อิซราเอล ญาย 24 - Prai Bibleงกีจ็อง ไล โมเซด ก็อห โตะ และ ออ 1 เยโฮวา ก็ ไล โมเซด ฮุนเน “มัห ก็อห โตะ และ เอิญ ตัก ญวัง ทึห เน ดาย มัห เอิด อาโรน นาดับ อาบีฮู เคิบ ปึง อัหแกะ ครำ อิซราเอล เจ็ดซิบ ล็อง วัล แป จู ล็อง ต็อง กราบ ไว เอิญ ตัก ญวัง เน แต ต็อง ไว เอิญ เจ็น เยอะ ซะ 2 มัห มี ล็อง เดียว โตะ ติ ซะ เคิบ เอิญ กุญ อัหซอ นัน โตะ ติ ซะ เคิบ เอิญ ไอ มี กุญ เตาะ ปึง พซาซน นัน ก็ อำ ระ อัห โตะ เคิบ มัห เตาะ” เยโฮวา ไล โมเซด จังนะ 3 แลว เอาซาง ไล โมเซด ฮุนนัน แลว โมเซด ก็ โตะ ไล อน ตัก พซาซน ปัง มด กด จู มบลึ ตี เอาซาง ไล อน ตัก โมเซด นัน โมเซด ก็ ไล อน ตัก อัห ปัง มด ปึง พซาซน ปัง โมเซด ไล ออ แลว อัห ก็ ซวัล นำ เลิมๆ ฮุนเน “อิห แอง จู มบลึ มอก เอาซาง ไล อิห แอง นัน ดาย” อัห อัง 4 ทาเน โมเซด ก็ จด ระ แญง เอาซาง มด จู มบลึ ตี เอาซาง ไล อน ตัก นำ แลว นัน ตุด ตัก งกร็อห นำ ก็ แอง ตี ทวาย ซะ ตัก เจ็ง ญวัง นัน นำ ก็ เอิด เกียง แอง เป็น งกรัง นำ ก็ เอิด งกรัง เกียง นัน ซิบซอง เซ็น พร็อห ระ อน งกรัง ซิบซอง เซ็น นัน ซำรับ ครำ อิซราเอล ซิบซอง กรอก นัน 5 เจ็นนัน นำ ก็ ไล ครำ นุม เริล เคิม ซะ ทวาย อน ตัก เอาซาง นำ ก็ ไล อัห มเบิล งัว ลัง ทวาย อน ตัก เอาซาง วัล ตี อัห ทวาย เน ก็ ซำรับ อัห อุ เลาะ อุ ซุก เคิบ เอาซาง 6 โมเซด ก็ เอิด เมียม ซัด ปึง นัน มี คัล ระ อน ตัก นจัห เมียม ซัด มี คัล นัน วัล นำ ก็ เอิด ซัห ซิห ตัก ตี ทวาย ซะ นัน 7 เจ็นนัน นำ ก็ เอิด นังซือ ตี นำ จด แญง ซันญา เอาซาง แลว นัน นำ ก็ อาน อน ตัก ปึง พซาซน ปัง ปึง พซาซน ปัง แลว อัห ก็ ไล โมเซด คือเน “เอาซาง ไล อิห แอง ซีวะ อิห ก็ แอง มอก นำ ไล อน มด ดาย” อัห อัง 8 เจ็นนัน โมเซด ก็ เอิด นจัห ตี นำ ซิห เมียม เคิน นัน นำ ก็ ซัห ซิห เมียม นัน ตัก ปึง พซาซน มด นำ ก็ ไล พซาซน คือเน “เมียม เน เป็น เมียม รับรอง แญง ซันญา คอง เยโฮวา ตี แป ซันญา เคิบ นำ แลว นัน ดาย” โมเซด อัง อัห ก็อห โตะ และ เอาซาง ตัก ญวัง ทึห 9 ทาเน โมเซด อาโรน นาดับ อาบีฮู เคิบ ปึง อัหแกะ ครำ อิซราเอล เจ็ดซิบ ล็อง นัน อัห ก็ ก็อห เริล ตัก ญวัง นทึห 10 โตะ ทึห แลว อัห ก็ เม็จ เอาซาง ตัก เป็น งกี ครำ อิซราเอล นัน ตัก ปืน เจ็ง นำ ลัห เซ็บ ก็ ไซ มอก ไพลิน แลว ก็ ไซ มอก วาง ทึห นัน 11 ปึง อัหแกะ ครำ อิซราเอล นัน อัห เม็จ เอาซาง แต นำ ไอ มี จบ ลงโทด ซิห อัห เตาะ อัห เม็จ เอาซาง แลว อัห ก็ กุญ ป็อง จะ เลิม ออก เลิม นัน 12 เจ็นนัน วัล เยโฮวา ก็ ไล โมเซด คือเน “มัห ก็อห โตะ และ เอิญ ตัก ญวัง ทึห เน ดาย มัห เพา เอิญ อุ ตัก เน เอิญ ก็ เคียน กด ซิห ตัก แพ็น เกียง อน ตัก มัห มัห ต็อง เก็บ ระ อน เพือ นเจ็น อัห ดาย” นำ อัง 13-14 โมเซด ก็ ไล ปึง อัหแกะ คือเน “แป เพา อุ ตัก เน จำปอ เอิญ วัล โตะ และ แป วัล ดาย อาโรน เคิบ เฮอ ก็ ควะ อุ เคิบ แป เซ็บ เน กัน แป มี ปันฮา ซีวะ แป ก็ โตะ และ ปาม ดาย” โมเซด อัง เจ็นนัน โมเซด ก็ ก็อห เริล ญวัง งกีจ็อง นทึห โยซูวา ตัก เป็น ลูกนอง โมเซด นัน ก็ เริล เลิม 15 ปน โมเซด ก็อห เริล นทึห แลว บด ก็ โตะ ปุก ระ ญวัง นัน 16 เยโฮวา ก็ ทาง อุ ตัก ญวัง ซีนาย นัน บด ก็ ปุก ระ ญวัง นัน ฮก งิ งิ ที เจ็ด เยโฮวา ก็ งกรอ โมเซด เจ็น บด นัน 17 ครำ อิซราเอล ดอม เยโฮวา ตัก ญวัง ทึห นัน อัห ก็ เม็จ นำ ทาง อุ อี อังกัด โอด จีก ญวัง นัน 18 โมเซด ก็ อุ ตัก ญวัง ทึห นัน ซีซิบ งิ ซีซิบ แจ็ล |
Global Partners
Global Partners