ตัวแทน 24 - Prai Bibleอัห โตะ พอง เปาโล ตัก เฟลิก 1 เปาโล อุ ตัก เมือง ซีซารียา ฮา งิ แลว ก็ โตะ ซะ แกะ ครำ ยิว เจ็น เมือง เยรูซาเล็ม อัห โตะ พอง เปาโล ตัก เมือง ซีซารียา นัน อานาเนีย ตัก เป็น มอ เอาซาง จ็อง ก็ โตะ เลิม เคิบ ปึง ซะ แกะ นัน เทอทูลัด ตัก เป็น ทนายความ ก็ โตะ เลิม ปึง อัห เนๆ โตะ พอง เปาโล ตัก พูวา เฟลิก 2-3 โตะ อัห มด แลว ปึง พูวา เฟลิก ก็ ไล อัห เริล เอิด เปาโล ซับ ตัก ออ โตะ เปาโล ตัก ฮ็อง พซุม แลว เทอทูลัด ก็ ตัง เกา พอง เปาโล คือเน “ซาทุ พูวา เฟลิก เฮย อิห อุ เลาะ อุ ซุก จู งิ เน ก็ ญอน มัห เน ฮัก นอ มัห พัดทะนา กรอก อิห เลาะ ซีเละ เมือง อิห พัดทะนา เลาะ เล็ห จู มบลึ เน ก็ ญอน มัห ฮัก อิห ก็ ญอม ฮับ มัห เน เลาะ ซีเละ อิห ก็ คอบคุน มัห ดกๆ ดาย 4 แต เอิญ ไอ มี ซีรอก ระ มัห เซีย เวลา ดก เตาะ เอิญ ครอ ระ มัห ปัง แญง เอิญ ตีดต็อง วาล ดาย 5 อิห เม็จ เอา ล็อง เน แอง ไอ มี เลาะ เตาะ ดุ นำ กวา โละ ซุย ครำ ยิว นำ แอง นเซอะ ครำ ยิว เลอะ ญุง มด จู ตี นำ มี ล็อง เดียว เน เป็น ฮัวนา ปึง อัห ตี เจือ แบบ นาซาเร็ด นัน 6 งิ นาน นำ บัก และ แอง นเซอะ วิฮาน อิห เน เซีย แอ็ม อิห ก็ ลด เญ็บ นำ ระ อน 8 กัน มัห ที ซ็วน นำ มัห ก็ เม็จ ดาย อิห โตะ พอง นำ ตัก มัห เน แคระ ลู ไอ มี แคระ มัห ก็ เม็จ มด ฮัก” เทอทูลัด ไล พูวา จังนะ 9 ทาเน ปึง ครำ ยิว ตัก โตะ เลิม นัน อัห ก็ เลอะ ไล มอก นัน เมือนนอย มด อัห เค็ย เปาโล กิว แอง มอก เทอทูลัด เค็ย นัน เปาโล แก คะดี ออ ตัก พูวา เฟลิก 10 เจ็นนัน พูวา ก็ ระ เปาโล จ็อก ออ เปาโล ก็ ไล พูวา คือเน “เอิญ เม็จจึด มัห เน เป็น เจาเมือง ตัดซิน ปะเทด อิห ดก วาง แลว มานะ เน เอิญ ก็ เลาะใจ ตี เอิญ กุญ แก คะดี ออ เคิง ซาน มัห เน 11 เลือง เอิญ ก็ จังเน ดาย งิ นาน เอิญ เริล ไว เอาซาง ตัก เมือง เยรูซาเล็ม ไอ มี ตัน ทึง ซิบซอง งิ ตัน กัน มัห ซงไซ ซีวะ มัห ซ็วน ปึง อัห เน ก็ กุญ มัห ก็ เม็จ ดาย 12 งิ นาน อัห โตะ เม็จ เอิญ ตัก วิฮาน เอาซาง เอิญ ไอ มี แอง พิด ซีวะ อัห ไอ มี เม็จ เอิญ เทียง เคิบ อีเอ ตัก ฮ็อง พซุม ครำ ยิว ก็ ตึก ตัก ใน เมือง ก็ ตึก เอิญ ก็ ไอ มี กุญ ซุย ระ พซาซน แอง ญุง ซีวะ 13 ตี อัห จบ โตด เอิญ แอง ซะเน ซะนัน ก็ ไอ มี กิว อัห เม็จ เอิญ แอง ลุห ซีวะ 14 แต เอิญ ญอม ฮับ มี เลือง เดียว เน ตัก มัด มัห เป็น เลือง ตี เอิญ ญอม ฮับ เค็ย เอิญ ทือ เอาซาง แบบ เยซู ตี อัห เค็ย ไอ มี แคระ นัน เอิญ ญอม ฮับ มี เลือง เดียว เน เลือง ซอ เอิญ ก็ เจือ มอก ครำ ตี โตะ พอง เอิญ เน เอิญ ทือ งกีจ็อง มอก เอาจ็อง เมจ็อง อิห ตัก อิง นัน นังซือ กด เอาซาง เคิบ นังซือ ลาม เอาซาง เครม ตี อัห เคียน ระ อน นัน เอิญ ก็ เจือ มด 15 เลือง แอ รีด เล็ห วัล บัดนะ เอิญ ก็ เจือ มอก อัห นัน เอิญ แก็นใจ เจือ เค็ย เอาซาง กิว ระ แอ มด จู ล็อง รีด เล็ห วัล บัดนะ ตึง ครำ เลาะ ตึง ครำ ไอ มี เลาะ ก็ รีด เล็ห วัล มด บัดนะ 16 ญอน เอิญ เจือ เค็ย เอาซาง ระ แอ รีด เล็ห วัล นัน เอิญ ก็ ลด เซียงตี แอง เลาะ แอง ซือ เคิบ เอาซาง เอิญ ก็ เซียงตี แอง เลาะ เคิบ มัด ครำ วัล เอิญ ไอ มี กุญ แอง ลุห ซีวะ มอก อัห เค็ย นัน 17 ดก วาง แลว เอิญ ไอ มี กุญ โตะ ตัก เมือง เยรูซาเล็ม เน นอ แต งิ นาน เอิญ ก็ ลบ วัล โตะ เอิญ โตะ ซับ เงิน ตี อัห จวย นัน อน ตัก ครำ ยิว อิห เน เงิน นัน ซำรับ จวย ครำ ตุก ครำ ญาก แลว เอิญ ก็ โตะ ทวาย ซะ อน ตัก เอาซาง วัล 18 ญาม เอิญ ทวาย ซะ นัน ครำ ยิว ก็ เม็จ เอิญ ตัก วิฮาน นัน แต ญาม นัน เอิญ แอง พิที ระ นัง ออ เลาะ ตาม กด เอาซาง มด แลว ญาม นัน ก็ ไอ มี ดก ครำ อุ เลิม เคิบ เอิญ ซัง เอิญ ไอ มี จบ กุญ แอง ญุง ซีวะ เตาะ เอิญ แอง ตาม ระเบียบ ครำ ยิว มด แต ครำ ยิว นัน อัห จบ โตะ เญ็บ เอิญ ฮัก 19 นังเลาะ แลว ครำ ตี และ เลือง เอิญ นัน เก็ย จบ แมน ปึง เน ซัง เป็น ครำ ยิว ตี โตะ เจ็น จังวัด เอเซีย ฮัก ตี โตะ และ เลือง เอิญ งิ นาน ดาย กัน ปึง นัน มี เลือง ซีรอก พอง เอิญ อัห โตะ พอง เอิญ ตัก มัห เน ฮัก ซัง แคระ ดาย 20 งิ นาน ปึง ซะพา ตัก เมือง เยรูซาเล็ม ก็ ซอบซวน เอิญ แลว อัห ไอ มี เม็จ เอิญ แอง พิด ซีวะ มานะ เน เอิญ ญ็อง อุ ตัก มัด มัห เน แลว กัน มัห ซีรอก เม็จ ก็ ครอ ระ มัห ซ็วน อ็อญ ปึง เน ตี โตะ พอง เอิญ เน ดาย อัห ไล อน ตัก มัห ก็ กุญ 21 จับ อัห ซีรอก พอง เอิญ เลือง ตี เอิญ เจือ เค็ย แอ เปิล แลว ลบ วัล รีด เล็ห วัล อัห ซีรอก พอง เอิญ เลือง นัน ฮุ งิ นาน ตัก พซุม ซะพา เอิญ ก็ ร็อห จ็อก แร็งๆ เคิบ มัด อัห แลว เอิญ ไล อัห ฮุนเน ‘ตี แป พอง เอิญ งิ นะ เน ก็ เป็น ตัก เอิญ เจือ เค็ย แอ เปิล ลบ วัล รีด เล็ห วัล’ เอิญ ไล อัห จังนะ แลว อัห ซีรอก พอง เอิญ เลือง เน ฮุ” เปาโล อัง ตัวแทน 21:17-28, ตัวแทน 23:6 เปาโล ควะ อุ ตัก ลุก 22 ทาเน พูวา เฟลิก เน นำ ก็ เม็จจึด เลือง เยซู เลาะ แลว นำ ก็ ลด เคาใจ เค็ย ครำ ยิว พอง เปาโล นัน ไอ มี แคระ นำ ก็ ไอ มี งเคาะ ตัดซิน เปาโล เตาะ นำ อง เพา โตะ นายพัน ลีเซียด วาล ซัง นำ กอย ตัดซิน เปาโล วัล 23 เฟลิก ก็ ลด ไล นายรอย เพา เปาโล นำ ไอ มี ปอ ไล อัห คุม เปาโล ปานเดย เตาะ อัห ระ เปาโล โละ เริล ออ ก็ กุญ อัห ระ เปือน นำ โตะ แอว และ นำ ก็ กุญ นำ จำเป็น มี ซีวะ อัห ซับ อน ตัก นำ ก็ กุญ 24 ดก งิ เจ็นนัน วัล เฟลิก ก็ ลบ วัล โตะ เคิบ ยัห ออ ยัห นำ ซือ ตัก ดรูซิลลา นำ เป็น ครำ ยิว ปาม ก็ ไล อัห ซับ เปาโล โตะ และ ออ ปาม ซีรอก ปัง เปาโล เลามุน เลือง เจือ เยซู คริด นัน แอ เจือ จังนัก แด 25 ทาเน เปาโล ก็ โตะ เลามุน เคิบ เฟลิก เปาโล เลามุน เลือง แอง เลาะ แอง ซือ เคิบ เอาซาง เลือง ควบคุม นัง ออ เลาะ เลือง เอาซาง โตะ ตัดซิน ครำ แอ บัดนะ เปาโล กำลัง เลามุน เลือง เนๆ เฟลิก ก็ ญ็อก งโกรด ตับ งโกรด แซ็ง มด นำ ก็ ลด ไล เปาโล เค็ย ปอ ปานะ วาล กัน นำ รวง ญาม นเดย วัล นำ อง ไล เปาโล โตะ และ ออ วัล 26 แต นังเลาะ แลว เฟลิก เน นำ ซีรอก กุญ เงิน ซินบน ตัก เปาโล นำ ก็ ลด มพอล เปาโล โตะ เลามุน เคิบ ออ มันๆ 27 ทาเน เปาโล อุ ตัก ลุก นัน ติกๆ เฟลิก ก็ ไอ มี ญอม ระ เปาโล ทอก เจ็น ลุก เตาะ นำ ซีรอก กุญ ใจ ครำ ยิว นำ ก็ ลด เติล ระ เปาโล ติกๆ เปาโล อุ ตัก ลุก นัน เปียะ วาง แลว ก็ โตะ พูวา ล็อง แมะ ซือ นำ ตัก ปอซีอัด เฟทัด นำ เป็น พูวา แตน เฟลิก นัน |
Global Partners
Global Partners