เกาตีนา 40 - Prai Bibleโยเซบ แก มเพาะ ครำ อุ ลุก 1-2 ทาเน อุ เจ็นนัน วัล ก็ มี ฮัวนา พนักงาน พะเจายูฮัว อียิบ เปียะ ล็อง ปาม แอง ไอ มี เลาะ ซิห พะเจายูฮัว ออ มี ล็อง นัน เป็น ฮัวนา มวด แอง พุย องุน มี ล็อง นัน เป็น ฮัวนา มวด แอง คนม ปาม แอง ไอ มี เลาะ พะเจายูฮัว ฟาโร ก็ ลด ไอ มี ปอใจ อัง ปาม นำ อ็อด อัง ปาม 3 นำ ก็ ลด ไล ฮัวนา ทฮาน เอิด ปาม เติล ระ ตัก ลุก เลิม เคิบ โยเซบ นัน ลุก นะ อุ ตัก เจิง ฮัวนา ทฮาน นัน 4 ฮัวนา ทฮาน นัน ก็ ไล โยเซบ จวย ดอม ปาม ปาม ก็ อุ ตัก ลุก นัน อิง แดๆ 5 อุ เจ็นนัน วัล มี มี แจ็ล นัน ปาม ก็ ราย มเพาะ กวัด ตึง เปียะ ล็อง มี แจ็ล เดียว เลิม นัน แต มเพาะ มี ยาง มี ล็อง มเพาะ ปาม ก็ มี ความ มาย มี ยาง มี ล็อง 6 ตัก งกร็อห โยเซบ ก็ เม็จ ปาม นำ ดอม มัด ปาม ฮุน ไอ มี เลาะใจ ปาม เตาะ 7 โยเซบ ก็ ซ็วน ปาม ฮุนเน “ซีวะ อัง ปา บ็อห เอิญ ดอม มัด ปา ฮุน ไอ มี เลาะใจ ปา ดาย” โยเซบ อัง 8 ปาม ก็ ซวัล โยเซบ ฮุนเน “แจ็ล เคิน เยอะ ราย มเพาะ แต ไอ มี ซีเอ จางรู แก มเพาะ เยอะ ดาย เยอะ ก็ ไอ มี เลาะใจ เตาะ” ปาม อัง โยเซบ ก็ ไล ปาม ฮุนเน “ก็ เอาซาง จางรู แก มเพาะ ไอ แมน เออะ ปา ไล อน ตัก เอิญ ปัง กา เอาซาง แก อน ตัก แอ กุญ ดาย” โยเซบ อัง 9 ทาเน ล็อง ตี เป็น ฮัวนา มวด แอง พุย องุน นัน นำ ก็ เลามุน มเพาะ ออ อน ตัก โยเซบ ปัง ฮุนเน “แจ็ล เคิน เอิญ มเพาะ เม็จ ซีมึ องุน อุ เคิบ มัด ออ 10 มี งกา แพะ งกา เจ็นนัน ก็ ปง นทู ลด เล็ห ราง เจ็นนัน ก็ เล็ห แพละ องุน เป็น ปุก องุน นัน ก็ ลด แคร็ห แอ็ม 11 เอิญ ก็ ก็อง จอก ฟาโร อุ นัน เอิญ ก็ เก็บ เอิด แพละ องุน นัน บีบ พุย ซิห ตัก จอก อน ฟาโร ออก” เอิญ มเพาะ ฮุนเน นำ อัง 12 โยเซบ ก็ แก มเพาะ อน ตัก นำ ฮุนเน “องุน แพะ งกา ก็ ซีแล็ม เค็ย แพะ งิ 13 แพะ งิ เจ็นเน นโดน ฟาโร ก็ โตะ และ มัห แองกาน เมือน เครม วัล มัห ก็ ลบ วัล เป็น ฮัวนา มวด แอง พุย องุน มอก เครม นัน มัห ต็อง เป็น มอก เน ดาย 14 กัน ปน มัห ทอก เจ็น ลุก เน แลว ก็ ครอ ระ มัห ตึ อัง เอิญ อำ เลอ อัง เอิญ ดาย เอิญ ครอ ระ มัห จวย ไล ฟาโร ระ ฟาโร จวย เอิญ ปน แอ็ม เจ็น ลุก เน 15 ครอ เคิบ มัห เตาะ กำนา อัห จบ ลอด เญ็บ เอิญ ตัก ปะเทด ฮีบรู นัน อัห ก็ ลด ซับ เอิญ โตะ ตัก ปะเทด อียิบ เน มานะ เน อัห ก็ จบ เติล เอิญ ตัก ลุก เน เอิญ อุ ตัก ลุก เน เอิญ ไอ มี กุญ แอง ลุห ซีวะ เอิญ ไอ มี ซมควน อุ ตัก งกุก เน” โยเซบ อัง 16 ทาเน ฮัวนา มวด แอง คนม เม็จ โยเซบ แก มเพาะ อน ตัก เปือน ออ เลาะ ฮุนนัน นำ ก็ ไล อน มเพาะ ออ ตัก โยเซบ ฮุนเน “เอิญ มเพาะ เม็จ คนม แพะ พาง ปุด ปิ พาง มด อี ต็อก อุ ตัก กึ เอิญ 17 พาง ลัห ทึห นัน มี คนม จู มบลึ ตี อัห แอง อน ตัก ฟาโร นัน เจ็นนัน ก็ มี เซ็ม โตะ ท็อห ป็อง แอ็ม” นำ อัง 18 โยเซบ ก็ แก มเพาะ นำ ฮุนเน “มเพาะ มัห เน ก็ ซีแล็ม เค็ย ฮุนเน ดาย พาง แพะ แก็น ก็ ซีแล็ม เค็ย แพะ งิ 19 ควะ แพะ งิ เจ็นเน ฟาโร ก็ โตะ และ มัห นำ ก็ ไล อัห โค็ห แอ็ม งคอ มัห นำ เอิด นัง มัห มพล็อง ระ ตัก เกาลำ ปึง เซ็ม ก็ ซำ โตะ ท็อห ป็อง แอ็ม เซ็จ มัห วัล” โยเซบ อัง 20 แพะ งิ เจ็นนัน ก็ เล็ห งิ เกิด ฟาโร ฟาโร ก็ จัด งาน เลียง ลูกนอง ออ มด จู ล็อง จู นัง ฟาโร ก็ ระ ปาม ทอก เจ็น ลุก ตึง เปียะ ล็อง นังเลาะ ระ ปาม โตะ อุ เลิม เคิบ ปึง ลูกนอง นัน 21 ทาเน ฟาโร ก็ ระ ฮัวนา มวด พุย องุน แองกาน เมือน เครม วัล นังเลาะ 22 แต ฮัวนา มวด แอง คนม นัน ฟาโร ก็ ไล อัห โค็ห แอ็ม งคอ นำ อัห ก็ เอิด นัง นำ มพล็อง ตัก เกาลำ มอก โยเซบ เพีย ไล อน นัน ซีเละ 23 แต ฮัวนา มวด พุย องุน นัน นำ ก็ กุญ แองกาน มอก เครม นังเลาะ แต นำ ไอ มี ลุห นโทล อัง โยเซบ เตาะ นำ เลอ อัง แญง ตี โยเซบ ฟาก ไล ฟาโร นัน |
Global Partners
Global Partners