มาระโก 4 - Prai Bibleเยซู เลามุน แญง มเบิด เลือง ครำ วาน ซา มัดทิว 13:1-9 , ลูกา 8:4-8 1 มี มี ลบ นัน เยซู เริล นเจ็น อัห ตัก เปล นอก ทะเล กาลิลี วัล ปึง พซาซน ก็ รูบ โตะ แกวด นำ ปิ มด นำ ก็ ลด คุด ตัก เฮือ ตี อุ ตัก เปล นอก นัน ซอน อัห ปึง พซาซน ก็ ปัง นำ อุ ตัก ซะร็อห 2 นำ ก็ มเบิด ไล อัห ดก เลือง คือเน 3 “แป ปัง เอิด ดาย มี ครำ มี ล็อง เริล วาน ซา 4 ซา มี มบรัห คลิห ตัก รวง เซ็ม ก็ โตะ ท็อห ป็อง แอ็ม ลิบ ซุด มด 5 ซา มี มบรัห ก็ คลิห ตัก ซิก ปาเกียง แต มี ซิก ตีดต็อง ไอ มี อิง ก็ ปลัด ซา นัน เพาะวา ไอ มี จุ ซิก 6 ญาม แร็ง เล็ห อาก ซา นัน ก็ มเบิล แอ็ม เพาะวา ไอ มี จุ เกรด 7 มี มบรัห คลิห นดิ เกา ซีเยอะ แต ซีเยอะ นัน เคริบ แกะ อี ก็ งวม แอ็ม เกา ซา นัน ซา นัน ก็ ลด ราม แอ็ม 8 มี มบรัห คลิห ตัก ซิก เลาะ เกา ซา นัน ก็ เลาะลัห งกน แพละ กุญ ซามซิบ ทัง แด ฮกซิบ ทัง แด กุญ มี รอย ทัง แด 9 ซีเอ มี นโทล ก็ ปัง เอิด เลาะๆ ดาย” เยซู อัง ลูกนอง เยซู ซ็วน เลือง แญง มเบิด มัดทิว 13:10-17 , ลูกา 8:9-10 10 แลว ปน แอ็ม ปึง ครำ ดก นัน แลว ลูกนอง เยซู เคิบ ครำ ซอ ตี ม็อด เริล เลิม เคิบ นำ อัห ก็ ซ็วน นำ คือเน “แญง มเบิด นัน เคิน ซีแล็ม เค็ย ซีวะ บ็อห” อัห อัง 11 เยซู ก็ ซวัล อัห คือเน “เลือง แมะ ตี เอาซาง โตะ ปกคอง โลก เน ตี เอาซาง ไอ มี ตัน ไล นัน เอิญ ก็ ที ไล อน ตัก แป ดาย แต ซำรับ อัหซอ เอิญ ก็ มเบิด ไล อน ตัก อัห ฮัก 12 อัห วาง ดอม จังนัก ก็ ไอ มี ตาด อัห วาง ปัง จังนัก อัห ก็ ไอ มี เคาใจ เตาะ กัน อัห ดอม ตาด กัน อัห เคาใจ แลว อัห ก็ วัล โตะ และ เอาซาง นำ ก็ ลด ญ็อก แอ็ม ตี ลุห อัห แต อัห ก็ ไอ มี ญอม แอ็ม” นำ อัง อิซยา 6:9-10 เยซู อะทิบาย เลือง ครำ วาน ซา มัดทิว 13:18-23 , ลูกา 8:11-15 13 เยซู ไล อัห คือเน วัล “กัน แป ไอ มี เคาใจ แญง มเบิด ตี เอิญ จ็อก มันเน เคิน แป ก็ ไอ มี เคาใจ แญง มเบิด ซอ วัล ก้า 14 ครำ วาน ซา นัน ก็ มอก ครำ ไล แญง เอาซาง อน ตัก อัห 15 พรัน ซา ตี คลิห ตัก รวง ก็ มอก ครำ ตี กุญ ปัง แญง เอาซาง แลว แต ปรอง ก็ ลู เอิด แญง นัน เริล แอ็ม 16 พรัน ซา คลิห ตัก ซิก ปาเกียง ก็ มอก ครำ เม็จ แญง เอาซาง แลว อัห ก็ ลด เลาะใจ ปัง ลด เจือ 17 แต ไอ มี ตัน เคาใจ เลาะ ไอ มี ปอ อิง กัน มี ปันฮา กัน อัหซอ คมเฮง อัห ก็ นาย แอ็ม ใจ ลด พระ แอ็ม แญง เอาซาง อัห ก็ มอก เกา ซา ตี เวิด มเบิล ตี ไอ มี จุ เกรด นัน 18 พรัน ซา ตี คลิห ตัก เกา ซีเยอะ นัน ก็ มอก ครำ ตี กุญ ปัง แญง เอาซาง แลว 19 แต ดก อัห ซนใจ เลือง ซะ ใน โลก เน อัห ซีรอก เป็น ครำ ฮัง อัห กึด เค็ย มี เงิน ดก ก็ เลาะใจ อุ อัห โซะ กุญ ซะเน ซะนัน ดก มบลึ กำกึด นัน ก็ ทม แอ็ม แญง เอาซาง ซีวิด อัห ก็ ลด ไอ มี แกะ ใน เอาซาง 20 พรัน ซา ตี คลิห ตัก ซิก เลาะ นัน ก็ มอก ครำ ตี ปัง แญง เอาซาง เลาะ อัห เคาใจ เลาะ อัห ก็ ญอม ฮับ ลด เจือ ซีวิด อัห ก็ ลด กุญ พน ปะโยด เลาะ มอก ซิห ซา มี ทัง กุญ ซามซิบ ทัง แด กุญ ฮกซิบ ทัง แด กุญ มี รอย ทัง แด” เยซู อัง ตะเกียง ทิง บุง ลูกา 8:16-18 21 เยซู ก็ ไล อัห ฮุนเน วัล “ไอ มี ซีเอ โทจ ตะเกียง แลว เอิด บุง ควบ ระ อน ซัง ไอ มี อีเอ โทจ ตะเกียง ระ ทิง โตะ ไล เซ็บ ซัง อัห โทจ แลว อัห ก็ ต็อง ต็อก ระ ตัก ตี ทึหๆ ซะ ฮัก 22 ซะ ตัก เอาซาง งเกริม ระ อน มานะ ก็ ต็อง มี งิ ระ ครำ เม็จ วัล ซะ ตัก เอาซาง ระ อน ใน ใจ ออ ฮัก นัน ก็ ต็อง มี งิ นำ ไล ระ เม็จ มด 23 เอา นเดย มี นโทล ก็ ปัง เอิด ดาย” นำ อัง 24 เยซู ไล อัห ฮุนเน วัล “ซะ ตี เอิญ ไล แป เน แป ตังใจ ปัง เลาะๆ ดาย กัน แป เอิด ใจ ซิห มอก นเดย เอาซาง ก็ จวย แป เคาใจ มอก นัน แต นำ เฮง จวย ระ แป เคาใจ ดก กวา นัน วัล 25 ครำ ตัก เคาใจ อุ แลว ก็ เฮง เคาใจ ดก กวา นัน วัล แต เอา นเดย ตัก ไอ มี ตัน เคาใจ ไอ มี เอิด ใจ ซิห ซะ ตี อัห เคาใจ ตีดต็อง นัน ก็ ซำ งาล แอ็ม ไอ มี ควะ เลือ ซีวะ วัล เตาะ” ซา ปลัด ก็ แปลก 26 เยซู ก็ เลามุน วัล เค็ย “ตี เอาซาง โตะ ปกคอง โลก แพนซิก เน ก็ มอก ครำ เริล วาน ซา นัน 27 นำ แองกาน ตัก งิ ตัก แจ็ล นำ ก็ อวย ซา ตี นำ วาน นัน ก็ ปลัด เคริบ แกะ ฮัก ซา นัน ปลัด จังนัก นำ ก็ ไอ มี เม็จจึด เตาะ 28 ซา นัน