อิซราเอล ญาย 10 - Prai Bibleเอาซาง แอง ระ เล็ห นซอด 1 ฟาโร ไอ มี พระ อัห เริล เยโฮวา ก็ ไล โมเซด คือเน วัล “มัห เริล และ ฟาโร ดาย แต เอิญ แอง ระ ใจ นำ เคิบ ลูกนอง นำ นัน ลืน ดาน แลว เอิญ แอง ระ ใจ อัห ลืน ดาน ก็ เพาะวา เอิญ ซีรอก แอง ซะ แปลก ดก มบลึ เคิบ มัด อัห 2 เลือง เน แป ต็อง เม็จ เคิบ มัด เคิบ มุห ออ บัดนะ นโดน แป ก็ เลามุน เลือง เน อน ตัก ควัน นจะ ควัน ลาน ออ ปัง แป ต็อง เลามุน เค็ย เอิญ แอง ดุ ซิห ครำ อียิบ เอิญ แอง ซะ แปลก ซะ จ็อง เคิบ มัด อัห ระ แป เม็จจึด เค็ย เอิญ เป็น เยโฮวา” เยโฮวา อัง 3 ทาเน โมเซด เคิบ อาโรน ก็ แอง ฮุน เยโฮวา ไล อน ปาม ก็ เริล ไล ฟาโร คือเน “เยโฮวา งกีจ็อง คอง ครำ ฮีบรู ไล มัห พระ ครำ คอง ออ ดาย มัห ลืน ซีเละ ควะ อิง มอก นเดย บ็อห มัห ควะ แอง ลืน มอก เน มัห ต็อง พระ ครำ คอง งกีจ็อง เริล ออ ดาย ระ อัห เริล ทวาย ซะ อน ตัก งกีจ็อง 4 กัน มัห ไอ มี ญอม พระ อัห เริล ดอม เนอะ งิ กรัก งกีจ็อง ก็ ระ มี นซอด โตะ ป็อง แอ็ม ซะ คอง แป มด ดาย 5 นำ ระ นซอด เลอะ โตะ ปุด ปิ ซิก ดอม ซิก ก็ ไอ มี ตาด เตาะ ตัก งะ ตัก ซวน ตี มี มบัห มี เกาลำ ตัก ควะ เลือ แพล อัง นัน นซอด ก็ ป็อง แอ็ม ลิบ ซุด มด 6 เจ็นนัน นซอด ก็ เลอะ โตะ รุม เจิง แป วัล เป็น เจิง มัห เจิง ปึง ลูกนอง เจิง พซาซน ทัว ปะเทด อียิบ ก็ เลอะ ปิ นซอด มด เจ็น ซะไม เอาจ็อง เมจ็อง แป ตัก อิง ตัก นา ก็ ไอ มี เกย เม็จ นซอด ดก มอก เน ซัง งกีจ็อง ไล จังนะ ดาย” โมเซด อัง แลว โมเซด ไล ฟาโร แลว ฟาโร ก็ ฮุด เค็ห เคา วัล แอ็ม 7 ทาเน ปึง ลูกนอง ฟาโร ก็ ไล ฟาโร คือเน “บัห บอซะเน นำ รบกวน แอ อิง แลว นีห มัห พระ แอ็ม ครำ อิซราเอล เริล นทึห เตาะ ระ อัห เริล ทวาย ซะ อน ตัก เยโฮวา งกีจ็อง คอง ออ วาล ดอม กา ปะเทด อียิบ แอ เน บัก และ ซุด แอ็ม ซะ แลว ญอน นำ นัน” อัห อัง 8 เจ็นนัน ฟาโร ก็ ญอม ปัง อัห นำ ไล อัห เริล และ โมเซด เคิบ อาโรน มี ลบ วัล โมเซด เคิบ อาโรน ก็ ลบ โตะ และ ฟาโร วัล ฟาโร ก็ ไล ปาม คือเน “เอิญ ญอม ระ แป เริล ทวาย ซะ อน ตัก เยโฮวา งกีจ็อง คอง แป ดาย แต มัห ระ อีเอ เริล แด” ฟาโร