ตัวแทน 21 - Prai Bibleเปาโล พอม เริล เยรูซาเล็ม 1 แลว อิห พระ นอย ตัก มีเลทัด นัน แลว อิห ก็ เริล ออ อิห ต็อก เฮือ เริล ซือๆ เจ็น เมือง มีเลทัด พด เล็ห ตัก เกาะ โคด อิห ต็อก เฮือ เริล มี งิ วัล ก็ เล็ห ตัก เมือง โรด เจ็นนัน ก็ อิห เริล เมือง ปาทารา วัล 2 เล็ห ตัก เมือง ปาทารา แลว อิห ก็ เม็จ เฮือ มี ลำ วัล เฮือ ลำ นัน บัก และ เริล จังวัด ฟีนีเซีย อิห ก็ ลด ต็อก เฮือ ลำ นัน เริล 3 เจ็นนัน อิห ก็ เม็จ เกาะ ไซปรัด อิห ก็ เว็น เกาะ นัน เริล ลัห เซอะ อิห ต็อก เฮือ เริล ติกๆ จำปอ โตะ ตัก จังวัด ซีเรีย อิห เล็ห ตัก เมือง ไทระ ตัก จังวัด ซีเรีย นัน อิห เล็ห ตัก นัน แลว อัห ก็ จอด เฮือ มพลิห ซะ ตัก อัห ตาง นัน 4 อิห ก็ ลด แวด แอว และ ครำ ตี เจือ เยซู ตัก อุ เมือง ไทระ นัน อิห ลด พัก อุ เคิบ อัห เจ็ด งิ ญาม อิห ควะ อุ ตัก นัน ซีมาล เอาซาง ก็ จำใจ ปึง ตี เจือ เยซู ตัก นัน มบราง เปาโล เริล เมือง เยรูซาเล็ม 5 แลว ปน เจ็ด งิ แลว ปึง อิห ก็ และ เริล ออ ปึง ควน นไจ ตัก เมือง ไทระ มด ตึง คล็อง ตึง ยัห ตึง ควัน อัห ก็ เลอะ ซับ ซง อิห ตัก เปล นอก เซ็บ เล็ห ตัก เปล นอก ปา ดอน ซาย นัน แลว อิห ก็ ลด คุกโคล ครอ วอน เอาซาง เป็น ปึง ตัก นัน 6 เจ็นนัน อิห ก็ ลด พระ อัห ตัก นัน อิห ก็ ต็อก เฮือ เริล ออ อัห ก็ วัล เจิง ออ 7 อิห ต็อก เฮือ เริล เจ็น เมือง ไทระ นัน พด เล็ห ตัก เมือง ทอเลเมอิด อิห ก็ ลด แวด แอว ปึง ควน ปึง นไจ ตัก เมือง ทอเลเมอิด นัน อิห ลด พัก อุ เคิบ อัห มี งิ เคิบ มี แจ็ล 8 ฮุน งิ กรัก วัล อิห ก็ ต็อก เฮือ เริล เมือง ซีซารียา ตัก เมือง ซีซารียา นัน อิห ก็ พัก อุ ตัก เจิง ฟีลิบ ฟีลิบ เน เป็น ครำ ไล คาว เลาะ คาว แลม คอง เยซู อน ตัก อัห นำ เป็น ครำ ใน ปึง เจ็ด ล็อง นัน ตี อัห เลือก เอิด จวย แจก ซะ กำนา ตัก เมือง เยรูซาเล็ม นัน 9 นำ มี ควัน มอน ซี ล็อง ควัน คอง นำ ไอ มี ตัน เอิด คล็อง ซัก มี ล็อง เตาะ อัห เป็น ลาม เอาซาง มด ตึง ซี ล็อง นัน 10 อิห พัก อุ เคิบ นำ ดก งิ ญาม อิห ควะ พัก อุ ตัก เจิง ฟีลิบ นัน ก็ โตะ อัหคล็อง มี ล็อง ซือ อากาบัด นำ เป็น ลาม เอาซาง นำ โตะ เจ็น จังวัด ยูเดีย งคม 11 อากาบัด เน ก็ โตะ เอิด ทาล เครด คอง เปาโล ท็อก ที ท็อก เจ็ง ออ นำ ก็ ลด จ็อก ฮุนเน วัล “ซีมาล เอาซาง ก็ เพีย ไล อน เค็ย ครำ ยิว ตัก เมือง เยรูซาเล็ม อัห ก็ เญ็บ งกี ทารเครด เน อัห ท็อก งกี ทารเครด เน ดาย เจ็นนัน ครำ ยิว ก็ มอบ งกี ทารเครด เน อน ตัก ครำ กรอก ซอ วัล” อากาบัด ไล อัห จังนะ ตัวแทน 11:28 12 ญาม ปึง อิห เม็จ อากาบัด ไล ฮุนนะ แลว อิห เคิบ ปึง ควน นไจ ตัก อุ เมือง ซีซารียา นัน อิห มด ปึง นัน ก็ ไอ มี ซีรอก ระ เปาโล ก็อห เริล เมือง เยรูซาเล็ม เตาะ อิห ก็ เลอะ ครอ เคิบ เปาโล เค็ย “ครอ เคิบ มัห อำ มัห เริล เตาะ ดาย” อิห อัง 13 เปาโล ก็ ซวัล อิห ฮุนเน “แป แอง ซีวะ จังเน แป เญ็ม ฮุนเน ก็ แป แอง ระ เอิญ ตุกใจ นาย แอ็ม ใจ วัล แอ็ห เอิญ ไอ มี เปียน ใจ เตาะ เอิญ ต็อง เริล เมือง เยรูซาเล็ม ติก ดาย อัห แอง จังนัก ซิห เอิญ ตัก นัน ก็ ตาม แต เตาะ เอิญ พอม ระ อัห ท็อก เอิญ เอิญ พอม ระ อัห มเบิล แอ็ม เอิญ ดาย อัห เติล ลุก เอิญ ก็ ตาม แต เตาะ เอิญ พอม อด เอิด กุญ ก็ เพือ เยซู คริด งกีจ็อง นัน” เปาโล อัง 14 ทาเน เปาโล ไอ มี ปัง อิห อิห ก็ เค็ย แลว แต งกีจ็อง ซับรวง นำ ฮัก อิห ก็ ครอ ระ เอาซาง แอง ตาม ใจ ออ ฮัก เปาโล เริล เมือง เยรูซาเล็ม 15-16 เจ็นนัน อิห ก็ เพีย เตียม นัง ออ ลด เริล เมือง เยรูซาเล็ม ครำ ตี เจือ เยซู ตัก เมือง ซีซารียา นัน ก็ เริล เลิม เคิบ อิห แด ญาม อิห เล็ห ตัก เมือง เยรูซาเล็ม งคม แลว อัห ก็ ซับรวง อิห เริล เจิง มนาซัน มนาซัน เน เป็น ครำ เกาะ ไซปรัด นำ เจือ เยซู เจ็น ตัก อิง นำ เป็น ครำ เจือ เยซู จูบ แรก นัน เปาโล เคิบ ยากอบ เคิบ ซะ แกะ เมือง เยรูซาเล็ม พซุม นอย 17 อิห โตะ ตัก เจิง มนาซัน แลว ปึง ควน นไจ ตัก นัน ก็ ตอนฮับ อิห เลาะ ซีเละ 18 ปัห ซะ ฮุน งิ กรัก อิห ก็ เริล แอว และ ยากอบ ปึง อัหแกะ ตี ซับรวง คริซจัก ก็ อุ ตัก นัน เลิม 19 ทาเน เปาโล ก็ ไท เลามุน เลือง ตี นำ เริล ไล ครำ กรอก ซอ กำนา นัน นำ ไท ไล อน ตัก ยากอบ เคิบ เปือน นำ ปัง เอาซาง จวย นำ แอง ซีวะ ญาม นัน นำ ก็ ไท ไล อน ตัก อัห ปัง มด 20 แลว อัห เม็จ เปาโล เลามุน คือนะ แลว อัห ก็ เลอะ ลือ เอาซาง เจ็นนัน ยากอบ ก็ ลด ไล เปาโล คือเน “นไจ เฮย มัห ก็ เม็จ แลว นอ ครำ ยิว เป็น พันๆ ล็อง อัห ก็ เจือ เยซู แลว แต อัห ควะ ทือ กด โมเซด เน็ด ซีเละ อัห มี ปันฮา เคิบ มัห มี ติด ดาย 21 ปึง ครำ ยิว นัน อัห เม็จ มี ครำ เซาะ มัห อัห เค็ย มัห ไล ครำ ยิว ตัก อุ ปะเทด ซอ นัน พระ แอ็ม กด โมเซด อัห เค็ย มัห มบราง ปึง ควัน อัหคล็อง คอง อัห แอง พิที ซุนัด อัห เค็ย มัห ไอ มี ระ ครำ ยิว แอง มอก เครม ตี อัห เกย ทือ เจ็น ตัก อิง ตัก นา นัน” ยากอบ ไล เปาโล คือนะ 22 เจ็นนัน ยากอบ ก็ ลบ ไล เปาโล ฮุนเน วัล “เลือง อัห เซาะ มัห นัน แอ แอง จังนัก เลาะ บ็อห มานะ เน มัห ก็ โตะ ตัก เยรูซาเล็ม เน แลว นอ ครำ ตี เซาะ มัห นัน อัห ก็ ต็อง เม็จ คาว เค็ย มัห โตะ ตัก เน แลว ดุห 23 กัน จังนะ ก็ ครอ แอง ตาม แญง อิห ไล อน เน ดาย มัห ต็อง แอง พิที มี มบลึ เลิม เคิบ ครำ ยิว ดาย มานะ เน มี ครำ ยิว ตี เจือ เยซู ซี ล็อง อุ เคิบ อิห เน อัห ตึง ซี ล็อง เน บน ระ นัง ออ ตัก เอาซาง แลว 24 ครอ ระ มัห เริล แอง พิที ระ นัง ออ เลาะ ตาม กด โมเซด นัน ก็ เลาะ มัห แอง เลิม เคิบ ครำ ยิว ซี ล็อง นะ ดาย กัน อัห คิด ญิม ซีวะ มัห ก็ ต็อห อน ตัก อัห มด ดาย แลว มัห ต็อห ญิม แลว ก็ ระ อัห โกน กึ ตาม ฮีด ออ กุญ กัน มัห แอง คือนัน แลว อัห ก็ เม็จจึด เค็ย มัห ไอ มี กิว พระ กด โมเซด เตาะ อัห ก็ ไอ มี ซงไซ มัห ไอ มี โป มัห วัล เตาะ 25 แต เลือง ครำ กรอก ซอ ตี ไอ แมน ครำ ยิว ตี เจือ เยซู แลว นัน อิห ก็ เคียน จดมาย ไล อัห แลว เค็ย ไอ มี จำเป็น ทือ กด โมเซด มด เตาะ แต อิห ไล อัห ซี มบลึ อำ ป็อง เซ็จ ตี อัห มเบิล เลียง ฮูบ อำ ป็อง เมียม อำ ป็อง ซัด ตี อัห มพล็อง ต็อล อำ ปิล จู อิห ไล อัห เตานะ ไอ มี อิห เพิม แญง ซอ เตาะ” ยากอบ เคิบ ปึง อัหแกะ ตี ซับรวง คริซจัก ไล เปาโล คือนะ ตัวแทน 15:29 26 ทาเน เปาโล ก็ แอง ฮุน อัห ไล อน นัน ปัห ซะ เปาโล ก็ เอิด ปึง ซี ล็อง นัน เริล เลิม อัห ก็ แอง พิที ระ นัง ออ เลาะ ฮุน กด โมเซด ไล อน แลว ปึง อัห แอง ระ นัง ออ เลาะ ตาม กด แลว ปึง อัห ก็ ลด เริล ตัก วิฮาน เอาซาง เปาโล ก็ เพีย ไล มอ เอาซาง ระ เม็จจึด เค็ย งิ นเดย จบ อัห แอง พิที ระ นัง ออ เลาะ ตาม กด แลว อัห ตึง ซี ล็อง นัน ต็อง มเบิล ซะ ทวาย อน ตัก เอาซาง วัล อัห เญ็บ เปาโล ตัก วิฮาน เอาซาง 27 เปาโล แอง พิที นัน บัก และ ครบ เจ็ด งิ แลว นำ ก็ เริล ตัก วิฮาน เอาซาง วัล ทาเน ก็ มี ครำ ยิว โตะ เจ็น จังวัด เอเซีย อัห โตะ ตัก วิฮาน เอาซาง วัล อัห ปัก เม็จ เปาโล อุ ควังใน วิฮาน นัน อัห ก็ ซุย ระ พซาซน บวน นอย มด ลด เญ็บ เปาโล 28 ปึง ยิว นัน อัห ก็ นซาก งกรอ คือเน “ครำ อิซราเอล เฮย แอ จวย นอย โตะ เญ็บ ล็อง เน เนอ ล็อง เนๆ ตี กวา โละ ไล พซาซน ไอ มี เลาะ นัน นำ กวา โละ เซาะ ครำ ยิว แอ เน ทัว มด แลว นำ ก็ โป เค็ย กด เอาซาง ไอ มี เลาะ นำ ก็ กวา โละ ไล อัห เค็ย วิฮาน เน ไอ มี เลาะ มานะ เน นำ ก็ ซำ มพอล ครำ กรอก ซอ ตัก ไอ แมน ครำ ยิว กุด วิฮาน เอาซาง เน วัล นำ แอง ระ ตี ซักซิด คอง เอาซาง เน เซีย แอ็ม มด” อัห อัง 29 ปึง ยิว เน อัห อ็อด อัง เปาโล ซีเละ อัห เยา เปาโล มพอล ครำ กรอก ซอ กุด วิฮาน เอาซาง วาล นัน อัห เม็จ โตฟีมัด ครำ เมือง เอเฟซัด อุ เลิม เคิบ เปาโล ใน เมือง โตฟีมัด เป็น ครำ กรอก ซอ ไอ แมน ครำ ยิว อัห ก็ เยา เปาโล เน มพอล โตฟีมัด ตัก เป็น ครำ กรอก ซอ นัน กุด วิฮาน เอาซาง เลิม เคิบ ออ อัห ก็ จบ อ็อด อัง เปาโล 30 ทาเน แลว อัห นซาก งกรอ ครำ อิซราเอล จวย เญ็บ เปาโล แลว อัห ก็ เล็ง รูบ โตะ เญ็บ เปาโล เป็น ปึง อัห ก็ ลาก ซับ นำ ทอก เจ็น วิฮาน แลว อัห ลาก นำ ทอก แลว อัห ก็ เติล แอ็ม ปะตู วิฮาน 31 อัห บัก และ มเบิล แอ็ม เปาโล ทาเน ก็ มี ครำ เริล ไล นายพัน ทฮาน เค็ย ครำ เยรูซาเล็ม เลอะ บวน นอย ทัว เมือง มด 32 นายพัน เม็จ คาว แลว นำ ก็ ลด เอิด นายรอย แด เอิด พน ทฮาน แด เล็ง โตะ ดอม อ็อญ ปึง ยิว เม็จ โตะ ทฮาน แลว อัห ก็ ลด ญัง ออ อัห ไอ มี คัล เปาโล วัล เตาะ 33 นายพัน ก็ เญ็บ เปาโล ระ อัห เอิด โซ เปียะ เซ็น ท็อก ระ นำ วาล นำ ก็ ลด ซ็วน ครำ ตัก คัล เปาโล นัน “นำ เป็น อีเอ เน นำ แอง พิด ซีวะ บ็อห” นายพัน อัง เค็ย อัห 34 ทาเน ก็ ดก ครำ อุ ตัก นัน มี มบรัห ก็ จ็อก คือเน มี มบรัห ก็ จ็อก คือนัน ญุง ซีเละ นายพัน ก็ ไอ มี เม็จจึด เป็น คิ ซีวะ ซีเละ นำ ก็ ลด ไล ทฮาน เอิด เปาโล ซับ ระ ตัก คาย วาล แลว กอย ซอบซวน นำ ตัก นัน วัล 35 ญาม อัห ซับ เปาโล โตะ เคิด ม็อล คาย นัน ก็ แร็ง ดก ครำ และ มเบิล นำ ทฮาน ก็ จำเป็น ปะ นำ เริล 36 ปึง นัน ตัก เคริบ แทะ ลอล ปึง ทฮาน นัน อัห ก็ นซาก งกรอ เค็ย “มเบิล แอ็ม นำ ดาย มเบิล แอ็ม นำ ดาย” อัห อัง เปาโล จ็อก เคิบ ปึง พซาซน 37 เจ็นนัน ปึง ทฮาน ก็ บัก และ ซับ เปาโล กุด ควังใน คาย แต เปาโล ไล นายพัน คือเน “เอิญ ครอ จ็อก เคิบ มัห วาล มี ติด กุญ อัน” นำ อัง นายพัน ก็ ซ็วน นำ “เออ มัห จ็อก แญง กรีก ก็ กุญ นอ 38 เออ เอิญ เยา มัห เป็น ครำ อียิบ ล็อง นัน กำนา ตัก แอง ระ ครำ ใน เมือง เลอะ บวน นอย มเบิล นอย นัน นำ ซับรวง พัก คาตะกอน ซี พัน ล็อง เริล อุ ซะร็อห ตัก ตี แลง นัน เอิญ เยา เป็น มัห เน” นายพัน อัง 39 เปาโล ก็ ซวัล นำ คือเน “เอิญ ไอ แมน ล็อง นัน ดาย เอิญ เป็น ครำ ยิว ฮัก เอิญ เกิด ตัก เมือง ทาซัด จังวัด ซีลีเซีย เอิญ เป็น ครำ เมือง จ็อง ดาย เอิญ ไอ แมน ล็อง นัน เตาะ เอิญ ครอ จ็อก เคิบ ปึง พซาซน เน วาล ดาย” เปาโล อัง 40 นายพัน ก็ ระ เปาโล จ็อก เคิบ อัห เปาโล ก็ ญ็อง ตัก ม็อล นำ ญ็อก ซิห ที ตัก ปึง อัห นัน อัห ก็ เค็ด อุ เจ็นนัน นำ ก็ จ็อก แญง ฮีบรู ซิห อัห |
Global Partners
Global Partners