มัดทิว 15 - Prai Bibleเลือง ซีวะ ลุห ซีวะ ไอ มี กิว ลุห มาระโก 7:1-13 1 ทาเน ก็ โตะ ครำ ฟาริซี เคิบ อาจาน ไล กด เอาซาง อัห โตะ เจ็น เมือง เยรูซาเล็ม อัห โตะ ซ็วน เยซู ฮุนเน 2 “ซีวะ ลูกนอง มัห ไอ มี แอง พิที พุจ ที ซีวะ อัห ลุห อัง กด ตี เอา เม แอ ไล อน เจ็น อิง” อัห อัง 3 เยซู ก็ ซวัล อัห คือเน “แป ดุห แป ก็ ลุห อัง กด เอาซาง แป ไอ มี กิว แอง มอก กด เอาซาง ไล อน แป แอง มอก กด ออ ฮัก 4 นังเลาะ แลว เอาซาง ไล แป ทือ เอา ทือ เม ออ อีเอ จม งวย เอา เม ออ ล็อง นัน ต็อง เปิล เอาซาง ไล จังนะ 5-6 แต แป เน ไอ มี กิว ทือ เอา เม ออ มอก กด เอาซาง ไล แป วัล ทือ กด คอง ออ ฮัก เงิน ตี แป นทม ระ จวย เอา เม ออ นัน แป ไล อัห ไล เอา เม ออ จังเน วัล ‘เอา เฮย เม เฮย เงิน ตี เอิญ อง จวย ปา นัน เอิญ ซันญา อน ตัก เอาซาง แลว เอิญ จวย ปา ไอ มี กุญ ดาย’ แป ไล นอย ไล เอา เม ออ จังนัน นอ กัน ซีเอ ไล เอา เม ออ มอก นัน อัห ก็ ไอ มี จำเป็น จวย เอา เม ออ เตาะ แป ไล นอย จังเน นอ 7 แป เน จ็อก มี ยาง แอง มี ยาง วัล แป แอง มอก อิซยา ลาม เอาซาง เพีย เคียน ระ อน ซีเละ อิซยา เคียน ระ อน จังเน 8 ‘ครำ ปึง เน อัห จ็อก อัห ก็ เค็ย อน เกียด ตัก เอิญ อัห เค็ย เจือ เอิญ อัห จ็อก พาลือ แต ใจ อัห แอง มี ยาง วัล อัห ไอ มี กิว รัก เอิญ ไอ มี กิว เจือ เอิญ 9 ตี อัห ไว เอิญ ทือ เอิญ นัน ก็ ไอ มี คิ ไอ มี ปะโยด ตี อัห ทือ นัน ตี อัห ไล อัหซอ นัน อัห เค็ย เป็น กด เอาซาง แต ไอ แมน กด เอาซาง ซัง เป็น กด ครำ ฮัก ไอ มี เป็น ปะโยด เตาะ’ เอาซาง อัง อิซยา 29:13 อิซยา เคียน ไล อน จังเน แป ก็ แอง มอก อิซยา เค็ย นัน ซีเละ” เยซู ไล อัห จังนะ ซะ ตี ระ แอ เป็น ครำ ลุห มาระโก 7:14-23 10 เจ็นนัน เยซู ก็ มพอล พซาซน โตะ ติๆ ปัง แญง ออ “แป ปัง เลาะๆ ดาย 11 เลือง แอง พิที พุจ ที วาล ป็อง จะ มอก เอา เม แป ไล อน เจ็น อิง นัน แป ต็อง กึด เลาะๆ ดาย ซะ ป็อง ตี แอ ซิห ตัก งกาบ นัน ไอ มี แอง ระ แอ เป็น ครำ ลุห ครำ เพอะ แญง จ็อก ตี ทอก โตะ เจ็น ใจ เจ็น งกาบ แอ นัน ฮัก ซัง แอง ระ แอ เป็น ครำ ลุห ครำ เพอะ” เยซู อัง 12 เจ็นนัน ลูกนอง เยซู ก็ โตะ ไล เยซู คือเน “อาจาน ตี มัห ไล จังนะ ปึง ฟาริซี เม็จ อัห ก็ แร็ง อ็อด ซีเละ ดาย” ลูกนอง นำ อัง 13 เยซู ก็ ซวัล อัห คือเน “ครอ มเบิด เลือง เกาลำ ดาย เอา เอิญ ตัก วาง ทึห นำ กุญ เทิล ลำ ตัก โลก แพนซิก เซ็บ เน อัหซอ ก็ เทิล แด ทาเน บัดนะ เกาลำ ตี นำ เทิล ออ ฮัก นำ ก็ ระ อน แต เกาลำ จู เกา ตี นำ ไอ มี กุญ เทิล นัน นำ ต็อง โท็ห แอ็ม มด บัดนะ 14 เจ็นนัน ก็ อำ ปัง แญง ปึง ฟาริซี นัน เตาะ บัดนะ อัห ก็ มอก เกาลำ ตี เอาซาง ต็อง โท็ห แอ็ม นัน อัห ไล ซีวะ ก็ อำ เจือ เตาะ อัห ตี ไล ไอ มี แคระ นัน อัห ก็ มอก ครำ บอด มัด ซับรวง ครำ บอด มัด กัน ครำ บอด มัด ซับรวง ครำ บอด มัด ปาม ก็ คลิห งกุก คลิห งกวบ กวัด ตึง เปียะ ล็อง นัน อำ ซนใจ แญง อัห เตาะ” เยซู อัง ลูกา 6:39 15 เจ็นนัน เปโตร ก็ ซ็วน เยซู คือเน “อาจาน แญง ตี มัห มเบิด ไล อิห มันเน วะ อิห ไอ มี เคาใจ ครอ ระ มัห ไล อน ตัก อิห ระ อิห เคาใจ เลาะๆ ดาย” เปโตร อัง 16 เยซู ก็ ไล ปึง ลูกนอง ฮุนเน “แป ไอ มี ตัน เคาใจ อัง 17 แอ ป็อง ซีวะ ก็ อี คลิห เริล ตัก มพุล แอ ฮัก เจ็นนัน ก็ คลิห แอ็ม ตัก ซวม 18 แต แญง ตี แอ จ็อก เน ก็ เล็ห เจ็น ใจ แอ แญง ไอ มี เลาะ นัน แอง ระ แอ เป็น ครำ เจอะ ครำ เพอะ ฮัก 19 ตัก ใจ แอ ก็ มี กำกึด ไอ มี เลาะ แอ กึด มเบิล นอย ปิล จู ปิล วะ ลอด ซะ จ็อก คีอู เซาะ อัห กำกึด ไอ เลาะ เน ก็ ทอก โตะ เจ็น ใจ แอ ฮัก 20 กำกึด ไอ มี เลาะ เน ซัง แอง ระ แอ เป็น ครำ เจอะ ครำ เพอะ แต เลือง ไอ มี แอง พิที พุจ ที วาล ป็อง จะ นัน ไอ มี แอง ระ แอ เป็น ครำ เจอะ ครำ เพอะ เตาะ” เยซู อัง มัดทิว 12:34 อัหเม กรอก ซอ เจือ เยซู มาระโก 7:24-30 21 เจ็นนัน เยซู ก็ เริล เจ็น จังวัด กาลิลี เล็ห นดิ เคด เมือง ไทระ เคิบ เมือง ไซดอน 22 เล็ห ตัก นัน แลว ก็ มี อัหเม มี ล็อง โตะ และ เยซู อัหเม ล็อง นัน นำ เป็น ครำ กรอก คานาอัน ไอ แมน ครำ ยิว เตาะ นำ ก็ วาง ครอ ระ เยซู จวย ออ นำ ครอ คือเน “งกีจ็อง ควัน งา ดาวิด เฮย ครอ ตึ อัง เอิญ ดาย ควัน อัหเม เอิญ มี ปรอง กุด นำ เย็ห ทอระมาน นำ ซีเละ ครอ เคิบ มัห จวย ควัน เอิญ ดาย” อัหเม ล็อง นะ อัง 23 เยซู ก็ เค็ด อุ ไอ มี ซวัล นำ ซัก มี แญง ทาเน ปึง ลูกนอง เยซู นัน อัห ก็ วาง ครอ เคิบ เยซู ฮุนเน “อีซะเน ดุ นำ กวน แอ ซีเละ มัห ไล นำ วัล ก็ เลาะ” อัห อัง 24 เยซู ก็ ลด ไล อัหเม ล็อง นัน คือเน “เอาซาง ไอ มี ไล เอิญ จวย ครำ กรอก ซอ นำ ระ เอิญ โตะ จวย ครำ อิซราเอล ฮัก ดาย อัห มอก แกะ คอง เอาซาง ตัก เลอ รวง เอาซาง ไล เอิญ โตะ จวย อัห ฮัก” เยซู ไล อัหเม ล็อง นัน จังนะ 25 แต อัหเม ล็อง นัน ก็ โตะ กราบ ไว เยซู นำ วาง ครอ ระ เยซู จวย ออ ติกๆ “ครอ เตาะ งกีจ็อง เฮย ครอ เคิบ มัห จวย เอิญ ดาย” นำ อัง 26 เยซู ก็ มเบิด ไล นำ คือเน วัล “แอ เอิด ซะ ป็อง คอง ควัน ออ กวาง อน ตัก ซวะ ป็อง ก็ ไอ มี จบ แคระ ก้า” เยซู อัง 27 อัหเม ล็อง นัน ก็ ซวัล เยซู คือเน “แมน ซีเละ นะ งกี เฮย แต ซวะ นัน เย็ห ซวาล ป็อง ปุด ตี คลิห ฮัก