ฮีบรู 11 - Prai Bibleเลือง ครำ ตี แก็นใจ เจือ เอาซาง เลาะ 1 แอ เจือ เอาซาง ก็ ฮุนเน ดาย แอ แก็นใจ เค็ย เลือง ตี เอาซาง เค็ย เกิด เล็ห บัดนะ ก็ กิว เกิด เล็ห นังเลาะ แอ ก็ แก็นใจ เค็ย ซะ ตี แอ ไอ มี ตัน เม็จ เคิบ มัด ออ ก็ กิว มี นังเลาะ 2 เอาจ็อง เมจ็อง แอ ตัก อิง นัน อัห แก็นใจ เจือ เอาซาง ซีเละ อัห แก็นใจ เจือ เอาซาง เอาซาง ก็ ลด อวด ลือ อัห ซีเละ 3 แอ มานะ เน แอ ก็ เคาใจ เค็ย เอาซาง แอง วาง แอง โลก แพนซิก เน มด แลว นอ แอ เคาใจ ก็ ญอน แอ เจือ จู มบลึ ตี แอ เม็จ เคิบ มัด ออ จู งิ เน ก็ กิว เป็น เล็ห ญอน เอาซาง ไล เย็ห เป็น ฮุนนัน ฮัก นำ เอิด ซะ ตี แอ ไอ มี เม็จ เคิบ มัด ลบ วัล แอง ระ เป็น ซะ ตี แอ เม็จ เคิบ มัด กุญ แอ เคาใจ คือเน ก็ ญอน แอ เจือ เอาซาง ฮัก อาเบล เอโนก เคิบ โนอา เจือ เอาซาง 4 ตัก อิง อาเบล นำ เจือ เอาซาง ญอน นำ เจือ นัน ซะ ตี นำ ทวาย นัน ก็ เลาะ กวา คอง คาอิน อาเบล ทวาย ซะ มอก เอาซาง ไล เอาซาง ก็ อวด ลือ นำ ซีเละ แอ ก็ ลด เคาใจ เค็ย นำ เป็น ครำ ตี เลาะ อุ เคิบ เอาซาง เอาซาง ก็ ระ อาเบล เม็จ เค็ย เอาซาง เลาะใจ เคิบ ซะ ตี อาเบล ทวาย นัน อาเบล เน นำ เปิล เจ็น อิง นอ แต ญอน นำ เจือ นัน ก็ มอก นำ ควะ จ็อก อุ เคิบ แอ เตา มานะ เน เกาตีนา 4:3-10 5 เอโนก ก็ เจือ เอาซาง ญอน นำ เจือ เอาซาง นัน เอาซาง ก็ ลด เอิด นัง รีด นำ เริล ทึห นำ ไอ มี เปิล เตาะ นำ อุ ตัก โลก แพนซิก เน ก็ ลด งาล แอ็ม นัง นำ เป็น เอาซาง เอิด นำ เริล ซีเละ วาล เอาซาง เอิด เอโนก เริล นทึห นัน อัห เค็ย นำ แอง เลาะ ฮุน เอาซาง ซอบ ฮัก เกาตีนา 5:21-24 6 ทาเน กัน แอ ไอ มี เจือ เอาซาง แอ แอง ระ เอาซาง ปอใจ เคิบ แอ ก็ ไอ มี จบ กุญ เตาะ ซีเอๆ ก็ ตึก ต็อง เจือ เมือนนอย มด กัน แอ ซีรอก แอง ระ เอาซาง ปอใจ เคิบ ออ แอ ต็อง เจือ เค็ย เอาซาง กิว มี นังเลาะ ต็อง เจือ เค็ย เอาซาง กิว อน รางวัน ตัก ครำ จู ล็อง ตี เอิด ใจ ซิห เม็จจึด เคิบ นำ เลาะๆ นัน 7 โนอา ก็ เจือ เอาซาง เอาซาง เพีย ไล นำ วาล เค็ย เอาซาง อง แอง ระ นอก ทวม โลก ตี เอาซาง อง แอง ระ นอก ทวม โลก นัน โนอา ไอ มี ตัน เม็จ เคิบ มัด ออ ตัน แต โนอา ก็ เจือ แญง เอาซาง นำ ก็ ลด แอง เฮือ จ็อง ระ ยัห เคิบ ควัน กุญ ปน แอ็ม เจ็น นอก ทวม นัน ตี โนอา เจือ เอาซาง ลด แอง เฮือ นัน นำ ก็ ไล ครำ ทัว โลก เค็ย อัห ลุห ซีเละ อัห ต็อง กุญ โทด ก็ ฮุนเน ดาย โนอา เจือ เอาซาง เอาซาง ก็ เค็ย นำ อุ เลาะ เคิบ ออ แลว ก็ ญอน นำ เจือ เอาซาง ฮัก เกาตีนา 6:13-22 อับราฮัม เจือ เอาซาง 8 อับราฮัม ก็ เจือ เอาซาง เอาซาง ไล นำ เริล อุ ตี แมะ ตี เอาซาง อง อน ตัก นำ นัน นำ เจือ เอาซาง นำ ก็ เริล นำ ไอ มี เม็จจึด เริล พานเดย แต นำ ก็ เริล 9-10 นำ เจือ เอาซาง ซีเละ ญาม นำ เล็ห ตัก ตี ซิก นัน แลว นำ ก็ พัก อุ ตัก ตุบ ตี เป็น พาเต็น ตลอด อับราฮัม ไอ มี แอง เจิง เพาะวา นำ ไอ มี ตัน กุญ ตี ซิก นัน เป็น คอง ออ ตัน แต นำ เจือ เค็ย เอาซาง กิว อน ตัก นำ อับราฮัม เน นำ เจือ เค็ย ต็อง มี มี งิ วัล ตี เอาซาง ซับ นำ เริล เมือง แมะ เมือง นัน เอาซาง กึด แบบ ออ ฮัก เอาซาง แอง ออ ฮัก เมือง นัน อุ ตลอด จำ นเดย จำ กวา อับราฮัม แก็นใจ กุญ อุ เมือง เลาะ นัน บัดนะ นำ ก็ ลด ปอใจ พัก อุ ตัก ตุบ พาเต็น มอก ครำ ไอ มี เจิง นำ เจือ เอาซาง ซีเละ อิซอัก เคิบ ยาโคบ ก็ เมือนนอย เอาซาง ซันญา อน เมือง แมะ ตัก ปาม ปาม ก็ เจือ เอาซาง ซีเละ ปาม ก็ ปอใจ อุ ตัก พาเต็น เมือนนอย เกาตีนา 12:1-5 11 อับราฮัม เน นำ แก็นใจ เจือ เอาซาง ซีเละ ญาม นัน นำ มแบร็ห แลว ยัห นำ ก็ ซำ เป็น มัน วัล ไอ มี ควัน เตาะ แต อับราฮัม ควะ เจือ เค็ย เอาซาง ซือซัด เอาซาง กิว ระ นำ มี ควัน ฮุน นำ ซันญา ระ อน แลว ญอน นำ เจือ นัน เอาซาง ก็ ระ นำ มี ควัน ซีเละ 12 ญาม นัน อับราฮัม มแบร็ห ซีเละ มี ควัน ไอ มี กุญ เตาะ นำ มอก ครำ เปิล แลว มี ควัน ไอ มี กุญ เตาะ แต นำ มี ควัน นังเลาะ นำ ก็ มี ควัน นจะ ควัน ลาน วัล ดก ซีเละ ดก มอก ซีเม็ญ ตัก วาง ทึห ดก มอก ซาย ตัก เปล นอก ทะเล นับ ไอ มี แป เตาะ นำ มี ควัน งา ดก ญอน นำ เจือ เอาซาง นัน 13 ครำ จูบ อับราฮัม อิซอัก ยาโคบ นัน อัห เปิล มด แลว นอ ญาม อัห เปิล นัน อัห ไอ มี ตัน กุญ ซะ ตี เอาซาง ซันญา อง อน ตัก อัห ตัน แต อัห เลาะใจ ตี เอาซาง กิว อน ตัก อัห งิ แทะ วัล มอก อัห เม็จ ควะ เยอะ ซะ นัน อัห เจือ เค็ย โลก เน ไอ แมน ตี อุ จำ นเดย จำ กวา อัห ไอ มี เจิง อุ เป็น ตี อัห ญอม ญาย เริล ญาย วัล แต อัห เม็จจึด แลว เค็ย บัดนะ เอาซาง อน เจิง เลาะ ตัก อัห อัห ก็ ปอใจ อุ 14 ครำ ตี เค็ย โลก เน ไอ แมน เจิง แตๆ คอง ออ แอ ก็ เคาใจ เค็ย อัห ซีรอก เริล อุ ตี แมะ ตี เป็น เจิง คอง ออ แตๆ นัน 15 กัน อัห งอม อัง เจิง เครม อัห ก็ วัล เจิง เครม ออ กุญ 16 แต แป อับราฮัม เคิบ ควัน เคิบ ควัน นจะ ออ นัน อัห ไอ มี ซีรอก วัล เตาะ อัห ซีรอก เริล อุ ตี แมะ ตี เลาะ กวา เจิง เครม