ยอน 12 - Prai Bibleมารี ซิห นำฮอม ตัก เยซู มัดทิว 26:6-13 , มาระโก 14:3-9 1 ทาเน ก็ ควะ ฮก งิ วัล ซัง เล็ห งิ อัห ซะลอง เทซกาน เปซา นัน เจ็นนัน ก็ โตะ เยซู ตัก งวัล เบทานี เป็น งวัล ลาซารัด ตี เยซู แอง ระ รีด เล็ห วัล นัน 2 ทาเน อัห ก็ ป็อง เลียง ตอนฮับ เยซู นไจ ลาซารัด ตัก มาทา นัน นำ ก็ จวย พระ จะ พระ วะ อน อัห ลาซารัด ก็ ป็อง เลิม เคิบ เยซู นัน 3 เจ็นนัน มารี ก็ เอิด ควด นำฮอม นาระดา โตะ มี ควด จ็อง ควด ซีเมอ เน นำฮอม ก็ เป็น นาระดา ล็อนๆ แปง ญิม ซีเละ นำ ก็ เอิด ทุก ซิห ตัก เจ็ง เยซู เจ็นนัน นำ ก็ เอิด นโซก กึ ออ เจ็ด ปีด แอ็ม เจ็ง เยซู นำ ฮอม นัน ก็ ยุม ทัว เจิง มด ลูกา 7:37-38 4 ทาเน ก็ มี ลูกนอง เยซู มี ล็อง (ตี ฮักลัง เยซู แทะ นัน วัล) ซือ นำ ตัก ยูดาด อิซคารีโอด นัน ยูดาด เม็จ มารี ทุก นำฮอม ซิห ตัก เจ็ง เยซู คือนัน นำ ก็ ไอ มี เลาะใจ เตาะ นำ ก็ เค็ย มารี จังเน 5 “เปือง ไบ มัห จังเน ซีวะ ไอ มี มัห เอิด นำฮอม นัน เท็จ กัน เท็จ ก็ กุญ เงิน ดก เตา เคิบ ญิม รับจาง มี วาง ดาย เท็จ เอิด เงิน นัน จวย ครำ ตุก ครำ ญาก ก็ เลาะ” นำ อัง 6 ตี ยูดาด เค็ย จังนะ นังเลาะ แลว ไอ แมน นำ กิว ซนใจ จวย ครำ ตุก ครำ ญาก เตาะ นำ ซีรอก ลอด เอิด นำ เป็น ครำ จางลอด นำ ก็ เป็น ครำ ก็อง กะเปา เงิน คอง ปึง ซิบซอง ล็อง นัน อุ แลว ดก ลบ นำ ลอด เอิด เงิน อัห แลว 7 เยซู ก็ ไล อัห คือเน “อำ เค็ย มารี เตาะ ระ นำ แอง นทึห เตาะ ตี นำ แอง มอก เน ก็ เลาะ แลว นำ เพีย ซิห นำฮอม ตัก นัง เอิญ เน ซำรับ อัห เทิ๊บ เอิญ บัดนะ 8 ครำ ตุก ครำ ญาก อัห อุ เคิบ แป ตลอด แป จวย อัห ญาม นเดย ก็ กุญ แต เอิญ เน ไอ มี ควะ อุ เคิบ แป ตลอด เตาะ อัหเม ล็อง เน ซิห นำฮอม ตัก เอิญ งิ นะ เน ก็ เลาะ แลว” นำ อัง กด เอาซาง 15:11 อัห อง มเบิล ลาซารัด 9 ทาเน ครำ ยิว ดก ล็อง เม็จ คาว เค็ย เยซู อุ ตัก งวัล เบทานี อัห ก็ เริล และ เยซู ตัก งวัล นัน ไอ แมน อัห ซีรอก เม็จ เยซู มี ล็อง เดียว อัห ซีรอก เม็จ ลาซารัด วัล อัห เม็จ คาว เค็ย ลาซารัด เปิล แต เยซู แอง ระ นำ รีด เล็ห วัล อัห ก็ ซีรอก เม็จ เคิบ มัด ออ 10-11 ดก ครำ ซนใจ เริล และ เยซู เคิบ ลาซารัด ก็ ญอน อัห เม็จ คาว ลาซารัด นัน อัห ก็ ลด พระ แอ็ม ปึง มอ เอาซาง แกะ อัห ลด เจือ เยซู ทาเน ปึง มอ เอาซาง แกะ นัน เม็จ ดก ครำ พระ ออ อัห ก็ ไอ มี ปอใจ อัห ก็ ซีรอก มเบิล แอ็ม ลาซารัด วัล อัห ซะลอง เยซู กุด เมือง เยรูซาเล็ม มัดทิว 21:1-11 , มาระโก 11:1-11 , ลูกา 19:28-40 12 คือ งิ กรัก วัล ก็ มี ครำ ดก ล็อง ตี โตะ ซะลอง เทซกาน เปซา ตัก เมือง เยรูซาเล็ม นัน อัห เม็จ คาว เค็ย เยซู บัก และ โตะ เมือง เยรูซาเล็ม 13 อัห เม็จ คาว เค็ย เยซู กำลัง โตะ อัห ก็ ทอก เจ็น เมือง อัห เริล ตอนฮับ นำ อัห ก็ เอิด งกอง นทู อินทาพำ เริล ตอนฮับ นำ อัห ก็ งกรอ แร็งๆ ฮุนเน “ครอ ลือ มัห ดาย เอาซาง ครอ ระ มัห แอง เลาะๆ ซิห ล็อง เน ตี มัห ระ โตะ ตัก อิห เน ครอ ระ มัห แอง เลาะๆ ซิห พะเจายูฮัว อิซราเอล อิห เน เนอ” อัห อัง เพลง เอาซาง 118:25-26 14 ทาเน เยซู ก็ เม็จ ลา ซีเติน มี นัง นำ ก็ ต็อก ลา นัง นัน โตะ ตัก เมือง เยรูซาเล็ม นำ ต็อก ลา โตะ มอก อัห เพีย เคียน ระ ตัก นังซือ เอาซาง แลว คือเน 15 “ครำ เมือง ซีโยน เฮย อำ นเจิก เตาะ ดาย เน โตะ พะเจายูฮัว คอง แป นำ ต็อก ลา แย็ด โตะ และ แป” นังซือ เอาซาง ไล จังนะ เซคารียา 9:9 16 งิ นัน ปึง ลูกนอง เยซู อัห ไอ มี เคาใจ ตี เยซู ต็อก ลา นัน แต แลว เยซู เปิล ลบ วัล รีด เล็ห แลว แลว นำ เริล วาง นทึห แลว แลว นำ กุญ เกียด ตัก เอาซาง นทึห แลว แทะ นัน วัล ซัง ปึง ลูกนอง นำ เคาใจ เลือง นำ ต็อก ลา กุด เมือง เยรูซาเล็ม นัน อัห ก็ ลุห นโทล อัง แญง เอาซาง ตี เพีย ไล อน เลือง เยซู ต็อก ลา นัน อัห เม็จ ฮุนนัน มด ซัง อัห เคาใจ 17-18 ทาเน ก็ ดก ครำ โตะ และ เยซู ตัก รวง นัน ตี ดก โตะ ครำ ก็ ญอน อัห เม็จ คาว เยซู จวย ลาซารัด งิ นาน ก็ ฮุนเน ดาย ญาม เยซู จวย ลาซารัด รีด เล็ห นัน ก็ มี ดก ล็อง อุ เคิบ เยซู ญาม นัน ปึง นัน ตี เม็จ เยซู จวย ลาซารัด เคิบ มัด ออ นัน อัห ก็ เริล ไล คาว เยซู นัน ตัก เมือง เยรูซาเล็ม ครำ เยรูซาเล็ม เม็จ คาว แลว อัห ก็ โตะ และ เยซู ทึดๆ 19 ปึง ฟาริซี เม็จ อัห เริล และ เยซู ทึดๆ ฮุนนัน อัห ก็ ไอ มี เลาะใจ เตาะ อัห ก็ ไล นอย คือเน “ดอม กา แอ กาน อัง นำ มด