ZEKHARIAH 9 - SHEEYU BAIBEL (BSI)

Israel Maiye Ngaobayu Maitao hi Chikure

¹ Mapao vei chipao sü haitaoe: Mapao nou Hadrak teidei ae Damaskas nuhdu pei hi tukhare chi sü peiwure. Israel tyahrü hrülai themoa Aram nuhdutao-a Mapao veie.

² Hadrak deiraih soua buyu Hamath hai-a puh veie, sübüa Tair ae Sidon nuhdutao süpeinou puletao vei dokai teitei hai-a puh veie.

³ Tair nuhdu nahai lah puhye donou romü-kaoro veishoa khohao khailoure, shahu sünou naihü büa pojü khailoure alia sana hai ludu hi konai buyu büa buloure.

⁴ Ana chuo Mapao nou puletao vei nangi buyu veishi hai poloulai, alia puletao vei kini khesü zai hi laithouwulai, alia nuhdu khesü mei deiwulai.

⁵ Haitao hai Ashkelon nuhdu nanou ngaoloua ngaopi sholai. Gaza nuhdu na-a haihai ngaoloua veasho-a bulai. Sübüa Ekron maitao-a puletao vei areih sü hatalai. Gaza hi vemai hatalai, alia Ashkelon hisü mai hrümoa bailai.

⁶ Ashdoh nuh hisü mai tyatyali vei hrülai, alia Philistia mainou khaophu souyu nasü Enou souhawulai.

⁷ Puletao hai souzhe toupulai moe, alia tounouyu touso khesü toupu laimoe. Shokhaitou-a buyu maitao hrülai hai avei mai soutalai. Puletao hai Judah hi khü ali büa bailai, alia Ekron mai hai Jebus mainou avei mai soutayu büa puletao-a soutalai.

⁸ Süthaisü Enou avei teidei kholoua ngaoba maiye panou takou takhe laimoe. Maiye souveayu mai panou puletaoye souveapu laimoe, daiolouzü chuo lah anghithou vujünou amaitao nou veayu nasü Enou ngaore.

Thaikhai hi Veo

⁹ Zion hi hrüa buyu maitao, sasho loukhaio! Shusoua asalo! Jerusalem hi hrüyu maitao! Zhukhaio, neletao vei veo sü laire; veilouyu puhsü tavere, Puhwo natai-a rheisüh ali pfüa laibaie, alia rheisüh sünahai tyoutu baie.

¹⁰ Mapao nou paoe, “Ephraim hi reih souyu rheiluki nasü Enou polaiwulai, alia Jerusalem hi rheitao sü polaiwulai; reih poa souyu voulou khesü soushilai. Neletao vei veo nou tyahrütao hisü kaonayu pove peilai; puhvei vedei hai zai li hinou zai lihi koutelai, Euphratis rei hinou poa teidei akhai hi koutelai.”

Ramai vei Maitaoye Podakhai Loure

¹¹ Mapao nou paoe, “Neletao hai Eye koa zhe nou poa Vo soukhai touyu thaifüa, Enou neletaoye sü panou lahdo souloulai, dzü hayu raobvü hinou popa peiwulai.

¹² Dakhai velo, chuo areih buyu hukha maitao, neletao vei baibu aveih hisü veloulo; zhou teithe Enou neletao vei veayu paoh nasü khapeilai, süolouzü neletao nou veayu na jünou deida sü Enou neletaoye shiha peilai.

¹³ Enou Judah maiye sü voulou büa paipa loulai, ae Israel maiye sü loushu büa souloulai. Alia Zion maitaoye sü khoche poyu büa poloua Grees maiye sü reih soulai.”

¹⁴ Mapao nou puhvei maitao hisü veloulai, alia puhvei loushu nasü teireiyu büa kalai. Ramai Mapao nou besü houpoa khelo nou teikhai-teirü ye koa savelai.

¹⁵ Khoukhoulai Mapao nou puhvei maitao ye sü vupa peilai, alia puletao nou ngaoba mai jünou veiloulai. Puletao nou reih buh hisü zhaoh soziyu mai büa shusou ralai, alia ngaoba mai vei zhe sü puletao nou soukou loulai, süsü rathoki hi posheelayu phaki pai hinou lakouyu büa zhe sü külai.

¹⁶ Süzhou teithe veyu phaki, Mapao nou puhvei maitao ye sü zhaokhowo nou kaozhou shihi loure zhaotu ye vupa peiyu büa vupa peilai. Puletao hai puletao vei teidei hinou vepeirü hi mutei chuh nanou vayu büa valai.

¹⁷ Süzhou teidei sünasü daizhou koute veilaisa! Sühi buyu nahle maitao nou sühinou payu touso touloua khouko ngaopu loulai.