กาลาเทีย 2 - Prai Bibleปึง อัหแกะ คริซจัก ตัก เยรูซาเล็ม ตกลง ระ เปาโล ไล ครำ กรอก ซอ 1-2 ทาเน เอิญ เกย เริล แอว เมือง เยรูซาเล็ม มี ลบ แลว นอ อุ อิง เจ็นนัน วัล ซิบซี ปี ซัง เอิญ เริล แอว และ อัห วัล ลบ เน เอิญ เคิบ บานาบัด ก็ เอิด ทีตัด เริล เลิม ตี เอิญ เริล แอว และ อัห นัน ก็ เป็น เอาซาง ฮัก ไล เอิญ เริล ไอ แมน อัหแกะ คริซจัก ไล เอิญ เริล เตาะ ญาม เอิญ โตะ เมือง เยรูซาเล็ม แลว เอิญ ก็ แอว และ ปึง อัหแกะ ตี ซับรวง คริซจัก ตัก นัน ปึง อัหแกะ เน คริซจัก ญอม ฮับ อัห เป็น อัหแกะ ซับรวง คริซจัก มด แลว เจ็นนัน เอิญ ก็ ไล ปึง อัห ระ เคาใจ คาว เลาะ คาว แลม ตี เอิญ เริล ไล ครำ กรอก ซอ นัน เอิญ ก็ ไล อัห เลาะๆ ระ อัห เคาใจ เพาะวา เอิญ นเจิก งาน ตี เอิญ เริล ไล ครำ กรอก ซอ นัน ไอ มี เป็น ปะโยด ตัวแทน 15:1-21 3 ทาเน เอิญ ไล ปึง พูนำ แลว อัห ก็ เคาใจ เลาะ อัห ไอ มี ไล อิห ระ ครำ กรอก ซอ ต็อง แอง ตาม กด โมเซด เตาะ คนาด ทีตัด ตี เริล เลิม เคิบ เอิญ นัน นำ เป็น ครำ กรอก ซอ นำ ไอ แมน ครำ ยิว เตาะ แต ปึง พูนำ ตัก คริซจัก เยรูซาเล็ม นัน อัห ก็ ไอ มี คนาบ ทีตัด แอง พิที ซุนัด ฮุน กด โมเซด ไล อน นัน 4 แต ก็ มี อัหซอ แกด ล็อง อุ ตัก นัน อัห แอง นัง ออ มอก เป็น ครำ ตี เจือ เยซู แต นังเลาะ แลว อัห ซีรอก ลอด ดอม ปึง อิห อัห ซีรอก เม็จจึด เค็ย อิห แอง ตาม กด โมเซด ลู ไอ มี แอง อัห ซีรอก เม็จจึด เค็ย อิห เน ตี อุ เคิบ เยซู คริด อิห อิซระ ดก มอก นเดย อัห ก็ ซีรอก คนาบ อิห แอง ตาม กด โมเซด วัล 5 แต อิห เน ไอ มี ญอม แอ็ม ตัก อัห เตาะ ตีดต็อง อิห ก็ ไอ มี ญอม ตัก อัห เตาะ อิห ซีรอก รักซา คาว เลาะ คาว แลม เน อน ตัก แป 6 เอิญ จ็อก เคิบ ปึง นัน ตี อัห เค็ย อัหแกะ ซับรวง คริซจัก เอิญ ไล คาว เลาะ อน ตัก อัห ระ อัห เคาใจ เค็ย เอิญ เจือ จังนัก ทาเน อัห ปัง เอิญ แลว อัห ก็ ไอ มี ไล ซีวะ เพิม อน ตัก เอิญ เตาะ เอิญ ไอ มี นเจ็น เม็จ ซีวะ ตัก อัห เตาะ นังเลาะ แลว อัห เป็น ซะ แกะ ตี ซับรวง คริซจัก ก็ ตึก เอิญ ไอ มี ซนใจ อัหซอ ทือ อัห อน เกียด ตัก อัห จังนัก เอาซาง ก็ ไอ มี ซนใจ เมือนนอย จังนัก ก็ ตึก อัห ไอ มี ไล ซีวะ แมะ อน ตัก เอิญ เตาะ เป็น เอาซาง ฮัก ตี ระ เอิญ เคาใจ คาว เลาะ คาว แลม คอง ออ นัน 7 นังเลาะ แลว อัห เคาใจ เค็ย เอาซาง เลือก เอิญ ระ อน แลว เอาซาง ระ เอิญ เน ไล คาว เลาะ คาว แลม อน ตัก ครำ กรอก ซอ ก็ มอก เปโตร นอ เอาซาง เลือก เอิด นำ ระ นำ มี นาตี ไล คาว เลาะ คาว แลม อน ตัก ครำ ยิว นัน 8 เอาซาง ก็ อน แร็ง ตัก นำ ระ นำ เป็น ตัวแทน เยซู เริล ไล ครำ ยิว เอิญ เน ก็ เมือนนอย เอาซาง อน แร็ง ตัก เอิญ ระ เอิญ เป็น ตัวแทน เยซู ไล ครำ กรอก ซอ นัน 9 ทาเน ตัก คริซจัก เยรูซาเล็ม นัน ก็ มี ยากอบ เปโตร เคิบ ยอน ตี อัห เค็ย เป็น ซะ แกะ ตี ซับรวง คริซจัก อัห นัน แต ปึง ซะ แกะ นัน อัห เคาใจ แลว เค็ย เอาซาง อน งาน พิเซด เน ตัก เอิญ ฮัก อัห เคาใจ คือนัน แลว อัห ก็ ตกลง เคิบ เอิญ ซีเละ เค็ย อัห ต็อง เริล ไล คาว เลาะ คาว แลม อน ตัก ครำ ยิว เอิญ เคิบ บานาบัด ต็อง เริล ไล ครำ กรอก ซอ ฮัก 10 แต อัห ครอ ไล อิห มี ยาง เดียว เน อัห ครอ ระ อิห จวย ครำ ตุก ครำ ญาก ตัก เป็น ครำ ยิว เลิม นัน แต เลือง ครำ ตุก ครำ ญาก เน เอิญ ก็ เอิด ใจ ซิห จวย อัห อุ แลว นอ เปาโล โป เปโตร ตัก เมือง อันทิโอก 11 ทาเน เปโตร เคิบ ปึง ซะ แกะ คริซจัก เยรูซาเล็ม นัน อัห ตกลง นอย แลว เค็ย ครำ กรอก ซอ ไอ มี จำเป็น ทือ กด โมเซด มอก ครำ ยิว เตาะ อัห เค็ย ครำ กรอก ซอ อิซระ แลว ทาเน เปโตร ก็ เริล แอว คริซจัก ตัก เมือง อันทิโอก นำ โตะ ตัก อันทิโอก แลว นำ ก็ ไอ มี แอง มอก ปึง ซะ แกะ ตกลง นอย แลว นัน เอิญ ก็ ลด โป นำ ซีเละ เน เอิญ โป นำ เคิบ มัด อัห มด นัน 12 เปโตร เน นำ แอง ลุห ฮุนเน ที แรก นัน นำ ก็ ญอม ป็อง จะ เลิม เคิบ ครำ กรอก ซอ ตี ไอ มี แอง ตาม กด โมเซด เจ็นนัน ก็ มี ครำ ยิว ตี ทือ กด โมเซด นัน อัห โตะ เจ็น เมือง เยรูซาเล็ม ครำ ยิว ปึง นัน อัห เป็น ปึง ยากอบ โตะ ปึง นัน แลว เปโตร ก็ ไอ มี ฮาน ป็อง จะ เลิม เคิบ ครำ กรอก ซอ วัล นำ นเจิก อัง ครำ ปึง ยิว นัน โป ออ วัล นำ ก็ ลด ไอ มี ฮาน ป็อง จะ เลิม เคิบ ครำ กรอก ซอ เตาะ 13 ทาเน ก็ มี ปึง ครำ ยิว ล็อง ซอ ตี เจือ เยซู แลว อัห เม็จ เปโตร ไอ มี ฮาน ป็อง จะ เลิม เคิบ ครำ กรอก ซอ นัน อัห ก็ เลอะ แอง มอก เปโตร มด อัห ก็ ไอ มี ฮาน ป็อง จะ เลิม เคิบ ครำ กรอก ซอ เตาะ อัห ก็ เป็น มอก เซ็ม เปียะ กึ วัล ไล มี ยาง แอง มี ยาง วัล คนาด บานาบัด ก็ แอง ไอ มี เลาะ เลิม เคิบ อัห มด 14 ทาเน เอิญ เม็จ อัห แอง ไอ มี เลาะ ไอ มี ซือ มอก คาว เลาะ ไล อน นัน เอิญ ก็ โป เปโตร เคิบ มัด อัห มด นัน เอิญ โป นำ คือเน “มัห แอง จังเน ก็ ไอ มี แคระ ดาย คนาด มัห เน เป็น ครำ ยิว ซีเละ แต มัห ก็ ไอ มี แอง มอก ครำ ยิว มัห ไอ มี แอง มอก กด โมเซด ไล อน แลว นัน ก็ ซีวะ มัห วัล คนาบ ครำ กรอก ซอ ทือ กด โมเซด มอก ครำ ยิว วัล 15 แอ คนาบ อัห แอง ตาม กด ก็ ไอ มี แคระ ดาย อา เน เป็น ครำ ยิว เจ็น เกิด นอ อา ไอ แมน ครำ กรอก ซอ ตี แอ เค็ย เป็น ครำ ลุห นัน 16 แต อา เน ก็ เม็จจึด เลาะ แลว เค็ย แอ กุญ อุ เลาะ เคิบ เอาซาง ก็ ญอน แอ เจือ เยซู คริด ฮัก ไอ แมน ญอน แอง เลาะ ตาม กด เตาะ ตึง ครำ ยิว ตึง ครำ กรอก ซอ ก็ เมือนนอย มด แอ จู ล็อง อุ เลาะ เคิบ เอาซาง กุญ ก็ ญอน เยซู คริด ฮัก เจ็นนัน แอ เน ก็ เจือ เยซู เพือ กุญ เลาะ อุ เคิบ เอาซาง นัน ไอ มี ซีเอ ซัก มี ล็อง ตี เลาะ อุ เคิบ เอาซาง ญอน แอง ตาม กด นัน ไอ มี เตาะ เลือง เน อา ก็ เม็จ เลาะ แลว นอ” 17 แอ ตี เป็น ครำ ยิว แอ ก็ ไอ มี แก็นใจ กุญ อุ เลาะ เคิบ เอาซาง ญอน แอง ตาม กด นัน แอ พระ แอ็ม กด โมเซด แลว แอ เลาะ อุ เคิบ เอาซาง ก็ ญอน เยซู คริด ฮัก นอ ไอ แมน ญอน กด เตาะ ทาเน กัน แอ พระ แอ็ม กด โมเซด แลว ลด แอง ลุห ตาม กด นัน วัล เป็น เยซู คริด ซับรวง แอ แอง ลุห อัน ไอ แมน เตาะ 18 แต กัน เอิญ ไล แป แลว เค็ย แอ อุ เลาะ เคิบ เอาซาง ญอน เยซู ฮัก เจ็นนัน กัน เอิญ ลบ วัล มบุล แญง ออ ไล แป ทือ กด โมเซด วัล เอิญ ก็ ลุห ซีเละ แอง จังนัน ก็ ลุห อัง กด เอาซาง ซีเละ 19 กด โมเซด นัน ก็ ระ เอิญ เคาใจ เค็ย นัง ออ เป็น ครำ ลุห ระ เอิญ เคาใจ นัง ออ ต็อง เปิล ซีเละ ก็ มอก เอิญ เปิล พระ กด เอาซาง แลว มอก อัห มพำ เอิญ เลิม เคิบ เยซู คริด แลว กด นัน ก็ ลด ไอ มี อำนาด บังคับ เอิญ วัล เจ็นนัน เอิญ ก็ รีด อุ เพือ แอง ตาม ใจ เอาซาง ฮัก เพาะวา ตี ลุห คอง เอิญ เปิล เลิม เคิบ เยซู ตัก ลำ ซีโรด นัน แลว 20 โป แญง มเบิด ก็ มอก เอิญ เปิล ตัก ลำ ซีโรด เลิม เคิบ เยซู แลว มานะ เน เอิญ รีด อุ ก็ ไอ แมน แร็ง คอง เอิญ เตาะ เป็น แร็ง คอง เยซู คริด อุ ใน นัง เอิญ ฮัก ทาเน จู มบลึ ตี เอิญ แอง ตัก โลก แพนซิก เน เอิญ ก็ แอง ญอน เอิญ เจือ เยซู ควัน เอาซาง นัน นำ รัก เอิญ นำ เปิล แตน เอิญ ระ เอิญ ปน แอ็ม เจ็น ลุห แลว นัง คอง เอิญ เน ก็ เป็น นัง คอง เยซู ฮัก 21 เอาซาง แอง เลาะ เคิบ แอ ลือๆ เอิญ ก็ ญอม ฮับ ซีเละ เอิญ ก็ ไอ มี ซีรอก แอง ระ งาน คอง นำ เซีย ปะโยด แต กัน แอ อุ เลาะ เคิบ เอาซาง ญอน แอ แอง เลาะ ตาม กด นัน เยซู คริด ไอ มี จำเป็น เปิล แตน แอ เตาะ ไอ มี คิ |
Global Partners
Global Partners