ยอน 2 - Prai Bibleงาน แตงงาน ตัก งวัล คานา จังวัด กาลิลี 1 อุ เปียะ งิ เจ็นนัน วัล อัห ก็ เริล แตงงาน ครำ งวัล คานา จังวัด กาลิลี นัน เม เยซู ก็ อุ ตัก งาน แตงงาน นัน 2 อัห ก็ มพอล เยซู เคิบ ลูกนอง นำ เมือนนอย เยซู เคิบ ลูกนอง ก็ อุ ตัก นัน เลิม 3 อัห ก็ ป็อง จะ อัห ก็ ออก ปุจ องุน ทาเน ก็ ซุด แอ็ม ปุจ อัห เม เยซู เม็จ ซุด แอ็ม ปุจ อัห นำ ก็ โตะ ไล เยซู “ซุด แอ็ม ปุจ อัห แลว ควัน” นำ อัง 4 ทาเน เยซู ก็ ซวัล นำ ฮุนเน “เม มัห ไล เอิญ อังวะ ไอ มี ตัน เล็ห เวลา เอิญ ระ อัห เม็จ แร็ง ออ ดาย” เยซู อัง 5 ทาเน เม เยซู นัน ก็ ไล ลูกนอง เจิง นัน นำ ไล อัห คือเน “กัน เยซู ไล แป แอง จังนัก แป ก็ แอง จังนัน ดาย” นำ อัง 6 ทาเน ก็ มี อุง ฮก และ อุ นัน เป็น อุง ตี อัห เอิด เกียง แอง นัน เป็น อุง ตี อัห ซิห ออก ซำรับ แอง พิที ลาง ซะ เน ซะ นัน ตาม แบบ ยิว ฮัก อุง นะ จ็อง และ ซีเมอ มี และ นเดย อัห ซิห ออก กุญ ปะมาน มี ลอย ลิด เน 7 ทาเน เยซู ก็ ไล อัห ปัด ออก ซิห ตัก อุง นัน ระ ปิ อัห ก็ ปัด ออก ซิห ปิ มด กวัด ตึง ฮก และ นัน 8 เจ็นนัน เยซู ก็ ไล ลูกนอง เจิง นัน เปิก เอิด ออก นัน ซับ อน ตัก ฮัวนา ตี ฮับพิดซอบ งาน นัน ระ นำ จิม อ็อญ วาล ลูกนอง เจิง นัน ก็ เปิก เอิด ออก นัน ซับ อน ตัก ฮัวนา ล็อง นัน ตี ฮับพิดซอบ งาน นัน 9 ฮัวนา งาน ก็ จิม อ็อญ เป็น เล็ห ปุจ องุน เลาะ (แต นำ ไอ มี เม็จจึด ปุจ นัน เล็ห เจ็น นเดย มี แต ปึง ลูกนอง ตัก เจิง อัห นัน ฮัก เม็จ) ทาเน ฮัวนา งาน ก็ งกรอ เจาบาว โตะ และ ออ นำ ไล เจาบาว นัน คือเน 10 “เอ จู ลบ เจาพาบ ก็ พระ ปุจ เลาะ ทีซุด อน ตัก อัห ออก วาล นอ ดก อัห ออก แลว ซัง อัห กอย พระ ปุจ เลาะ ซีเมอ อน ตัก อัห ออก แทะ แต มัห เน ไอ มี แอง มอก อัห ดาย ปุจ เลาะ ทีซุด มัห อน แทะ วัล แปลก มี ติด ดาย มัห เน” ฮัวนา งาน ไล เจาบาว จังนะ 11 เยซู แอง ออก ระ เป็น เล็ห ปุจ องุน ตัก งวัล คานา จังวัด กาลิลี เน ก็ เป็น ลบ แรก ตี เยซู แอง ระ ครำ เม็จจึด เค็ย นำ มี แร็ง ดก ปึง ลูกนอง นำ เม็จ อัห ก็ เจือ นำ 12 แลว อัห วัล เจ็น เจิง แตงงาน นัน แลว เยซู ก็ เริล งวัล คาเปอนาอุม เม นำ ควน คอง นำ เคิบ ลูกนอง คอง นำ ก็ เริล เลิม มด อัห อุ ตัก นัน ดก งิ มัดทิว 4:13 เยซู มบรึห ครำ เท็จ ซะ ตัก วิฮาน มัดทิว 21:12-13 , มาระโก 11:15-17 , ลูกา 19:45-46 13 เจ็นนัน ก็ บัก และ เล็ห งิ เทซกาน เปซา เป็น เทซกาน ตี ครำ ยิว กึด เลือง เอาซาง จวย อัห ตัก ปะเทด อียิบ ตัก อิง นัน ทาเน เยซู ก็ เริล เมือง เยรูซาเล็ม ซะลอง เทซกาน เปซา เลิม เคิบ อัห 14 เล็ห ตัก เมือง เยรูซาเล็ม แลว นำ ก็ เริล วิฮาน เอาซาง เล็ห ตัก เด็นเตะ วิฮาน นัน นำ ก็ เม็จ ปึง ปอกา ดก ล็อง อัห เท็จ งัว เท็จ แปะ เท็จ แกะ เท็จ เซ็ม งกรุก อน อัห ปึง ปอกา เท็จ อน อัห ทวาย อน ตัก เอาซาง มบรัห ก็ คุด แลก เงิน อุ ตัก เด็นเตะ วิฮาน นัน อัห คุด อุ ตัก โตะ แลก เงิน อน อัห 15 เยซู เม็จ นำ ก็ ไอ มี เลาะใจ เตาะ นำ ก็ เอิด ทาล แอง เป็น ซีมบัด นำ มบรึห อัห ปัด แอ็ม เจ็น วิฮาน นัน มด จู ล็อง แปะ แกะ งัว เซ็ม นัน นำ ก็ มบรึห แอ็ม มด นำ ทุก แอ็ม เงิน ตี อัห แลก นัน นำ มพึห แอ็ม โตะ ตี อัห แลก เงิน นัน จือ เตาะ เงิน เต็ล จัก เริล มี ติด มี ตี 16 นำ ก็ ไล ครำ ตี เท็จ เซ็ม งกรุก นัน คือเน “เอิด ซะ เน กวัล แอ็ม เจ็น วิฮาน เน มด ดาย อำ แอง ระ เจิง เอา เอิญ เป็น กาด เท็จ ซะ ดาย” นำ อัง 17 ปึง ลูกนอง เยซู เม็จ เยซู แอง จังนัน อัห ก็ พุล ลุห นโทล อัง แญง เอาซาง ตี อัห เคียน ระ อน ฮุนเน “เอิญ ซีรอก ระ เจิง เอาซาง มี เกียด ฮัก เอิญ ก็ ลด เอิด ใจ ซิห เจิง เอาซาง ซีเละ” แญง เอาซาง ไล จังนะ เพลง เอาซาง 69:9 18 ญาม ปึง ซะ แกะ เม็จ เยซู มบรึห ปึง ปอกา นัน อัห ก็ ไอ มี ปอใจ เตาะ อัห ก็ โป เยซู คือเน “บัห มัห แอง ซีวะ จังเน กัน เอาซาง ไล มัห แอง ฮุนเน ซีเละ ก็ มัห แอง ซะ แปลก ระ อิห เม็จ กา ระ อิห เม็จจึด เค็ย มัห มี ซิด แอง จังเน ซีเละ” อัห อัง 19 เยซู ก็ ไล อัห คือเน “เออะ ดิห กัน แป รึห แอ็ม วิฮาน เน เอิญ แอง แมะ แพะ งิ ก็ แลว” เยซู อัง 20 อัห ก็ ซวัล นำ คือเน “บัห มัห เค็ย ซีวะ จังนะ อัห แอง วิฮาน เน ซีซิบ ฮก วาง ซัง แลว ดาย มัห วัล เค็ย แอง แพะ งิ ก็ แลว ไอ มี เตาะ” อัห อัง 21 แต วิฮาน ตี เยซู เค็ย นัน นำ ซีแล็ม เค็ย นัง ออ ฮัก 22 แทะ นัน อิง วัล ญาม เยซู เปิล ลบ วัล รีด เล็ห นัน ปึง ลูกนอง เยซู ก็ พุล ลุห นโทล อัง แญง ตี เยซู ไล อัห นัน อัห ก็ ลด เจือ นังซือ เอาซาง อัห ก็ ลด เจือ แญง ตี เยซู ไล อน มด นัน 23 ทาเน ญาม อัห ซะลอง เทซกาน เปซา นัน เยซู ก็ อุ ตัก เมือง เยรูซาเล็ม นัน ญาม นำ ควะ อุ ตัก เมือง เยรูซาเล็ม นัน นำ ก็ แอง ซะ แปลก ดก มบลึ ระ อัห เม็จจึด นำ มี แร็ง เอาซาง นัน ญอน อัห เม็จ นำ แอง ซะ แปลก นัน กุญ อัห ก็ เจือ นำ ดก ซีเละ 24 แต เยซู เน นำ ไอ มี เจือใจ อัห เตาะ นำ เม็จจึด แลว เค็ย ครำ ปึง นัน อัห กิว เจือ นำ ไอ มี กิว เจือ นำ นำ ก็ เม็จจึด มด 25 ไอ มี จำเป็น ต็อง มี ครำ ไล นำ เค็ย อีเอ เจือ อีเอ ไอ มี กิว เจือ นำ เม็จ มด แลว ครำ แอ เน กึด จังนัก นำ ก็ เม็จ มด แลว |
Global Partners
Global Partners