แลว ครำ ตัก โลก เน อัห ก็ เลอะ เริล เคิบ นำ แลว” อัห อัง ครำ กรีก โตะ และ เยซู 20 ทาเน ตัก เทซกาน เปซา นัน ก็ ดก ครำ โตะ ลือ เอาซาง ตัก เมือง เยรูซาเล็ม นัน ปึง ครำ ตี โตะ ซะลอง นัน ก็ มี ครำ กรีก แด อัห ไอ แมน ครำ ยิว เตาะ แต อัห ก็ โตะ ลือ เอาซาง เลิม เคิบ ครำ ยิว 21 ทาเน ครำ กรีก นัน อัห ก็ เม็จ คาว เลือง เยซู อัห ก็ เริล และ ฟีลิบ ฟีลิบ เน เป็น ครำ งวัล เบ็ดไซดา จังวัด กาลิลี นัน อัห ซ็วน ฟีลิบ ฮุนเน “ฟีลิบ อิห ซีรอก เม็จจึด เยซู” อัห อัง 22 ฟีลิบ เม็จ อัห ซ็วน ออ จังนะ แลว นำ ก็ เริล ไล อันดรู เจ็นนัน ฟีลิบ เคิบ อันดรู ก็ เริล ไล เยซู ปาม เค็ย มี ครำ กรีก โตะ และ นำ 23 เยซู เม็จ ปาม ไล ออ คือนะ นำ ก็ ไล ปาม คือเน “เอิญ เน ตี เอาซาง ระ เกิด เป็น ครำ เอิญ ต็อง กุญ เกียด ดก มานะ เน ก็ เล็ห เวลา เอิญ กุญ เกียด นัน แลว 24 แต เอิญ ไล ปา นังเลาะ นะ คุ ซา มี แก็น เดียว กัน ไอ มี คลิห ตัก ซิก กัน ไอ มี ปลัด กัน ไอ มี คุจ แอ็ม งคะ ก็ ควะ เป็น มี แก็น เดียว อุ นัน แต กัน คลิห ตัก ซิก กัน คุจ แอ็ม งคะ เย็ห ก็ ปลัด เล็ห นซ็อก ก็ ดก เล็ห แก็น วัล 25 ครำ ก็ มอก คุ ซา นัน ครำ ตี รัก นัง ออ ตี รักซา ซีวิด ออ ระ อน ซุดทาย อัห ก็ ต็อง เปิล แต ครำ ตี ญอม เปิล พระ แอ็ม โลก เน ครำ ปึง นัน อัห ก็ รีด อุ จำ นเดย จำ กวา 26 อีเอ ซีรอก ฮับไจ เอิญ อัห ต็อง เริล เลิม เคิบ เอิญ เอิญ อุ พานเดย อัห ก็ อุ ตัก นัน เลิม ตลอด กัน อัห ญอม เริล เคิบ เอิญ มอก นัน เอาซาง ก็ อน เกียด ตัก อัห ดก” เยซู ไล ปาม จังนะ เยซู ไล อัห เลือง นัง ออ ต็อง เปิล 27 เยซู ก็ ไล อัห คือเน วัล “มานะ เน เอิญ แร็ง ตุกใจ ซีเละ บัห เอิญ ครอ จังนัก เลาะ บ็อห เอิญ ครอ เคิบ เอา จวย ระ เอิญ ไอ มี กุญ โซะ มานะ เน เลาะ อัน ไอ มี เลาะ ก้า เอิญ โตะ ตัก โลก เน ก็ เพือ อด โซะ เน เอิญ ลบ วัล ครอ ระ ไอ มี กุญ โซะ ก็ ไอ มี จบ แคระ ก้า” เยซู ไล อัห จังนะ 28 เจ็นนัน เยซู ก็ ครอ ระ เอา กุญ เกียด “เอา เฮย ครอ ระ มัห กุญ เกียด ดกๆ ดาย เอา” นำ อัง แลว เยซู ไล เอา ออ จังนะ แลว ก็ พด เล็ห แญง จ็อก เจ็น วาง ทึห คือเน “เอิญ กุญ เกียด แลว บัดนะ เอิญ ก็ ลบ กุญ วัล” แญง นะ อัง 29 ทาเน ครำ ตี ญ็อง อุ นัน อัห เม็จ แญง นัน จ็อก เคิบ เยซู อัห ก็ ไอ มี เคาใจ แกด ล็อง ก็ เค็ย โกระ เคิร แกด ล็อง ก็ เค็ย เทวาดา จ็อก เคิบ เยซู 30 แต เยซู ไล อัห ฮุนเน “แญง ตี จ็อก เคิบ เอิญ นัน ก็ ไอ แมน เป็น ปะโยด ตัก เอิญ ดาย นำ จ็อก เพือ เป็น ปะโยด ตัก แป ฮัก 31 มานะ เน ก็ เล็ห เวลา ตัดซิน โลก เน แลว มานะ เน เล็ห เวลา มบรึห แอ็ม ปรอง จ็อง ตี ปกคอง โลก เน แลว เล็ห เวลา มบรึห เย็ห แลว 32 แต เอิญ เน อัห ต็อง เอิด นัง เอิญ มพำ ระ ตัก ลำ ทึห แลว อัห ญ็อก เอิญ นทึห แลว เอิญ ก็ แอง ระ ครำ จู ล็อง ทัว โลก เน โตะ และ เอิญ วัล” เยซู อัง 33 ตี เยซู ไล อัห ฮุนนัน ก็ เพือ ระ อัห เม็จจึด เค็ย นำ ต็อง เปิล แบบ นเดย บัดนะ 34 ปึง พซาซน เม็จ เยซู ไล ออ ฮุนนัน อัห ก็ เคาใจ เค็ย เยซู ต็อง เปิล อัห ซงไซ อัห ก็ ลด ซ็วน เยซู คือเน วัล “กด เอาซาง เค็ย เมซียา ตี โตะ จวย แอ นัน นำ ต็อง รีด อุ จำ นเดย จำ กวา ก็ ซีวะ มัห เค็ย อัห มพำ นำ ซิห ตัก ลำ วัล กัน อัห มพำ แอ็ม นำ ตัก ลำ นำ เป็น เมซียา ไอ มี กุญ เตาะ ก้า ล็อง ตี เอาซาง ระ เกิด เป็น ครำ นัน นำ เป็น ล็อง นเดย นังเลาะ บ็อห” อัห อัง 35 เยซู ก็ ซวัล อัห คือเน “เจ็นเน เอิญ ควะ นโจง รวง อน ตัก แป ไอ มี ปอ อิง เตาะ ญาม เอิญ ควะ นโจง รวง อน แป เน ก็ ครอ ระ แป เริล รวง ตี เอิญ นโจง อน ตัก แป นัน ดาย ระ แป ไอ มี กุญ เริล รวง ม็อญ ซะ ซีเอ เริล ตัก รวง ม็อญ ซะ นัน ก็ ไอ มี เม็จ รวง เริล เตาะ นำ เริล พานเดย นำ ก็ ไอ มี เม็จจึด เตาะ 36 ญาม เอิญ ควะ นโจง รวง แป อุ เน แป ก็ ต็อง เจือ เอิญ ซัง แป เป็น ครำ มอก เอิญ เน ฮัก แป เป็น ครำ มอก เอิญ ตี นโจง รวง อน อัห นัน” เยซู อัง แลว เยซู ไล อัห มอก นัน แลว นำ ก็ เริล ตี ซอ นำ ไอ มี ระ อัห เม็จ นัง ออ เตาะ ครำ ไอ มี เจือ เยซู 37 ทาเน ปึง พซาซน นัน อัห ไอ มี เจือ เยซู เตาะ นำ แอง ซะ แปลก ดก มบลึ ระ อัห เม็จ เค็ย นำ เป็น ควัน เอาซาง ก็ ตึก อัห ก็ ควะ ไอ มี เจือ นำ 38 ตี อัห ไอ มี เจือ เยซู นัน ก็ เพือ ระ เป็น เล็ห มอก อิซยา เคียน ระ อน ตัก นังซือ เอาซาง แลว อิซยา ไล อน ฮุนเน “งกีจ็อง เฮย ไอ มี ซีเอ เจือ แญง อิห เตาะ มัห มี แร็ง มี อำนาด ดก ก็ ไอ มี ซีเอ เคาใจ” อิซยา อัง อิซยา 53:1 39-40 อัห ไอ มี เจือ เยซู ก็ ญอน อิซยา เพีย ไล อน แลว นัน อิซยา ก็ ไล อน ฮุนเน วัล “เอิญ นเดิด มัด นเดิด มุห อัห ระ อัห ไอ มี เม็จ เอิญ แอง ระ อัห ลืน ดาน ระ อัห ไอ มี เคาใจ ระ อัห ไอ มี โตะ และ เอิญ ระ อัห ไอ มี กุญ รักซา ตัก เอิญ ระ งาล โซะ” อิซยา อัง อิซยา 6:10 ทาเน ปึง ครำ ยิว ก็ ลืน ดาน มอก อิซยา เค็ย นัน ซีเละ 41 ตี อิซยา เพีย เคียน ระ อน ฮุนนัน ก็ เพาะวา นำ เม็จ วาล มัด แลว เค็ย เยซู ต็อง มี เกียด ดก ซีเละ ตัก ซะวัน นัน 42 อิซยา เค็ย พซาซน ไล ดก ไอ มี ญอม เจือ เยซู แต นังเลาะ แลว ปึง อัห เจือ เยซู ดก แดๆ ซะ แกะ ก็ เจือ แด แต อัห ไอ มี ฮาน ไล อีเอ อัห แร็ง นเจิก อัง ครำ ฟาริซี อัห นเจิก ครำ ฟาริซี ตัด แอ็ม ออ ไอ มี ระ เป็น ซะมาซิก ฮ็อง พซุม 43 ปึง ซะ แกะ เน อัห มัก ระ ครำ อวด ลือ ออ อน เกียด ตัก ออ เอาซาง อวด ลือ อัห อัห ก็ ไอ มี ปอ ซนใจ เตาะ 44-45 ทาเน เยซู ก็ ไล อัห แร็งๆ คือเน “แป เม็จ นัง เอิญ แป ก็ เม็จ เอา นัน ตี ไล เอิญ โตะ ตัก โลก เน กัน แป เจือ เอิญ แป ก็ เจือ เอา นัน ตี ไล เอิญ โตะ ตัก โลก เน 46 เอิญ โตะ ตัก โลก เน ก็ เอิญ โตะ นโจง รวง อน แป ระ แป ตี เจือ เอิญ ไอ มี จำเป็น งวำ เริล ตี ม็อญ ซะ วัล 47 เอิญ โตะ ตัก โลก เน เอิญ ไอ มี โตะ ตัดซิน ครำ ดาย เอิญ โตะ จวย ครำ ระ ปน แอ็ม เจ็น ลุห เจ็น โทด ฮัก ซีเอ ตี เม็จ แญง เอิญ แลว แต อัห ไอ มี เจือ นัน เอิญ ก็ ไอ มี งเคาะ ตัดซิน อัห ตัน 48 แต ซีเอ ตี ไอ มี ญอม เจือ เอิญ ไอ มี ญอม ปัง แญง เอิญ เน บัดนะ เอาซาง ก็ ตัดซิน อัห ฮัก บัดนะ ญาม เอาซาง ตัดซิน ครำ ทัว โลก เน นำ ก็ เอิด แญง คอง เอิญ เนๆ ตัดซิน แป ฮัก 49 เอิญ ไอ มี จ็อก ตาม ใจ ออ เตาะ เอิญ จ็อก ฮุน เอา เอิญ ไล อน ฮัก เอา เอิญ ตี ไล เอิญ โตะ ตัก โลก เน นำ ไล ซีวะ ตัก เอิญ เอิญ ก็ ไล มอก เอา เอิญ ไล นัน เอิญ ไอ มี จ็อก ตาม ใจ ออ เตาะ 50 เอิญ ก็ เม็จ แลว แญง ตี เอา เอิญ ไล เน ซับรวง แป รีด อุ จำ นเดย จำ กวา ฮัก เอิญ ก็ ลด ไล แญง เอา ออ เน อน ตัก แป ปัง” |
Global Partners
Global Partners