นอ” อัหเม ล็อง นะ อัง 28 เยซู ก็ ซวัล นำ คือเน “ควน เฮย มัห เน เจือ เอาซาง ซีเละ นอ ตี มัห ครอ เอิญ จวย ออ เน เอิญ ก็ จวย มัห แลว ดาย” เยซู อัง ท็อบ เยซู ไล อัหเม ล็อง นัน จังนะ ควัน อัหเม ล็อง นัน ก็ ลด เลาะ เล็ห ญาม นัน ลด เยซู รักซา ครำ โซะ ดก ล็อง 29 เจ็นนัน เยซู ก็ ทอก เริล เจ็น ตี นัน นำ ลบ วัล โตะ ตัก นอก ทะเล กาลิลี วัล นำ ก็ ก็อห เริล ตัก ญวัง นำ ก็ คุด อุ ตัก นัน 30 เจ็นนัน ก็ มี ครำ ดก ซีเละ โตะ และ นำ อัห ซับ ครำ โซะ ดก ล็อง ระ เยซู รักซา ครำ เปิกเดิด เริล ก็ มี ครำ บอด มัด ก็ มี ครำ แว็ล ก็ มี ครำ ไอ มี เป็น จ็อก ก็ มี ครำ โซะ ซะเน ซะนัน ก็ มี มด ดก ซีเละ อัห ซับ ครำ โซะ นัน อวย เคิง มัด เยซู นัน เยซู ก็ รักซา อัห ระ เลาะ เล็ห มด จู ล็อง 31 ทาเน ปึง พซาซน ก็ ญ็อก งึด อัง เยซู อัห งึด ตี นำ จวย อัห กุญ มด ครำ ตี ไอ มี จางรู จ็อก อัห ก็ จ็อก กุญ ครำ แว็ล ลา แว็ล นดัก ก็ เลาะ เล็ห วัล ครำ ตี ไอ มี เป็น นจาง อัห ก็ นจาง เริล กุญ ครำ บอด มัด อัห ก็ ดอม เม็จ มด อัห จู ล็อง ก็ เลอะ ลือ เอาซาง งกีจ็อง คอง ครำ อิซราเอล นัน เยซู เลียง ครำ 4,000 ล็อง มาระโก 8:1-10 32 เจ็นนัน เยซู ก็ มพอล ลูกนอง โตะ และ ออ อัห โตะ และ นำ แลว นำ ก็ ไล อัห จังเน “ตึ อัง ปึง พซาซน เน ซีเละ ดาย อัห อุ เคิบ เอิญ แพะ งิ แลว อัห ไอ มี ควะ ซีวะ ป็อง นอ กัน เอิญ ไล อัห วัล เจิง ญาม อัห ควะ โซะ จะ อุ เน จับ อัห เป็น ปลิ เป็น ลม กิล ตาม รวง ฮุ เอิญ ก็ ไอ งกิ ไล อัห วัล เจิง เตาะ” เยซู อัง 33 ปึง ลูกนอง ก็ ไล เยซู คือเน “พาเน ไอ มี งวัล ครำ ดาย แอ และ ซะ ป็อง ตัก นเดย เลียง ครำ ดก มอก เน บ็อห” อัห อัง 34 เยซู ก็ ซ็วน อัห คือเน “แป มี คนมปัง แซะ แพ็น บ็อห” นำ อัง ปึง ลูกนอง นำ ก็ ไล นำ “มี คนมปัง เจ็ด แพ็น มี คา เปียะ แพะ นัง แย็ด” อัห อัง 35 เจ็นนัน เยซู ก็ ไล ปึง พซาซน คุด 36 นำ ก็ เอิด คนมปัง เจ็ด แพ็น เคิบ คา นัน ลด คอบคุน เอาซาง นำ ก็ เพก คนมปัง เคิบ คา นัน อน ตัก ลูกนอง ออ ปึง ลูกนอง ก็ แบง อน ตัก ปึง พซาซน ป็อง 37 เจ็นนัน ปึง พซาซน ก็ ป็อง อิม มด จู ล็อง แลว อิม อัห มด จู ล็อง แลว ก็ ควะ เลือ อุ วัล ปึง ลูกนอง เยซู ก็ เอิด อัน ตี ควะ เลือ นัน กุญ เจ็ด งโกรง จ็อง ปิ ควะ เลือ ดก ซีเละ 38 ปึง ครำ ตี ป็อง นัน นับ อัหคล็อง ล็อนๆ มี ปะมาน 4,000 ล็อง ปึง อัหเม เคิบ ปึง ควัน แย็ด ไอ มี นับ เตาะ 39 เจ็นนัน เยซู ก็ ระ ปึง พซาซน วัล ออ ซุด อัห วัล มด แลว เยซู ก็ ต็อก เฮือ เริล พาโนน เล็ห ตัก งวัล มากาดาน พาโนน |
Global Partners
Global Partners