ตัวแทน 7 - Prai Bibleซะเทเฟน แก คะดี ออ 1 ทาเน มอ เอาซาง จ็อง ก็ ซ็วน ซะเทเฟน คือเน “อัห พอง มัห ฮุนเน แคระ อัน บ็อห” นำ อัง 2 ซะเทเฟน ก็ ซวัล มอ เอาซาง ฮุนเน “ปึง เอา แกะ ปึง ควน นไจ เฮย ครอ ระ แป ปัง เอิญ วาล มี ติด ดาย เอาซาง ตัก มี เกียด ดก ทีซุด นัน นำ มแบละ นัง ออ ตัก อับราฮัม เอาจ็อง คอง แอ ตัก อิง ญาม นำ ควะ อุ ปะเทด เมโซโปเตเมีย นัน เอาซาง ไล นำ วาล ไอ ตัน นำ ญาย เริล อุ ตัก เมือง ฮาราน นัน 3 ญาม นัน เอาซาง ไล นำ คือเน ‘มัห พระ ควน พระ นไจ พระ ตี อุ คอง ออ ดาย เอิญ ไล มัห เริล ตี แมะ ตัก เอิญ ระ มัห เม็จ บัดนะ นโดน’ เอาซาง อัง เกาตีนา 12:1 4 เจ็นนัน อับราฮัม ก็ ลด ทอก เริล เจ็น ปะเทด เคเดีย นำ โตะ อุ ตัก เมือง ฮาราน วาล นำ อุ ตัก นัน จำปอ เปิล เอา นำ แลว เปิล เอา นำ แลว เอาซาง ก็ ลด ไล นำ ญาย โตะ อุ แต็ห เน ตัก ตี แป อุ มานะ เน 5 อับราฮัม อุ เคิง เน แลว แต เอาซาง ไอ มี งเคาะ อน กากุน ซีวะ ตัก นำ ซัง ตี ซิก มี วัห ก็ ไอ มี ตัน อน เตาะ แต เอาซาง ซันญา อง ระ ควัน นจะ ควัน ลาน คอง นำ ซืบ เอิด ตี ซิก นัน บัดนะ นโดน ญาม นัน อับราฮัม ไอ ตัน มี ควัน แต เอาซาง ก็ เพีย ไล นำ วาล ฮุนเน 6 ‘ควัน งา มัห ต็อง เริล อุ ปะเทด ซอ บัดนะ ควัน งา มัห ต็อง เป็น ทาด อัหซอ อัหซอ นัน ก็ ต็อง คมเฮง ควัน งา มัห 400 ปี วัล’ เอาซาง ไล นำ จังนะ ตัก อิง 7 เอาซาง ก็ ลบ ไล ฮุนเน วัล ‘เอิญ ต็อง ตัดซิน ลงโทด ปะเทด นัน ตี แอง ระ ควัน งา แป เป็น ทาด อัห นัน แต แทะ นัน วัล เอิญ ก็ ระ แป ทอก แอ็ม เจ็น ปะเทด นัน โตะ ไว เอิญ ตัก เน วัล’ เอาซาง ไล จังนะ ตัก อิง 8 ทาเน ตัก อิง นัน เอาซาง ก็ ไล อัห แอง พิที ซุนัด ระ เป็น เคือง มาย ซันญา เคิบ เอาซาง ญาม อับราฮัม กุญ ควัน ออ ตัก อิซอัก แลว อิซอัก เกิด แปด งิ แลว อับราฮัม ก็ แอง ซุนัด อน ตัก นำ แทะ นัน อิซอัก ก็ มี ควัน ซือ ตัก ยาโคบ ยาโคบ ก็ มี ควัน อัหคล็อง ซิบซอง ล็อง ตัก เป็น เอาจ็อง คอง แอ ตัก อิง นัน 9 ปึง เอาจ็อง แอ ตัก อิง นัน อัห ก็ เซ็ห อัง โยเซบ อัห เท็จ แอ็ม โยเซบ ระ นำ เป็น ทาด ครำ อียิบ แต เอาซาง ก็ อุ เลิม เคิบ โยเซบ จวย โยเซบ ฮัก 10 เอาซาง ก็ ลด ระ นำ ปน ตุก มด จู มบลึ เอาซาง ก็ อน ปันญา ดก ตัก โยเซบ นำ ระ ฟาโร ตัก เป็น พะเจายูฮัว อียิบ นัน ซอบ นำ แอง เลาะ ซิห นำ วัล ฟาโร ก็ ระ โยเซบ เป็น ฮัวนา มด ตึง เจิง ตึง ปะเทด วัล 11 เจ็นนัน อัห ก็ เกิ๊ด ซีอ็อจ จ็อง ทัว ปะเทด อียิบ ทัว ปะเทด คานาอัน มด อัห ก็ ตุก ญาก ลำบาก ซีเละ เอา เม แอ ตัก อิง นัน อัห โละ ซา ป็อง ก็ ไอ มี กุญ แอ็ม เตาะ 12 ทาเน ยาโคบ ก็ เม็จ คาว เค็ย มี ซา ดก ตัก ปะเทด อียิบ นำ ก็ ไล ปึง ควัน ออ เริล และ ซา ตัก ปะเทด อียิบ นัน ก็ เป็น ลบ แรก ตี อัห เริล ตัก อียิบ นัน 13 เจ็นนัน วัล ปึง ควัน ยาโคบ อัห ก็ ลบ วัล เริล วัล เป็น เปียะ ลบ อัห เริล ลบ ที ซอง นัน โยเซบ ก็ ไล นัง ออ ตัก ควน นไจ เค็ย นัง ออ เป็น โยเซบ ฟาโร ก็ ลด เม็จจึด เลือง ควน นไจ โยเซบ ลบ นัน 14 เจ็นนัน โยเซบ ก็ มพอล เอา ออ เคิบ ควน นไจ ออ มด ตึง เจ็ดซิบ ฮา ล็อง นัน โตะ อุ เคิบ ออ ตัก อียิบ นัน 15 ปึง ยาโคบ ก็ ลด ญาย เริล อุ ตัก ปะเทด อียิบ มด ยาโคบ อุ ตัก อียิบ นัน จำปอ มแบร็ห ลด เปิล แอ็ม ตัก ปะเทด อียิบ นัน ควัน นำ ซิบซอง ล็อง ก็ เปิล แอ็ม เคิง นัน 16 ปึง ควัน นจะ ควัน ลาน ก็ เอิด ซบ ซิบซอง ล็อง นัน ซับ เทิ๊บ ระ ตัก กรืบ เมือง เซเคม เป็น กรืบ ตี อับราฮัม ทน เอิด ตัก กรอก ฮาโม ตัก อิง นัน 17 ทาเน อิง แทะ นัน วัล ก็ บัก และ เล็ห เวลา เอาซาง อง ซับรวง อัห วัล อุ ตัก ปะเทด คานาอัน วัล มอก เอาซาง ซันญา เคิบ อับราฮัม เจ็น อิง แลว บัก และ เล็ห เวลา เอาซาง ซับรวง อัห อุ ตัก คานาอัน แลว กรอก ยาโคบ ตัก อุ ปะเทด อียิบ นัน ก็ เฮง เคริบ แปร ดก เล็ห ติกๆ 18 อัห อุ ตัก อียิบ ติกๆ นัน ทาเน ก็ มี พะเจายูฮัว อียิบ มี ล็อง นะ พะเจายูฮัว ล็อง นัน นำ ไอ มี เม็จจึด เลือง โยเซบ ซัง 19 พะเจายูฮัว ล็อง นัน นำ ก็ แอง ดุ แอง ราย ซิห กรอก แอ ซีเละ นำ แอง ไอ มี เลาะ ซิห กรอก แอ นำ ดุ คมเฮง เอาจ็อง แอ นำ คนาบ เอาจ็อง แอ พระ แอ็ม ควัน เจะ ระ เปิล แอ็ม 20 ญาม นัน ก็ พวม เกิด โมเซด นำ เลาะลัห ซีเละ เอาซาง เลาะใจ เคิบ นำ ซีเละ เอา เม นำ ก็ ลอด เลียง นำ ระ ตัก เจิง จำปอ แพะ ซัวะ 21 เจ็นนัน อัห ก็ เอิด ควัน เจะ นัน มบลอย แอ็ม ตัก นอก ญาม นัน ก็ พวม โตะ ควัน มอน ฟาโร ตัก นอก นัน นำ เม็จ ควัน เจะ ตัก นอก นัน นำ ก็ ลด เอิด เลียง ระ อน มอก ควัน ออ 22 โมเซด ก็ กุญ นเจ็น มด จู มบลึ ตี ครำ อียิบ นเจ็น นัน นำ ก็ มี ปันญา เลาะ ซีเละ นำ แอง ซีวะ ก็ เลาะ มด นำ เก็ง ซีเละ แญง จ็อก ก็ เลาะ มด 23 ญาม โมเซด อาญุ ซีซิบ ปี แลว นำ ก็ ตัดซินใจ เริล ดอม ควน นไจ ออ ตัก ครำ อิซราเอล นัน 24 นำ ก็ เริล ทาเน นำ ก็ ปัก เม็จ ครำ อียิบ คัล ครำ อิซราเอล อุ ครำ อียิบ แอง จังนัน ก็ ไอ มี แคระ เตาะ โมเซด เม็จ นำ ก็ เล็ง โตะ จวย นำ ก็ ตอบติก นำ ก็ มเบิล แอ็ม ครำ อียิบ ล็อง นัน 25 นำ เยา ควน นไจ ออ เคาใจ ตี เอาซาง ระ นำ จวย อัห ปน แอ็ม เจ็น ตุก เจ็น ญาก นัน แต ปึง อัห ไอ มี จบ เคาใจ นำ เตาะ 26 คือ งิ กรัก วัล นำ ก็ ปัก เม็จ ครำ อิซราเอล วาง นอย อุ วัล นำ ซีรอก ระ ปาม อุ เลาะ เคิบ นอย ‘แอง จังนัน ไอ มี เลาะ ดาย ปา เป็น ควน นไจ นอย ปา วาง นอย อังวะ จังเน’ โมเซด อัง 27 แต ล็อง นัน ตัก แอง ไอ มี แคระ ซิห เปือน ออ นัน นำ ก็ ทับ ญู แอ็ม โมเซด นำ โป โมเซด ฮุนเน ‘มัห ซีแอง แกะ อังวะ อีเอ ไล มัห ตัดซิน อิห เน 28 มัห และ มเบิล เอิญ ฮุน มัห มเบิล ครำ อียิบ งิ เซ็น ก้า’ นำ อัง 29 โมเซด เม็จ แญง นำ จ็อก คือนะ นำ ก็ ลด ปัด แอ็ม เจ็น ปะเทด อียิบ นัน นำ ปัด อุ เคิบ อัหซอ ตัก ปะเทด มีเดียน นำ เอิด ยัห ตัก นัน ลด มี ควัน อัหคล็อง เปียะ ล็อง ตัก นัน อิซราเอล ญาย 2:11-15, 18:3-4 30 ญาม โมเซด อุ เคิง นัน ซีซิบ ปี แลว ก็ มี เทวาดา มี ล็อง โตะ มแบละ นัง ออ ตัก เกา ซีเยอะ ตี กรึห อุ ฮุน โอด นัน โมเซด เม็จ ตัก ทะเล ซาย นดิ ญวัง ซีนาย นัน 31 โมเซด เม็จ ฮุนนัน แลว นำ ก็ งึด ซีเละ นำ ก็ ติ โตะ ที ดอม อ็อญ นำ ก็ เม็จ แญง งกีจ็อง จ็อก คือเน 32 ‘เอิญ เป็น งกี คอง เอาจ็อง มัห ตัก อิง นัน ดาย เอิญ เป็น เอาซาง ตี อับราฮัม อิซอัก ยาโคบ ทือ นัน’ งกีจ็อง อัง โมเซด ก็ ญ็อก ซีดุง ไอ มี ฮาน นำ ดอม เตาะ นำ แร็ง นเจิก ซีเละ 33 งกีจ็อง ก็ ลด ไล นำ ทอด แค็บ ‘ทอด แค็บ ดาย ตี มัห ญ็อง อุ เน เป็น ตี ซักซิด ดาย 34 เอิญ เม็จ อัห คมเฮง กรอก ออ ตัก ปะเทด อียิบ แลว เอิญ เม็จ นเซิง อัห ซีนืล อุ แลว เอิญ ก็ จูล โตะ จวย อัห ระ ปน ตุก ปน ญาก นัน เจ็นเน เอิญ ก็ ไล มัห เริล ตัก ปะเทด อียิบ วัล ดาย’ เอาซาง อัง อิซราเอล ญาย 3:1-10 35 ทาเน ครำ อิซราเอล ก็ ไอ มี ปัง โมเซด อัห ลบ วัล โป ซิห โมเซด ‘มัห ซีแอง แกะ อังวะ อีเอ ไล มัห โตะ ตัดซิน อิห เน เออะ’ อัห อัง อัห ไอ มี ปัง โมเซด เตาะ แต เป็น โมเซด ล็อง เนๆ ตี เอาซาง จ็อก เคิบ นำ ตัก เกา ซีเยอะ นัน เอาซาง ตัง ระ นำ เป็น ฮัวนา ปกคอง ครำ อิซราเอล เป็น โมเซด ล็อง เนๆ ตี เอาซาง ระ โตะ จวย ครำ อิซราเอล ปน แอ็ม เจ็น ตุก นัน 36 เจ็นนัน โมเซด ก็ ซับรวง ครำ อิซราเอล ทอก เริล เจ็น ปะเทด อียิบ นำ ก็ แอง ซะ แปลก ตัก ปะเทด อียิบ ตัก นอก ทะเล โซ นำ ก็ แอง ตัก ทะเล ซาย นำ ก็ แอง นำ ระ อัห เม็จ ซะ แปลก นัน ซีซิบ วาง 37 ญาม นัน โมเซด ก็ เพีย ไล ครำ อิซราเอล ฮุนเน ‘บัดนะ นโดน เอาซาง อน ลาม ล็อง แมะ ตัก แป นำ ก็ ระ ลาม ล็อง แมะ นัน โตะ อุ เคิบ แป มอก นำ ระ เอิญ โตะ อุ เคิบ แป แลว เน ลาม ล็อง แมะ นัน ต็อง เกิด ตัก ปึง แป นัน ฮัก’ โมเซด อัง” ซะเทเฟน ไล อัห จังนะ 38 ทาเน ซะเทเฟน ลบ ไล อัห ฮุนเน วัล “ตัก อิง นัน โมเซด ก็ อุ เลิม เคิบ ปึง เอา เม แอ ตัก ตี แลง นัน เทวาดา ตัก มแบละ นัง ออ ตัก ญวัง ซีนาย ก็ อุ เลิม เคิบ นำ เทวาดา นัน ก็ ฟาก แญง เลาะ อน ตัก โมเซด เป็น แญง เลาะ ตี ซับรวง แอ รีด โมเซด ก็ ไล แญง เลาะ แญง แลม นัน อน ตัก แอ ตอ วัล ระ แอ กุญ ปัง เตา มานะ เน 39 แต เอา เม แอ ตัก อิง นัน อัห ไอ มี ญอม ปัง แญง โมเซด อัห พระ แอ็ม โมเซด อัห กึด ใน ใจ ซีรอก วัล