2 ทิโมที 1 - Prai Bibleเปาโล ทักทาย ทิโมที 1 เอิญ เปาโล ดาย เอิญ เป็น ตัวแทน เยซู คริด เป็น เอาซาง ฮัก ระ เอิญ เป็น ตัวแทน ออ ดาย นำ ก็ ระ เอิญ เน เริล ไล อัห เลือง ตี เอาซาง ซันญา ระ แอ รีด ญอน เยซู คริด ฮัก 2 ทิโมที เฮย จดมาย เน เอิญ เคียน อน ตัก มัห ดาย ควัน มัห เป็น ควัน ตี เอิญ รัก ซีเละ ครอ ระ เอาซาง ตัก เป็น เอา เคิบ เยซู คริด ตัก เป็น งกี คอง แอ ใจ ดัว แอง เลาะ ซิห มัห ครอ ระ นำ จวย มัห ระ มัห อุ เลาะ อุ ซุก ดาย เปาโล อน กำลัง ใจ ตัก ทิโมที 3-5 ทิโมที เฮย เอิญ คอบคุน เอาซาง เลือง มัห ซีเละ ดาย เอิญ คอบคุน เอาซาง ตี เอิญ ฮับไจ นัน มอก เอาจ็อง เมจ็อง แอ ตัก อิง ฮับไจ นำ นัน เอิญ ก็ ฮับไจ นำ เลาะ เอิญ ไอ มี กึด เค็ย นัง ออ ลุห เคิบ นำ เตาะ เอิญ ครอ วอน เอาซาง เพือ มัห ตึง งิ ตึง แจ็ล เอิญ ครอ วอน เพือ มัห ตลอด เอิญ แร็ง งอม อัง มัห ซีรอก เม็จ มัด มัห ซีเละ กำนา ญาม เอิญ พระ มัห นัน มัห ก็ เญ็ม เซียใจ ซีเละ นอ เอิญ ก็ ควะ จำ เลือง นัน อุ กัน แอ กุญ เม็จ มัด นอย อุ เลิม เคิบ นอย วัล เอิญ ก็ เลาะใจ ซีเละ ดาย มัห เจือ เอาซาง เลาะ ซีเละ ดาย เลือง เน เอิญ ก็ เม็จ เลาะ นอ มัห แก็นใจ เจือ เยซู มอก เมจ็อง คอง มัห ตัก โลอิด เคิบ เม คอง มัห ตัก ยูนิด นัน เอิญ คอบคุน เอาซาง เลือง มัห ซีเละ ดาย 6 เจ็นนัน เอิญ ก็ ครอ ระ มัห ฮับไจ เอาซาง ติกๆ ดาย กำนา ญาม เอิญ พระ ที ซิห ตัก มัห นัน เอาซาง ก็ อน ความ ซามาด ตัก มัห ซีเละ นอ เจ็นนัน เอิญ ก็ ลบ ไล มัห วัล ระ มัห ลบ แอง เลาะ มอก มัห เกย แอง กำนา นัน ครอ อำ นาย แอ็ม ใจ เตาะ 7 เพาะวา เอาซาง อน ซีมาล ออ ตัก แอ แลว นำ ไอ มี อน ตัก แอ เพือ ระ แอ กราญ ระ แอ นเจิก เตาะ แต นำ อน ตัก แอ เพือ ระ แอ มี แร็ง ดก ระ แอ รัก อัห ระ แอ ควบคุม นัง ออ เลาะ 8 เจ็นนัน ก็ อำ กราญ ไล เลือง เยซู ตัก เป็น งกีจ็อง คอง แอ นัน เตาะ อำ กราญ เป็น เปือน เอิญ ตี เติล ตัก ลุก เน เตาะ ตี เอิญ เติล ลุก เน ก็ ญอน เอิญ ฮับไจ เยซู คริด ฮัก ครอ อำ กราญ ซีวะ เตาะ แต ครอ ระ มัห อด ตุก อด ญาก เลิม เคิบ เอิญ เน เพือ ไล คาว เลาะ คาว แลม อน ตัก อัห ซัง เลาะ ครอ ระ มัห เปิง แร็ง เอาซาง นัน ฮัก 9 เอาซาง เน นำ เลือก เอิด แอ ระ แอ เป็น ครำ เลาะ ครำ ซือ คอง ออ ฮัก นำ เลือก เอิด แอ ไอ แมน ญอน แอ แอง เลาะ ซีวะ ซิห นำ เตาะ แต ตี นำ เลือก เอิด แอ ก็ ญอน นำ ใจ ดัว แอง เลาะ ซิห แอ ฮัก ตี เอาซาง เลือก เอิด แอ ก็ เพาะวา นำ ซีรอก