มาระโก 2 - Prai Bibleเยซู จวย ครำ แว็ล มัดทิว 9:1-8 , ลูกา 5:17-26 1 อุ เจ็นนัน ไอ มี ปอ แซะ งิ วัล เยซู ก็ วัล เจิง ออ ตัก งวัล คาเปอนาอุม วัล ปึง พซาซน เม็จ คาว เค็ย นำ โตะ ตัก เจิง แลว 2 อัห ก็ รูบ โตะ ตัก เจิง นำ ปุด ปิ มด ตัก ปะตู ก็ ปิ ครำ มด เยซู ก็ นเจ็น แญง เอาซาง อน ตัก อัห ปัง 3 ทาเน ก็ มี ครำ ซี ล็อง งโกง ซับ ครำ แว็ล อัห โตะ และ เยซู 4 อัห กุด โตะ และ นำ ก็ ไอ มี กุญ เพาะวา แร็ง ปิ ครำ อัห ก็ ก็อห รึห ซีนุม เจิง ลัห ทึห ระ วาก ซือ นำ อุ นัน แลว อัห รึห แลว อัห ก็ ญ็อก เอิด ล็อง นัน เลิม เคิบ ตี อวย มพลิห ซือ ตี เยซู อุ นัน 5 เยซู เม็จ อัห เจือ ออ ซีเละ นำ ก็ อัง คือเน “ควัน เฮย ตี ลุห มัห เอิญ ก็ ญ็อก แอ็ม แลว ดาย” นำ อัง 6 แต ปึง อาจาน ครำ ยิว ตัก คุด อุ นัน อัห กึด ใน ใจ ออ คือเน 7 “ซีวะ เอา เน จ็อก คือนะ บ็อห นำ โป ปะมาด เอาซาง เต็ห ไอ มี ซีเอ จางรู ญ็อก แอ็ม ตี ลุห ครำ แอ ซัง มี แต เอาซาง มี ล็อง เดียว นัน แอ็ห ตี แอง กุญ” อัห อัง 8 เยซู เม็จ อัห กึด ใน ใจ ออ คือนัน นำ ก็ ไล อัห ฮุนเน “เป็น ตัก ซีวะ แป กึด ใน ใจ ออ คือนัน บ็อห 9 ซำรับ ครำ พาลือ แอง จังนัก ซัง งาย กวา นอย บ็อห แอ ญ็อก แอ็ม ตี ลุห นำ งาย อัน แอ รักซา นำ ระ นำ ร็อห นจาง งาย อัน ซำรับ ครำ แอ เน อัน นเดย งาย บ็อห 10 แต เอิญ ซีรอก รักซา ล็อง เน ระ นจาง กุญ ก็ เพือ ระ แป เม็จจึด เค็ย เอิญ เน ตี เอาซาง ระ เกิด เป็น ครำ เอิญ มี ซิด มี อำนาด ญ็อก แอ็ม ตี ลุห ครำ ตัก โลก แพนซิก เน กุญ มด” เยซู ไล อัห จังนะ เยซู ก็ ไล ครำ แว็ล นัน คือเน วัล 11 “มัห ร็อห เพล็ว มเบิน วัล เจิง ออ ดาย” นำ อัง 12 ครำ แว็ล นัน ก็ ลด ซีนุก ร็อห เพล็ว มเบิน นจาง เริล เคิบ มัด อัห นัน ปึง อัหซอ เม็จ เยซู รักซา ล็อง นัน แลว อัห ก็ เลอะ งึด อัง เยซู มด อัห ก็ ลือ เอาซาง เค็ย “ไอ มี เกย เม็จ อีเอ แอง ฮุนเน ซัก มี ลบ” อัห อัง เยซู มพอล เลวี เริล เคิบ ออ มัดทิว 9:9-13 , ลูกา 5:27-32 13 เจ็นนัน เยซู ก็ เริล ตัก เปล นอก ทะเล กาลิลี วัล ปึง พซาซน ก็ รูบ โตะ และ นำ ทึดๆ นำ ก็ นเจ็น อัห ติกๆ 14 ญาม นำ กำลัง เริล ออ นัน นำ ก็ เม็จ ควัน อาเฟอัด มี ล็อง ซือ ตัก เลวี นำ คุด อุ ตัก ดาน เก็บ พาซี เยซู ก็ มพอล นำ “มัห เริล เคิบ เอิญ ดาย” เยซู อัง เลวี ก็ คุล ร็อห ลด เริล เคิบ เยซู 15 เจ็นนัน เยซู ก็ เริล เจิง เลวี นำ คุด ป็อง จะ แจ็ล ตัก เจิง เลวี นัน ทาเน ก็ มี ครำ เก็บ พาซี เคิบ ครำ ไอ มี เลาะ ดก ล็อง เคริบ เยซู เริล ตลอด แจ็ล นัน ก็ มี ปึง นัน ป็อง จะ อุ เลิม เคิบ เยซู เคิบ ลูกนอง นำ วัล 16 ปึง อาจาน ครำ ยิว ตัก เป็น ปึง ฟาริซี อัห ก็ อุ นัน เลิม แด ทาเน ปึง อาจาน เน เม็จ เยซู ป็อง จะ เลิม เคิบ ครำ เก็บ พาซี เคิบ ปึง ครำ ซอ ตี อัห เค็ย ไอ มี เลาะ นัน อัห ก็ ลด ซ็วน ลูกนอง เยซู คือเน “เป็น ตัก ซีวะ อาจาน แป ป็อง จะ เลิม ออก เลิม เคิบ ปึง ครำ เก็บ พาซี เคิบ ครำ ไอ มี เลาะ นัน” อัห อัง 17 เยซู เม็จ อัห โป คือนะ นำ ก็ ซวัล อัห คือเน “ครำ เลาะใจ อุ อัห ไอ มี เริล และ มอ ครำ โซะ ซัง อัห เริล และ มอ เอิญ ไอ มี โตะ มพอล ครำ เลาะ โตะ และ ออ แต เอิญ โตะ มพอล ครำ ไอ มี เลาะ ฮัก ระ อัห เริล อุ เคิบ ออ” เยซู อัง อัห ซ็วน เยซู เลือง อด จะ มัดทิว 9:14-17 , ลูกา 5:33-39 18 ทาเน ก็ มี ปึง ลูกนอง ยอน ตี จุบ อัห ตัก นอก เคิบ ปึง ลูกนอง ฟาริซี เปียะ ปึง เน อัห อด จะ แต ปึง ลูกนอง เยซู ไอ มี อด จะ เตาะ ก็ มี ครำ แกด ล็อง โตะ ซ็วน เยซู คือเน “เป็น ตัก ซีวะ ปึง ลูกนอง ยอน เคิบ ลูกนอง ฟาริซี อัห อด จะ แต ลูกนอง มัห อัห ไอ มี อด จะ เตาะ” อัห อัง 19 เยซู ก็ ซวัล อัห คือเน “จับ แป แตงงาน กัน ควะ เจาบาว อุ เลิม เคิบ เปือน แป ก็ ไอ มี จบ ระ เปือน เจาบาว อด จะ ก้า 20 แต บัดนะ นโดน ญาม อัห เอิด เจาบาว นัน เริล ญาม นัน ซัง เปือน เจาบาว นัน อด จะ เอิญ เคิบ ลูกนอง ก็ มอก นัน” เยซู อัง แบบ แมะ เคิบ แบบ เครม ซุน นอย เลิม ไอ มี กุญ 21 เยซู ก็ มเบิด ไล อัห มี เลือง วัล “ไอ มี อีเอ เอิด พา แมะ ตาบ โกบ เครม ตัก นเท็จ แอ็ม แลว เพาะวา พา แมะ นัน ไอ มี ตัน อี งคด กัน แอ เอิด พา แมะ ตาบ โกบ เครม ก็ อี แอง ระ โกบ เครม นัน เฮง เคิบ ควาง นเท็จ ติกๆ วัล 22 พุย องุน ก็ เมือนนอย ไอ มี อีเอ เอิด พุย องุน แมะ นซุ ระ อน ตัก ทง ซวัห เครม ซัง เพาะวา พุย องุน แมะ นัน อี พู เล็ห อี แอง ระ ทง ซวัห เครม นัน พุก แตก แอ็ม พุย องุน แมะ เคิบ ทง ก็ เซีย แอ็ม เลิม มด แต พุย องุน แมะ นัน ต็อง ซิห ตัก ทง แมะ ฮัก ซัง เลาะ” นำ อัง อัห เทียง เยซู เลือง งิ มโบละ มัดทิว 12:1-8 , ลูกา 6:1-5 23 มี มี งิ นัน เป็น วัน เซา เยซู เคิบ ลูกนอง ก็ นจาง พาน เริล ตัก ล็อง แซ ทาเน ลูกนอง นำ ก็ เค็จ เอิด นซ็อก ซา ลอก ป็อง เริล 24 ปึง ฟาริซี เม็จ ลูกนอง เยซู แอง คือนัน อัห ก็ โป เยซู คือเน “ปึง ลูกนอง มัห อัห แอง ลุห กด เอาซาง ดาย อัห แองกาน ตัก วัน เซา ดุห” อัห อัง 25 เยซู ก็ ซ็วน อัห คือเน “แป ไอ มี กุญ อาน นังซือ เอาซาง ก้า กำนา พะเจายูฮัว ดาวิด เคิบ เปือน แอง ซีวะ ญาม อัห แร็ง โซะ จะ ไอ มี ซีวะ ป็อง นัน 26 ซะไม นัน อาบีอาทา เป็น มอ เอาซาง จ็อง มี ลบ นัน ดาวิด ก็ กุด ตัก วิฮาน เอาซาง นำ ก็ เอิด คนมปัง ตี ต็อก อุ ตัก โตะ ตี อัห ระ เคิบ มัด เอาซาง นัน นำ ก็ เอิด ป็อง คนมปัง นัน กด เอาซาง ระ มอ เอาซาง ป็อง ฮัก ครำ ซอ ป็อง ไอ มี กุญ เตาะ แต ดาวิด ก็ เอิด ป็อง นำ ก็ แบง อน ตัก เปือน ป็อง วัล เอาซาง ก็ ไอ มี โป นำ” เยซู อัง 27 เยซู ก็ ไล อัห ฮุนเน วัล “เอาซาง ตัง ระ งิ มโบละ นัน เป็น ปะโยด อน ตัก ครำ ไอ แมน เอาซาง แอง ระ ครำ ลำบาก ตัก งิ มโบละ นัน เตาะ 28 กัน จังนะ แลว เอิญ ตี เอาซาง ระ เกิด เป็น ครำ เน เอิญ ก็ มี อำนาด ไล ครำ แอง ซีวะ ตัก วัน เซา เน กุญ มด” นำ อัง |
Global Partners
Global Partners