ZEKHARIAH 2 - SHEEYU BAIBEL (BSI)

Zho Ngaoyu Asüna: Douyu Rai

¹ Enou zhushuyu phaki, mai ali hai puh bah hinou douyu rai ali poa ngaoe.

² “Ne daiki velai?” tea Enou noue. Puhnou ahi chila peie, “Jerusalem vei duyu ae shoyu hai kazhou busa touyu dou zhulai.”

³ Süthaisü Eye cha-a buyu rakivamai nanou pahilo takouyu Enou ngaoe, alia rakivamai kukhe ali hai puhye daore donou takou loua,

⁴ alia puh hisü haibüa paoe, “Tukou douyu rai poa buyu nahlepuna hisü haibüa paopeio: Jerusalem hai kivo khopu moa nou hrüa bailai, daiolouzü haihi mai alao sou hrüvelai ae kikhaorü hai-a poushoa hrüpalai.

⁵ Süpehao teitei hisü Enou mei kivo soupeilai, tea Mapao nou paoe, alia Enou sühisü aduso nasoua hrülai.”

Vakou Nüpota-a Buyu Maitaoye Ki hi Dakhai Velo teanou Kuyu

⁶ Mapao nou puh maitao hisü paoe, “Tave lourao, tave lourao, Babilon hinou tupa lourao; daiolouzü Enou neletaoye sü deiphao kainghou adai hisü hupo rarou laipeiwure.

⁷ Babilon nah naotumai ye koa hrüa buyu maitao, Zion hi tuve lourao.

⁸ Khoukhoulai Mapao nou neletaoye souveayu tyahrütao ye donou haibüa paoe: Mai tara linoua neletaoye souveayu hai Eye souveayu büa baie.

⁹ Südonou chuo, Enou puletaoye sü dutalai, alia puletao hai lah puletao vei kilai mai khenou hrü talai.” Süthai neletao nou Eye Khoukhoulai Mapao nou seive-e touyu hai süloulai.

¹⁰ Mapao nou paoe, “Asayu lou sü soukhaio, Oh Jerusalem hi maitaore! E-a neletaoye koa hrüre donou laire.”

¹¹ Süzhou teithe tyahrü taolinou Mapao hisü velai alia puhvei mai soutalai, alia puh hai-a neletao hrohinou bulai. Süthaisü Khoukhoulai Mapao nou Eye neletao hi seivewe touyu hai neletao nou süloulai.

¹² Mapao nou Judah hai puhvei sheeyu teidei ali soua popu loulai alia Jerusalem hai puhnou leshi kayu nuhdu ali soua dopu loulai.

¹³ Mai hrülai nou Mapao nghoujü hi nasha-a bulo; daiolouzü puhvei sheeyu buh hinou puh hai tashure.