ปลัด ก็ เป็น ตัก ซิก นัน ฮัก ตี นา ก็ ปลัด เล็ห มบูล เจ็นนัน ก็ แกะ เจ็นนัน ก็ กง ลด เล็ห นซ็อก กัด เจน 29 เจ็นนัน ก็ แคร็ห อัห ก็ เอิด เกียว จัก เกียว ซา นัน เพาะวา เล็ห นวจ เกียว ซา แลว เลือง นัน ก็ เป็น เอาซาง แอง ฮัก” เยซู อัง แก็น แย็ด เล็ห เป็น เกา จ็อง มัดทิว 13:31-35 , ลูกา 13:18-19 30 เยซู ซ็วน อัห คือเน วัล “เลือง เอาซาง ปกคอง โลก เน เอิญ เปียบเทียบ เคิบ เลือง ซีวะ เลาะ บ็อห ระ แป เคาใจ ปัง 31 เอิญ เปียบเทียบ มอก ควัง มบัห โคระ ดาย ญาม แอ เทิล ก็ แย็ด แก็น ทีซุด แย็ด กวา พรัน มบัห ซอ วัล 32 เจ็นนัน ก็ ปลัด จ็อง เกา กวา มบัห ซอ ตัก ซวน ดก เล็ห งกา วัล เซ็ม โตะ แอง มพวย ตัก งกา ก็ กุญ มด” นำ อัง 33 เลือง ไล แญง เอาซาง อน ตัก พซาซน นัน เยซู ก็ มเบิด ไล อัห ตลอด นำ ไล อัห เตา ตี อัห เคาใจ กุญ 34 นำ ซอน อัห ลบ นเดย นำ ก็ มเบิด ไล อัห จู ลบ แต กัน ปน อัหซอ แลว นำ ก็ ไท เลามุน อน จุม ลูกนอง ออ ฮัก นำ ไล ระ อัห เคาใจ มด จู มบลึ เยซู แร็ง กวา งกริม มัดทิว 8:23-27 , ลูกา 8:22-25 35 ทาเน แมด ซะ งิ นัน เยซู ก็ มพอล ลูกนอง ออ ต็อก เฮือ นำ ไล อัห คาม นอก เริล ไล พาโนน 36 ลูกนอง ก็ ระ ปึง พซาซน วัล ออ เจ็นนัน อัห ก็ ลด ต็อก เฮือ เริล เลิม เคิบ เยซู เฮือ ซอ ก็ เริล เลิม แด 37 อัห ก็ ต็อก เฮือ เริล ติกๆ ทาเน ก็ พด เล็ห งกริม จ็อง อี นทูด นอก โตะ มพัห กุด เฮือ บัก และ ปิ เฮือ 38 เยซู ก็ อวย ลึ เบาะ อุ ตัก ลอล เฮือ นำ ก็ ลิงลัก อวย อุ ปึง ลูกนอง ก็ โตะ พร็อห นำ “อาจาน จวย อิห แด กา มัห ไอ มี ตึ อัง อิห เตาะ ก้า แอ บัก และ เปิล จม นอก อุ แลว ดาย” อัห อัง 39 เยซู ก็ ร็อห โป งกริม คือเน “งกริม เฮย เค็ด อุ งเกิน ดาย” นำ อัง งกริม ก็ เค็ด งาล แอ็ม นอก ก็ ลด งเกิน อุ 40 เยซู ก็ ซ็วน อัห คือเน “แป นเจิก อังวะ เต็ห ซีวะ แป ไอ มี เจือ เอาซาง” นำ อัง 41 แต ปึง ลูกนอง เยซู อัห ก็ นเจิก ซีเละ อัห ญ็อก งึด อัง นำ มด อัห ลด ซ็วน นอย คือเน “เยซู เน นำ เป็น ซีเอ บ็อห งกริม เคิบ นอก ก็ ปัง แญง นำ” อัห อัง |
Global Partners
Global Partners