มัดทิว 4 - Prai Bibleปรอง ซาตาน ซุย เยซู แอง ลุห มาระโก 1:12-13 , ลูกา 4:1-13 1 เจ็นนัน ซีมาล เอาซาง ก็ ซับรวง เยซู เริล ตัก ตี แลง ระ ปรอง ซาตาน จุ ซุย เยซู 2 นำ ก็ อุ ตัก ตี แลง นัน ซีซิบ งิ ซีซิบ แจ็ล นำ ไอ มี กุญ ป็อง ซีวะ เตาะ นำ อุ ตัก ตี แลง ซีซิบ งิ ซีซิบ แจ็ล แลว นำ ก็ แร็ง โซะ จะ ซีเละ ฮีบรู 2:18, 4:15 3 ทาเน ปรอง ซาตาน ก็ โตะ ซุย เยซู ระ เยซู แอง ลุห เย็ห โตะ ไล นำ คือเน “กัน มัห กิว เป็น ควัน เอาซาง ซีเละ มัห ไล ง็อล เกียง พาเน เป็น เล็ห คนมปัง กา” ปรอง ไล เยซู จังนะ 4 แต เยซู ไอ มี ปัง “ไอ เตาะ นังซือ เอาซาง ไล จังเน ‘ครำ แอ เน รีด อุ ไอ แมน ญอน ซะ ป็อง มาลือ ครำ รีด อุ ญอน แญง เอาซาง จู แญง ตี เอาซาง ไล อน ฮัก’” เยซู ไล เย็ห จังนะ กด ลบ ซอง 8:3 5 เจ็นนัน ปรอง ซาตาน ก็ ซับรวง นำ เริล เมือง เยรูซาเล็ม ตี เป็น เมือง คอง เอาซาง ฮัก เย็ห ก็ ซับรวง เยซู ก็อห ดาดฟา วิฮาน เอาซาง ตัก ทึห ทีซุด นัน 6 เล็ห ทึห แลว เย็ห ก็ ไล เยซู กะโดด มพลิห เซ็บ “กัน มัห กิว เป็น ควัน เอาซาง ซีเละ มัห กะโดด มพลิห นเซ็บ กา แญง เอาซาง ไล แลว เค็ย ‘เอาซาง ระ เทวาดา ออ โตะ จวย มัห ไอ มี ระ มัห เป็น ซีวะ อัห ก็อง มัห ไอ มี ระ เจ็ง มัห แคระ เกียง เตาะ’” ปรอง ซาตาน ไล เยซู จังนะ 7 เยซู ก็ ไอ มี ปัง เตาะ นำ ก็ ซวัล ปรอง ซาตาน ฮุนเน “นังซือ เอาซาง ไล ฮุนเน วัล ‘อำ ลอง ใจ เอาซาง ตัก เป็น งกีจ็อง แป ดาย” เยซู อัง 8 ปรอง ซาตาน เม็จ เยซู ไอ มี ปัง แญง ออ เย็ห ก็ ซับรวง นำ ก็อห ญวัง ทึห วัล ญวัง นะ ทึห ซะ ทีซุด เล็ห ตัก มแบ็จ ญวัง ทึห แลว เย็ห ก็ ระ เยซู เม็จ จู เมือง จู ปะเทด ทัว โลก เลาะลัห ครึ ซีเละ 9 เจ็นนัน เย็ห ก็ ไล เยซู คือเน “ซะ จู มบลึ ตี มัห เม็จ เน เอิญ อน ตัก มัห มด ก็ กุญ ดาย กัน มัห กราบ ไว เอิญ เอิญ ก็ อน ตัก มัห มด” ซาตาน ไล เยซู จังนะ 10 เยซู ก็ ลบ ไล เย็ห คือเน วัล “นังซือ เอาซาง ไล อน แลว คือเน ‘เอาซาง เป็น งกีจ็อง คอง แป แป ต็อง กราบ ไว เอาซาง มี ล็อง เดียว ต็อง แอง ฮุน นำ ไล อน ฮัก’ มัห ปัด แอ็ม นทึห เตาะ ซาตาน” เยซู อัง 11 ปรอง ซาตาน ก็ ปัด แอ็ม ปึง เทวาดา ก็ โตะ จวย เยซู กด ลบ ซอง 6:13 เยซู เลิม ซอน อัห มาระโก 1:14-15 , ลูกา 4:14-15 12 ทาเน เยซู ก็ เม็จ คาว เค็ย อัห เญ็บ ยอน เติล ตัก ลุก นำ เม็จ คาว แลว นำ ก็ ทอก เจ็น จังวัด ยูเดีย ลด เริล จังวัด กาลิลี 13 ญาม นำ อุ ตัก จังวัด กาลิลี นัน นำ ก็ เริล งวัล นาซาเร็ด เจ็นนัน นำ ก็ ทอก เจ็น งวัล นาซาเร็ด เริล งวัล คาเปอนาอุม วัล งวัล คาเปอนาอุม เน อุ เปล นอก ทะเล กาลิลี นัน อุ ตัก เคด ตี ซิก เซบูลุน เคิบ นับทาลี 14 ตี เยซู เริล ตัก นัน ก็ ระ เป็น เล็ห มอก แญง เอาซาง ไล อิซยา ตัก อิง นัน อิซยา มเบิด เคียน ระ อน ฮุนเน 15 “ครำ กรอก ซอ ตี อุ เคด เซบูลุน เคิบ เคด นับทาลี อัห ก็ เม็จ ทาง ซะ แลว อัห ปึง นัน ก็ อุ ตัก จังวัด กาลิลี นัน อัห อุ ตัก เปล รวง เริล นอก ทะเล กาลิลี นัน 16 อัห อุ ตัก นัน เจ็น อิง มเบิด ก็ มอก อัห อุ ตัก ตี ม็อญ ซะ ม็อญ ซะ อุ ก็ ญอน อัห บัก และ กุญ โทด จำ เปิล มานะ เน ตัก อัห นัน ก็ คล็อย ซะ นซึล แลว เพาะวา อัห เม็จ ทาง ซะ โตะ นโจง อัห แลว” อิซยา ไล จังนะ เยซู ก็ ลด เริล อุ เคิบ ครำ ปึง นัน มอก อิซยา ไล อน นัน อิซยา 9:1-2 17 เยซู โตะ อุ ตัก นัน แลว นำ ก็ เลิม ไล แญง เอาซาง อน ตัก อัห นำ ไล อัห ฮุนเน “แป ต็อง พระ แอ็ม ตี ลุห ออ แป ต็อง เอิด ใจ แมะ ต็อง วัล โตะ และ เอาซาง ดาย เอาซาง บัก และ โตะ ปกคอง แป แลว” เยซู ไล อัห จังนะ มัดทิว 3:2 เยซู เลือก เอิด ลูกนอง มาระโก 1:16-20 , ลูกา 5:1-11 18 มี มี งิ นัน เยซู ก็ นจาง เริล ตัก เปล นอก ทะเล กาลิลี ญาม นำ นจาง เริล นัน นำ ก็ เม็จ ซีโมน เคิบ อันดรู ปาม เป็น ควน เคิบ นไจ ซีโมน เน นำ ก็ มี ซือ ตัก เปโตร วัล เยซู เม็จ ปาม ซัห เนิ๊ก อุ ปาม โละ คา เท็จ 19 เยซู ก็ งกรอ ปาม “ปา เริล เคิบ เอิญ กา เอิญ ไล อน จาง ตัก ปา เอิญ ระ ปา โละ และ ครำ ฮัก ระ อัห โตะ และ เอิญ” เยซู อัง 20 ปาม เม็จ เยซู งกรอ ออ แลว ปาม ก็ เพิล พระ เนิ๊ก ลด เคริบ เยซู เริล 21 เจ็นนัน อัห ก็ นจาง เริล ตัก เปล นอก ติกๆ อัห นจาง เริล มี บึด มี ญาม เจ็นนัน เยซู ก็ เม็จ ควน เคิบ นไจ เปียะ ล็อง วัล ซือ ตัก ยอน เคิบ ยากอบ ปาม เป็น ควัน เซเบดี ปาม คุด จิง อวน อุ ตัก เฮือ เลิม เคิบ เอา ออ เยซู ก็ มพอล ปาม เริล เคิบ ออ 22 ปาม ก็ พระ เฮือ พระ เอา เริล เลิม เคิบ เยซู ลด ดก ครำ เคริบ เยซู เริล ลูกา 6:17-19 23 ทาเน เยซู ก็ เริล ไล แญง เอาซาง อน ตัก ครำ ยิว ทัว จังวัด กาลิลี นัน นำ ก็ ไล อัห ตัก ฮ็อง พซุม ครำ ยิว ทัว จังวัด กาลิลี นัน นำ ก็ ไล คาว เลาะ คาว แลม เลือง เอาซาง โตะ ปกคอง อัห เจ็นนัน นำ ก็ รักซา ครำ โซะ จู มบลึ จู มบลัก ระ งาล วัล มัดทิว 9:35, มาระโก 1:39 24 ทาเน อัห ก็ เลอะ เม็จ คาว เลือง เยซู ทัว มด แพ็ว ครำ ปะเทด ซีเรีย ตี อุ เยอะ ซะ อัห ก็ เลอะ เม็จ คาว มด อุ เจ็นนัน ไอ มี อิง อัห ก็ เลอะ ซับ ครำ โซะ ซะ เน ซะ นัน โตะ และ นำ ทึดๆ ครำ ปรอง กุด ครำ ตี เป็น จัก เป็น เฮิ๊ด ครำ อำมะพึก อำมาพาด อัห ก็ ซับ ระ นำ รักซา นำ ก็ จวย รักซา อัห ระ เลาะ เล็ห มด จู ล็อง 25 นำ เริล พานเดย ก็ มี ครำ เคริบ นำ เริล ยาง ดก ครำ กาลิลี ครำ ทดบุรี ครำ เมือง เยรูซาเล็ม ครำ จังวัด ยูเดีย ครำ ตี อุ คาม นอก จอแดน พาโนน ก็ โตะ มด ครำ มู เน อัห ก็ เคริบ เยซู เริล |
Global Partners
Global Partners