ตัวแทน 9 - Prai Bibleเซาโล เอิด ใจ แมะ ตัวแทน 22:6-16 , 26:12-18 1 ญาม นัน เซาโล ก็ ควะ คู ครำ ตี เจือ งกีจ็อง นำ เค็ย อง มเบิล แอ็ม อัห นำ ก็ โตะ และ ปึง มอ เอาซาง แกะ 2 นำ ก็ ซ็วน นังซือ ไบ อนุยาด ตัก อัห ระ นัง ออ มี ซิด เญ็บ ครำ ทือ เยซู นำ อง เอิด ไบ อนุยาด นัน ซับ ตัก ฮ็อง พซุม ครำ ยิว ตัก เมือง ดามากัด กัน นำ เม็จ ครำ ตี เจือ เยซู นำ ก็ อง เญ็บ อัห มด อัหคล็อง ก็ ตึก อัหเม ก็ ตึก นำ อง เญ็บ ซับ อัห ตัก เมือง เยรูซาเล็ม มด 3 ญาม เซาโล กุญ ไบ อนุยาด แลว นำ ก็ เริล บัก และ ติ เล็ห ตัก เมือง ดามากัด แลว ก็ พุก ทาง ซะ เจ็น วาง ตัก ทึห ทาง เคิง นำ อุ นัน 4 นำ ก็ ลด มพึง ลัง นำ ลด เม็จ แญง นะ งกรอ ซิห ออ คือเน “เซาโลๆ มัห คมเฮง เอิญ อังวะ” แญง นัน อัง 5 เซาโล ก็ ซวัล คือเน “งกีจ็อง เฮย มัห เป็น อีเอ นะ บ็อห” เซาโล อัง “เอิญ เป็น เยซู ตี มัห คมเฮง อุ นัน 6 ร็อห เนอ มัห เริล ใน เมือง ติกๆ ดาย มัห แอง จังนัก วัล ก็ มี ครำ ไล อน ตัก มัห ฮัก” แญง นัน อัง เจ็น วาง ตัก ทึห 7 ทาเน ครำ ตัก เริล เลิม เคิบ เซาโล นัน อัห ก็ เค็ด งเกิน อุ ไอ มี จางรู จ็อก เตาะ อัห เม็จ นเซิง จ็อก แต ไอ มี เม็จ นัง ครำ อัห ก็ งึด อุ นัน 8 เจ็นนัน เซาโล ก็ ร็อห ญ็อง นำ ก็ ลด บอด แอ็ม มัด นำ ดอม ซะ ก็ ไอ มี ตาด เตาะ นำ ร็อห ก็ มี ครำ ทาก ที นำ ร็อห อัห ทาก ที นำ เริล เมือง ดามากัด 9 นำ บอด มัด อุ แพะ งิ ไอ มี ตาด มัด นำ เตาะ จะ ก็ ไอ มี กุญ ป็อง ออก ก็ ไอ มี กุญ ออก เตาะ 10 ทาเน ก็ มี ครำ เจือ เยซู มี ล็อง ตัก เมือง ดามากัด นัน ซือ นำ ตัก อานาเนีย นำ ก็ เม็จ งกีจ็อง จ็อก เคิบ ออ คือเน “อานาเนีย เฮย” นำ ก็ ซวัล เค็ย “เอิญ อุ เน ดาย งกีจ็อง เฮย” นำ อัง 11 งกีจ็อง ก็ ไล นำ ฮุนเน “มัห ร็อห เริล ตัก รวง กรัล นัน ดาย มัห เริล เจิง ยูดาด มัห ซ็วน และ ครำ เมือง ทาซัด ซือ นำ ตัก เซาโล ดาย มานะ เน เซาโล กำลัง ครอ วอน เอาซาง อุ 12 นำ ก็ เม็จ ซะ แปลก แลว นำ เม็จ ครำ ซือ อานาเนีย โตะ พระ ซิห ที ตัก ออ ระ ตาด มัด วัล” งกีจ็อง อัง 13 