ZEKHARIAH 13 - SHEEYU BAIBEL (BSI)

¹ “Sübüyu teithe veyu phaki, David kihikhamai alia Jerusalem hinou hrüa buyu maitao vei mah ae sheemoyutao khüsheere donou dzühou ali soupeilai.

² Süzhou teithe Enou teidei sühi bashara zhih nasü souhawulai, sübüa mai ali koute-a panou puh zhih sü lichopu laimoe. Enou teidei sühisü rachi paolayu mai alia sheemoyu rako khesü polaiwulai.

³ Süthaisü mai tarali noua rachi paolare donou palouzü, puhye nyapeiyu pfüpuo nou puh hi haibüa paolai, ‘Neye panou hrilai moe, daiolouzü ne Mapao zhih nou poa dayu chi paoyu donou, alia puhye napeiyu pfüpuo nou puhye sü rachipaolayu donou southa bailai.

⁴ Süzhou teithe rachi paolayu maitao nou puletao vei zhohabo ngaoyu nasü po hao-a bailai, puletao vei soumai sabanü nasü puletao nou banoupu laimoe.’

⁵ Alia puletao nou haibüa paolai, ‘Ewo rachi paolayu mai moe, E tai bukinou tata-a payu mai baie.’

⁶ Alia mai tarali nou puletao hi ‘Ne phaohi daisounou zhimü pfüwe?’ teanou noulouzü, puletao nou ‘A samai kihi nou zhiloua baie’ tea chila peia bailai.”

Ramai vei Zhaokhoyu Maitaoye Southawo tea Kharochi Peiyu

⁷ Khoukhoulai Mapao nou paoe, “Oh khoche, tashulo; Eye donou vah souyu zhaokho maitao ye sü daothawo. Zhaokhoyu maitao ye southawua panou zhaotu khesü porarou talai. Enou amaitao ye sü dulai.

⁸ Teidei haihi hrüa buyu mai zha asü hinou zha ahai hai Enou souhawulai, panou zha alikhei hrüa bailai.

⁹ Hria buyu mai zha ali ye sü Enou mei hi thou shahu deisheeyu büa deisheelai. Alia sana zhuyu büa zhulai. Süthaisü puletao nou A zhih kua veachi paolai, alia puletao veachi sü Enou kei peilai. Enou paolai, ‘Puletao hai avei mai-e’ tea nou; alia puletao nou ‘Mapao hai Etao vei Ramai-e’ tea paolai.”