มาระโก 5 - Prai Bibleเยซู รักซา ครำ ปรอง กุด มัดทิว 8:28-34 , ลูกา 8:26-39 1 เยซู เคิบ ลูกนอง ก็ ต็อก เฮือ เริล โตะ ตัก เคด เมือง เกราซา พาโนน 2 เยซู ก็ ทอก เจ็น เฮือ ทาเน ก็ มี ครำ ปรอง กุด มี ล็อง ทอก โตะ เจ็น พาเฮ็ว 3 ล็อง เน นำ อุ ตัก พาเฮ็ว นัน ตลอด ครำ พานัน ท็อก นำ ระ อน ก็ ไอ มี กุญ ไอ มี ซีเอ ท็อก นำ กุญ ซัง อัห เกย เอิด โซ เล็ก ท็อก ระ นำ ก็ กิด แอ็ม มด 4 นำ นจัห นำ เด็ง แอ็ม โซ นัน มด นำ มี แร็ง ดก ซีเละ ไอ มี ซีเอ ท็อก ระ นำ กุญ ซัง 5 นำ กวา นซาก อุ ตัก พาเฮ็ว ตัก ญวัง นำ นซาก อุ มด งิ มด แจ็ล นำ ก็ เอิด เกียง แล็ห นัง ออ วัล 6 ทาเน นำ เม็จ เยซู ควะ อุ เยอะ ซะ นัน นำ ก็ เล็ง โตะ กราบ ไว เยซู 7-8 เยซู ก็ ไล ปรอง คือเน “บอ ปรอง คึด มัห เจ็ย ทอก แอ็ม เจ็น ล็อง เน” เยซู อัง เอา นัน ก็ นซาก งกรอ แร็งๆ คือเน “เยซู เฮย มัห เป็น ควัน เอาซาง ตี แกะ ทีซุด มัห ญุง เคิบ เอิญ อังวะ บ็อห ครอ ระ มัห ซันญา เคิบ เอาซาง เค็ย มัห ไอ มี ลงโทด ซิห เอิญ” นำ อัง 9 เยซู ก็ ลบ วัล ซ็วน ปรอง คือเน “มัห ซือ ซีเอ” เยซู อัง เย็ห ก็ ซวัล “เอิญ ซือ ตัก ปึง เพาะวา อิห ดก นัง อุ ใน ล็อง เน” เย็ห อัง 10 เย็ห ก็ วาง ครอ ตัก เยซู ติกๆ เย็ห ไอ มี ซีรอก ระ เยซู มบรึห ออ ปัด เจ็น นัน 11 ทาเน ก็ มี อิ มี ปึง จ็อง อัห ปลอย ระ อี โละ ป็อง พา อุ เปล ญวัง ติๆ พานัน 12 ปึง ปรอง นัน ก็ วาง ครอ ตัก เยซู คือเน “อิห ครอ กุด ปึง อิ นัน ดาย” เย็ห อัง 13 เยซู ก็ ระ ปึง ปรอง ทอก เจ็น ล็อง นัน ลด กุด ตัก นัง อิ ปึง อิ ก็ เล็ง ปัด ไล รัง นเซ็บ คลิห ตัก นอก ทะเล เปิล แอ็ม มด ปึง อิ นัน ก็ ดก ซีเละ มี ซม ซอง พัน นัง 14 ครำ เลียง อิ เม็จ ฮุนนัน แลว อัห ก็ เล็ง ปัด เริล เลามุน อน ตัก ครำ ใน เมือง เคิบ ครำ ซะร็อห ปัง อัห เม็จ คาว แลว อัห ก็ เลิบ โตะ ดอม อ็อญ เจือ มี ซีวะ กิว เกิด เล็ห ซีเละ 15 อัห โตะ ตัก เยซู แลว อัห ก็ เม็จ ล็อง นัน ตัก ปรอง กุด นัน จึห คัว คุด อุ เลาะ นำ มี ซะติ เลาะ มอก เครม ครำ ตัก โตะ ดอม นัน อัห ก็ เลอะ นเจิก มด 16 ปึง อัห ตัก กุญ เม็จ ครำ ปรอง กุด นัน งาล เลาะ แลว เคิบ อัห เม็จ อิ เปิล อัห ก็ ลบ เลามุน อน ตัก ครำ ตี โตะ แทะ ปัง วัล 17 ปึง ครำ ดก นัน อัห ก็ รูบ โตะ ครอ ระ เยซู ปัด แอ็ม เจ็น ตี ออ นัน 18 ญาม เยซู บัก และ ต็อก เฮือ นัน ครำ ตัก งาล ปรอง กุด นัน ก็ ครอ เริล เลิม 19 เยซู ก็ ไล นำ คือเน “มัห อำ เริล เคิบ เอิญ เตาะ มัห วัล เจิง และ ควน นไจ ออ ดาย มัห เลามุน เลือง ตี เอาซาง แร็ง ตึ อัง มัห ระ มัห เลาะ เล็ห เน” เยซู อัง 20 เอา นัน ก็ เริล ออ นำ เริล ทัว จังวัด ทดบุรี นำ ก็ เลามุน เลือง เยซู จวย ออ อน อัห ปัง อัห ก็ ญ็อก งึด มด เลือง ควัน ไจรัด เคิบ อัหเม ตัก เล็ห เมียม มัดทิว 9:18-26 , ลูกา 8:40-56 21 เจ็นนัน เยซู ก็ ต็อก เฮือ วัล ออ โตะ พาโนน แลว ก็ มี ครำ ดก ล็อง โตะ แกวด นำ ตัก เปล นอก ทะเล นัน 22 ทาเน ก็ มี ฮัวนา ฮ็อง พซุม ครำ ยิว มี ล็อง ซือ ตัก ไจรัด นำ เม็จ เยซู โตะ นำ ก็ ลด กราบ ไว ตัก เจ็ง เยซู 23 นำ ลด ครอ ไล เยซู จวย ควัน ออ คือเน “ควัน เอิญ โซะ บัก และ เปิล ดาย ครอ เคิบ มัห เริล จัก คอบ ซิห นัง ควัน เอิญ ดาย กัน มัห คอบ นำ นำ ก็ งาล โซะ ไอ มี เปิล เตาะ” ไจรัด อัง 24 เยซู ก็ เริล เคิบ ไจรัด ดก ครำ เริล เลิม อัห แดก เยซู เริล 25 ทาเน ก็ มี อัหเม มี ล็อง นำ แร็ง เล็ห เมียม ซิบซอง ปี แลว 26 นำ ก็ อด โซะ ทอระมาน ดก มบลึ ญอน ปึง มอ รักซา นำ นัน นำ ก็ ไอ มี แควน เตาะ นำ ก็ ดก ซุด เงิน ซุด ทอง รักซา นัง ออ แต นำ ก็ เฮง โซะ ติกๆ วัล 27 นำ เม็จ คาว เลือง เยซู นำ ก็ ซุน เริล เลิม เคิบ อัห เคริบ แทะ ลอล เยซู เริล 28 นำ กึด ใน ใจ ออ คือเน “กัน เอิญ กุญ คอบ ซิห โกบ เยซู ลือๆ เอิญ ก็ งาล โซะ” นำ อัง 29 นำ ก็ ลด คอบ ซิห โกบ เยซู เมียม นำ ก็ ลด ทิบ ฮัด แอ็ม ซีเละ นำ ลด เม็จจึด นัง ออ งาล โซะ มด 30 ท็อบ นำ คอบ โกบ เยซู เยซู ก็ ลด เม็จ ริด เม็จ แร็ง ใน นัง ออ ทอก นำ ก็ งแก็ล ดอม อัห นำ ก็ ซ็วน ปึง อัห คือเน “ซีเอ คอบ โกบ เอิญ บ็อห” นำ อัง 31 ลูกนอง นำ ก็ ซวัล นำ ฮุนเน “มัห ซ็วน ซีวะ จังนะ บ็อห มัห ก็ เม็จ แลว นอ ดก ครำ แดก มัห เริล” อัห อัง 32 แต เยซู ก็ กวา ดอม และ ล็อง ตี เพลิบ โกบ ออ นัน 33 อัหเม นัน เม็จจึด นัง ออ งาล โซะ นำ ก็ โตะ กราบ ไว เจ็ง เยซู นำ แร็ง นเจิก ญ็อก นโจ็ห มด ตึง นัง นำ ก็ ไล เลือง นัง ออ อน ตัก เยซู ปัง มด 34 เยซู ก็ ไล นำ ฮุนเน “ควัน เฮย มัห งาล โซะ ก็ ญอน มัห เจือ นัน มัห งาล โรก นทึห เตาะ มัห เริล เลาะๆ ดาย” เยซู อัง 35 ญาม เยซู ควะ จ็อก อุ นัน ก็ มี ครำ โตะ เจ็น เจิง ไจรัด อัห ไล ไจรัด คือเน “ควัน มัห เปิล แลว มัห อำ รบกวน อาจาน วัล เตาะ” อัห อัง 36 เยซู เม็จ อัห โตะ ไล ไจรัด คือนัน นำ ก็ ไอ มี จบ ปัง แญง อัห เตาะ นำ ก็ ไล ไจรัด คือเน “มัห อำ นเจิก อำ ทืล เตาะ เจือ ติกๆ นทึห เตาะ ดาย” นำ อัง 37 เจ็นนัน เยซู ก็ เริล เจิง ไจรัด นำ ซับ เปโตร ยากอบ เคิบ ยอน ควน ยากอบ เริล เลิม ครำ ซอ นำ ไอ มี ซับ เริล เลิม เตาะ 38 ทาเน เยซู โตะ เจิง ไจรัด แลว นำ ก็ เม็จ อัห เลอะ เญ็ม อุ ญ็อก คับ ซะ คับ แญ็น มด 39 เยซู ลด กุด ควังใน เจิง นำ ก็ ไล อัห คือเน “แป เญ็ม อังวะ ควัน มอน เน ไอ มี เปิล ซัง นำ ลิงลัก อวย อุ” เยซู อัง 40 อัห เม็จ เยซู ไล ออ จังนะ อัห ก็ เลอะ เซด เยซู อัห ก็ ซำ ปิล มัด นำ วัล แต เยซู ไล อัห ทอก ปัด อุ บัดซะ นำ ก็ ซับ เอา เม ควัน แย็ด เคิบ ลูกนอง ออ แพะ ล็อง นัน กุด ตัก ฮ็อง ตี ควัน แย็ด อวย อุ นัน 41 เยซู ก็ โตะ ทาก ที ควัน แย็ด นัน เยซู ก็ จ็อก คือเน “ทาลิทา คูมี” ซีแล็ม เค็ย “ควัน แย็ด เฮย ร็อห เนอ” นำ อัง 42 ควัน แย็ด นัน ก็ ลด ซีนุก ร็อห นจาง นำ มี อาญุ ซิบซอง ปี แลว ปึง อัห ตัก อุ นัน ก็ ญ็อก งึด มด 43 เยซู ก็ มบราง อัห ไอ มี ระ อัห ไล เลือง เน อน ตัก อัหซอ ปัง เด็ดคาด นำ ก็ ลด ไล อัห และ ซะ ป็อง อน ตัก ควัน แย็ด นัน |
Global Partners
Global Partners