อานาเนีย ก็ ซวัล งกีจ็อง คือเน “งกีจ็อง เฮย ดก ครำ เลามุน เลือง เอา นัน ตัก เอิญ แลว อัห เค็ย แร็ง ดุ นำ แอง ไอ มี เลาะ ซิห ครำ คอง มัห ตัก เมือง เยรูซาเล็ม ดาย 14 นำ ก็ ลด ครอ ไบ อนุยาด ตัก ปึง มอ เอาซาง แกะ ระ กุญ เญ็บ ครำ ตัก เน นำ อง โตะ เญ็บ ครำ ตัก ทือ มัห เคิง เน ดาย” อานาเนีย อัง 15 งกีจ็อง ก็ ลบ ไล อานาเนีย คือเน “เริล นทึห เตาะ เอิญ เลือก เอิด เซาโล แลว เอิญ ก็ ระ นำ เป็น ลูกนอง ออ บัดนะ เอิญ ระ นำ ไล อัหซอ ดก ล็อง เลือง เอิญ นำ ต็อง ไล ครำ กรอก ซอ แด ครำ อิซราเอล แด ครำ ระดับ พะเจายูฮัว แด บัดนะ นโดน นำ ต็อง ไล เลือง เอิญ อน อัห ปัง มด 16 เอิญ ระ นำ เม็จจึด เค็ย นำ ต็อง อด ตุก อด ญาก ลำบาก มอก นเดย ญอน ฮับไจ เอิญ นัน” งกีจ็อง อัง 17 อานาเนีย ก็ เริล โตะ เจิง อัห แลว อานาเนีย ก็ กุด ควังใน เจิง นำ ก็ ต็อก ซิห ที ตัก เซาโล นำ ก็ จ็อก คือเน “เซาโล เฮย เยซู งกีจ็อง คอง แอ ตี นำ ระ มัห เม็จ นัง ออ ตัก รวง งิ นาน นำ ไล เอิญ โตะ และ มัห นำ ไล เอิญ โตะ จวย มัห ระ มัห ดอม ซะ ตาด วัล ดาย นำ ก็ ระ มัห มี ซีมาล เอาซาง อุ เลิม เคิบ มัห” อานาเนีย อัง 18 เจ็นนัน ก็ มี ซะ อัง กัด งโคล กรืจ เล็ห เจ็น มัด เซาโล นำ ก็ ลด ตาด เล็ห มัด ลด ดอม ซะ กุญ วัล นำ ก็ ลด ร็อห เริล แอง พิที จุบ นอก 19 เจ็นนัน นำ ก็ ลด ป็อง จะ ลด เลาะ เล็ห ใจ นำ ก็ มี แร็ง เล็ห วัล ญาม นัน เซาโล ลด อุ ตัก เมือง ดามากัด นัน ดก งิ วัล นำ พัก อุ เคิบ ครำ ตี เจือ เยซู นัน เซาโล ไล อัห เลือง เอาซาง ตัก ดามากัด 20 นำ ก็ กุด ฮ็อง พซุม ยิว นำ ก็ ไล เลือง เยซู อน ตัก อัห ปัง นำ เค็ย เยซู เป็น ควัน เอาซาง 21 เอา นเดย เม็จ แญง นำ จ็อก อัห ก็ ญ็อก งึด อัห ก็ ซ็วน นอย คือเน “เอ ซีวะ จังนะ ล็อง เน นำ เกย ทำลาย ครำ ทือ เยซู ตัก เมือง เยรูซาเล็ม แลว นำ โตะ ตัก เน ก็ นำ โตะ เญ็บ ครำ เยซู ซับ อน ตัก ปึง มอ เอาซาง แกะ ตัก เมือง เยรูซาเล็ม มานะ เน ก็ ซีวะ นำ ไล เลือง เยซู ตัก อัห วัล” อัห อัง 22 แต เซาโล ก็ เฮง จ็อก เลาะ จ็อก มี เฮดพน ซีเละ นำ ไล อัห เลือง เยซู ติกๆ นำ ไล อัห เค็ย เยซู นัน เป็น เมซียา ซีเละ ครำ ยิว ตัก เมือง ดามากัด อัห ก็ ไอ มี จางรู เทียง เซาโล เตาะ 23 ดก งิ แทะ นัน วัล ปึง ยิว ก็ ปึกซา นอย อัห อง มเบิล แอ็ม เซาโล 24 แต ก็ มี อัหซอ ลอด โตะ ไล นำ ระ นำ เม็จ ปึง ครำ ยิว นัน ก็ วาง จบ เพา นำ อุ ตัก ปะตู เมือง มด งิ มด แจ็ล อัห บัก และ มเบิล แอ็ม นำ 25 แต แจ็ล นัน ก็ มี ลูกนอง นำ โตะ จวย นำ อัห ระ นำ คุด ตัก เค็ง จ็อง และ อัห ก็ เอิด ทาล ท็อก เค็ง มพลิห นำ ลัห นเดะ กำแพง เมือง นำ ก็ ลด ปน แอ็ม เจ็น อัห 2 โคริน 11:32-33 เซาโล อุ ตัก เมือง เยรูซาเล็ม 26 เจ็นนัน วัล เซาโล ก็ เริล เมือง เยรูซาเล็ม นเซอะ โตะ นำ แลว นำ ก็ เริล และ ปึง ครำ ตี เจือ เยซู เคิง นัน นำ ซีรอก เปาะ อัห แต อัห ไอ มี เจือ เค็ย นำ กิว ทือ เยซู อัห ก็ ลด นเจิก อัง นำ 27 แต บานาบัด ก็ จวย เซาโล นำ ซับรวง เซาโล โตะ และ ปึง ตัวแทน เยซู บานาบัด ก็ ไล อัห เค็ย เซาโล เน นำ กิว เม็จ เยซู ตัก รวง เริล เมือง ดามากัด แลว เยซู จ็อก เคิบ นำ แลว บานาบัด เค็ย เซาโล เน ฮาน ไล เลือง งกีจ็อง อน ตัก ครำ เมือง ดามากัด ซีเละ 28 เจ็นนัน เซาโล ก็ เปาะ นอย เลาะ เคิบ ปึง ตัวแทน เยซู ตัก เมือง เยรูซาเล็ม นัน 29 นำ ก็ ฮาน ไล เลือง เยซู อน ตัก ครำ เยรูซาเล็ม นัน ซีเละ ครำ ยิว ตี จ็อก แญง กรีก ก็ มี อุ นัน เซาโล ก็ จ็อก เคิบ อัห เทียง เคิบ อัห เลือง เยซู นัน อัห ก็ ซำ และ มเบิล แอ็ม นำ วัล 30 ทาเน ปึง ควน นไจ ตี เจือ เยซู เม็จ คาว เค็ย อัห บัก และ มเบิล เซาโล อัห ก็ ซับ นำ ตัก เมือง ซีซารียา อัห ลด ซง นำ วัล เจิง ตัก เมือง ทาซัด 31 เจ็นนัน คริซจัก มด จู ตี ก็ อุ เลาะ อุ ซุก คริซจัก จังวัด ยูเดีย กาลิลี ซะมาเรีย ก็ อุ เลาะ อุ ซุก มด ไอ มี ซีเอ รบกวน อัห วัล เตาะ อัห ก็ เฮง แก็นใจ ทือ งกีจ็อง ติกๆ ซีมาล เอาซาง ก็ จวย อน กำลัง ใจ ตัก อัห ระ อัห เฮง จเริน เฮง ดก เล็ห ครำ เจือ ติกๆ เปโตร รักซา ไอเนอัด 32 ทาเน เปโตร ก็ เริล แอว อัห ดก ตี ทัว มด แลว นำ ก็ เริล แอว ปึง ครำ เอาซาง