นัน วัล อัห ซีรอก เริล อุ เคิบ เอาซาง ตัก วาง นทึห ฮัก เอาซาง ก็ ลด เลาะใจ เอิด อัห เป็น ครำ คอง ออ นำ ก็ ไอ มี กราญ เอิด อัห เป็น ครำ คอง ออ เตาะ แอ เม็จจึด จังนัก ก็ เพาะวา เอาซาง เตียม เมือง แมะ อน อัห แลว 17-18 อับราฮัม เจือ เอาซาง ซีเละ มี มี ลบ นัน เอาซาง ลอง ใจ นำ นอ เอาซาง ไล นำ มเบิล ควัน ออ ทวาย อน ตัก เอาซาง นำ ก็ ลด ญอม ทวาย ควัน ออ มี ล็อง เดียว นัน อน ตัก เอาซาง แต เอาซาง ซันญา เคิบ นำ วาล แลว เค็ย ควัน นจะ ควัน ลาน ดก ล็อง ตี เอาซาง ซันญา เคิบ อับราฮัม นัน ต็อง เป็น ควัน นจะ ควัน ลาน คอง อิซอัก ฮัก อิซอัก เน ต็อง เป็น กรอก จ็อง บัดนะ เอาซาง อัง คนาด เอาซาง ไล อับราฮัม จังนะ วาล แลว อับราฮัม ก็ ควะ ญอม ทวาย อิซอัก อน ตัก เอาซาง 19 นำ เจือ เอาซาง ซีเละ นำ เจือ เค็ย กัน อิซอัก เปิล เอาซาง แอง ระ นำ รีด เล็ห วัล ก็ กุญ นังเลาะ แลว ซำรับ อับราฮัม นัน ก็ มอก อิซอัก เปิล แลว ลบ วัล รีด เล็ห วัล 20 อิซอัก ก็ เจือ เอาซาง ญอน นำ แก็นใจ เจือ นัน นำ ก็ ลด ซันญา เคิบ ควัน ออ ตัก ยาโคบ เคิบ เอซาว เค็ย ปาม กุญ เลาะ ตัก เอาซาง บัดนะ ฮัก 21 ยาโคบ ก็ เจือ เอาซาง ซีเละ นำ เจือ เค็ย งิ แมะ เอาซาง แอง เลาะ ซิห ควัน โยเซบ ตึง เปียะ ล็อง นัน นำ ก็ ลด ครอ ระ เอาซาง จวย ควัน โยเซบ เปียะ ล็อง นัน ญาม นำ ญ็อง ลือ เอาซาง นำ ก็ ต็อง เซ็จ งเกราะ ญ็อง ลือ เอาซาง ญาม นัน นำ ก็ มแบร็ห บัก และ เปิล นำ เจือ เอาซาง ซีเละ ดาย เกาตีนา 47:31, เกาตีนา 48:20 22 โยเซบ ก็ เจือ เอาซาง ญาม นำ บัก และ เปิล แลว นำ ก็ แก็นใจ เจือ เค็ย งิ แมะ เอาซาง ต็อง ซับรวง ครำ อิซราเอล วัล โตะ อุ ตัก ปะเทด คานาอัน นำ ก็ ไล ครำ อิซราเอล เค็ย ญาม อัห วัล โตะ อุ ตัก ปะเทด คานาอัน บัดนะ นัน นำ ไล อัห เอิด ซีเยิง ออ เริล เลิม 23 เอา เม โมเซด ก็ เจือ เอาซาง เมือนนอย ญาม เกิด โมเซด นัน ปาม เม็จ ควัน ออ เลาะลัห ปาม ก็ งเกริม ควัน ออ ระ อน กุญ แพะ ซัวะ ไอ มี ระ ทฮาน อียิบ เม็จ เอา เม โมเซด เน ฮาน ลืน แญง พะเจายูฮัว อียิบ ซีเละ ปาม ไอ มี นเจิก อัง พะเจายูฮัว เตาะ 24 โมเซด ก็ เจือ เอาซาง ญาม นำ แกะ นัง แลว นัน นำ ก็ มี ซิด เป็น ควัน นจะ พะเจายูฮัว ฟาโร แต นำ ไอ มี ญอม เป็น ควัน นจะ ฟาโร ก็ ญอน นำ เจือ เอาซาง ฮัก 25 กัน นำ เลือก เป็น ควัน นจะ ฟาโร นัน นำ ก็ มวน ซีเละ ซะบาย ซีเละ แต นำ ไอ มี ญอม ระ นัง ออ แอง มวน แอง ลุห อุ เลิม เคิบ อัห เตาะ เลือง ซะบาย