ZEKHARIAH 1 - SHEEYU BAIBEL (BSI)

Mapao nou Puhvei Maitaoye Dakhai Velo tea Kuyu

¹ Darius veo nou vekou louyu po ahai vei khouh acha nahi Mapao vei chipao hai Iddo tyao, Berekhiah nahpoutu rachipaolawo Zekhariah hi haibüa ve-e:

² “Mapao vei rarou-lekha nahai neletao puopao hi alao sou bue.”

³ Südonou puletao hi haibüa paopeio: “Ahi dakhai velo, sütoulouzü E-a puletao hi dakhai vepeilai,” tea Khoukhoulai Mapao nou paoe.

⁴ “Neletaowo neletao puopao maiye raiso. Puletao hi rachi paola peiyu mainou haibüa paopeie: Hrü ashi ae mah hinou hrüpu khaiso. Ana puletao hai süsü choubare, tea Mapao nou paoe.

⁵ Neletao puopao maitao kalo vetare? Alia rachi paolayu maitao-a teisa nou hriwu?

⁶ Enou avei kilai rachi paolayu maitao hinou kharochi ae tukhayu zhaitao sü seive paopeie, ana puletao nou sütao hai ngaophou peimore. Südonou puletao nou ngaozü na thaifüa veayu ngaoe. Süthaisü puletao nou le daloua puletao veayu hai, Khoukhoulai Mapao Enou souvea baie alia sübüa veayu hai vea züa baie touyu lah puletao nou süloue.”

Rachi Paolawo nou Rheitaoye Zho hinou Ngaoyu

⁷ Darius veo nou vekou louyu po ahaikou, khouh kiali vei teithe kaidai (Shebat teanou kuyu khouh) zhou Mapao vei chipao hai Iddo tyao, Berekhiah nahpoutu rachi paolawo Zekhariah hi haibüa pove ngaoe.

⁸ Mai ali hai rhei horayu ali pfülai-a ngaoe. Puhsü deikho hi süübetao hrohinou la-a bue, alia puh thailo hisü rhei hoyu, rapüpüyu, alia kaayu tya bue.

⁹ Enou puh hisü noue: “Apaopuwo, haitao hai daitiwe?” Puhnou haibüa chila peie, “Haitao hai daie touyu Enou ne hi ngaolai.”

¹⁰ Süthaisü dei nayu süübetao hrohinou la-a buyu nanou chila peie: “Mai haitao hai Mapao nou deiphao sühao zhuta-o teanou seita khaitouyu maitaoe.”

¹¹ Süthai puletao nou Mapao vei rakivamai süübe madai hrohinou la-a buyu nahisü haibüa paoe: “Etao nou deiphao teitei hai sühaove zhutae, alia zhukhaio, deiphao teitei hai nasei teanou bubaie.”

¹² Süthaisü Mapao vei rakivamai nanou paoe, “Oh Khoukhoulai Mapao, nenou Jerusalem alia Judah nuhdutao hi rarou-lekhayu hai chuo po rainai pare. Nevei zhuveayu halia ngaomoa puletao hai teile kasho bulai hige?”

¹³ Mapao nou rakivamai nahisü zhuveayu ae pai-la aveih nou chila peie.

¹⁴ Süthai Khoukhoulai Mapao nou paoyu chipao taosü rakivamai nanou ahi haibüa paopeio tea paoe. “Jerusalem alia Zion nuhdu nahai Enou alaosou leshia bue.

¹⁵ Alia vaphi-a nou ngasou buyu maihrütao hisü E alaosou rarouwe. Daiolouzü Enou rarouyu nahai khaitalai touyuma, puletaoye ngaoloua ararou nasü papua baiwe.

¹⁶ Südonou Mapao nou haibüa paoe, E Jerusalem ye zhuveayu vanou dakhai vepure, avei Rathoki nasü sühinou soushupu loulai, alia Jerusalem kivo nahai-a soutare donou douyu rai poa doutalai.”

¹⁷ Khoukhoulai Mapao nou paoe, “Haihai paopu peilaio, Avei nuhdutao sü panou vapapu khailai, alia Zion ye sü souvapu peilai ae Jerusalem ye sü puhvei soure donou dopu loulai.”

Zho Ngaoyu Ahaina: Soukaitao

¹⁸ Süthaisü Enou zhupayu phaki, soukai adai zhingaoe.

¹⁹ Eye cha-a buyu rakivamai nahi haitao hai daivanoue tea Enou noue. Puhnou haibüa ahi chila peie, “Soukai haitao nou Judah, Israel, alia Jerusalem ye sü hupho rarou laiwure.”

²⁰ Süthaisü Mapao nou Eye hubao poa hukuyu mai adai ye ngaoe.

²¹ Enou noue, “Puletao hai dai vah soure donou vewe?” Puhnou haibüa ahi chila peie, “Mai ali-a panou pei pfüla louhoa Judah ye hupho rarou laiyu soukai taosü haitaoe; ana mai haitao hai Judah hi kai pfüla payu tyahrütao ae puhmaitao ye hupho rarou laiyu maitaoye soupire donou alia souhare donou hukuyu mai haitao hai vewe.”