ZEKHARIAH 5 - SHEEYU BAIBEL (BSI)

Zho Ngaoyu Arouna: Zhaotayu Larü

¹ Enou dakhai zhupuyu phaki, larübvü ali hai tei hinou zhao-a laiyu ngaoe.

² Rakivamai nanou Ahi noue, “Ne dai ngaoe?” Enou chila peie, “Larübvü ali zhao-a laiyu zhi ngaoe; sünavei sashoyu hai mitar aküe alia mitar adai-a da hai jha due.”

³ Süthai puhnou ahi paoe, “Haihai deiphao teitei hi taho chaa peilaiyu nae; daiolouzü maivei avao mai hrülaiye sü larübvü dapolova hi rüthou khaitouyu thaifüa souhawulai, alia da shaki peiyu mai hrülaiye sü ali lova rükhai touyu thaifüa souha khaiwulai.

⁴ Khoukhoulai Mapao nou paoe, ‘Enou chaa haina hai seitare, südonou haina sü avao mai kihi loulai, alia A zhih hinou da-a nou shaki soukhai touyu mai hrülai ki hisü ve loulai; alia puletao ki hisü ve buloua nou buyu na veishi souhakhai touwulai.’ ”

Zho ngaoyu Anaina: Naotumai ali Sülai hi Bua Ngaoyu

⁵ Süthaisü Eye cha-a buyu rakivamai nanou ahi takou loua paoe, “Hotao hinou tapayu nasü dai-e touyu zhukhaio.”

⁶ “Hona hai daige?” teanou Enou noue. Puhnou ahi paoe, “Hona hai sülai-e, süsü deiphao mai hrülai vei mahtaoe.”

⁷ Süthai müho hapayu phaki, sülai na hisü naotumai ali bua zhingaoe.

⁸ Rakivamai nanou paoe, “Haihai ashi nasüe.” Sübüa paoa puhnou honapaiye sü sülai hi khaothou khaiwure, alia müho nasü bewure.

⁹ Süthaisü Enou zhuyu phaki, naotumai ahai sü ahilo zhaokoua zhingaoe. Hona hai vei shouh hai veishoyu raohao shouh büe, alia hona hainou sülai nasü poa zhaotare.

¹⁰ Süthaisü Eye cha-a buyu rakivamai nahi Enou paoe, “Hona hainou sülai nasü kalova pove tare?”

¹¹ Puhnou ahi paoe, “Babilon hi potare. Buh sühinou puletao nou honapai ye donou rathoki ali soue. Sünasü souche loure toulouzü, puletao nou sülai nasü sühi khailoua tholai.”