ZEPHANIAH 1 - SHEEYU BAIBEL (BSI)

¹ Judah hi veo Amon nahpoutu Josiah teile hinou Mapao vei chipao hai Hezekiah nahpoutu Amariah nahpoutu Gadaliah nahpoutu Kushi nahpoutu Zephaniah hi haibüa ve-e.

Mapao nou Judah Maiye Chikure Teithe

² Mapao nou paoe, “Deiphao hi buyu na veishi Enou souha khaiwulai.

³ Mai, hrikhaona, raohou alia kha hrülai-a souhawulai. Mai ashimaiye Enou soukhaowulai, deiphao hinou hrüa buyu mai hrülaiye sü souha khailai, tea nou Mapao nou paoe.

⁴ “Jerusalem ae Judah hi hrüa buyu mai hrülaiye sü Enou tudeelai. Buh sühi Baal rahye thoa buyu teitei Enou souha khaiwulai, alia mai aliro panou basharaye napao mainou kabüa tho-e tiyu pa sülai moe.

⁵ Kipei hinou taopa khouh teinghi, alia vuhtao ye thoyu mai hrülai Enou souha khailai. Eye tholai teanou paokhaitou-a Milkom zhih hinou chaachou souyu mai hrülaiye sü Enou souhalai.

⁶ Eye thoyu hinou dakhai tayu mai, Ahi vemoyu mai alia Eye phoumoyu mai hrülaiye sü souha khailai.”

⁷ Mapao Ramai nghoujü hi ngasoua bulouo, daisounou tiyuo, Puhnou chikure teile sü nghire. Mapao nou Puhvei maitaoye posheelare donou soudawure alia sheela peilaiyu shemai-a soudawure.

⁸ Mapao vei sheelayu teithe hisü peikhomai, veo nahmaitao alia shemai zhai sou-a laimai hrülaiye sü tudee souwulai.

⁹ Rah kukheye tho-a buyu mai hrülai, vaomai, maivei saotou mai alia maiye dathayu mai hrülai, süzhou teithe Enou souvealai.

¹⁰ Süzhou teithe, Mapao nou paoe, “Khah rokhubomü hinou neletao nou krayu pai choulai, nuhdu hinou buyu ki ahai chena hinou dopfüa krayu pai choulai alia deichi hinou shusou-a rayu pai choulai.

¹¹ Nuhdu khelo hinou hrüa buyu maitao, dopfüa kralo! Daiolouzü huha souyu mai hrülai hai thaita khaire, shahu süh doumai hrülai-a souha khaitoure.

¹² “Süzhou teithe Enou Jerusalem ye sü mei taopoa phoulai, alia lahye louche-a vasho-a buyu mai alia ‘Mapao hai haveih-a hashi-a soulai moe,’ teanou paoyu mai hrülaiye sü souvea peilai.

¹³ Puletao vei kini khesü shaoloulai, alia puletao ki sü hakhaowulai. Puletao nou ki soukhai tiyuma sühisü pa lou bulou laimoe; puletao nou darkha kipei soukhai tiyuma süsü panou toulou laimoe.”

¹⁴ Mapao vei dushoyu teithe nahai nghiteire, nghitei toure alia thasho-a laire. Süzhou teithe sü shisholai, daiolouzü süzhou teithe hai khouko pfüsho-a buyu mai koutea shusoua kralai.

¹⁵ Süzhou teithe hai rarouyu, veayu ae le ngaiyu teithe soulai, soushiyu ae souhayu teithe soulai, teimaiyu ae teibouyu, teihao chaoyu ae zhiteih tiyu teithe ali soulai.

¹⁶ Veihsho-a nou soukhai tiyu nuhdutao alia reih buhtao hisü reih souloure donou shabe nghou-a alia reihvo souyu teithe souwulai.

¹⁷ Mapao nou paoe, “Enou veayu sü mai khemai pei hi pove peilai, sübüa panou puletaoye nghichayu maili büa panou talai, daiolouzü puletao hai Ahi mah souwure. Puletao zhe sü pa dzü büa külai, alia puletao thaiphao sü choba büa panou tahlai.”

¹⁸ Mapao nou lekha payu teithe sü puletao vei sana raka nou puletaoye khailu peilou laimoe. Puh vei rarou-lekha mei sünou deiphao teitei dei hawulai, deiphao hi hrüa buyu mai hrülaiye sü thasho-a nou puh nou souha khailai.