 6 นำ ก็ งึด อัง ครำ ใน งวัล นัน ตี ไอ มี เจือ นำ เจ็นนัน นำ ก็ กวา โละ นเจ็น อัห ตาม งวัล ซอ เยซู ไล ปึง ลูกนอง เริล นเจ็น พซาซน มัดทิว 10:5-15 , ลูกา 9:1-6 7 เจ็นนัน นำ ก็ งกรอ ปึง ลูกนอง โตะ และ ออ นำ ไล อัห ทอก เริล เป็นกูๆ นำ ระ อัห มี อำนาด มบรึห ปรอง ทอก เจ็น ครำ 8-9 นำ ไล อัห คือเน “อำ แป เอิด ทง เอิด ซีวะ เริล ไจ ตัก รวง ดาย เป็น เงิน เป็น ซะ ป็อง เป็น คัว ทาย ก็ อำ เอิด เริล เตาะ แป ซุก แค็บ เอิด งเกราะ เริล ลือๆ ก็ ปอ” นำ อัง 10 นำ ไล อัห คือเน วัล “กัน แป กุด งวัล นเดย พัก อุ เจิง นเดย แป ก็ พัก อุ เจิง นัน จำปอ แป ทอก เจ็น งวัล นัน 11 กัน งวัล นเดย ไอ มี ตอนฮับ แป ไอ มี ปัง แญง แป แป ก็ ตัด แอ็ม อัห ดาย ญาม แป ทอก เริล เจ็น งวัล นัน แป ต็อง นโจ็ห แอ็ม พุน ตัก แค็บ ออ แป แอง ฮุนนัน ก็ ระ อัห เม็จจึด นัง ออ ลุห” เยซู อัง 12 ปึง ลูกนอง นัน ก็ เริล นเจ็น พซาซน ระ อัห เอิด ใจ แมะ 13 อัห ก็ มบรึห ปรอง ปัด เจ็น ครำ ดก ล็อง อัห ก็ เอิด นำมัน ปีด ซิห ตัก ครำ โซะ ระ อัห งาล โซะ ดก ล็อง เฮโรด มเบิล ยอน มัดทิว 14:1-12 , ลูกา 9:7-9 14 ทาเน พะเจายูฮัว เฮโรด เคิบ ครำ ทัว มด จู ตี ก็ เลอะ เม็จ เลือง เยซู มด แกด ล็อง ก็ เค็ย นำ เป็น ยอน ตี จุบ อัห ตัก นอก อัห กึด เค็ย นำ เปิล ลบ วัล รีด เล็ห วัล ลด มี อำนาด แอง ซะ แปลก กุญ 15 แกด ล็อง อัห ก็ เค็ย นำ เป็น เอลียา แกด ล็อง ก็ เค็ย นำ เป็น ลาม เอาซาง มอก ลาม เอาซาง ตัก อิง นัน 16 ญาม พะเจายูฮัว เฮโรด เม็จ คาว เลือง เยซู นำ ก็ กึด เค็ย เยซู เป็น ยอน ตี นำ โค็ห แอ็ม กึ กำนา “เอิญ มเบิล แอ็ม นำ แลว นำ ก็ รีด เล็ห วัล ก้า” เฮโรด อัง 17-18 กำนา วาล นัน เฮโรด เน นำ เอิด ยัห ควน ออ นำ เอิด เฮโรเดีย ตี เป็น ยัห ฟีลิบ ยอน ก็ โป นำ ฮุนเน “มัห เอิด ยัห ควน ออ มัห ก็ ลุห อัง กด เอาซาง ซีเละ ดาย” ยอน อัง เจ็นนัน เฮโรด ก็ ไล ทฮาน เญ็บ ยอน เติล ระ ตัก ลุก 19 เฮโรเดีย ก็ ควะ ลุหใจ อัง ยอน ไอ มี เลอ นโทล นำ เตาะ นำ ซีรอก มเบิล แอ็ม ยอน แต นำ มเบิล ไอ มี กุญ 20 เพาะวา เฮโรด นับทือ ยอน ระ ยอน ปอดไพ อุ ยอน เป็น ครำ เลาะ ครำ ซือ นำ เจือ ปัง แญง เอาซาง เลาะ เฮโรด ก็ นับทือ นำ ซีเละ จู ลบ ตี ยอน นเจ็น นำ นำ ปัง แลว นำ ก็ ลำบาก ใจ ซีเละ แต นำ ควะ ซีรอก ปัง อุ เมือนนอย 21 มี มี งิ นัน เป็น โอกาด เลาะ ซำรับ เฮโรเดีย เป็น งิ เกิด เฮโรด เฮโรด ก็ จัด งาน เลียง งิ เกิด ออ นำ เลียง ปึง เจา ปึง นาย เคิบ ครำ ซำคัน ทัว จังวัด กาลิลี นัน 22 ทาเน ควัน มอน เฮโรเดีย ก็ โตะ พอน อน อัห ดอม นำ พอน เลาะลัห ซีเละ พะเจายูฮัว เฮโรด เคิบ ปึง เจานาย ก็ มัก ดอม เฮโรด ก็ ไล ควัน มอน นัน คือเน “มัห ซ็วน ซีวะ ตัก เอิญ เอิญ ก็ อน มัห” เฮโรด อัง 23 เฮโรด ก็ ซันญา เคิบ ควัน มอน นัน คือเน “มัห ครอ ซีวะ เอิญ ก็ อน ตาม แญง มัห ครอ นัน ตึง ปะเทด เอิญ มี คัล เอิญ ก็ ญอม อน” นำ อัง 24 ควัน มอน นัน ก็ ทอก เริล ซ็วน เม ออ “เม เอิญ ครอ ซีวะ ตัก พะเจายูฮัว เลาะ บ็อห” นำ อัง ทาเน ก็ เป็น โอกาด เลาะ ซำรับ เฮโรเดีย นำ ก็ ไล ควัน คือเน “มัห ครอ กึ ยอน ตี จุบ อัห ตัก นอก นัน ดาย” นำ อัง 25 ควัน มอน นัน ก็ เลิบ โตะ ไล พะเจายูฮัว เฮโรด “เอิญ ครอ กึ ยอน ตี จุบ อัห ตัก นอก ซิห ตัก ทาด ซับ อน เอิญ มานะ เน ดาย” นำ อัง 26 พะเจายูฮัว เฮโรด เม็จ นำ ไล ออ คือนะ นำ ก็ เซียใจ ซีเละ แต นำ ไอ มี ซีรอก พระ แญง ออ ซีโลด นำ จ็อก เคิบ มัด ครำ ดก แลว นำ ก็ ไอ มี ซีรอก ระ พิด แญง ตี นำ ซาบาน แลว 27 นำ ก็ ไล ทฮาน เริล โค็ห แอ็ม งคอ ยอน ทฮาน ก็ ลด เริล โค็ห เอิด กึ ยอน ตัก ลุก 28 ซิห ตัก ทาด ลด ซับ อน ตัก ควัน มอน นัน ควัน มอน นัน ก็ เอิด ซับ อน ตัก เม ออ 29 ญาม ลูกนอง ยอน เม็จ คาว อัห ก็ เริล เอิด ซบ ยอน เทิ๊บ ระ ตัก อุโมง (เลือง เฮโรด เคิบ ยอน ก็ มี มอก เน) เยซู เลียง อัห ฮา พัน ล็อง มัดทิว 14:13-21 , ลูกา 9:10-17 , ยอน 6:1-14 30 ทาเน ปึง ตัวแทน เยซู ตี เริล นเจ็น ครำ งวัล ซอ นัน อัห ก็ วัล โตะ และ นำ ตัก เปล นอก ทะเล กาลิลี ซะ ตี อัห กุญ แอง เคิบ ซะ ตี อัห นเจ็น อน ตัก อัหซอ นัน