ตัวแทน 28 - Prai Bible

เปาโล อุ ตัก เกาะ มอลตา

¹ โตะ อิห ตัก ซะร็อห แลว ‍ ซัง อิห เม็จจึด เกาะ นัน เป็น เกาะ มอลตา ‍

² ครำ ตัก เกาะ นัน ‍ อัห ก็ เลาะ ซีเละ ‍ อัห ตึ อัง อิห ซีเละ ‍ เมียะ ก็ เล็ห ‍ เคด ก็ เคด ‍ อัห ก็ งคุม โอด อน อิห จืล วัล ‍

³ เปาโล ก็ โละ และ โอด กุญ มี มัด เน ‍ ซิห ตัก กวัห โอด ‍ ลอด มี มาล ปิด อุ ตัก มัด โอด นัน ‍ ยาก โอด เย็ห ก็ ทอก โตะ พ็อก ซิห ที เปาโล อุ แก็น ‍

⁴ ครำ ตัก อุ เกาะ นัน ‍ อัห เม็จ มาล มพล็อง อุ แก็น ตัก ที เปาโล ‍ อัห ก็ เค็ย นำ เป็น ครำ มเบิล ครำ วัล ‍ “อา ‍ เอา เน นำ มเบิล ครำ เด็ดคาด ‍ ปน นำ เจ็น นอก แลว ‍ ก็ ควะ มี เลือง มาล วัล ‍ ซะ ตัก ทึห ไอ มี ระ นำ รีด เตาะ” อัห อัง ‍

⁵ แต เปาโล ก็ นแจ็ด ซิห มาล ตัก กวัห โอด ‍ ไอ มี ซีวะ อัง เปาโล เตาะ ‍

⁶ แต ปึง อัห ก็ เพา ดอม อ็อญ จับ ปอง นำ ฮุ ‍ ปลุม กิล เปิล นำ ฮุ ‍ อิง อัห เพา ดอม นำ แลว ‍ ก็ ไอ มี ซีวะ อัง นำ ‍ อัห ก็ วัล กึด มี ยาง วัล ‍ อัห เค็ย “นำ เป็น ซะ ตัก ทึห วัล”

⁷ ทาเน ตัก เกาะ มอลตา นัน มี เจานาย มี ล็อง ซือ ตัก ปูลีอัด ‍ นำ มี ตี แซ ตี ซวน อุ ติๆ พานัน ‍ นำ ก็ มพอล อิห โตะ พัก ตัก เจิง ออ ‍ นำ ตอนฮับ อิห เลาะ ซีเละ ‍ นำ เลียง อิห แพะ งิ ‍

⁸ แต เอา คอง นำ ก็ โซะ เป็น คัด ลง มพุล อวย อุ ‍ เปาโล ก็ เริล ดอม นำ เม็จ นำ โซะ อุ ‍ เปาโล ก็ พระ ซิห ที ตัก นำ ‍ ลด ครอ วอน เอาซาง ระ นำ งาล โซะ ‍

⁹ ทาเน ครำ โซะ ตัก เกาะ นัน เม็จ เปาโล แอง คือนัน ‍ อัห ก็ เลอะ โตะ รักซา ตัก นำ ‍ อัห ก็ เลอะ งาล โซะ มด จู ล็อง ‍

¹⁰ ปึง อัห ก็ นับทือ อิห ซีเละ ‍ อัห ก็ จวย อิห ดก มบลึ ‍ ญาม เล็ห งิ อิห บัก และ ต็อก เฮือ เริล ออ นัน ‍ อัห ก็ อน ซะ ดก มบลึ ตี อิห ต็องกาน นัน ‍ อัห โตะ ซิห ระ ตัก เฮือ ฮัก

เปาโล โตะ ตัก เมือง โรม

¹¹ ทาเน ปน แอ็ม แพะ ซวัะ แลว ‍ อิห ก็ ต็อก เฮือ ตี โตะ เจ็น เมือง อเล็กซานเดีย ‍ เฮือ ลำ นัน อัห จอด ระ ตัก เกาะ นัน จำปอ ปน แอ็ม นาเคด ‍ กึ เฮือ นัน อัห แกะ ซะลัก เป็น ฮูบ พะ พางลาง ‍

¹² อิห ต็อก เฮือ ลำ นัน เริล ‍ อิห เล็ห ตัก เมือง ไซราคิว ‍ อิห ก็ ลด พัก อุ ตัก นัน แพะ งิ

