มัดทิว 17 - Prai Bibleนัง เยซู เปียน มาระโก 9:2-13 , ลูกา 9:28-36 1 ฮก งิ เจ็นนัน วัล เยซู ก็ ก็อห ญวัง ทึห นำ เอิด เปโตร นำ เอิด ยากอบ เคิบ ยอน ตัก เป็น ควน เคิบ นไจ นัน เริล เลิม อัห อุ ตัก ญวัง นัน จุม อัห ซี ล็อง ฮัก 2 เล็ห ทึห แลว ลูกนอง เยซู แพะ ล็อง นัน อัห ก็ ดอม เยซู อุ นัน ทาเน นัง เยซู ก็ เปียน มัด นำ ก็ ทาง มอก งิ คัว นำ ก็ พัห ซัล 3 เจ็นนัน อัห ก็ เม็จ พด โตะ โมเซด เคิบ เอลียา โตะ จ็อก อุ เคิบ เยซู นัน 4 เปโตร ก็ ซ็วน เยซู คือเน “นาย เฮย แอ อุ เน ก็ เลาะ นอ กัน มัห ซีรอก ระ เอิญ แอง ตุบ อน แป เอิญ ก็ แอง อน แป ดาย แอง อน มัห มี ลัง โมเซด มี ลัง เอลียา มี ลัง นอ” เปโตร อัง 5 ญาม เปโตร ควะ จ็อก อุ เคิบ เยซู นัน ก็ พด เล็ห บด บด นะ ปุก ระ อัห บด นะ ทาง ซีเละ เจ็นนะ ก็ มี แญง จ็อก ตัก บด นัน ฮุนเน “เน เป็น ควัน เอิญ ตี เอิญ รัก ดก ทีซุด ดาย เอิญ ปอใจ อัง นำ ซีเละ แป ต็อง ปัง แญง นำ เลาะๆ ดาย” แญง นะ อัง 6 ญาม แป เปโตร เม็จ แญง นะ จ็อก คือนัน อัห ก็ แร็ง นเจิก อัห ก็ ซีเลิบ มัด เพิล พระ อวย อุ ตัก ซิก 7 เจ็นนัน เยซู ก็ โตะ ทุๆ อัห นำ ไล อัห ร็อห “ร็อห เนอ อำ นเจิก เตาะ” นำ อัง 8 อัห ก็ ดอม โตน ดอม แต็ห เม็จ เยซู มี ล็อง เดียว ฮัก ไอ มี เม็จ โมเซด เคิบ เอลียา เตาะ 9 เจ็นนัน อัห ก็ จูล เจ็น ญวัง ญาม อัห กำลัง นจาง จูล นัน เยซู ก็ ไล อัห คือเน “ซะ ตี แป เม็จ เน อำ แป ไล ซีเอ ดาย เพาะวา เอิญ เปิล ลบ วัล รีด เล็ห วัล ซัง แป กอย ไล อัห ดาย” เยซู อัง 10 เจ็นนัน ปึง ลูกนอง นัน ก็ ซ็วน เยซู คือเน “ปึง อาจาน ตี ไล กด เอาซาง อน ตัก แอ นัน อัห เค็ย เอลียา ต็อง โตะ วาล ซัง โตะ ล็อง นัน ตี ปกคอง แอ ซีวะ อัห เค็ย เอลียา ต็อง โตะ วาล นำ” อัห ซ็วน เยซู จังนะ 11 เยซู ก็ ไล อัห คือเน “เอลียา โตะ วาล ซีเละ เอลียา ต็อง โตะ เตียม จู มบลึ วาล ระ เลาะ เล็ห มอก เครม ซัง โตะ ล็อง นัน ตี ปกคอง แป ตี อาจาน ไล แป นัน ก็ แคระ แลว ดาย 12 เอิญ ไล แป นังเลาะ นะ เอลียา โตะ แลว แต ปึง ซะ แกะ ไอ มี เม็จจึด เค็ย นำ เป็น เอลียา อัห ก็ วาง แอง ไอ มี เลาะ ซิห นำ ตาม ใจ ออ แลว บัดนะ อัห ก็ แอง ไอ มี เลาะ ซิห เอิญ ตี เอาซาง ระ เกิด เป็น ครำ เน เมือนนอย” เยซู ไล ลูกนอง ออ จังนะ 13 เจ็นนัน ปึง ลูกนอง เยซู อัห ก็ เคาใจ เค็ย เยซู ซักพืน เลือง ยอน ตี จุบ อัห ตัก นอก นัน มาลาคี 4:5, มัดทิว 11:14 เยซู จวย ควัน บาว ปรอง กุด มาระโก 9:14-29 , ลูกา 9:37-43 14 แลว เยซู เคิบ ลูกนอง จูล เจ็น ญวัง นัน แลว เยซู ก็ โตะ และ ปึง พซาซน ตี เพา นำ อุ ตัก เจ็ง ญวัง นัน ทาเน ก็ มี อัหคล็อง มี ล็อง เล็ง โตะ กราบ ไว เยซู 15 นำ ไล เยซู คือเน “อาจาน ครอ ตึ อัง ควัน เอิญ ดาย นำ เป็น บัด เป็น เฮิ๊ด แร็ง เป็น ซีเละ นำ คลิห ตัก โอด ดก ลบ นำ คลิห ตัก นอก ดก ลบ แลว 16 เอิญ ซับ นำ ตัก ลูกนอง มัห ระ อัห จวย รักซา นำ แต ปึง ลูกนอง มัห จวย ไอ มี กุญ” เอา ล็อง นะ อัง 17 เยซู ก็ ซวัล ฮุนเน “ฮีเอิห แป เน ลืน ซีเละ นอ ซีวะ ไอ มี เจือ เอาซาง บ็อห นอ เอิญ ต็อง อด อุ เคิบ แป อิง ปานเดย บ็อห ซัง แป เจือ เอาซาง ซัง แป เคาใจ แร็ง เอาซาง มัห ซับ ควัน ออ โตะ แต็ห เน ดาย” เยซู อัง 18 เจ็นนัน อัห ก็ ซับ ควัน บาว ล็อง นะ ตัก เยซู เยซู ก็ มบรึห ปรอง ทอก เจ็น ล็อง นะ แลว เย็ห ทอก ปัด ออ แลว ควัน บาว ล็อง นะ ก็ ลด เลาะ เล็ห 19 แลว ปน เยซู เจ็น ครำ ดก นัน แลว ปึง ลูกนอง เยซู อัห ก็ ซ็วน เยซู จุม อัห ฮัก “เอ อาจาน ซีวะ อิห มบรึห ปรอง นัน ไอ มี กุญ บ็อห” อัห อัง 20 เยซู ก็ ไล อัห คือเน “ก็ เป็น ตัก แป ไอ มี ปอ เจือ เอาซาง เอิญ ไล แป นังเลาะ นะ กัน แป เจือ เอาซาง ตีดต็อง มอก พรัน มบัห โคระ มี แก็น เดียว นัน กัน แป เจือ เอาซาง ตีดต็อง มอก นัน แป ไล ญวัง เน ญาย เริล ตี ซอ เย็ห ก็ ปัง แญง แป มด ดาย กัน แป เจือ แป แอง ซีวะ ก็ กุญ มด” เยซู อัง เยซู ไล อัห เค็ย นำ ต็อง เปิล มาระโก 9:30-32 , ลูกา 9:43-45 22 เจ็นนัน เยซู เคิบ ปึง ลูกนอง ก็ โตะ ซุม นอย อุ มี ตี นะ ตัก จังวัด กาลิลี นัน เยซู ก็ ไล อัห คือเน “เอิญ เน ตี เอาซาง ระ เกิด เป็น ครำ เอิญ ต็อง โซะ ต็อง เปิล ดาย อัห ต็อง มอบ เอิญ อน ตัก อัหซอ มเบิล แอ็ม 23 แต เปิล แพะ งิ แลว เอาซาง ก็ ระ เอิญ รีด เล็ห วัล” เยซู อัง ปึง ลูกนอง เม็จ เยซู ไล อัห จังนะ อัห ก็ ตุกใจ เซียใจ ซีเละ ไอ มี เลาะใจ ปัง เตาะ เลือง ต็อห พาซี วิฮาน เอาซาง 24 เจ็นนัน เยซู เคิบ ลูกนอง ออ ก็ เริล งวัล คาเปอนาอุม เล็ห ตัก งวัล คาเปอนาอุม แลว ก็ มี ครำ โตะ เก็บ พาซี ซำรับ พัดทะนา วิฮาน อัห โตะ ซ็วน เปโตร ฮุนเน “อาจาน แป นำ ต็อห พาซี ซำรับ พัดทะนา วิฮาน อัน” อัห อัง อิซราเอล ญาย 30:13, 38:26 25 “นำ ต็อห กา” เปโตร อัง เจ็นนัน เปโตร ก็ กุด ควังใน เจิง และ ไล เยซู แต นำ ไอ มี ตัน ไล เยซู เค็ย อัห ซ็วน ออ เยซู ก็ ซ็วน นำ วาล คือเน “ซีโมน มัห กึด จังนัก บ็อห จู ปะเทด ทัว โลก เน ปึง พะเจายูฮัว อัห เก็บ พาซี ตัก อีเอ บ็อห ไล ดก อัห เก็บ ตัก ควัน นำ ลู อัห เก็บ ตัก ครำ ซอ” เยซู ซ็วน นำ จังเน 26 เปโตร ก็ ซวัล นำ คือเน “ไล ดก อัห เก็บ ตัก ครำ ซอ ครำ ซอ ต็อง ต็อห พาซี อน พะเจายูฮัว ไอ มี อัห เก็บ ตัก ควัน พะเจายูฮัว เตาะ” เปโตร อัง เยซู ก็ ซวัล เปโตร “กัน จังนะ ควัน พะเจายูฮัว ก็ ไอ มี จำเป็น ต็อห พาซี เตาะ นอ 27 ทาเน แอ ตี เป็น ครำ คอง เอาซาง แอ ก็ ไอ มี จำเป็น ต็อห เงิน วิฮาน เอาซาง เตาะ นอ แต แอ ไอ มี ซีรอก มี เลือง เคิบ อัห นอ แอ อน อัห ก็ เลาะ เปโตร มัห เริล ซิห เบ็ด ดาย มัห เริล ซิห เบ็ด ตัก นอก มัห กุญ คา มี นัง มัห วัห งกาบ คา นัน มัห ก็ เม็จ เงิน อุ นัน มี เลียน มัห เอิด เงิน นัน ต็อห อน ตัก อัห ซำรับ อา เปียะ ล็อง นอ” เยซู อัง |
Global Partners
Global Partners