อัห ก็ ไล อน ตัก เยซู ปัง มด 31 ทาเน ก็ มี ครำ ดก เริลวัลๆ อุ ตัก เปล นอก นัน เยซู เคิบ ลูกนอง ก็ ไอ มี รวง ป็อง จะ เตาะ เยซู ก็ ลด ไล ลูกนอง คือเน “แอ็ห แอ เริล มโบละ วาล นอ แอ เริล ตัก ตี เค็ด งาล ซะ ตี ไอ มี ดก ครำ” นำ อัง 32 เยซู เคิบ ลูกนอง ก็ ต็อก เฮือ เริล และ ตี มโบละ 33 แต มี ดก ครำ เล็ห เจ็น ดก งวัล อุ ตัก เปล นอก นัน อัห เม็จ เยซู เคิบ ลูกนอง และ เริล ออ อัห ก็ เคาใจ เป็น เยซู เคิบ ลูกนอง ซีเละ อัห ก็ เม็จจึด เค็ย เยซู เคิบ ลูกนอง และ เริล ตัก นเดย อัห ซีรอก อุ เคิบ เยซู อัห ก็ เล็ง เริล ตัก ตี นัน วาล อัห เล็ง เริล ตาม เปล นอก ทะเล นัน ปึง อัห ก็ พด เล็ห ตัก ตี นัน วาล 34 โตะ เยซู เคิบ ลูกนอง ตัก นัน แลว ก็ มี ครำ ดก เป็น ปึง เพา อุ นัน แลว ทาเน เยซู ก็ ทอก เจ็น เฮือ นำ เม็จ ดก ครำ อุ นัน นำ ก็ ตึ อัง อัห เพาะวา อัห ก็ มอก ปึง แกะ ตัก ไอ มี ครำ เลียง ไอ มี ครำ ซับรวง นำ ก็ นเจ็น อัห ติกๆ 35 ทาเน ก็ บัก และ แจ็ล แอ็ม แลว ปึง ลูกนอง ก็ ไล เยซู คือเน “อาจาน แจ็ล แอ็ม แลว ดาย ตัก เน ก็ ไอ มี งวัล ครำ นอ 36 ปึง พซาซน ก็ โซะ จะ มัห ไล อัห เริล ทน ซะ ป็อง ตัก งวัล นเซอะ งวัล งคม ดาย” อัห ไล เยซู คือเน 37 แต เยซู ก็ ซวัล อัห คือเน “แป ฮัก และ ซะ ป็อง อน อัห ดาย” เยซู อัง ลูกนอง ก็ ซวัล นำ “อาจาน เฮย แอ เลียง ครำ ดก มอก เน ก็ ไอ มี กุญ เตาะ แอ เอิด เงิน 200 เลียน ทน ซะ ป็อง อน อัห ก็ ไอ มี จบ ปอ” อัห อัง 38 เยซู ก็ ซ็วน อัห “แป มี ซะ ป็อง มอก นเดย เออะ แป เริล ดอม อ็อญ กา” เยซู อัง อัห ก็ เริล ดอม อ็อญ อัห เม็จ แลว อัห ก็ โตะ ไล เยซู “มี คนมปัง ฮา แพ็น เคิบ คา เปียะ นัง” อัห อัง 39 เยซู ก็ ระ ลูกนอง ไล ปึง พซาซน คุด เป็นปึงๆ ตัก แญ็น แคร็วๆ นัน 40 อัห ก็ คุด เป็นปึงๆ นัน มี ปึง นเดย มี ฮาซิบ ล็อง แด มี รอย ล็อง แด 41 ทาเน เยซู ก็ เอิด คนมปัง เคิบ คา นัน นำ ก็ ง็อห ดอม วาง ทึห คอบคุน เอาซาง นำ ก็ เพก อน ตัก ลูกนอง ออ ปึง ลูกนอง ก็ ลด แจก อน ตัก ปึง พซาซน ป็อง 42 ปึง