อัง 9 โมเซด ก็ ไล นำ “อิห ต็อง เริล มด ดาย เป็น เอา แกะ ควัน แย็ด ควัน บาว ควัน มอน เป็น แปะ แกะ งัว ลา อิห ก็ เอิด เริล มด เพาะวา อิห ต็อง แอง พิที ทวาย ซะ อิห ต็อง อน เกียด ตัก เยโฮวา งกีจ็อง นัน” โมเซด อัง 10 ทาเน ฟาโร ก็ ไอ มี ปอใจ เตาะ นำ ก็ ไล ปาม คือเน “แป กึด แอง ไอ มี เลาะ ไอ มี ซือ เคิบ เอิญ แลว กัน เอิญ ญอม ระ แป เอิด ยัห เอิด ควัน เริล เลิม ก็ ต็อง เป็น เยโฮวา จวย แป ฮัก เอิญ ไอ มี พระ แป เริล เตาะ 11 เอิญ ไอ งกิ ระ แป เอิด ยัห เอิด ควัน ออ เริล เลิม ซัง แป เริล จุม อัหคล็อง ฮัก ก็ ปอ แป เริล ทวาย ซะ อน เยโฮวา มอก แป เค็ย นะ” ฟาโร อัง แลว ฟาโร โป ปาม คือนะ แลว อัห ก็ ลด มบรึห ปาม ปัด แอ็ม เจ็น เจิง ฟาโร 12 ทาเน เยโฮวา ก็ ไล โมเซด คือเน “มัห นจืน ที นจืน ลา จี วาง นทึห คอม อียิบ นัน ระ ปึง นซอด รูบ โตะ ป็อง มบัห ป็อง มบ็วญ คอง อัห จู มบลึ ระ ซุด แอ็ม มด มี ซีวะ ตี ควะ เลือ แพล อัง ก็ ระ เย็ห โตะ ป็อง แอ็ม ซุด มด” เยโฮวา อัง 13 โมเซด ก็ แอง ฮุน งกีจ็อง ไล อน นำ ก็ เอิด งเกราะ จี ซิห ตัก วาง นทึห คอม ปะเทด อียิบ นัน งกีจ็อง ก็ แอง ระ งกริม นทูด โตะ เจ็น งคม มด งิ มด แจ็ล ปัห ซะ ตัก งกร็อห งกริม ก็ นทูด ซับ ปึง นซอด โตะ ปุด ปิ แลว 14 นซอด ก็ เลอะ โตะ อุ ทัว ปะเทด อียิบ มด เย็ห โตะ เกาะ อุ ทัว เคด ครำ อียิบ นัน ฮัก เจ็น อิง เจ็น นา ก็ ไอ มี เกย เม็จ นซอด ดก มอก เน แทะ นัน วัล ก็ ไอ มี ดก มอก นัน วัล เตาะ 15 นซอด ก็ โตะ มอก งกีจ็อง ไล อน นัน อี โตะ เกาะ อุ ทัว ปะเทด อียิบ มด ญ็อก ม็อญ อี อัง ซะ มด อี ป็อง แอ็ม มบัห แอ็ม มบ็วญ ตัก งะ ตัก ซวน อัห มด แพละ ลำ จู มบลึ ตัก ควะ เลือ แพล อัง เย็ห ก็ ป็อง แอ็ม ซุด มด ไอ มี ควะ นทู แคร็วๆ ซัก มี ติด เตาะ ซุด แอ็ม มด ทัว ปะเทด อียิบ 16 ฟาโร เม็จจึด นัง ออ แอง ลุห แลว นำ ก็ ลด ซัง โมเซด เคิบ อาโรน โตะ และ ออ นำ ไล ปาม คือเน “เอิญ แอง ลุห อัง เยโฮวา งกีจ็อง คอง แป ซีเละ ดาย เอิญ ก็ ซำ แอง ลุห อัง ปา วัล 17 ครอ เคิบ มัห ครอ มัห ญ็อก แอ็ม โทด เอิญ มี ลบ เน วัล ดาย มัห ครอ เคิบ เยโฮวา งกีจ็อง