มัดทิว 8 - Prai Bibleเยซู รักซา ครำ คีเฮือน มาระโก 1:40-45 , ลูกา 5:12-16 1 แลว เยซู จ็อก เคิบ อัห ตัก ญวัง นทึห นัน แลว นำ ก็ จูล เจ็น ญวัง ญาม นำ จูล นัน ก็ ดก ครำ เคริบ นำ เริล 2 แลว ก็ มี อัหคล็อง มี ล็อง นะ เป็น คีเฮือน นำ โตะ และ เยซู นำ โตะ กราบ ไว เยซู “งกีจ็อง เฮย ครอ เคิบ มัห จวย เอิญ ดาย มัห แอง ระ เอิญ งาล คีเฮือน เน กุญ มด กัน มัห ญอม แอง อน เอิญ คีเฮือน เน ก็ งาล แอ็ม มด” ล็อง นะ อัง 3 เยซู เม็จ นำ จ็อก จังนะ เยซู ก็ จวย นำ เยซู ก็ นจืน ที นจืน ลา คอบ นัง นำ ลด ไล นำ คือเน “เอิญ ปอใจ จวย มัห มัห งาล โซะ นทึห เตาะ” เยซู อัง ท็อบ เยซู ไล นำ ฮุนนะ นำ ก็ ลด งาล แอ็ม คีเฮือน นัน มด 4 แลว เยซู รักซา นำ แลว เยซู ก็ มบราง นำ ไอ มี ระ นำ ไล อัหซอ เค็ย เยซู จวย นำ “อำ ไล ซีเอ เด็ดคาด เค็ย เอิญ แอง ระ มัห งาล โซะ เน ดาย อำ ไล อัห เตาะ แต มัห ต็อง เริล มแบละ นัง ออ อน ตัก มอ เอาซาง ระ มอ เอาซาง ตวด ดอม นัง มัห วาล แลว มอ เอาซาง ตวด ดอม นัง มัห แลว มัห ก็ ต็อง ทวาย ซะ อน ตัก เอาซาง มอก กด โมเซด ไล อน เลือง ครำ ตี งาล คีเฮือน นัน โมเซด ไล ครำ งาล คีเฮือน ทวาย ซีวะ มัห ก็ ต็อง ทวาย ซะ นัน นเซอะ อัหซอ จู ล็อง เม็จจึด เค็ย มัห กิว งาล คีเฮือน แลว” เยซู ไล นำ จังนะ กด เอาซาง 14:1-32 นายรอย ทฮาน โรม เจือ เยซู ลูกา 7:1-10 5 ทาเน เยซู ก็ เริล งวัล คาเปอนาอุม แลว นำ กุด งวัล คาเปอนาอุม แลว ก็ มี ทฮาน โรม มี ล็อง โตะ และ เยซู นำ เป็น นายรอย นำ ก็ ครอ ระ เยซู จวย ลูกนอง ออ 6 “นาย เฮย ครอ เคิบ มัห เตาะ ครอ ระ มัห จวย ลูกนอง เอิญ ดาย นำ แร็ง โซะ ซีเละ นำ เป็น อำมาพาด นำ อวย โซะ อุ นัน ครอ เคิบ มัห จวย ระ นำ งาล โซะ ดาย” นายรอย อัง 7 เยซู ก็ ซวัล นำ ฮุนเน “เออะ ดิห เอิญ เริล รักซา นำ ระ งาล ดาย” เยซู อัง 8 แต นายรอย นัน มบราง เยซู เริล เจิง ออ “อำ เริล เจิง เอิญ เตาะ นาย เอิญ เน ไอ มี ซมควน ระ มัห กุด เจิง ออ เตาะ ครอ ระ มัห อุ ตัก เน ไล นำ งาล โซะ นำ ก็ งาล ดาย ไอ มี จำเป็น เริล และ นำ ตัก เจิง เตาะ 9 มัห มี แร็ง มี อำนาด อุ แลว มัห แอง จังนัก ก็ กุญ มด เลือง อำนาด เน เอิญ ก็ เคาใจ เลาะ แลว นาย เอิญ ก็ มี อำนาด กวา เอิญ เอิญ ก็ มี อำนาด กวา ปึง ทฮาน ตี เอิญ ฮับพิดซอบ นัน เอิญ ไล อัห เริล อัห ก็ เริล เอิญ ไล อัห โตะ อัห ก็ โตะ เอิญ ไล ลูกนอง แอง จังนัก อัห ก็ แอง มด มานะ เน มัห ญ็อง อุ ตัก เน ไล ลูกนอง เอิญ งาล โซะ ก็ กุญ นำ ก็ ต็อง งาล” นายรอย อัง 10 เยซู เม็จ นายรอย จ็อก มอก นัน นำ ก็ งึด ซีเละ เยซู ก็ ไล ปึง นัน ตี เริล เคิบ เยซู นัน ฮุนเน “บา นอ เอิญ เริล ทัว ปะเทด อิซราเอล แอ เน เอิญ ไอ มี เกย เม็จ อีเอ แก็นใจ เจือ มอก ล็อง เน นำ ไอ แมน ครำ อิซราเอล แอ เน ดุห 11 เอิญ ไล แป นังเลาะ นะ บัดนะ มี ครำ ทัว โลก เน ตี ไอ แมน ครำ ยิว อัห โตะ และ เอาซาง อัห โตะ เจ็น เซอะ อัห โตะ เจ็น งคม อัห เลอะ โตะ คุด ป็อง เลียง เลิม เคิบ เอาซาง ตัก วาง ทึห อัห คุด อุ เลิม เคิบ อับราฮัม อิซอัก ยาโคบ อัห กุด โตะ กุญ ก็ ญอน อัห เจือ เอิญ เน 12 แต มี ครำ อิซราเอล แอ เน ดก ล็อง อัห ไอ มี กุญ กุด อุ เลิม ตัก นัน เตาะ นังเลาะ แลว เอาซาง เตียม ตี นัน อน ตัก ครำ ยิว นัน แลว แต อัห ไอ มี กุญ กุด เตาะ ญอน อัห ไอ มี เจือ เอิญ นัน เอาซาง ก็ เอิด ปึง ครำ ยิว นัน กวาง แอ็ม ตัก ตี ม็อญ ซะ ญึด อัห ก็ แร็ง ตุกใจ เซียใจ เญ็ม พ็อก เซิง อ็อด อุ นัน” เยซู ไล อัห จังนะ 13 แลว เยซู ไล อัห แลว นำ ก็ ไล นายรอย ฮุนเน “มัห วัล เจิง นทึห เตาะ ดาย มัห เจือ เอิญ มอก นัน แลว ลูกนอง มัห ก็ เลาะ เล็ห แลว ดาย” เยซู อัง ท็อบ เยซู ไล ฮุนนะ ลูกนอง นายรอย ก็ ลด งาล โซะ ลด เลาะ เล็ห เยซู รักซา ครำ ดก ล็อง มาระโก 1:29-34 , ลูกา 4:38-41 14 แลว เยซู เล็ห ตัก คาเปอนาอุม แลว นำ ก็ โตะ เจิง เปโตร นำ ก็ เม็จ เมเทา เปโตร อวย โซะ อุ แร็ง เป็น คัด นำ ซีเละ 15 เยซู ก็ โตะ คอบ ที นำ ท็อบ เยซู คอบ ที นำ นำ ก็ ลด งาล แอ็ม คัด ลด เลาะ เล็ห แลว เมเทา เปโตร เลาะ เล็ห แลว นำ ก็ ลด ร็อห แอง ซะ ป็อง อน อัห ป็อง วัล 16 แจ็ล นัน อัห ซับ ครำ โซะ ดก ล็อง ระ เยซู จวย รักซา อัห เยซู ก็ รักซา อัห ระ เลาะ เล็ห มด อัห ก็ ซับ ครำ ปรอง กุด ดก ล็อง นำ ก็ มบรึห ปรอง ทอก เจ็น อัห มด นำ จ็อก มี แญง เดียว เย็ห ก็ ปัด แอ็ม มด 17 ตี เยซู รักซา อัห ดก ล็อง มอก นัน ก็ เพือ ระ เป็น เล็ห มอก แญง เอาซาง ไล อิซยา ตัก อิง นัน อิซยา เพีย เคียน ระ อน ฮุนเน “โตะ ล็อง นะ แลว นำ ก็ รักซา แอ ตี โซะ ระ แอ งาล โซะ มด” อิซยา อัง อิซยา 53:4 อิซยา เคียน ไล คือนะ เยซู ก็ แอง มอก อิซยา เค็ย นัน ซีเละ แอ เริล เคิบ เยซู ก็ เลาะ ลูกา 9:57-62 18 เยซู เม็จ อัห แกวด ออ ดก ล็อง นำ ก็ ไล ลูกนอง คาม นอก ทะเล เริล พาโนน 19 ทาเน ก็ โตะ อาจาน ซอน กด เอาซาง มี ล็อง นำ ซ็วน เริล เคิบ เยซู “อาจาน มัห เริล พานเดย เอิญ ก็ เริล เคิบ มัห ดาย” นำ อัง 20 แต เยซู ซวัล นำ คือเน “มัห กิว พอม เริล เคิบ เอิญ อัน อิห ไอ มี ตี อุ ไอ มี ตี อวย ซวะ นจ็อย ก็ มี ตี อุ ตี อวย เซ็ม ก็ มี มพวย ออ แต เอิญ เนๆ ตี เอาซาง ระ เกิด เป็น ครำ เน เอิญ ไอ มี ตี อุ ไอ มี ตี อวย ไอ มี ตี ลึ กึ ออ เตาะ มัห เริล เคิบ เอิญ ก็ ญาก ดาย” เยซู ไล นำ จังนะ 21 เจ็นนัน ก็ โตะ ลูกนอง เยซู มี ล็อง วัล นำ ไล เยซู คือเน “นาย เฮย เอิญ เริล เคิบ มัห ดาย แต เอิญ ครอ เพา เอา ออ เปิล วาล เอิญ ครอ เทิ๊บ เอา ออ วาล ซัง เอิญ กอย เริล เคิบ มัห ดาย” ล็อง นะ อัง 22 แต เยซู ไล นำ คือเน “มัห ต็อง เริล เคิบ เอิญ มานะ เน ครำ ตี ไอ มี เจือ อัห ก็ มอก ครำ เปิล แลว มัห ระ อัห เทิ๊บ นอย ฮัก ก็ เลาะ” เยซู ซวัล นำ จังนะ เยซู ระ งกริม เค็ด งาล มาระโก 4:35-41 , ลูกา 8:22-25 23 แลว เยซู จ็อก เคิบ ปึง นัน แลว นำ ก็ กุด เฮือ เลิม เคิบ ลูกนอง เจ็นนัน อัห ก็ ต็อก เฮือ เริล 24 ทาเน ก็ พด เล็ห งกริม ลุกพุก จ็อง ตัก นอก ทะเล กาลิลี นัน แร็ง ซีเละ นอก ก็ มพัห กุด เฮือ อัห นอก กุด เฮือ ดก มอก นัน แต เยซู ก็ ควะ ลิงลัก อวย อุ นัน 25 ทาเน ลูกนอง เยซู ก็ พร็อห เยซู “นาย เฮย มัห ร็อห จวย อิห เดอ กา อิห บัก และ เปิล จม นอก แลว” อัห อัง 26 เยซู เม็จ อัห ไล ออ จังนะ นำ ก็ ซ็วน อัห “เอ ซีวะ แร็ง นเจิก แป จังเน ซีวะ แป ไอ มี ปอ เจือ เอิญ” นำ อัง เจ็นนัน เยซู ก็ ร็อห ญ็อง นำ ก็ โป งกริม โป นอก งกริม ก็ เค็ด งาล นอก ก็ เค็ด อุ งเกิน 27 ปึง ลูกนอง เม็จ เยซู แอง จังนัน อัห ก็ ญ็อก งึด ญ็อก เงอ อุ อัห ก็ จ็อก คือเน “บา ล็อง เน นำ เป็น ซีเอ นังเลาะ บ็อห คนาด นอก เคิบ งกริม ก็ ญัง ปัง แญง นำ มด” อัห อัง เยซู จวย ครำ ปรอง กุด เปียะ ล็อง มาระโก 5:1-20 , ลูกา 8:26-39 28 เจ็นนัน อัห ก็ ต็อก เฮือ เล็ห พาโนน เคิง นัน เป็น เคด กาดารา เยซู ก็ จูล เจ็น เฮือ ทาเน ก็ มี ครำ เปียะ ล็อง ทอก โตะ เจ็น พาเฮ็ว โตะ เม็จ เยซู เปียะ ล็อง นะ ปรอง กุด ปาม ปาม ดุ ซีเละ ไอ มี ซีเอ ฮาน เริล พานัน เตาะ แร็ง นเจิก อัห อัง ปาม 29 ปาม เม็จ เยซู แลว ปาม ก็ นซาก งกรอ เยซู “ควัน เอาซาง เฮย มัห โตะ ญุง เคิบ อิห อังวะ มัห เพีย โตะ ทอระมาน อิห วาล กำนด ก้า มัห โตะ ทอระมาน อิห วาล ไอ ตัน เล็ห งิ ตี เอาซาง กำนด ระ อน ก้า” ปาม อัง 30 ทาเน ก็ มี อิ มี ปึง จ็อง นะ อี โละ ป็อง พา อุ ติๆ ซะ พานัน 31 ทาเน ปึง ปรอง ตี กุด ปา ล็อง นะ เย็ห ก็ ครอ เคิบ เยซู คือเน “กัน มัห มบรึห อิห ทอก เจ็น เปียะ ล็อง เน ก็ ครอ ระ อิห กุด ปึง อิ โตน นัน ดาย” เย็ห อัง 32 “เออะ ดิห แป ปัด กุด อิ” เยซู อัง เจ็นนัน ปึง ปรอง นัน ก็ ทอก แอ็ม เจ็น ปาม ลด กุด ปึง อิ ปึง อิ ก็ เล็ง ปัด มพลิห ตัก รัง คลิห ตัก นอก ทะเล กาลิลี นัน เย็ห ก็ เปิล จม นอก มด จู นัง 33 ทาเน ครำ เลียง อิ นัน อัห เม็จ อิ ซุด เปิล จม นอก มด อัห ก็ ปัด ออ อัห ปัด เริล ไล ครำ ใน งวัล ติๆ อุ พานัน อัห ก็ ไล จู ล็อง เค็ย เยซู มบรึห ปรอง ทอก แอ็ม เจ็น เปียะ ล็อง นัน 34 เจ็นนัน ครำ งวัล นัน ก็ เลอะ โตะ และ เยซู เป็น ปึง อัห เม็จ เยซู แลว อัห ก็ วาง ครอ ระ เยซู ปัด แอ็ม เจ็น อัห นัน อัห ครอ ระ นำ ปัด เริล ตี ซอ |
Global Partners
Global Partners