เกาตีนา 45 - Prai Bibleโยเซบ ไล นัง ออ ตัก นไจ 1 โยเซบ เม็จ ยูดา จ็อก คือนะ แลว นำ ก็ แร็ง โซะ เญ็ม นำ อด เล็ห พุย มัด ไอ มี กุญ เตาะ แต มี ปึง ครำ อียิบ ญ็อง อุ นัน เลิม นำ ก็ แร็ด ไล อัห “แป ปัด มด จู ล็อง” อัห ก็ เลอะ ปัด มด แลว ปน อัห มด แลว นำ ก็ ไล นัง ออ จุม ควน จุม นไจ เค็ย นัง ออ เป็น โยเซบ 2 โยเซบ ก็ นซาก เญ็ม แร็ง นเซิง ซีเละ ครำ อียิบ ก็ เม็จ นเซิง ครำ ตัก เจิง ฟาโร ก็ เลอะ เม็จ นเซิง มด 3 โยเซบ ก็ ไล ควน นไจ ออ คือเน “เอิญ เป็น โยเซบ ดาย เอา แอ ควะ รีด อุ อัน” นำ อัง อัห ไอ มี จางรู ซวัล นำ ซัก มี แญง แร็ง นเจิก อัห อัง นำ 4 โยเซบ ก็ ไล ปึง นไจ ออ ติ โตะ ตัก ออ อัห ก็ ติ โตะ โยเซบ ก็ ไล อัห คือเน “เอิญ เป็น โยเซบ ตี แป เท็จ อน ตัก ครำ อียิบ กำนา นัน ดาย 5 แต มานะ เน แป อำ ตุกใจ เซียใจ เตาะ อำ อ็อด อัง นัง ออ เตาะ ตี แป เท็จ เอิญ โตะ ตัก เน ก็ เป็น ตัก เอาซาง ระ เอิญ โตะ อุ ตัก เน วาล จวย ระ แป ไอ มี เปิล 6 แร็ง เกิ๊ด ซะ เปียะ วาง แลว ควะ วัล ฮา วาง ไอ มี กุญ แซ็ด แซ เกียว ซา เตาะ 7 เอาซาง ซง เอิญ โตะ อุ เน วาล แป นำ แอง นเซอะ กรอก แป ควะ รีด อุ นเซอะ แป ควะ มี เจือ มี จาด 8 ตี เอิญ โตะ อุ เน ไอ แมน เป็น เคิบ แป ซัง เป็น เคิบ เอาซาง ฮัก ซง เอิญ โตะ อุ เน เอาซาง จวย เอิญ นำ ระ เอิญ เป็น ฮุน เอา ฟาโร นำ ระ เอิญ เป็น เจานาย แกะ ตัก เจิง ฟาโร นำ ระ เอิญ ปกคอง ปะเทด อียิบ มด วัล 9 เจ็นเน แป เจย เริล ไล เอา แอ ดาย แป ไท ไล นำ คือเน ‘อิห เม็จ โยเซบ ควัน มัห แลว เอา นำ ไล อิห เค็ย เอาซาง จวย ระ นำ เป็น เจานาย แกะ ปกคอง ปะเทด อียิบ มด มัห โตะ และ นำ เวิดๆ ดาย เอา 10 มัห โตะ อุ ตัก โกเซน โตน กุญ อุ ติ ซะ เคิบ โยเซบ นำ มพอล แอ โตะ มด ตึง เอา ตึง ควัน ตึง ควัน นจะ ควัน ลาน แอ มด เน เป็น แปะ แกะ งัว วะ เป็น ซะ จู มบลึ คอง แอ ก็ เอิด ซับ เริล มด 11 นำ อง เลียง ดอม แอ ตัก นัน ฮัก เพาะวา ควะ เกิ๊ด ซะ อุ ฮา วาง วัล นำ ไอ มี ซีรอก ระ เอา เคิบ ควัน นจะ ตุก ญาก ลำบาก อุ’ แป ต็อง ไล เอา คือเน ดาย” โยเซบ อัง 12 โยเซบ ก็ ไล อัห คือเน วัล “แป เคิบ เบนยามิน ควน เอิญ เน แป ก็ เม็จ เคิบ มัด ออ แลว นอ เป็น งกาบ เอิญ ฮัก จ็อก เคิบ แป 13 แป ก็ เลามุน อน เอา ปัง เค็ย เอิญ แกะ ทีซุด ตัก ปะเทด อียิบ เน แป เม็จ เคิบ มัด เคิบ มุห ออ แลว แป ก็ ต็อง ไล อน ตัก เอา ปัง มด ดาย เจ็นนัน แป