ระ เยซู จวย แอ แอง เลาะ ซิห แอ ฮัก นำ ตัดซิน เลือก เอิด แอ วาล ไอ ตัน นำ แอง โลก แพนซิก เน แลว 10 นำ กึด แอง เลาะ ซิห แอ เจ็น ตัก อิง ตัก นา แลว นอ แต มานะ เน เอาซาง ระ แอ เม็จ ซัด แลว เค็ย เยซู คริด กิว โตะ จวย แอ แลว ซีเละ เยซู เน นำ ก็ จวย ระ แอ ปน แอ็ม เจ็น ลุห ซีเละ แอ เม็จ คาว เลาะ คาว แลม เน แอ ก็ กุญ รีด อุ จำ นเดย จำ กวา นำ ก็ ซะนะ อัง เปิล แลว ไอ มี ซีวะ มี อำนาด แอง ระ แอ เปิล วัล เตาะ 11 ทาเน ตี เอาซาง ตัง เอิญ เป็น ตัวแทน เยซู นัน ก็ เพือ ระ เอิญ ไล คาว เลาะ คาว แลม อน ตัก อัห 12 เอาซาง ระ เอิญ ไล คาว เลาะ คาว แลม เน แลว เอิญ ก็ ลด ญอม อด ตุก อด ญาก เพือ ไล อัห ติก เอิญ ต็อง อด โซะ ดก ซีเละ แต เอิญ ไอ มี กราญ เตาะ เอิญ ควะ แก็นใจ เค็ย เอาซาง ซือซัด อุ ตลอด เพาะวา เอิญ เม็จจึด เคิบ เอาซาง เลาะ เอิญ แก็นใจ เจือ เค็ย จู มบลึ ตี เอิญ ฟาก ระ อน ตัก เอาซาง นัน นำ ก็ รักซา ระ ปอดไพ จำปอ เล็ห งิ ตี นำ ตัดซิน นัน 13 ทาเน จู มบลึ ตี เอิญ ไล อน ตัก มัห แลว นัน ก็ เป็น ตัวยาง เลาะ อน ตัก มัห เจ็นนัน ก็ ครอ ระ มัห แก็นใจ เจือ แญง เลาะ แญง ซือ นัน ฮัก ดาย ครอ ระ มัห แอง มอก แญง ตี เอิญ ไล มัห แลว นัน อำ จบ พระ ดาย มัห ต็อง แก็นใจ เจือ เยซู ต็อง รัก อัห มอก เยซู รัก แอ นัน 14 เอาซาง มอบ เลือง นังเลาะ นัน อน ตัก มัห แลว นอ แอ มี ซีมาล เอาซาง อุ ใน นัง แอ แลว เจ็นนัน ก็ ครอ ระ มัห เปิง แร็ง ซีมาล เอาซาง นัน ติกๆ ครอ ระ มัห รักซา แญง นังเลาะ นัน ระ อน เลาะๆ อำ ระ คาว เลาะ นัน เปียน เป็น แญง ตี ไอ มี แคระ วัล 15 ทาเน มัห ก็ เม็จ แลว นอ ครำ เอเซีย จู ล็อง ตี จวย เอิญ เน อัห ก็ พระ แอ็ม เอิญ มด แลว ตึง ฟีเจลัด ตึง เฮอโมเกเนด อัห บัก และ พระ แอ็ม เอิญ มด แลว 16 แต ควะ โอเนซีโฟรัด นัน นำ ไอ มี พระ เอิญ เตาะ นำ เลาะ ซีเละ นำ มัน โตะ แอว และ เอิญ นำ ระ เอิญ มี กำลัง ใจ ซีเละ เอิญ เติล ลุก นำ ก็ ไอ มี กราญ โตะ แอว และ เอิญ เตาะ ครอ ระ เอาซาง ใจ ดัว ซิห นำ แอง เลาะๆ ซิห นำ มด ตึง ครอบครัว คอง นำ ดาย 17 นำ ไอ มี กราญ แอว และ เอิญ เตาะ ญาม นำ โตะ ตัก เมือง โรม เน นำ ไอ มี เม็จจึด เอิญ อุ ตัก นเดย นำ ก็ กวา โละ และ เอิญ จำปอ เม็จ 18 ทาเน มัห ก็ เม็จ แลว นอ กำนา อิง ญาม เอิญ อุ ตัก เอเฟซัด นำ ก็ จวย เอิญ ดก ซีเละ บัดนะ ญาม เยซู ลบ วัล โตะ นัน ก็ ครอ ระ งกีจ็อง ตึ อัง นำ แอง เลาะ ซิห นำ ติกๆ ดาย |
Global Partners
Global Partners