¹³ เจ็นนัน อิห ก็ ต็อก เฮือ เริล ติกๆ ‍ อิห โคง เริล โตะ ตัก เมือง เรกีอูม ‍ คือ งิ กรัก งกริม ก็ นทูด โตะ เจ็น เซอะ ‍ อิห ต็อก เฮือ เริล เปียะ งิ ‍ ก็ โตะ ตัก เมือง โปทิโอลี ‍

¹⁴ ตัก เมือง โปทิโอลี นัน ‍ อิห ก็ เม็จ ปึง ควน นไจ ตัก ทือ เอาซาง ‍ อัห ก็ มพอล อิห พัก อุ เคิบ ออ ‍ อิห ก็ ลด พัก อุ เคิบ อัห เจ็ด งิ ‍ เจ็นนัน อิห ก็ เริล เมือง โรม งคม ‍

¹⁵ วาล ไอ ตัน เล็ห ตัก เมือง โรม นัน ‍ ปึง ควน นไจ ตัก เมือง โรม เม็จ คาว โตะ อิห ‍ อัห ก็ โตะ ราบ และ อิห ตัก ตลาด อับปีอัด แด ‍ ตัก งวัล โรงแรม แพะ ลัง นัน แด ‍ เปาโล เม็จ อัห โตะ และ ออ นำ ก็ เลาะใจ ‍ นำ ก็ คอบคุน เอาซาง ‍ นำ ก็ เฮง มี กำลัง ใจ เล็ห ติกๆ วัล

¹⁶ เจ็นนัน อิห ก็ กุด เริล ตัก เมือง โรม ‍ อิห โตะ ตัก เมือง โรม แลว ‍ ปึง ทฮาน ก็ ญอม ระ เปาโล พัก อุ ตัก เจิง มี ล็อง ฮัก ‍ อัห ก็ ระ ทฮาน เพา นำ อุ มี ล็อง เดียว

¹⁷ แพะ งิ เจ็นนัน วัล ‍ เปาโล ก็ มพอล ปึง ซะ แกะ ครำ ยิว โตะ พซุม นอย ‍ โตะ อัห มด แลว ‍ นำ ก็ ไล อัห ซือๆ คือเน “ควน นไจ เฮย ‍ ครอ ระ แป ปัง เอิญ วาล ดาย ‍ เอิญ ไอ มี แอง พิด ซีวะ ซิห ครำ ยิว แอ เน ‍ เป็น ปะเพนี เอา เม เครม แอ ก็ ตึก ‍ เอิญ ก็ ไอ มี แอง พิด เตาะ ‍ แต ครำ ยิว จบ เญ็บ เอิญ ตัก เมือง เยรูซาเล็ม กำนา ‍ อัห ก็ ลด มอบ เอิญ อน ตัก ครำ โรม เติล วัล ‍

¹⁸ ปึง เจานาย ก็ ที ซ็วน เอิญ แลว ‍ อัห ก็ ไอ มี เม็จ เอิญ แอง พิด ซีวะ ตี ซมควน เปิล ‍ อัห ก็ ซีรอก พระ แอ็ม เอิญ ‍

¹⁹ แต ครำ ยิว แอ เน ก็ ไอ มี ญอม ระ เจานาย พระ เอิญ ‍ เอิญ ก็ จำเป็น ครอ ระ พะเจายูฮัว ซีซา ตัดซิน ออ ฮัก ‍ แต ไอ แมน เอิญ มี เลือง ซีรอก พอง ครำ กรอก ออ ดาย ‍

²⁰ ตี เอิญ มพอล แป โตะ งิ นะ เน ‍ ก็ เป็น ตัก เอิญ ซีรอก ไล เลือง เน อน ตัก แป ‍ ตี อัห เอิด โซ ท็อก เอิญ เน ก็ เป็น ตัก เอิญ เจือ ล็อง นัน ตี ครำ อิซราเอล แอ วาง เพา อุ นัน” เปาโล อัง เค็ย อัห ‍ ตัวแทน 25:11

²¹ แลว เปาโล จ็อก ออ แลว ‍ อัห ก็ ซวัล นำ คือเน “อิห ไอ มี เม็จ คาว ซีวะ เลือง มัห ดาย ‍ อิห ไอ มี กุญ จดมาย เลือง มัห เจ็น จังวัด ยูเดีย ‍ ไอ มี ควน นไจ ล็อง นเดย โป ราย ซิห มัห ‍

