ZEKHARIAH 6 - SHEEYU BAIBEL (BSI)

Zho Ngaoyu Achana: Rheiluki Adai

¹ Enou zhupuyu phaki, rheiluki adai hai baosahu deichi ahai ko hinou tapa-a ngaoe.

² Rheiluki araina hai rhei hoyu tyanou pfüwe, rheiluki ahai navei rhei hai tei-e,

³ rheiluki asü navei rhei hai kaa-e, alia rheiluki adai nahai rhei maomüyu tyae.

⁴ Süthaisü Enou rakivamai nahi noue, “Apaopuwo, haitao hai daitouwe?”

⁵ Puhnou haibüa chila peie, “Haitao adai hai deiphao teitei hi Mapao vei nghoujü nou tapayu teikhai taoe.”

⁶ Rhei tei nanou pfüyu rheiluki nahai teidei reilova tawe, rhei kaayu nanou pfüyu nahai teinghi loulova teideitao hi tawe, alia rhei maomüyu nanou pfüyu rheiluki nahai khelova buyu teidei hi tawe.

⁷ Maomüyu rhei nanou tapa peiyu phaki, puletao hai deiphao sühao zhutare donou kholouho soua bure. Rakivamai nanou paoe, “Tawo, taho deiphao sü zhutawo.”

⁸ Süthai rakivamai nanou ahi shusoua paoe, “Tyadei reilova khetayu rheitao nou Mapao vei rarou-lekha nasü soukaona peiwure.”

Joshua ye Vepeirü Rüpeio tea Kharochi Peiyu

⁹ Mapao vei chipao hai ahi haibüa ve-e:

¹⁰ “Vakou nüpota-a Babilon hinou dakhai velouyu Heldai, Tobijah, alia Jedaiah nou sapeina peiyu sanatao sü poloua süzhou nou Zephaniah nahpoutu Josiah ki hi ta-o.

¹¹ Shahu alia sana taosü poloua vepeirü soulo, alia sünasü poho Jehozadak nahpoutu Napao Peichana Joshua ye rüpeio.”

¹² Alia puh hisü haibüa paopeio, “Khoukobu Mapao nou paoe, ‘Baokao teanou kua buyu mai nasü veikhelai, alia puhnou Mapao vei Rathoki nasü soushupu loulai.

¹³ Puhnou Mapao vei Rathoki nasü soushulai, alia veo vei tsükhouyu sü puh hi bulai, ae puh nou vebuh hi buloua teidei hai kholai. Puh vebuh hisü napao mai ali koa bulai, alia puh haiko hisü kaonayu ae mailili ye tsükhoua hrülai.’

¹⁴ Vepeirü nasü Heldai, Tobijah, Jedaiah alia Zephaniah nahpoutu Josiah ye licholoure donou Rathoki hisü khailai.”

¹⁵ Doushoa buyu mainou velou Mapao vei Rathoki soushupuyu nasü soukha peilai, süthai Khoukhoulai Mapao nou Eye neletao hi seivewe touyu süloulai. Neletao nou soutao soua Mapao, neletao vei Ramai chi züa bulouzü haitao hai vepalai.