นัน ไอ มี กุม อิง นำ ก็ ไอ มี เอิด นำ วัล ญอม ระ ออ อด ตุก อด ญาก เลิม เคิบ ครำ เอาซาง ก็ ญอน นำ เจือ เอาซาง นัน ฮัก 26 โมเซด เน นำ กึด เค็ย อด ตุก อด ญาก ญอน เป็น ครำ เยซู คริด นัน ก็ เลาะ เลาะ กวา กุญ ซะ จู มบลึ ตัก ปะเทด อียิบ นำ เคาใจ เค็ย เอาซาง อน รางวัน เลาะ ตัก นำ บัดนะ นำ กึด มอก เน นำ ก็ ลด ไอ มี ซนใจ เป็น ครำ ฮัง ตัก ปะเทด อียิบ เตาะ 27 โมเซด เน นำ เจือ เอาซาง ซีเละ นำ ไอ มี นเจิก พะเจายูฮัว อ็อด อัง ออ นำ ก็ ฮาน ทอก เจ็น ปะเทด อียิบ นำ เริล ติกๆ มอก นำ เม็จ เอาซาง อุ วาล มัด ซับรวง ออ นำ เคริบ เอาซาง ตี แอ เม็จ นัง ไอ มี กุญ นัน 28 โมเซด เน นำ เจือ เอาซาง ซีเละ นำ เจือ เอาซาง นำ ก็ ลด ตัง งิ เปซา ระ อัห เอิด เมียม ปีด ซิห ตัก คอบ ปะตู ระ เทวาดา ไอ มี โตะ มเบิล แอ็ม ควัน อัหคล็อง ตัก เป็น ควัน เกา คอง อัห นัน อิซราเอล ญาย 12:29-32 29 ครำ อิซราเอล ก็ เจือ เอาซาง อัห เจือ เค็ย เอาซาง จวย ออ กุญ อัห ก็ ลด นจาง คาม นอก ทะเล โซ เริล ตัก ซิก ทังๆ นัน อัห ก็ ปอดไพ แต ญาม ครำ อียิบ ลอง นจาง เริล มอก อัห นัน ครำ อียิบ ก็ เงิก นอก เปิล แอ็ม มด จู ล็อง 30-31 ราฮับ เป็น อัหเม ตี เท็จ นัง ออ นอ แต นำ เจือ เอาซาง นำ ก็ ลด จวย ครำ อิซราเอล เปียะ ล็อง ตี โตะ ลอด ดอม เมือง เยรีโค นัน ราฮับ ก็ จวย ปาม ระ ปาม ปน แอ็ม เจ็น ครำ เมือง เยรีโค ตี จวาด มเบิล ปาม นัน ทาเน ญอน ครำ อิซราเอล เจือ เอาซาง นัน อัห ก็ นจาง แกวด เมือง เยรีโค เจ็ด งิ กำแพง เมือง เยรีโค ก็ เกลิน แอ็ม มด เกลิน ญอน อัห เจือ เอาซาง นัน เกลิน งเกริก แลว ครำ อิซราเอล ก็ มเบิล แอ็ม ครำ เยรีโค นัน แต อัห ไอ มี มเบิล ราฮับ เลิม เคิบ ครำ เยรีโค ตี ไอ มี ญอม เจือ เอาซาง นัน ราฮับ รีด อุ ก็ ญอน นำ เจือ เอาซาง นัน 32 เลือง ครำ ตี แก็นใจ เจือ เอาซาง เน ไอ มี ซุด เอิญ ไล อน ตัก แป มด ดาย เอิญ ไอ มี รวง มี เลือง กีเดโอน กัห บาลาก กัห แซมซัน เยบทา กัห ดาวิด ซามูเอล เคิบ ลาม เอาซาง มด จู ล็อง ปึง เน อัห เจือ เอาซาง ซีเละ อัห ลด เป็น ตัวยาง เลาะ อน แอ นอ 33 ครำ ปึง เน อัห เจือ เอาซาง อัห ก็ ลด ซะนะ อัง ซะตรู กุญ อัห ซะนะ อัง ปึง พะเจายูฮัว ดก ล็อง ญอน อัห เจือ เอาซาง นัน อัห ก็ กุญ ปกคอง ปะเทด อิซราเอล อัห ปกคอง เลาะ อัห แอง เลาะ แอง ซือ ตลอด อัห ลด กุญ จู มบลึ ตี เอาซาง ซันญา อง อน ตัก อัห นัน ญอน อัห เจือ เอาซาง นัน เอาซาง ก็ นเดิบ งกาบ โปก ไอ มี ระ โปก พ็อก