²² แต อิห เน ซีรอก ปัง กำกึด มัห วาล ดาย ‍ อิห ซีรอก เม็จจึด เค็ย ‍ แป กิว เจือ ซีวะ นังเลาะ ‍ เพาะวา อิห เม็จจึด แลว ‍ ครำ ตี เจือ มอก แป เน ก็ มี ครำ เซาะ ครำ โป ปึง แป มด จู ตี” ครำ ยิว ไล เปาโล ฮุนเน

²³ เจ็นนัน อัห ก็ นัด พซุม นอย แมะ วัล มี ลบ ‍ อัห เพีย ไล อน งิ พซุม ตัก เปาโล ‍ เล็ห งิ นัน แลว ‍ อัห ก็ เลอะ โตะ พซุม นอย เคิบ เปาโล ตัก ฮ็อง คอง นำ ‍ นำ ก็ ไล แญง เอาซาง อน ตัก อัห มด งิ ‍ เจ็น งกร็อห จำ แจ็ล ‍ นำ ไล เลือง เอาซาง โตะ ปกคอง โลก ‍ นำ เอิด นังซือ กด โมเซด เคิบ นังซือ ลาม เอาซาง ไท ไล อน ตัก อัห ‍ นำ ก็ เซียงตี ซับรวง อัห เจือ เยซู ‍

²⁴ มี มบรัห ปัง แลว ก็ เจือ ‍ มี มบรัห ก็ ไอ มี ญอม เจือ เตาะ ‍

^25-29 เปาโล ก็ ไล อัห เป็น แญง ซุดทาย วัล ฮุนเน “แป เน ก็ แอง ลืน แอง ดาน มอก เอาซาง ไล อน เจ็น อิง นัน ซีเละ ‍ ตัก อิง ซีมาล เอาซาง ไล อิซยา จ็อก เคิบ เอาจ็อง แอ จังเน ‘มัห เริล ไล ครำ กรอก อิซราเอล เน ดาย ‍ มัห ต็อง ไล อัห จังเน ‍ แป เม็จ เคิบ มัด เคิบ มุห ออ แลว ‍ แป เม็จ เคิบ นโทล ออ แลว ‍ แต แป ก็ ไอ มี เคาใจ ซีวะ ซัก มี ติด ‍ แป วาง ดอม จังนัก ก็ ตึก ‍ แป ก็ ไอ มี เม็จ แป ไอ มี เจือ ‍ ก็ เพาะวา กรอก แป เน แร็ง ลืน แร็ง ดาน ฮาย ‍ นโทล ก็ เกลิบ ‍ มัด ก็ ญิบ ‍ กัน ไอ ปานัน มัด ก็ ดอม ตาด ‍ นโทล ก็ เม็จ แญง ‍ ใจ ก็ เคาใจ เลาะ ‍ แป ก็ วัล โตะ และ เอิญ ‍ เอิญ ก็ รักซา แป ระ เลาะ เล็ห ‍ แต แป ไอ มี ญอม แอ็ม เตาะ’ ‍ ซีมาล เอาซาง ไล จังนะ  ‍ อิซยา 6:9-10 เจ็นเน ก็ ครอ ระ แป เคาใจ เลาะๆ ดาย ‍ เอาซาง ก็ ระ กรอก ซอ กุญ ปน แอ็ม เจ็น ลุห แลว ‍ อัห ก็ ปัง เลาะ” เปาโล อัง แลว เปาโล ไล อัห คือนะ แลว ‍ ปึง ครำ ยิว ก็ เทียง นอย ออ ฮัก ‍ อัห ก็ ลด เลิม วัล แอ็ม

³⁰ เปาโล ก็ พัก อุ ตัก เจิง ตี นำ เจา เอิด นัน เปียะ วาง ‍ จู ล็อง ตี โตะ แอว และ นำ ‍ นำ ก็ ตอนฮับ อัห เลาะ ซีเละ ‍

³¹ นำ ก็ ไล เลือง เอาซาง อน ตัก อัห ‍ นำ ไล เลือง เอาซาง โตะ ปกคอง โลก เคิบ เลือง เยซู คริด งกี คอง แอ นัน ‍ นำ ฮาน จ็อก ซีเละ ‍ ไอ มี นำ นเจิก อัง ซีเอ ‍ ไอ มี ซีเอ มบราง นำ เตาะ