ต็อง ซับ เอา โตะ ตัก เน เวิดๆ ดาย” โยเซบ อัง 14 แลว โยเซบ ไล อัห แลว นำ ก็ เญ็ม เกาะ ควน ออ ตัก เบนยามิน เบนยามิน ก็ เญ็ม เกาะ นำ 15 โยเซบ ก็ เกาะ ปึง นไจ ออ อัห ก็ เญ็ม เลามุน เคิบ นอย 16 ทาเน ปึง เจานาย แกะ เคิบ พะเจายูฮัว เม็จ คาว เค็ย โตะ ควน นไจ โยเซบ อัห ก็ ญ็อก เลาะใจ มด 17 ฟาโร ก็ โตะ และ โยเซบ นำ ไล โยเซบ คือเน “มัห ไล ควน นไจ ออ เอิด ซา ซิห ตัก ลา ตาง ซับ ตัก เอา ออ ตัก คานาอัน วาล ดาย 18 มัห ไล อัห เริล เอิด เอา แป เคิบ ครอบครัว แป มด โตะ อุ แต็ห เน ดาย เอิญ อน ตี ซิก เลาะ ทีซุด ตัก แป ใน ปะเทด อียิบ เน แป ก็ กุญ อุ เลาะ ป็อง เลาะ ตัก ปะเทด เน 19 มัห ไล ควน นไจ ออ เอิด ลอ อิห เน เริล ตาง เอิด เอา เอิด ยัห เอิด ควัน แย็ด คอง แป ซับ แต็ห เน มด ดาย 20 อำ แป เซียดาย อัง ซีวะ ตัก เจิง ออ เตาะ เพาะวา ตัก ปะเทด อียิบ เน มี ซะ เลาะ ดก เป็น คอง แป แลว มัห ต็อง ไล ควน นไจ ออ คือนะ ดาย” ฟาโร อัง 21 ควัน ยาโคบ ก็ แอง ฮุน ฟาโร ไล อน โยเซบ ก็ เอิด ลอ อน ตัก นไจ นำ ก็ อน ซะ ป็อง ตัก อัห ระ อัห ป็อง ตาม รวง 22 โยเซบ อน คัว เลาะๆ ตัก นไจ มี ซุด มี ล็อง แต นำ อน ตัก เบนยามิน ฮา ซุด เคิบ เงิน ซาม รอย เลียน 23 โยเซบ ก็ เอิด ซะ เลาะ ทีซุด ตัก ปะเทด อียิบ นัน ฟาก อน ตัก เอา ออ อัห ตาง ตัก ลา นัง ลัง ซิบ นัง ลา นัง เม็ย ซิบ นัง วัล อัห ระ เย็ห ตาง ซา ตาง คนมปัง เคิบ ซะ ป็อง อัห ตี อัห ป็อง ตาม รวง นัน 24 โยเซบ ก็ ระ ปึง นไจ ออ วัล เจิง ญาม อัห บัก และ เริล ออ นำ ก็ ไล อัห คือเน “แป เริล เลาะๆ ดาย อำ เญาะ นอย อำ เทียง นอย เริล ตาม รวง ดาย” นำ อัง 25 ทาเน ปึง ควน นไจ โยเซบ ก็ วัล และ เอา ออ อัห เริล เจ็น ปะเทด อียิบ โตะ ตัก ปะเทด คานาอัน 26-27 โตะ อัห แลว อัห ก็ ไล เอา คือเน “โยเซบ ควะ รีด อุ ดาย เอา ไอ มี จบ เปิล นำ ซัง นำ เป็น เจานาย แกะ ปกคอง ปะเทด อียิบ มด” อัห อัง ยาโคบ เม็จ อัห ไล ออ คือนะ นำ ก็ ญ็อก นทัน แต ไอ มี เนา นำ เจือ ควัน ออ เตาะ อัห ก็ ไท เลามุน เลือง โยเซบ อน นำ ปัง ญาม นำ เม็จ แญง ตี โยเซบ ฟาก ไล นำ นัน เคิบ นำ เม็จ ลอ ตี โยเซบ ซง ฮับ ออ นัน ซัง นำ เจือ นำ ก็ เลาะใจ ลง เล็ห ใจ นำ วัล 28 ยาโคบ ก็ ไล ควัน ออ คือเน “เอิญ เลาะใจ ไบ จังนะ ควัน เอิญ ตัก โยเซบ ควะ รีด อุ เอิญ ต็อง เริล ดอม มัด ควัน ออ วาล ไอ ตัน เอิญ เปิล” ยาโคบ อัง |
Global Partners
Global Partners