ตัก เมือง ลิดดา 33 ตัก เมือง ลิดดา นัน นำ เม็จ อัหคล็อง มี ล็อง ซือ ตัก ไอเนอัด ไอเนอัด เน นำ แว็ล แปด วาง แลว ไอ มี เป็น นำ ร็อห นำ อวย อุ แปด วาง แลว 34 เปโตร ก็ ไล นำ คือเน “ไอเนอัด เฮย เยซู คริด แอง ระ มัห เลาะ เล็ห วัล ดาย มัห ร็อห เก็บ ตี อวย นทึห เตาะ” เปโตร อัง ไอเนอัด ก็ ซีนุก ร็อห ซีเละ 35 อัห จู ล็อง ตัก อุ เมือง ลิดดา เคิบ งวัล ซาโรน เม็จ ไอเนอัด เลาะ เล็ห นัน อัห ก็ เอิด ใจ แมะ โตะ เจือ งกีจ็อง วัล ทาบีทา รีด เล็ห วัล 36 ทาเน ก็ มี อัหเม มี ล็อง ตัก เมือง ยาฟา นัน อัหเม ล็อง นะ เป็น ครำ เจือ เยซู ซือ นำ ตัก ทาบีทา แญง กรีก อัห เค็ย โดกัด โดกัด ซีแล็ม เค็ย พอด นำ เป็น ครำ ใจ เลาะ ใจ ดัว ใจ กวาง นำ จวย ครำ ตุก ครำ ญาก ดก ซีเละ 37 ทาเน นำ ก็ โซะ เท็ม ลด เปิล แอ็ม อัห ก็ เอิด ซบ นำ เอิม นอก ลด ซับ ระ นำ ตัก ฮ็อง ลัห ทึห 38 เมือง ยาฟา นัน ก็ อุ ติ ซะ เคิบ เมือง ลิดดา นัน ครำ เจือ เยซู ตัก อุ เมือง ยาฟา ก็ เม็จ คาว เค็ย เปโตร อุ ตัก เมือง ลิดดา อัห ก็ ไล ครำ เปียะ ล็อง เริล และ เปโตร อัห ครอ ระ นำ โตะ เวิดๆ 39 เปโตร ก็ เริล เลิม เคิบ ปาม โตะ เปโตร แลว อัห ก็ ซับรวง นำ ก็อห ตัก ฮ็อง ลัห ทึห นัน มี แมมาย ดก ล็อง ญ็อง เญ็ม แกวด นัง เปโตร นัน อัห ก็ ไล เปโตร ดอม คัว ดอม โกบ ตัก โดกัด แอง ญาม นำ ควะ รีด อุ นัน 40 ทาเน เปโตร ก็ ไล อัห ทอก ปัด เจ็น ฮ็อง นัน นำ ก็ คุกโคล ครอ วอน เอาซาง นำ ก็ มบิด มัด ดอม ครำ เปิล นัน นำ ลด จ็อก ฮุนเน “ทาบีทา เฮย ร็อห เนอ” นำ อัง ทาบีทา ก็ ลด มบัห มัด นำ เม็จ เปโตร แลว นำ ก็ ร็อห คุด 41 เปโตร ก็ จวย ทาก ที นำ ร็อห ญ็อง เปโตร ก็ งกรอ ปึง ตัก ทือ เยซู เคิบ ปึง แมมาย นัน โตะ ดอม นำ ก็ ซับ ทาบีทา ตัก รีด เล็ห แลว นัน อน ตัก ปึง อัห วัล 42 เลือง เน ก็ แปร เริล ทัว เมือง ยาฟา มด ครำ เจือ งกีจ็อง ก็ เฮง ดก เล็ห ติกๆ วัล 43 เปโตร ก็ ลด พัก อุ ตัก ยาฟา นัน ดก งิ นำ พัก อุ เคิบ ซีโมน มี ล็อง วัล ซีโมน ล็อง เน นำ เป็น ซะลา ฟอก ซวัห ซัด |
Global Partners
Global Partners