คอง แป ระ นำ แอ็มๆ นซอด ตัก มเบิล อิห เน ดาย” นำ อัง 18 โมเซด ก็ เริล ออ นำ ลด ครอ เคิบ เยโฮวา 19 เยโฮวา ก็ แอง ระ งกริม นทูด เล็ห เจ็น เซอะ วัล อี นทูด ปึห เอิด ปึง นซอด นัน มพลิห แอ็ม ตัก นอก ทะเล โซ มด ไอ มี ควะ นซอด ตัก ปะเทด อียิบ ซัก มี นัง เตาะ 20 แต เยโฮวา ก็ แอง ระ ฟาโร ลืน ดาน วัล ฟาโร ไอ มี กิว พระ แอ็ม ครำ อิซราเอล เริล ออ เตาะ งกีจ็อง แอง ระ ม็อญ ซะ 21 เจ็นนัน วัล เยโฮวา ก็ ไล โมเซด แอง ระ ม็อญ ซะ นำ ไล โมเซด คือเน “มัห ญ็อก ซิห ที ออ ตัก วาง นทึห ดาย ระ นเซอะ ม็อญ ซะ ทัว ปะเทด อียิบ มด ดอม ซีวะ ไอ มี ตาด เตาะ” เยโฮวา อัง 22 โมเซด ก็ แอง มอก งกีจ็อง ไล อน นัน นำ ก็ ญ็อก ซิห ที ตัก วาง นทึห เจ็นนัน ก็ ลิบ ม็อญ ซะ ญึด ทัว ปะเทด อียิบ แพะ งิ แพะ แจ็ล 23 แพะ งิ แพะ แจ็ล นัน อัห ดอม นอย ก็ ไอ มี ตาด เตาะ ไอ มี ซีเอ จางรู เริล พานเดย เตาะ แต ตัก เพียห ครำ อิซราเอล อุ ออ นัน คล็อย ซะ นซึล 24 ฟาโร ก็ ลบ ไล โมเซด โตะ และ ออ วัล นำ ไล โมเซด คือเน “แป เริล ทวาย ซะ อน ตัก เยโฮวา นทึห เตาะ ปึง อัหเม เคิบ ควัน แย็ด ก็ เริล กุญ แต งัว ลา แปะ แกะ คอง แป นัน อำ แป เอิด เริล เตาะ ดาย” ฟาโร อัง 25 แต โมเซด ก็ เทียง นำ คือเน “ฮอน จบ เลาะ เริล นัง ลือ เตาะ มัห ต็อง ปลอย ระ อิห เอิด งัว เอิด แปะ แกะ เริล เลิม ซัง อิห มี ซะ มเบิล ทวาย อน ตัก เยโฮวา งกีจ็อง คอง อิห ดาย 26 อิห ต็อง เอิด แปะ แกะ คอง อิห เริล มด ดาย ไอ มี เลาะ ระ ซัก มี นัง เพาะวา อิห ต็อง เล็ห เคิด ตี วาล ซัง อิห เม็จจึด ต็อง มเบิล ซีวะ ทวาย อน ตัก เยโฮวา งกีจ็อง คอง อิห” โมเซด อัง 27 แต เยโฮวา ก็ แอง ระ ฟาโร ลืน ดาน วัล นำ ไอ มี ญอม พระ ครำ อิซราเอล เริล เตาะ 28 ทาเน ฟาโร ก็ ไล โมเซด คือเน “เจ็นเน มัห เริล พานเดย ก็ เริล นทึห เตาะ อำ มัห มแบละ มัด ตัก เอิญ เม็จ วัล ดอม เนอะ กัน เอิญ เม็จ มัด มัห ญาม นเดย วัล มัห ก็ ต็อง เปิล” ฟาโร อัง 29 โมเซด ก็ จ็อก เคิบ ฟาโร คือเน “มัห จ็อก ฮุนนะ ก็ แคระ แลว เจ็นเน นโดน มัห ก็ ไอ มี เม็จ มัด เอิญ วัล เตาะ” โมเซด อัง |
Global Partners
Global Partners