ZEPHANIAH 3 - SHEEYU BAIBEL (BSI)

Jerusalem Maivei Mah

¹ Daizhozhou vealaisa! Kaotayu, souzhaiwuyu, alia lah maiye souveayu nuhdu napai!

² Honapai nou mai pai aliro keipei bae, mai nou kharochi peiyu-a pobae. Honapai nou Mapao ye louche moe, alia puhvei Ramai hi-a ngheikou bae.

³ Sühi peikho maitao nou kipeikhaodu büa ra-a laire; sühi chiku-apei maitao hai dutounüyu nou lakhao büa dosho donou halia shokhaito moe.

⁴ Sühi rachi paolayu maitao hai louchelou shire alia dahrührüa baire; napao maitao nou sheeyu buh nasü souzhai peiwure, alia Ramai vei kharochi khesü lahvei kaovei loure donou souda-a bubaire.

⁵ Ana Mapao louzü chukoute nuhdu sühi bue, Puhwo checheyu likhei sou-a baie, kaomoyu halia soumoe. Teithe payu chü Puhwo louzü souzü vah nasü souwe; ana chechemoyu maitao nou hraoyu sümoe.

⁶ Mapao nou paoe, “Enou tyahrütao ye souhakhai tiwure; Puletao vei reihbu khesü soushiwure; Enou puletao ludu nasü soushiwure, südonou sühi mailia tamore. Puletao nuhdu khesü soupa laire, mai ali koute-a bumore, sühi mai hrümore.

⁷ Puletao nou veimosou-a Eye pishulai teanou cho-e, Enou kharochi peiyu züshulai teanou cho-e; alia Enou puletao hi doupeiyu taosü ngaikhai paimoe tea Enou cho-e. Ana Avei maitao nou vah ashisü soupu baire.”

⁸ Mapao nou paoe, “Enou kushulou-a neletaoye mahdure teithe nasü kholo. Tyahrü kheye pove jülou-a veteidei khesü save jülou-a, puletao pei hi Enou vamoyu Avei lekha-rarou nasü lakoure donou Ale lawure. Avei lekha-rarouyu mei nou deiphao teitei deihawulai.

⁹ “Süzhou teithe Enou mai khemai paisü sheeyu paila hi souda thouwulai, sükua puletao hrülaiye panou la ali soulai alia le ali sou-a Mapao zhih sü kulai alia Eye tholai.

¹⁰ Ethiopia rei polova nou rarouta-a buyu maitao nou Eye tho-a nou Ahi sheelayu khesü pove peilai.

¹¹ Süzhou teithe neletaoye hrao peipu laimoe, daiolouzü neletao nou Eye khaitya-a vah souyu, khaophu souyu khesü Enou neletao hinou popawulai, alia neletao nou sheeyu deichi hinou khaophu sou-a tapu laimoe.

¹² Enou neletao hrohi tainou souyu alia nataiyu maiye khai peilai. Puletao nou Mapao zhih hinou bailoure buh phou bailai.

¹³ Shokhai tiyu Israel maitao nou kaozü moyu vah soupu laimoe, alia dayu chipao paopu laimoe, moa puletao mü hisü dayu mali pfüpu laimoe. Süthaisü puletao nou touso-a ae dazüa buyuma, mai linou-a puletaoye ve daicho laimoe.”

Asayu Lou

¹⁴ Oh Zion hi buyu nahnaotu paire, He Israel maitao, shusou-a lou soukhaio! Oh Jerusalem hi buyu nah naotupai, Salo alia ne le teitei koa asalo!

¹⁵ Neletao hi Mapao nou vamoyu nasü polai peiwure, Puhnou neletao ngaoba maiye sü souha peiwure. Mapao, Israel mai Veo sü neletao hinou bue; neletao nou hashi nasü ngaopi pulai moe.

¹⁶ Süzhou teithe Jerusalem hi haibüa paolai, “Ngaopiso, Oh Zion, Ne bah sü panou chathai tawuso.

¹⁷ Mapao, neletao vei Ramai sü neletao hi bue, Reih Aveiwo nou neletaoye reih veilouyu peie, Puh-a neletaoye koa asa sholaire, Puhnou neletaoye leshiyu hinou sousheepu peilai; Puh-a neletao donou khonüki büa asasho-a lou soulai.

¹⁸ Neletaoye soushire nasü Enou neletao hinou popa laipeilai, sübüa panou neletaoye sü chaa nasü pfüpu laimoe.

¹⁹ Zhukhaio, süzhou teithe Enou neletaoye souveayu maitaoye sü souhpeilai, Phi chayu maiye sü Enou süzhou khaipeilai, alia vakou hupa khaitiyu maiye save jüpeilai, alia puletao hrao nasü khekai hi soudathou peilai, alia deiphao mai hrülai nou süyu mai soupeilai.

²⁰ Süzhou Enou neletaoye ki hi save peilai, Teile süki Enou neletaoye save jüpeilai; Enou deiphao mai hrülai nghoujü nou neletaoye zhih tayu peilai ae paosho peilai, alia neletaoye panou vasho-a hrüyu peida khailai.” Haisü Mapao nou paoe.