อุ ตัก ปะเทด อียิบ วัล 40 อัห ก็ ไล อาโรน แอง ฮูบ พะ อน ออ ระ พะ นัน ซับรวง อัห เริล ตัก อียิบ วัล เพาะวา อัห เค็ย โมเซด ตัก ซับรวง อัห ทอก เจ็น อียิบ นัน งาล แอ็ม แลว 41 เจ็นนัน อัห ก็ ลด แอง ฮูบ งัว เป็น พะ คอง ออ อัห ก็ มเบิล ซะ ทวาย อน ตัก ฮูบ งัว นัน อัห ก็ ซะลอง นอย เลือง ซะ ตี อัห แอง เคิบ ที ออ ฮัก อิซราเอล ญาย 32:1-6 42 ทาเน เอาซาง ก็ เค็ห ซิห เคา พระ แอ็ม อัห นำ ก็ ปลอย ระ อัห ทือ ซีเม็ญ ตัก วาง นทึห ฮัก เลือง เน ก็ มอก อัห เคียน ระ ตัก นังซือ ลาม เอาซาง แลว คือเน ‘ครำ อิซราเอล เฮย แป อุ ตัก ทะเล ซาย ซีซิบ ปี นัน แป มเบิล ซะ ทวาย อน ตัก อีเอ บ็อห ไอ มี แป มเบิล อน ตัก เอิญ ดาย’ เอาซาง อัง 43 ‘แต แป วัล งโกง พาเต็น คอง พะโมเลก ฮัก แป ทือ ซีเม็ญ พะเรฟาน แป ทือ ฮูบ นัน ตัก แป แอง เคิบ ที ออ ฮัก แป แอง จังนัน เอิญ ก็ ต็อง มบรึห แป ปัด อุ ตัก เมือง บาบิโลน’ เอาซาง อัง เค็ย อัห อาโมด 5:25-27 44 ตัก อิง ญาม เอา เม แอ ควะ อุ ตัก ตี แลง นัน อัห ก็ มี พาเต็น คอง เอาซาง เป็น พญาน อัห แอง พาเต็น ฮุน เอาซาง ไล อน ตัก โมเซด นัน 45 อัห มี พาเต็น แลว โยซูวา ก็ ซับรวง อัห กุด ปะเทด คานาอัน อัห ก็ เอิด พาเต็น นัน เริล เลิม เคิบ ออ อัห เอิด ตี ซิก ครำ คานาอัน เอาซาง ก็ มบรึห ครำ คานาอัน ปัด แอ็ม ทาเน พาเต็น นัน ก็ ควะ อุ จำปอ โตะ ซะไม ดาวิด 46 เอาซาง แอง เลาะ ซิห ดาวิด ซีเละ นำ เค็ย ดาวิด เป็น ครำ เลาะ แต ญาม นำ ครอ อนุยาด แอง วิฮาน เลาะๆ อน ตัก เอาซาง เอาซาง ก็ ไอ มี ระ นำ แอง 47 เอาซาง ระ ซอลอมอน แอง วิฮาน คอง ออ นัน ฮัก 48 แต นังเลาะ แลว เอาซาง ตี แกะ ทีซุด นัน นำ ไอ มี อุ ตัก เจิง ตี ครำ แอ เน แอง เตาะ มอก ลาม เอาซาง เพีย ไล อน แลว คือเน 49 ‘งกีจ็อง จ็อก จังเน ตัก วาง นทึห ก็ เป็น ตี คุด คอง เอิญ แพนซิก นเซ็บ เป็น ตี เอิญ พระ เจ็ง แป แอง เจิง อน เอิญ อังวะ บ็อห แป ระ เอิญ มโบละ เคิง นเดย บ็อห 50 ซะ จู มบลึ ตัก โลก เน เอิญ ก็ แอง เคิบ ที ออ มด ฮัก ไอ แมน เออะ’ เอาซาง อัง” อิซยา 66:1-2 51 ทาเน ซะเทเฟน ก็ จ็อก วัล “โอ แป ครำ ลืน ครำ ดาน ครำ เกลิบ นโทล แป เกิ๊ด รวง ซีมาล เอาซาง ซีเละ แป นเจ็น เอิด จาง ตัก เอา เม ออ เจ็น ตัก อิง นัน เอา เม แป ตัก อิง นัน แอง จังนัก แป ก็ แอง จังนัน 52 มี ลาม เอาซาง ล็อง นเดย บ็อห ตี เอา เม แป ไอ มี กุญ คมเฮง นัน ไอ มี เตาะ แป วัล มเบิล แอ็ม ปึง ลาม ตัก เพีย ไล อัห ตัก อิง นัน ปึง ลาม เพีย ไล อัห เค็ย มี ครำ เลาะ โตะ แทะ วัล โตะ ครำ เลาะ นัน แลว แป ก็ ฮักลัง นำ วัล แป ก็ ซำ มเบิล แอ็ม นำ วัล 53 เทวาดา คอง เอาซาง ก็ อน กด เอาซาง ตัก แป แป ก็ ซำ ไอ มี ญอม ปัง กด นัน” ซะเทเฟน ไล อัห จังเน อิซยา 63:10 อัห มเบิล ซะเทเฟน 54 ญาม ปึง ซะพา เม็จ ซะเทเฟน จ็อก คือนะ อัห ก็ อ็อด แซ็ง ซีเละ อัห ก็ พ็อก เซิง ซิห นำ 55 แต ซะเทเฟน มี ซีมาล เอาซาง อุ เลิม ซีเละ นำ ก็ ง็อห มัด ดอม วาง ทึห นำ เม็จ เอาซาง ทาง อุ เซ็ล รับๆ นำ ก็ เม็จ เยซู ญ็อง อุ เพียห เลาะ คอง เอาซาง ฮัก 56 ซะเทเฟน ก็ จ็อก ฮุนเน “ดอม ทึห นัน กา เอิญ เม็จ วาง พลาง อุ นัน เอิญ ก็ เม็จ ล็อง นัน ตี เอาซาง ระ เกิด เป็น ครำ นัน ญ็อง อุ เพียห เลาะ คอง เอาซาง ฮัก” ซะเทเฟน อัง 57 ทาเน ปึง ซะพา เม็จ ซะเทเฟน จ็อก จังนะ อัห ก็ ไอ มี ปอใจ เตาะ อัห ก็ นเดิบ นโทล นซาก อุ อัห ก็ เล็ง โตะ รูบ เญ็บ ซะเทเฟน 58 อัห ก็ ท็อจ ลาก เอิด นำ เจ็น เมือง อัห ก็ เอิด เกียง กวาง นำ นดืม ซิห นำ ครำ ตี เป็น พญาน เม็จ อัห มเบิล ซะเทเฟน นัน อัห ก็ ฟาก โกบ ย็อห มบรูจ ระ ตัก เจ็ง ครำ นุม มี ล็อง ซือ ตัก เซาโล 59 เจ็นนัน อัห ก็ เอิด เกียง กวาง ซะเทเฟน ติกๆ ญาม อัห กำลัง เอิด เกียง กวาง ซะเทเฟน อุ นัน นำ ก็ ครอ วอน งกีจ็อง ฮุนเน “เยซู งกีจ็อง เฮย ครอ ระ มัห ฮับ เอิด ซีมาล เอิญ ดาย” นำ อัง 60 ซะเทเฟน ก็ คุกโคล งกรอ แร็งๆ เค็ย “งกีจ็อง เฮย ครอ เคิบ มัห อำ จบ ตอบติก ซิห อัห ตี แอง ไอ มี เลาะ เน ดาย” นำ อัง แลว นำ จ็อก ฮุนนะ แลว นำ ก็ ลด เปิล แอ็ม |
Global Partners
Global Partners