พซาซน ก็ ป็อง อิม มด ไท จู ล็อง 43 แลว ปึง พซาซน อิม จะ แลว ปึง ลูกนอง ก็ เก็บ อัน ตี ควะ เลือ กุญ ซิบซอง บุง ปิ 44 อัห ตี ป็อง คนมปัง เคิบ คา นัน นับ แต อัหคล็อง ก็ มี ฮา พัน ล็อง เยซู นจาง เริล คอม นอก ลัห ทึห มัดทิว 14:22-33 , ยอน 6:16-21 45 แลว อัห ป็อง แลว เยซู ก็ ไล ลูกนอง ออ ต็อก เฮือ คาม นอก ทะเล เริล เมือง เบ็ดไซดา วาล แต นำ เพา ระ ปึง พซาซน นัน วัล เจิง ออ วาล 46 ซุด ปน แอ็ม พซาซน แลว นำ ก็ เริล ออ นำ ก็ ก็อห ญวัง ครอ วอน เอาซาง ฮัก 47 แจ็ล ม็อญ ซะ แลว เฮือ ตี ปึง ลูกนอง นำ ต็อก นัน ก็ ควะ อุ กาง ล็อง นอก ทะเล แต นำ ควะ อุ ซะร็อห มี ล็อง ฮัก 48 นำ เม็จ ลูกนอง ออ พาย เฮือ ลำบาก อุ ซีเละ เป็น ตัก โตะ งกริม นทูด ไล มัด ญาม นัน ควะ เดิก อุ ไอ มี ตัน ปัห ซะ เยซู ก็ นจาง เริล ตัก นอก ลัห ทึห โตะ และ อัห นำ เริล บัก และ ลำ แอ็ม อัห แลว 49 ปึง ลูกนอง ก็ เลอะ เม็จ นำ อัห ก็ เยา นำ เป็น ปรอง อัห ก็ เลอะ นทัน เลอะ นซาก 50 อัห ก็ แร็ง นเจิก ซีเละ เยซู ลด งกรอ ไล อัห คือเน “อำ นเจิก เตาะ ดาย เอิญ เยซู ดาย” นำ อัง เค็ย อัห 51 นำ ก็ เริล และ อัห ตัก เฮือ งกริม ก็ ลด เค็ด งาล แอ็ม 52 อัห เลอะ งึด ไบ งึด เบอ เพาะวา เลือง เยซู เลียง อัห ฮา พัน ล็อง เคิน อัห ก็ ไอ มี ตัน เคาใจ เลาะ ตัน อัห ควะ ปึก อุ เยซู รักซา อัห ตัก งวัล เยนเนซาเร็ด มัดทิว 14:34-36 53 เจ็นนัน เยซู เคิบ ลูกนอง ออ ก็ คาม นอก โตะ พาโนน อัห โตะ พาโนน แลว อัห ก็ จอด เฮือ ระ ตัก ตำบน เยนเนซาเร็ด 54 ท็อบ อัห มพลิห เจ็น เฮือ ครำ พานัน ก็ ดอม เม็จ เป็น เยซู 55 ครำ ตี เม็จ เยซู นะ อัห เล็ง เริล ดก ตี อัห ก็ เลอะ ไล นอย ตอ วัล เยซู เริล พานเดย อัห ก็ งโกง ซับ ครำ โซะ ตัก นัน 56 กัน เยซู เริล งวัล นเดย เมือง นเดย กัน นำ เริล ซะร็อห ก็ ตึก อัห ก็ ซับ ครำ โซะ ระ อัห อวย เพา เยซู อุ ตัก กาด อัห ก็ ครอ อนุยาด ระ ครำ โซะ กุญ คอบ นทัล โกบ นำ เอา นเดย ตัก คอบ โกบ เยซู นัน อัห ก็ งาล โซะ มด จู ล็อง |
Global Partners
Global Partners