TSÜCHITAO 9 - SHEEYU BAIBEL (BSI)

Tsüveiyu alia Voyu

¹ Tsüveio nou deka anai shulaloua puhvei ki sü souloure.

² Honapai nou puhvei kikhaorü sü datha loure, puhvei zhaoh sü cholure, ae puhnou touso-a soudawure.

³ Puhnou nuhdu hinou kukayu buhtao hinou hrüyu maitaoye kutare donou puhvei kilai maitaoye seitawure:

⁴ “Maitara lia chaomeh soua buyu maitao, tavelo!” Tsühayu maitao hisü honapai nou haibüa paoe,

⁵ “Tave avei raokhao touwuo alia Enou chokhai touyu azhaoh sü sowuo.

⁶ Memeh soua buyu maime sü thaokhaio, sükia ho hrülo. Tsünghi ngaoyu ludu hi talo.”

⁷ Maiye lyasüyu mailiye souzüyu maisü lah hraongu ngao-a bailai. Mai ashimai liye tudeeyu maisü lahye zhiloua bailai.

⁸ Maiye lyasüyu mailiye tudee peiso, molouzü puhnou neye ngaora-a bailai. Ana nenou tsüveimai liye tudee peilouzü, puhnou neye tsükhou peilai.

⁹ Tsüvei mailiye paodou peio, sütoulouzü puhsü tsüvei pupalai. Checheyu mailiye doupeio, sütoulouzü puhsü süpu khekhai khekhailai.

¹⁰ Mapao ye piyu hainou tsüvei loure vei beih-e, alia Masheeo ye süyu hai tsünghei ngaolou nasüe.

¹¹ Daiolouzü avanou nevei teithe tao sü deida choputhou peilai, alia ne hrü hi po alao thoupu peilai.

¹² Nenou tsüvei louzü, ne lah neye donou tsüvei-a baie; nenou sünasü malai louzü, ne lah vea-a bailai.

¹³ Voyu naotumai lisü pai pouwe; puhsü tounü due alia hraolou sümoe.

¹⁴ Honapai nou puh kikhu bomü hinou bubaiwe, puhnou nuhdu vei buh kuyu kinou bua baiwe,

¹⁵ takou takheyu maiye kuwe, lahvei ludu hinou züsha tea ta-a buyu maiye sü kuwe,

¹⁶ “Chaomeh souyu maisü panou haihi talou khaio.” Voyu mai hisü honapai nou paoe,

¹⁷ “Vao louyu dzü hai ke veiwe, alia kheikhei soua vaotouyu raokhao sü touveie.”

¹⁸ Ana puhnou sühisü athai bue tiyu hai sümoe, alia honapai vei shemaitao hai rabedushao vei teikhai hi bue tiyu sümoe.