อัห 34 มี ครำ กวาง อัห ซิห ตัก โอด อัห ก็ ไอ มี จีก ไอ มี ตูล เตาะ มี ครำ และ ป็อก อัห มเบิล อัห อัห ก็ ปัด ปน แอ็ม กุญ อัห เป็น ครำ แมด ไอ มี แร็ง ไอ มี เดิด แต อัห เจือ เอาซาง เอาซาง ก็ ลด อน แร็ง ออ ตัก อัห อัห ก็ ลด มี แร็ง ซู ซะตรู กุญ อัห ก็ ซู ดุ ซีเละ ปึง ซะตรู ก็ กาน แอ็ม ซะตรู ก็ ปัด มี ติด มี ตี 35 เจ็นนัน ก็ มี ปึง อัหเม ตี แก็นใจ เจือ เอาซาง ซีเละ อัห เม็จ ควัน ออ ตี เปิล เริล แลว รีด เล็ห วัล ควัน อัห รีด เล็ห นัน ก็ ญอน อัห เจือ นัน มี ดก ล็อง กุญ เลาะ ญอน อัห เจือ เอาซาง นัน แต มี แกด ล็อง วัล อัห ก็ โซะ ดก ญอน อัห เจือ เอาซาง เมือนนอย อัห ญอม อด โซะ อัห ญอม ระ อัหซอ เญ็บ ออ เติล ออ ทอระมาน ออ อัห เจือ เอาซาง ซีเละ อัห ไอ มี ญอม พระ เอาซาง เตาะ อัห เม็จ แลว กัน อัห พระ แอ็ม เอาซาง อัห ก็ ทอก เจ็น ลุก กุญ แต อัห ไอ มี ญอม พระ เอาซาง เตาะ อัห แก็นใจ เจือ เค็ย รีด เล็ห วัล บัดนะ อัห เจือ เค็ย บัดนะ อัห กุญ เลาะ กวา นัน วัล อัห เจือ เอาซาง ซีเละ 36 อัห ตี เจือ นัน แกด ล็อง ก็ มี ครำ ปิล มัด ปิล มุห อัห มี ครำ คัล อัห มี ครำ เอิด โซ ท็อก อัห เติล อัห ตัก ลุก ก็ มี 37 แกด ล็อง อัห เอิด เกียง นดืม ระ เปิล แอ็ม ก็ มี แกด ล็อง อัห เอิด เลีย มเพ็จ เป็นตอนๆ ก็ มี แกด ล็อง อัห เอิด นแด็ง ป็อก มเบิล แอ็ม ก็ มี ครำ ปึง เน อัห โซะ ดก ซีเละ อัห กุญ โซะ ญอน อัห เจือ เอาซาง นัน แกด ล็อง มี ครำ มบรึห อัห ปัด แอ็ม เยอะ ซะ ก็ มี อัห ไอ มี คัว แซ็ด อัห ก็ ต็อง เอิด ซวัห แปะ ซวัห แกะ แซ็ด มี ครำ คมเฮง อัห ตลอด อัห ตุก ญาก ลำบาก ซีเละ 38 ปึง เน อัห ไอ มี ตี อุ อัห ต็อง กวา โละ ปัด เริล อุ ตัก ซะร็อห ทึห ตัก ญวัง ตัก ตี แลง อัห ต็อง กวา โละ ปัด พก อุ ตัก งกุก ตัก ทำ ครำ ปึง เน อัห เป็น ครำ เลาะ ครำ ซือ ซีเละ ครำ ตัก โลก เน ก็ ไอ มี ซมควน มี ครำ เลาะ มอก นัน โตะ อุ เลิม เคิบ อัห เตาะ 39 ครำ ปึง เน เอาซาง เค็ย ปอใจ เคิบ อัห ญอน อัห เจือ เอาซาง นัน นำ อวด อัห เค็ย อัห เลาะ ซีเละ แต จู มบลึ ตี เอาซาง ซันญา อง อน ตัก อัห นัน อัห ไอ มี ตัน กุญ 40 เพาะวา เอาซาง กึด แอง เลาะ กวา นัน วัล เอาซาง กึด เค็ย กากุน เลาะ ตี นำ ซันญา อง อน ตัก ครำ เครม ตัก อิง นัน นำ อง อน ตัก แอ เลิมๆ มด จู ล็อง บัดนะ ตึง ครำ เครม ตึง แอ ซะไม มานะ เน แอ ก็ กุญ เลิม นอย มด บัดนะ กำกึด เอาซาง นำ แอง มอก เน |
Global Partners
Global Partners